Ég hef ákveðið að taka baráttuna með Dögun.

Ég verð að viðurkenna fyrir ykkur lesendur mínir að ég er í framboði fyrir Dögun.  Ég ætlaði mér reyndar ekki að standa í því, var bara alveg til í að ýta vagninum því málefnið er gott, og ég hef fengið að taka þátt í málefnavinnunni og leggja mitt af mörkum.  Þóttist enda vera orðin of gömul til að standa í þessu.  En svo er málið bara að það er svo asskoti erfitt að fá konur til að taka þátt í framboðum.  Þessar elskur, ekki skortið þær vitið né hæfileikana, en þær eru bara einhvernveginn ekki tilbúnar til að stíga fram af ýmsum ástæðum. 

Mér líkar afar vel við mannskapinn sem ég hef starfað með, það ríkir einurð og ákveðni í að gera allt það besta fyrir land og þjóð. Á landsfundi var þeirri leið hafnað að hafa ákveðna talsmenn eða kjósa stjórn.  Við vildum frekar hafa þetta allt lýðræðislegt og vinna það saman.  Það hefur ákveðna ókosti í för með sér, svo sem að ef einhver fréttamaður vill ná tali af forystumönnum Dögunar, þá þarf að skoða hvern á að hringja í.  En svo er það, að með þessu þá eru fleiri ábyrgir og það verða fleiri bök sem bera þá ábyrgð.

Það hefur líka tekið tíma að setja saman málefnin sem við viljum vinna að eða um eitt ár.  En um leið verða málefnin einmitt vandaðri og ábyrgari, þegar allir þurfa að leggjast á eitt, og menn þurfa að tala sig niður á eina niðurstöðu.  

Allt hefur það gengið vel og þó við séum ólíkar manneskjur, þá hefur virðingin fyrir hvert öðru leitt okkur á endanum að þeirri niðurstöðu sem liggur nú fyrir eftir velheppnaðan landsfund. 

Já ég sagðist vera komin í framboð.  Ég hef ákveðið að þiggja fjórða sætið í Norðvesturkjördæmi.  Það var gert að vel athuguðu máli og eftir að ljóst var að enginn önnur kona sóttist eftir því sæti.

Það er nefnilega þannig í okkar ágæta lýðræðisríki, þá er það ekki lýðræðislegra en svo að fólk hugsar sig um tvisvar áður en það tekur sæti á lista, sem er ekki í gömlu flokkunum.  Í sumum tilfellum veit ég að fólki hefur verið hótað að ef það taki slíkt sæti geti það sagt bless við vinnuna sína. 

Þetta er gömul saga og ný.  Þegar við vorum að berjast í Frjálslyndaflokknum urðum við áþreyfanlega vör við þetta, sér í lagi ef það voru sjómenn sem vildu vinna með flokknum.  Einhverra hluta vegna var útgerðargreifum afskaplega illa við þann flokk, Wonder Why  En það má auðvitað ekki ræða þetta frekar en svo margt annað í okkar "lýðæðislega" þjóðfélagi.

En sem sagt ég ætla ekki að vera leiðinleg, og ákvað að segja ykkur þetta strax, svo þið getið undiðbúið ykkur undir áherslur mínar, þar sem ég geri mér grein fyrir því að með því að vera komin í framboð þá taka menn allt öðruvísi því sem ég segi og geri.

Ég er samt og verð alltaf sú sama sem ég er.  Get bara ekki annað.  Það sem ég er að gera með þessu flandri mínu á gamals aldri er að ég hef fulla trú á landinu mínu og þjóðinni, ég er alveg viss um að við getum unnið okkur út úr þeim vanda sem við erum í, og að við eigum bjarta framtíð fyrir okkur ef við högum okkur skynsamlegar en við höfum gert undanfarið. 

Ég vil fá börnin mín heim, og ég vil fá að sjá það samfélag sem við getum öll verið í með reisn og átt mannsæmandi líf. Það á enginn að þurfa að svelta eða vera borin út af heimili sínu.  Börnin okkar eiga að geta sótt skóla allt frá grunnskóla til æðri menntaskóla án tillits til fjárhags foreldra. 

