Vímuefna vandinn og DÖGUN.

14.4.2013 | 11:15

Hér eru á annan tug framboða sem kjósendum gefst kostur á að velja um þann 27. apríl n.k. Það er boðið upp á marg skynsamlegt og gott sem betur fer. Ég vil hvetja fólk til að kynna sér stefnumál nýju flokkana og láta ekki hræða sig með þessum 5% múr, því eins og einn ágætu maður sagði; Betra þykir mér... að kjósa með hjartanu og fá engann þingmann en að kjósa einhverskonar "skársta raunhæfa kost".

Það er samt eitt mál sem brennur mest á mér, en ég sé ekki að sé mikið í umræðunni hjá neinum flokki, nema okkar. Það er málaflokkurinn um okkar öðruvísi börn. Unga fólkið sem hefur leiðst út á ranga braut og á sér fáa málsvara.

Þetta er mér mikið hjartans mál, vegna þess að ástandið er þannig í dag að þetta blessaða fólk er í huldulandi, þau njóta oft ekki mannréttinda, og eru oftar en ekki meðhöndluð eins og óæðri verur. Við verðum að fara að viðurkenna að þau eru manneskjur með tilfinningar, væntingar og ósk um betra líf. Við verðum að fara að viðurkenna að þau eru veik en ekki glæpamenn.

Þess vegna er ég svo ánægð með Dögun og þeirra afstöðu til fíkla sem lýsir sér í stefnu flokksins:

Stefna Dögunar um breytta nálgun í vímuefnamálum. Sjá hér:

http://xdogun.is/stefnan/stefna-dogunar-um-breytta-nalgun-i-vimuefnamalum/

Ég er líka afskaplega ánægð með tvær ályktanir sem samþykktar voru á landsfundi Dögunar nú í vor en þær hljóða svo:

Á síðasta degi landsfundar, sunnudeginum 17. mars, voru eftirfarandi tvær ályktanir samþykktar . Flutningsmaður beggja var Ásthildur Cesil Þórðardóttir, meðflutningsmenn voru Hólmsteinn Brekkan og Hugrún Steinunn Guðmundsdóttir

Fyrri ályktunin varðar opnun lokaðra meðferðarstöðva og í henni segir:

„Dögun vill stefna að því að opna lokaðar meðferðarstofnanir fyrir langt leidda vímuefnaneytendur.

Verði hlutverk stofnananna af tvennum toga.

Annars vegar þar sem hægt er að vista langt leidd börn eða einstaklinga sem hafa verið sviptir sjálfræði og hins vegar að þeir sem misst hafa algjörlega tökin á lífi sínu og hafa leiðst út á braut glæpa, verði dæmdir í slíka meðferð. Einnig geti einstaklingar sem telja sig þurfa á langtíma meðferð að halda notið þessa úrræðis.

Að meðferðin taki í það minnsta eitt til tvö ár, og fylgi síðan eftirmeðferð til að hjálpa sjúklingum að komast aftur á rétt ról. Auk þessi verði húsnæðisúrræði í boði fyrir þá sem eiga ekki í nein hús að venda að meðferð lokinni.

Meðfram þessu þarf að stofna sérstakt embætti með sérstöku fagfólki, sem metur ástand viðkomandi sjúklings og skoðar hvort árangur náist með slíkri meðferð og tryggi eftirfylgni.“

Síðari ályktunin er svohljóðandi:

„Dögun mun vinna að því við fyrsta tækifæri að halda stóra alþjóðlega ráðstefnu um vímuefnamál.

Þar myndi verða skilgreindur árangur í meðferðarmálum vímuefnaneytenda, a.m.k. sl. þrjátíu ár, og einnig hugað að hvernig þessum málum er betur komið í framtíðinni.

