Fallegar minningagreinar.

Hér eru tvær fallegar minningargreinar sem birtust í Morgunblaðinu.  Þær eiga heima hér.  Mér var bent á þær í gær. 

 Júlíus Kristján Thomassen fæddist á Ísafirði 8. júlí 1969, hann lést á heimili sínu hinn 28. september síðastliðinn.

 

Móðir hans er Ásthildur Cesil Þórðardóttir, f. 11. sept. 1944. Foreldrar hennar eru Aðalheiður Bára Hjaltadóttir, f. 11. okt. 1924, d. 1. nóv. 2000, og Þórður Ingólfur Júlíusson, f. 4. ágúst 1918.

Faðir: Freddý Thomassen, Danmörku.

Fósturfaðir er Elías Skaftason, f. 18. júní 1944. Foreldrar hans eru Skafti Sigþórsson, f. 10. júlí 1911, d. 16. nóv. 1985, og Elín Elíasdóttir, f. 7. nóv. 1909, d. 14. jan. 1989.

Synir Júlíusar eru Þórður Alexander Úlfur Júlíusson, f. 8. mars 1997, móðir hans er Jóhanna Ruth Birgisdóttir.

Sigurjón Dagur Júlíusson, f. 16. júní 2005, móðir hans er Sigríður Inga Sigurjónsdóttir.

Systkini Júlíusar eru: Ingi Þór Stefánsson, f. 26. júní 1967. Unnusta hans er Matthildur Valdimarsdóttir. Börn þeirra eru Evíta Cesil og Símon Dagur. Önnur börn Matthildar eru Sóley Ebba, Kristján Logi og Aron Máni.

Bára Aðalheiður Elíasdóttir, f. 6. sept. 1971. Unnusti hennar er Bjarki Steinn Jónsson. Börn þeirra eru Hanna Sól og Ásthildur Cesil.

Skafti Elíasson, f. 3. júní 1974. Eiginkona hans er Tinna Óðinsdóttir. Börn þeirra eru Óðinn Freyr og Sólveig Hulda. Önnur börn Skafta eru Júlíana Lind og Daníel Örn.

Arinbjörn Elvar Elíasson, f. 18. apríl 1968. Eiginkona hans er Marijana Cumba Barn þeirra er Arnar Milos.

 Júlíus ólst upp á Ísafirði og bjó þar mestan hluta ævinnar. Hann vann ýmis störf um ævina svo sem við sjómennsku, fiskverkun og garðyrkju. Listin átti samt hug hans allan og var hann hagur á hin ýmsu náttúruefni, svo sem leður, tré og stein. Hann fékk ekki einungis útrás fyrir listhneigð sína í náttúrulistaverkum, heldur málaði hann einnig og teiknaði. Júlíus var mikill vinur vina sinna og í hjarta sínu góður drengur.

Útför hans fer fram frá Ísafjarðarkirkju laugardaginn 10. október kl. 14.

 Minningargrein Sigríðar barnsmóður hans og vinkonu.  

mbl.is/minningar

 

Vorið 2004 kynntist ég þér og fljótlega féll ég kylliflöt fyrir þér. Þú varst hraustur, frískur, fallegur og laus undan fíkninni. Það var yndislegt vor. Þú vannst hörðum höndum í garðvinnu og hellulögnum og einnig í sjálfum þér og þannig kynntumst við. Daginn sem ég missti bílprófið sagðist þú keyra mig hvert sem ég vildi komast. Góðsemin og hjálpsemin var aldrei langt undan. Þú hafðir ríka réttlætiskennd og sást alltaf það góða í öllu.

 

Þetta vor fórum við á hestbak í Engidalnum. Þú ljómaðir af hamingju. Þú fórst með okkur í Skálavík. Þú hlóðst bálköst og við grilluðum með Úlfi þínum og Ólöfu minni. Við fórum í nokkurra daga hestaferð og það var sólskin allt þetta sumar. Lágum í tjaldinu og horfðum á hval svamla í sjónum í Arnarfirðinum. Ég man að eitt kvöldið í hestaferðinni fórum við að veiða og þú sem varst svo fiskisækinn veiddir helling svo að við íhuguðum að opna fiskibolluverksmiðju.

 

Það var mikil hamingja þegar Sigurjón Dagur fæddist sumarið 2005. Það var stoltur faðir sem tók á móti honum. En óveðurský hrönnuðust upp það haust og leiðir okkar skildu. En þú komst alltaf reglulega að heimsækja okkur. Sonur okkar varð þeirra gæfu aðnjótandi að kynnast þínum besta manni. Tíminn sem hann fékk með þér var dýrmætur og þetta voru miklar gæðastundir. Veiðiferðirnar ykkar voru óteljandi og margar ferðir í pitsubúðina. Snemma í vor komst þú og keyptir með mér tré í garðinn sem þú gróðursettir fyrir okkur. Þú valdir trén af kostgæfni og alúð. Við áttum góðar stundir saman í sumar og lofuðum hvort öðru að vera alltaf vinir. Betri vin er ekki að finna. Tómleikinn innra með okkur er mikill og söknuðurinn sár.

 

Hvíl þú í friði, elsku Júlli okkar.

 

Undir hundruðum járnaðra hæla

 

dreymdi mig drauminn um þig,

 

sem gengur eitt haustkvöld

 

í hljóðum trega

 

dúnléttum sporum

 

hinn dimmleita stig,

 

dúnléttum sporum veg allra vega

 

og þú veist að ég elska þig.

 

(Steinn Steinarr.)