Og útlendingarnir okkar sem hafa flúið landið vegna aðstæðna vil ég fá heim aftur til að byggja upp velferðarþjóðfélag með okkur sem eftir sátum. 

En nú er ég örugglega farin að hljóma eins og "frambjóðandi"

En eins og Guðjón Arnar segir svo oft: ef þú hefur sannfæringu fyrir því sem þú ert að gera, verður þú aldrei rekin á gat með málefnin.

Það var einhver að hafa áhyggjur af því að Dögun hefði enga framtíðarsýn aðra en stjórnarskrármálið, ég ætla því að setja hér inn áherslur framboðsins í aðgerðum í þágu heimilanna.   

Öflugar aðgerðir í þágu heimila – samþykkt drög 30.10.201

Dögun vill tryggja réttlæti og samfélagslega sátt með öflugum aðgerðum í þágu heimila landsins og stuðla að betra lánakerfi til framtíðar með því að:

• Afnema verðtryggingu á neytendalánum
• Leiðrétta húsnæðislán
• Fjölga valkostum í nýju lánakerfi
• Setja þak á vexti
• Afnema stimpil- og uppgreiðslugjöld
• Tryggja að veð takmarkist við veðandlag
• Lögfesta lágmarkslaun sem miðast við framfærsluviðmið

Sjá hér nánar: http://xdogun.is/oflugar-adgerdir-i-thagu-heimila/ 

Málefnin voru samþykkt á landsfundi og héðan í frá verður unnið að því að upplýsa fólk um hvað við ætlum að gera og hvernig.

 Ég ætla mér að upplýsa ykkur um þau málefni, svona á milli þess sem ég býð ykkur í ferðalög. 

Fyrst og fremst þurfum við að þora að skoða þau framboð sem bjóða fram í næstu kosningum.  það hefur aldrei verið meira framboð á framboðum en einmitt nú, þó svo ef til vill einhver þeirra ná ekki markmiði sínu, þá held ég að viljinn til að gera vel sé til staðar hjá þeim öllum, bara spurning um hvernig þau hyggjast nálgast markmið sín og hvort þau markmið séu raunhæf. 

Sem sagt hér er ég og get ekki annað.

Athugasemdir

[Árni Gunnarsson, 22.3.2013 kl. 22:00]

Þú þarft sannarlega ekki að "viðurkenna" þetta eins og einhvern glæp Ásthildur mín. Ég held að Dögun sé hópur fólks með virðingarverðar skoðanir og þar eru margir sem ég tel til minna vina og kunningja. Ég er bara íhaldssamari í skoðunum en margir í þessari framlínu en hef reynslu fyrir því að í stjórnmálum er sjaldan allt á boðstólum í einu og sama framboðinu.

Gangi ykkur allt í haginn hvort sem ég verð með í hópnum eða ekki.

[Ásthildur Cesil Þórðardóttir, 22.3.2013 kl. 22:04]

Takk Árni minn.  Ég er ekkert að skammast mín eða þannig, er afskaplega stolt og ánægð með framboðið.  En ég veit að þegar maður fer í framboð breytist oft viðhorf fólks til þess sem maður hefur að segja.  Ekki þannig að þó ég sé í fjórða sæti, þá er ég auðvitað ekki að fara eitt eða neitt, en hef tækifæri til að leggja mitt af mörkum á þeim málefnum sem brenna á mér, eins og þær ályktanir sem samþykktar voru á landsfundinum sína um lokaða meðferðarstofnun og alþjóðlega ráðstefnu um málefni vímuefnaneytenda.  Sem ég er afskaplega ánægð með að hafa komið á dagskrá.

[Rafn Guðmundsson, 23.3.2013 kl. 00:24]

jájá - mikil framtíð þar

[Gunnar Heiðarsson, 23.3.2013 kl. 00:45]

Dögun hefur að mörgu leyti ágæta stefnu, þó hún hugnist mér ekki að öllu leyti. Margt gott fólk fer fyrir þessum flokk og ekki minnka gæðin við að fá þig í framvarðarsveitina, Ásthildur.