Á þessa ráðstefnu yrðu boðaðir helstu sérfræðingar í vímuvarnarmálum erlendis frá, til dæmis frá löndum sem hafa farið nýjar leiðir í slíkum málum. Einnig yrði boðið vímuefnaneytendum, aðstandendum þeirra, fulltrúum félagsmála og heilbrigðisgeirans, dómurum, lögreglu og lögfræðingum, tryggingafélögum, almennings sem verður fyrir tjóni af völdum innbrota og líkamsmeiðinga og öllum þeim aðilum sem vímuefnaneysla kemur inn á borð til.

Tilgangur ráðstefnunnar yrði fyrst og fremst að leita nýrra leiða til að eiga við þann vanda sem sífellt virðist aukast á neyslu ungs fólks á Íslandi.“

Þessar tvær tillögur sem og stefna Dögunar í málefnum fíkla skiptir miklu máli fyrir flestar fjölskyldur í þessu landi. Það þarf virkilega að taka til höndum og fara að vinna skipulega að því að bjarga ungmennum okkar út klóm þeirra sem nú hagnast verulega á neyð þeirra.

Hvað ætli séu mörg brotin heimili af þessum sökum. Hve margir syrgjandi foreldrar vegna þess að hafa misst barnið sitt út í fíkn. Hve margir sem hafa misst barnið sitt út í dauðann þegar allar dyr virðast vera því lokaðar.

Við getum ekki lengur beint blinda auganu að þessari neyð. Hér er vettvangur til þess að leggja áherslu á þessi mál. Og ég mun svo sannarlega gæta þess að þessi mál gleymist ekki hjá Dögun. Við erum með innan okkar raða marga einstaklinga sem vinna með þessi mál, eins og til dæmis báðir meðflutningsmenn mínir Hólmsteinn Brekkann og Hugrún Steinunn, auk annara. Það voru líka margir á landsfundinum sem ræddu við mig um þessi mál, margir sem voru í þessum sporum í dag, eða höfðu upplifað þá erfiðleika sem sjúkdómurinn Fíkn skapar.

ÞESSI MÁL ÞURFA AÐ FARA AÐ HEYRAST Á ALÞINGI.

Flokkur: Bloggar | Facebook

Athugasemdir

Held að ykkur eigi eftir að ganga ótrúlega vel

Ásdís Sigurðardóttir, 14.4.2013 kl. 11:54

Takk Ásdís mín, það er gott að heyra svona.

Ásthildur Cesil Þórðardóttir, 14.4.2013 kl. 12:18

Held að fíkniefnasalar verði ánægðir með ykkur og pírata

Er fíkniefnaneytendum einhversstaðar hafnað vegna þess að þeir séu að nota ólögleg vímuefni . Það er eitthvað nýtt . Hinsvegar hefur öll meðferðarúrræði hvort heldur er fyrir áfengissjúklinga fíkniefnaneytendur ofitusjúklinga geðsjúka verið skorið niður í tíð þessarar norrænu velferðarstjórnar

sæmundur (IP-tala skráð) 14.4.2013 kl. 16:13

Nei Sæmundur nákvæmlega ekki. Með því að taka fíklana undan því að vera glæpamenn, þá losum við þá einmitt undan píningu salanna. Þessi spurning um hvort neytendum sé hafnað vegna þess að þeir nota ólögleg vínmuefni þá er það bara staðreynd að þeir eru hundeltir og fangelsaðir, missa stöðu sína innan samfélagsins furðu hratt. Það þýðir að foreldrar fíkla geta ekki leitað mikið að aðstoð fyrir afkvæmi sín, því um leið og þeir reyna að leita sér aðstoðar eru þeir um leið búnir að glæpavæða afkvæmin. Hvað meðferðarúrræði varðar, þá hefur ekkert meðferðarúrræði virkað fyrir langt leidda fíkla, þegar þeir hafa misst tökin á lífi sínu og allt sjálfræði, þá geta þeir einfaldlega ekki verið inn á lokuðum meðferðarstofnunum því viljinn er ekki lengur til staðar. Eina úrræðið sem gæti virkað í dag er Krýsuvík. Þess vegna er afskaplega nauðsynlegt að koma á fót lokaðri meðferðarstofnun sem þau geta ekki strokið úr, og fá þann tíma sem þau þurfa til að ná sér upp.