 

Sigríður Inga Sigurjónsdóttir.

 

Í dag kveðjum við Júlíus systurson okkar með hlýju og söknuði. Hann fæddist rúmu ári eftir að litli bróðir okkar með sama nafni lést, aðeins nokkurra mánaða gamall. Júlli ólst upp á Seljalandsveginum steinsnar frá Vinaminni, sem er æskuheimili okkar móðursystkina hans. Þar var hann löngum stundum og var augasteinn ömmu sinnar. Júlíus var fjörmikill strákur og snemma kom í ljós hversu mikill ljúflingur hann var. Lífshlaup hans var viðburðaríkt og margs er að minnast. Hann elskaði náttúruna, og æskuslóðir afa hans í Fljótavík á Hornströndum voru í sérstöku uppáhaldi hjá honum. Hann eignaðist tvo yndislega syni sem hann elskaði og átti með þeim góðar stundir úti í náttúrunni sem hann þekkti svo vel.

 

Það er með trega í hjarta sem við systur kveðjum þennan frænda okkar og biðjum góðan guð að geyma hann.

 Halldóra, Inga Bára og

Sigríður Þórðardætur.

Það var hamingja og sorg til skiptis í lífi sonar míns.  Það var hægt að sjá á mörgu.  Til dæmis þessum tveimur myndum sem eru tréristur. 

Þegar honum leið illa, voru myndirnar hans dökkar og dimmar.  Þegar hamingjan átti völd voru myndirnar bjartar og glaðlegar.  Allt endurspeglaðist þetta í list hans.  Síðustu listaverkin steinarnir hans voru allir glaðir og fallegir.  En ég segi aftur og enn.  Ég skil ekki í áhugaleysi yfirvalda yfir því hve neyðin er mikil meðal fíkla og aðstandenda þeirra.  Alltof margir þeirra falla fyrir eigin hendi, eða deyja ótímabærum dauða á besta aldri vegna annara afleiðinga neyslu.  Og hópurinn kring um þá er stór.  Samt fara þessir stjórnmálamenn í kirkju í byrjun hvers þings, til að sýna fram á kristilegt innræti sitt.  Sagði ekki Jesú eitthvað álíka og; það sem þér gjörið mínum minnsta bróður það gjörið þér mér.  Ég kalla þetta hræsni og ekkert annað.  Ég hef þurft að glíma við þennan djöful yfir 20 ár.  Og hann hefur stækkað og versnað allan tímann, en það er ekkert verið að reyna að hafa hemil á honum.  Einungis verið að pota eitthvað í tærnar á honum.  Hausinn virðist vera friðhelgur og má ekki hreyfa við.  Af hverju er það? 

Athugasemdir

[Birna Dis Vilbertsdóttir (IP-tala skráð) 17.10.2009 kl. 11:24]

[Ragnheiður , 17.10.2009 kl. 12:11]

Tréristurnar segja ofsalega mikið, Júlli hefur verið sannur listamaður

[Jónína Dúadóttir, 17.10.2009 kl. 12:14]

[Ásthildur Cesil Þórðardóttir, 17.10.2009 kl. 13:52]

Já hann var svo sannarlega listamaður.  Allt sem hann gerði kom einhvernveginn við fólk.  Og það var hægt að sjá margar myndir út úr einni.  Hann hló oft að því sjálfur. 

[Hulda Elma Guðmundsdóttir, 17.10.2009 kl. 13:59]

Takk fyrir að deila þessu með okkur. Þó orð segi lítið þá sendi ég innilegustu samúðarkveðjur.

[Ásdís Sigurðardóttir, 17.10.2009 kl. 14:00]

[Ásthildur Cesil Þórðardóttir, 17.10.2009 kl. 16:28]

Takk Hulda mín.

Knús Ásdís mín.

[Hrönn Sigurðardóttir, 17.10.2009 kl. 17:31]

Falleg bláa myndin

[Hanna Birna Jóhannsdóttir, 17.10.2009 kl. 17:47]

Þú færð allt það knús frá mér sem til erInnilega samúðarkveðju til ykkar allra.

[Jón Reynir Svavarsson (IP-tala skráð) 17.10.2009 kl. 18:02]

Þetta er átakanlegt og sorglegt,hvernig þetta fór alt úr  böndunum .Auðvitað eigum við alltaf góðar og slæmar stundir í lífinu ,það vitum vil öll .En lífið er ekki alltaf einfant ,þó það líti stundum þannig út ,ekki getur maður skilið alltaf  orsök á ótrúlegu lífi sumra og það mætti stundum halda helst að þarna gætu verið forlög að verki .En það er falleg skrifin sem hún barnsmóðir hans skrifar hér .Ég sendi  aðstandendum  mínar samúðarkveðjur .

[IGG , 17.10.2009 kl. 23:37]

Svo sannarlega fallegar minningargreinar um ljúflinginn þinn og áhrifamiklar myndirnar hans.

[Jóna Kolbrún Garðarsdóttir, 18.10.2009 kl. 01:00]

Fallegar minningargreinar, um fallegan mann. 

[Guðrún Emilía Guðnadóttir, 18.10.2009 kl. 10:22]

Elskuleg mín, engin efast um listfengi hans og góðsemi, minningarnar um það lifa
og fólk á bara að muna gleðina.

Kærleik til þín
Milla

[Ásthildur Cesil Þórðardóttir, 18.10.2009 kl. 10:22]

Takk.

[Hulda Haraldsdóttir, 19.10.2009 kl. 01:57]

[Adda Laufey , 19.10.2009 kl. 08:07]