Gangi þér sem allra best.

[Ásthildur Cesil Þórðardóttir, 23.3.2013 kl. 00:58]

Takk fyrir það Gunnar, ég er innilega þakklát þeim sem hafa lagt inn gott orð til mín. 

Rafn minn vona að þú finnir þína framtíð. 

[Rafn Guðmundsson, 23.3.2013 kl. 01:06]

geri það - takk

[Ásthildur Cesil Þórðardóttir, 23.3.2013 kl. 01:18]

Gangi þér vel vinur.

[Vilhjálmur Stefánsson, 23.3.2013 kl. 10:41]

Ástildur...þú ætlar að henda atkvæði þínu á glæ.Ekki líst mér á það,við Sjálfstæðismenn eigum betra skilið fyrir Vestan.......

[Ásthildur Cesil Þórðardóttir, 23.3.2013 kl. 12:33]

Enginn sem fer á kjörstað og kýs kastar atkvæði sínu á glæ Vilhjálmur minn, fólk er aðeins að fylgja sannfæringu sinni.  Mín liggur ekki með sjálfstæðisflokknum

[Kolbrún Hilmars, 23.3.2013 kl. 16:15]

Gangi þér vel, Ásthildur mín. 

[Ásthildur Cesil Þórðardóttir, 23.3.2013 kl. 16:39]

Takk Kolla mín.

[Jósef Smári Ásmundsson, 23.3.2013 kl. 20:21]

Smá heilræði Ásthildur til ykkar Dögunarfólks.Það er svolítið sárt til þess að vita að í einni könnun nýverið kom fram að "Önnur framboð" sennilega Ný dögun,Húmonistar og önnur "smáframboð" hefðu samtals 10% fylgi en engan þingmann.Af hverju takið þið ykkur ekki saman við hin "smáframboðin" og fáið þannig sameiginlega hugsanlega 6 þingmenn.Það er einfaldlega hægt að gera það þannig að 3-5 efstu frambjóðendur hvers framboðs(fjöldi þingmanna úr hverju kjördæmi)séu settir í pott,síðan haft prófkjör meðal flokksmanna allra þessara flokka-nú eða allra í kjördæminu sem myndu síðan velja röðina á "nýjum "lista sem borinn yrði fram .Þeir sem síðan næðu kjöri tækju síðan einfaldlega með sér stefnu síns flokks inn á Alþingi.

[rhansen, 23.3.2013 kl. 22:31]

Það er nu ekki eins og það se eitthvað óheiðarlegt að hafa skoðun og upplysa hana ! Bara gangi þer sem best ..eg se eftir þvi samt að þetta framboð kemst sennilega  ekki á blað nema sameina sig öðru eða öðrum og kanski er það bara fint ,en eg er svo leiðinleg að eg se flest þessi litlu framboð sem viðhengi stóru flokkanna ...og þvi á eflaust eftir að draga saman með hópunum þegar nær dregur og menn  sjá að þeir  fá ekki fólk á þing ..þá er betra vera litil rödd i stórum hóp ,heldur en hrópandi i auðninni ....en enga skoðun hef eg að öðru leyti á þessum litlu framboðum ,og allt kemur þetta i ljós .... bara spennandi :)

[Baldvin Björgvinsson, 24.3.2013 kl. 08:41]

Jósef Smári, Dögun er eina stjórmálaaflið sem við vitum af, sem hefur sameinað smærri framboðsbrot. Dögun er: Borgarahreyfingin, Hreyfingin og Frjálslyndir ásamt tveimur fyrrum formönnum Hagsmunasamtaka heimilanna og fulltrúa úr stjórnlagaráði ásamt fjölmörgu öðru fólki.

Næstum öllum öðrum hefur verið boðið til samstarfs en ekki verið þegið.

kv. Baldvin Björgvinsson, í framkvæmdaráði Dögunar.

[Steinunn Helga Sigurðardóttir, 24.3.2013 kl. 10:40]

Hjartanlega til hamingju með þetta, heppinn flokkur að hafa þig kæra kona!