Fíklar er eini aðilin af þessum sem þú telur upp sem hefur ekki skilning, þeir eru glæpavæddir, meðan hinir hóparnir teljast vera sjúklingar. Bara þetta innlegg þitt sýnir vel þá fordóma sem þú hefur gagnvart þessu fólki, og það er bara sorglegt. Þess vegna gerist ekkert í þeirra málum, það hentar ekki þeim sem lifa á yfirborðinu að vilja hjálpa fíklum, né breyta hugsunargangi sínum í þeirra veru.

Ásthildur Cesil Þórðardóttir, 14.4.2013 kl. 18:17

Inn á opnum meðferðarstofnunum átti þetta að vera.

Ásthildur Cesil Þórðardóttir, 14.4.2013 kl. 18:18

Hvernig ætlar þú að taka á fíkniefnasölum ef löglegt er að neyta fíkniefna??????????????????? Verður þá fíkniefnasala lögleg?????????????

Hefur einhver fíkniefnaneytandi verið kærður til lögreglu ef hann hefur verið að fara í meðferð??????????????????

sæmundur (IP-tala skráð) 14.4.2013 kl. 22:43

Það verður áfram ólöglegt að selja fíkniefni, en hætt að eltast við fíkla með núll komma eitthvað gramm í vasanum. Já Sæmundur og meira að segja hafa menn verið teknir úr meðferð til að setja þá í fangelsi, meðal annars sonur minn sem var í eftirmeðferð á Staðarfelli og honum var gert að koma sér úr meðferðinni til að stinga honum inn. Ég margreyndi að fá yfirvöld til að leyfa honum að ljúka meðferðinni, en ó nei, því var ekki sinnt.

Fólkið sem ég þekki og er í þessu svartnætti er ekki til í uppheimum, þau hafa ekki mannréttindi, og foreldrar geta afskaplega lítið leitað að aðstoð.

Þessu þarf að linna og ekki seinna en strax.

Ásthildur Cesil Þórðardóttir, 14.4.2013 kl. 22:50

ágæta Ásthildur þetta er al rangt hjá þer það a ekki að setja fíkla i fangelsi þeir eru bara fórnarlömb skipuðlagra glæpa gengja það eru bankamenn sem a að setja i fangelsi. fíkniefna vandamalið er hægt að stoppa a einni nóttu bara með því að stoppa flutning a eiturlyfja peningum

Helgi Armannsson (IP-tala skráð) 14.4.2013 kl. 23:13

eg sa þetta ágæta viðtal her http://www.youtube.com/watch?v=C3lfI8eWIkc&feature=youtu.be

enn kver er stefnan i sambandi við ESB

Helgi Armannsson (IP-tala skráð) 14.4.2013 kl. 23:27

Helgi það er nákvæmlega það sem ég er að segja, fíklar eiga ekkert erindi í fangelsi, þeir eiga að fá að fara í lokaða meðferðarstofnun þar sem þeir fá langtímameðferð og aðstoð við að komast út í lífið aftur. Reyndar sammála þér með banksterana þeir eiga að sitja bak við lás og slá.

Takk fyrir að ryfja þennan þátt upp fyrir mér. Glæsilega fólkið mitt í Dögun.

Ásthildur Cesil Þórðardóttir, 15.4.2013 kl. 00:04

Ásthildur

Er lögreglan í sambandi við meðferðarstofnanir þannig að ef fíkniefnaneytendur leita þangað er haft samband við lögreglu.Ég þekki nokkra sem eru að fara í meðferð vegna fíkniefna og ég veit ekki til að þeir hafi þurft að gjalda fyrir það með fangelsisvist

En hinsvegar veit ég um að menn hafi verið teknir út í bæ með fíkniefni og þeir verið dæmdir og fengið afslátt af dómi vegna þess að þeir væru í meðferð og endurhæfingu

sæmundur (IP-tala skráð) 15.4.2013 kl. 09:21

Mig langar að segja eina sögu hér. Hún er svo sár að það er ennþá erfitt að ræða hana, en hún verður að koma fram.

