Nýja Ísland á morgun.

Var að koma inn úr dyrunum og hef ekki haft tíma til að svara ykkur elskurnar, en ég vil endilega setja inn myndir af Austurvelli, ég er uppfull af orku og hreykni yfir íslenskum almenningi.

Það var ljóst þegar komið var niður í bæ, að þar var allt fullt af lífi, fólk að koma og allir mjög áhugasamir. 

Loksins er fólk að vakna og láta í sér heyra, stemningin var alveg frábær, og einhugur fólksins áberandi, ég var stolt af mínu fólki.

Það var augljóst að hér var fólkið í landinu samtaka án tillits til þjóðfélagsstétta aðstöðu eða hverju sem var, þetta var fólkið í landinu, fólkið mitt í sínum samtakamætti.

Ræðurnar voru magnaðar, sérlega var ég hrifin af Einari Kárasyni, og viðbrögðum fólksins við ræðu hans. 

Loksins loksins eru menn að vakna upp og láta til sín taka, ég hef beðið þessarar stundar lengi.

Það mátti vel lesa ákefð og stolt úr andlitum fólksins.

Og spjöldin sögðu sína sögu.

Við erum að upplifa nýja tíma, nýtt Ísland, nýjar væntingar, og nýja sýn á framtíðina.

Að standa saman og krefjast þess að spillingaröflin fari frá.  Leyfi íslensku vori að blómstra.  Víki svo nýjir tímar megi líta dagsins ljós, það er krafa fólksins, svo það er eins gott að núverandi yfirvöld hlusti og komi sér burt, því þau njóta einskis trausts, hvorki hér heima né erlendis, eru reyndar aðhlátursefni út i heiminum.

Loksins gerðist eitthvað sem skiptir máli.

Héðan af verður ekki aftur snúið.  Boltinn er byrjaður að rúlla.

Úr öskunni mun fuglinn Fönix rísa.  Nýtt Ísland með þúsund radda brag mun óma um heimsbyggðina.  Á morgun!!!

Athugasemdir

[Sigrún Jónsdóttir, 9.11.2008 kl. 00:37]

Velkomin heim.  Verst að missa af þér....ég var þarna og var stolt af minni þátttöku

[Helga skjol, 9.11.2008 kl. 08:57]

Hefði viljað vera þarna líka.

Knús á þig mín kæra

[Jenný Anna Baldursdóttir, 9.11.2008 kl. 10:02]

Takk fyrir þessar frábæru myndir.

[Stefán Helgi Kristinsson, 9.11.2008 kl. 11:24]

Fínar myndir Cesil. :)

[Ásthildur Cesil Þórðardóttir, 9.11.2008 kl. 11:45]

Ég hugsaði til þín Sigrún og Katrínar, Jennýjar og fleiri sem ég vissi að væru þarna, það var þvílík örtröð að ekki gat maður hitt nokkurn mann.  En gaman var þetta, og stolt er ég.

Knús á þig líka elsku Katla mín

Takk Jenný mín.

Takk Stefán minn, ég er ánægð með hrós frá þér minn kæri.