[Ásthildur Cesil Þórðardóttir, 24.3.2013 kl. 10:47]

Takk Steinunn mín

Jópsef minn ágæti, Dögun hefur reynt að fá með í slaginn fleiri framboð en þessi sem Baldvin telur upp, það var reynt að fá með Samstöðu, það hefur verið rætt við Pírata, Flokk heimilanna, Lýðræðisvaktina og Hægri græna hef ég grun um.  En forystan þar virðist ekki hafa áhuga á að vera í opnum regnhlífasamtökum, nema ef til vill Píratar og húmanistar.  Þannig að það er ekki þannig að við höfum ekki reynt að fá fleiri með

Takk RHansen, ég vona að tölurnar fari að tosast upp á við nú þegar málefnin eru loksins í höfn og við erum að fara af stað með að auglýsa þau í fjölmiðlum, við þurfum samt að ná eyrum fólks.  En það er óplægður akur þarna úti af fólki sem vill breyta til og er að skoða hvað nýju framboðin hafi fram að færa.

Takk Baldvin, gott að sjá þig hér. 

[Haraldur Rafn Ingvason, 24.3.2013 kl. 12:17]

Ég á ekki von á að Píratar sameinist öðrum né Hg, en Flokkur heimilanna og Lýðræðisvaktin gætu etv. séð hag í samvinnu þegar nær dregur. Píratarnir munu að mínu mati að fara fram einir, sérstaklega ef næstu skoðanakannanir staðfesta það sem sást nýlega, að yngsti kjósendahópurinn veiti þeim stuðning.

[Ragnheiður , 24.3.2013 kl. 12:31]

Ég ætla einfaldlega að óska þér góðs gengis

[Ásthildur Cesil Þórðardóttir, 24.3.2013 kl. 12:57]

Haraldur ég er ekki að tala um sameiningu heldur samstarf sem er allt annar hlutur, þannig að atkvæði greidd Dögun nýtist Pírötum og öfugt.  Þetta er form sem hefur að vísu ekki verið reynt áður en er í fullu gildi, þá fá þeir sem eru í samstarfinu til dæmis TT ef þeir fara fram með Dögun.  Þeir halda öllu sínu og geta þess vegna komið inn mönnum.  En atkvæðin nýtast betur. 

Takk Ragnheiður mín það skiptir mig máli.

[Haraldur Rafn Ingvason, 24.3.2013 kl. 17:51]

Jamm, það þarf að meta þessa hluti vandlega, um að gera að ná sem bestri nýtingu og hirða sem mest af þessum óákveðnu 40%.

[Ásthildur Cesil Þórðardóttir, 24.3.2013 kl. 17:55]

Nákvæmlega, en til þess að svo megi verða þurfa framboðin auðvitað að vera sammála eða nokkurnveginn sammála í sem flestum málum, þannig að þau geti unnið saman ef svo myndi verða að þau fengju til þess brautargengi.

[Guðrún Dadda Ásmundardóttir (IP-tala skráð) 25.3.2013 kl. 00:35]

Kæra Ásthildur.

Mikið er ég stolt af því að vera með þér á lista og mikið glöð að þú tókst þá ákvörðun af vera ofarlega. Ég hlakka mikið til komandi tíma með þér og okkar góða fólki. Sérstaklega hlakka ég til að koma vestur og hitta þig og þitt góða fólk á Aldrei fór ég suður. 

Við munum massa þessa kosningabaráttu þó ekki sé nema bara á gleðinni.

Kærar kveðjur, Guðrún Dadda oddviti NV fyrir Dögun

[Ásthildur Cesil Þórðardóttir, 25.3.2013 kl. 09:09]

Takk Sömuleiðis Guðrún Dadda mín, ég er afskaplega ánægð með að vera þarna við hliðina á þér og Brynjólfi.  Já við munum koma okkar skilaboðum áfram, en það besta er að gleðjast saman og bretta upp ermar til að vinna fyrir fólkið í landinu sem svo sannarlega er farið að þrá breytingar.