Sonur minn hafði nýafplánað vist á Litla Hrauni hann sagði vinum sínum að hann ætlaði aldrei aftur í fangelsi, nú ætlaði hann að halda veginn þrönga og mjóa. Hann var búin að panta meðferð á Vogi og allt virtist svo bjart. Þeir voru að rúnta vinirnir á bíl sem drengurinn minn átti, unnusta eins þeirra var að aka, en þeir voru að fá sér bjór. Svo drepst á bílnum og kærastan kemur honum ekki í gang aftur, en hann var erfiður í starti. Sonur minn sest þá undir sæti til að gangsetja bílinn. Hann var á leiðinni út úr bílstjórasætinu þegar löggann kemur, (eins og þeir hafi verið að fylgjast með) Þeir skipa honum að koma út og blása. En sagði drengurinn ég var ekki að keyra, heldur bara að setja bílinn í gang, vinirnir staðfestu þetta, þá heyrist í talstöð, hver er þetta, Þetta er hann Júlli Tomm svaraði önnur löggann, já beint upp á stöð með hann, kom þá.

Þar sem hann var á skilorði þá var ljóst að þetta leiddi til þess að hann færi inn aftur. En eins og allir vita þarf að bíða eftir afplánun, og hann hafði lokið meðferðinni á Vogi og var komin í eftirmeðferð á Staðarfelli og allt gekk svo ljómandi vel. Þá kemur bréf upp á að hann eigi að koma inn.

Ég hef samband við fangelsismálastofnun og bið um að þeir sjái í gegnum fingur við drenginn minn, eða allavega fái að ljúka meðferðinni.

Við bíðum þá fyrir utan og tökum hann um leið og hann kemur út, var svarið.

Mamma, ég get ekki haldið áfram í meðferð undir þessari pressu sagði vesalings drengurinn minn.

Ég varð síðan að sækja hann á Staðarfell, ég ók honum beint niður í fangelsismálastofnun og inn til Erlends Baldurssonar og sagði með miklum þunga, því eg var svo reið; Ef þið setjið drenginn minn á Litla Hraun aftur þá geri ég allt vitlaust!

Sem betur fer fékk hann að fara í Kópavoginn.

En þetta er að mínu mati svo ógeðsleg að það er ekki hægt annað en að segja frá þessu. Þarna hafði lögreglan allt til að sýna kærleika og skilning, en ó nei, harkan ein skyldi það vera. Og þarna var kæft í upphafi góður ásetningur elsku drengsins míns. Og ég gat ekkert gert. Nema vekja athygli á þessu til að aðrir unglingar fái ef til vill meiri skilning, því ég vona svo sannarlega að þessir lögreglumenn og yfirmenn líti í spegilinn og kunni að skammast sín.

Ásthildur Cesil Þórðardóttir, 15.4.2013 kl. 09:54

Þú er harðjaxl Ásthildur! Það þarf að segja þessar sögur til að steingerfingar eins og þessi sæmundur átti sig á málinu.

Haraldur Rafn Ingvason, 15.4.2013 kl. 11:47

Takk Haraldur, ég get alveg sagt þér að það er þrælerfitt og sársaukafullt, en stundum þarf að gera meira en maður treystir sér til. Fólk verður að fara að átta sig á því að þessi hópur er algjörlega á skjön við mannlegt samfélag og fá ekki að komast þar inn, ekki bara vegna dílera, heldur líka vegna kerfisins og margra almennra borgara sem ekki skilja hvað er í gangi. Og svo er þetta stór hópur sem er verið að ræða um, og koma inn á flest heimili á landinu að einhverju leyti.

Ásthildur Cesil Þórðardóttir, 15.4.2013 kl. 12:04