Svolítið um pólitík - hugmynd.

Lesið í Bæjarins besta:

bb.is | 19.01.2012 | 10:55Krefjast þess að eignarhald auðlindarinnar liggi hjá þjóðinni

"Stjórn Samfylkingarinnar í Ísafjarðarbæ og í Bolungarvík hvetur ríkisstjórn Jóhönnu Sigurðardóttur til að leggja fram hið fyrsta frumvarp að lögum um nýtt fiskveiðistjórnunarkerfi og framfylgja þar með fyrirheiti samstarfsyfirlýsingar ríkisstjórnarinnar um breytingar á stjórn fiskveiða. Stjórnin telur brýnt að ekki verði látið undan þrýstingi hagsmunaaðila heldur staðið fast við það grundvallaratriði að ríkið fyrir hönd þjóðarinnar verði hinn eini sanni eigandi fiskveiðiauðlindarinnar,“ segir í ályktun sem félögin hafa sent frá sér.

Stjórnin væntir þess að ríkisstjórn Jóhönnu Sigurðardóttur afnemi þann ójöfnuð sem hlotist hefur af núverandi kvótakerfi og innleiði án tafar nýtt fiskveiðistjórnunarkerfi sem byggir á jöfnum rétti landsmanna til nýtingar fiskimiðanna, að eignarhald fiskveiðiauðlindarinnar liggi ótvírætt hjá þjóðinni og að réttlátur arður af veiðunum renni til fólksins í landinu.

Stjórn Samfylkingarinnar í Ísafjarðarbæ og Bolungarvík gerir kröfu um að hvergi verði hvikað frá markmiðum ríkisstjórnarflokkanna um: Ótvírætt eignarhald þjóðarinnar yfir fiskveiðiauðlindinni, þar með fullur ráðstöfunarréttur og forræði. Þjóðhagslega hagkvæmni af sjálfbærri nýtingu fiskistofnanna við landið. Eflingu byggða, nýliðun og atvinnusköpun innan greinarinnar. Sem mest jafnræði við úthlutun veiðiheimilda og þar með atvinnufrelsi í samræmi við stjórnarskrá lýðveldisins og álit mannréttindanefndar SÞ. Örugg og fyrirsjáanleg rekstrarskilyrði greinarinnar á grundvelli almennra reglna við úthlutun veiðiheimilda. Og að nýting fiskveiðiauðlindarinnar sé tímabundinn afnotaréttar gegn gjaldi til samfélagsins.

Samfylkingin í Ísafjarðarbæ og Bolungarvík tekur undir þau sjónarmið sem þingmenn kjördæmisins Ólína Þorvarðardóttir og Lilja Rafney Magnúsdóttir hafa sett fram um nýjar áherslur í fiskveiðistjórnun sem þjóna sjávarbyggðunum og því fólki sem þar býr og starfar. "

http://www.bb.is/Pages/26?NewsID=172688

Þetta lýst mér vel á.  Þetta er afdráttarlaus yfirlýsing og áskorun á ríkisstjórnina og Jóhönnu Sigurðardóttur um að vinna að vilja fólksins og efna kosningaloforð sín. 

Ætli þetta verði ekki litið illum augum af þeim forsætisráðherra sem telur að öll umvöndun eða ábendingar séu af hinu illa.  Setur Samfylkingu Bolungarvikur og Ísafjarðar á bekk með Samtökum Atvinnulífsins og ASÍ, með þennan grímulausa áróður. 

Ég var að hugsa í morgun geri það oft á morgnana þegar ég er vöknuð en þarf ekki að fara fram úr, því ég á minn tíma sjálf, og þá gerist margt í kollinum á mér.

Það sem hér er að gerast í samfélaginu er að fólk sér að þessi ríkisstjórn er alls ekki að gera sig, hún er líka haldinn algjörri veruleikafyrringu af verstu sort, þegar allir sem reyna að sýna fram á á hvaða leið hún er, er tekið illa og ákveðið að það sé af hatri eða illvilja einum saman.  Það er slæmt.

Það sem heldur þessari ríkisstjórn enn við völdin er.... já óttin við að Sjálfstæðismenn komist að völdum á ný.  Það er ekki beint skemmtileg né upplífgandi hugsun, því þeir hafa örugglega engu gleymt.   Ég veit að það er fullt af góðu fólki í Sjálfstæðisflokknum, mikið af hugsjónafólki sem fær því miður ekkert annað hlutverk en að þjóna elítunni í flokknum.   Meira að segja einn sjálfstæðismaður tengdur mér og innarlega í flokknum sagði mér að hann væri ósáttur við að ekkert væri hlustað á grasrótina í flokknum, menn bara ákvæðu það sem þeim hentaði og enginn spurðu, og þó aðildarfélög sendu ályktanir til ráðamanna flokksins, þá væri ekkert tilllit tekið til þess ef það strýddi gegn hugsunargangi þeirra. Ég trúi þessum manni og veit að þrátt fyrir allt er hann gegnheill sjálfstæðismaður.  Sem segir mér að jafnvel þó menn sjái hvað er að gerast þá geta þeir ekki slitið sig lausa frá trúfélaginu Sjálfstæðisflokkur.  Þetta segi ég til að sýna fram á að ótti fólks er á rökum reistur.   Þarna er mikið í húfi kvótakerfið fyrst og fremst, þeir myndu byrja á að festa það í sessi um aldur og ævi og fara algjörlega að vilja L.Í.Ú, enda er það hönd sem gefur rausnarlega.

En þar sem þessi vansæla ríkisstjórn hangi á þessu roði, og enginn vill í raun og veru slíta henni nema þeir áðurnefndu, þá datt mér si svona í hug lausn á þessu fram að næstu kosningum.  Auðvitað veit ég að það verður ekkerkt mark á mér tekið, en ég læt þetta flakka samt.

En sem sé, tveir ráðherrar til viðbótar verði látnir taka pokann sinn, það eru Össur Skarphéðinsson og Jóhanna Sigurðardóttir.  Í stað þeirra verði ráðnir fagmenn til að sinna forsætisráðherraembættinu og utanríkisráðuneytinu.

Össur blessaður er góður maður ég fer ekki ofan af því.  En hann er gjörsamlega vanhæfur ráðherra.  ÉG held að hann sé búin að lofa einhverju upp í ermina á þjóðinni þarna úti, þar sem gráðugir einræðisvannabees sitja og vilja gína yfir auðlindum landsins.  Hann getur hvorki sagt þeim að hann hafi lofað of miklu, né sagt okkur að hann sé komin út á hálan ís.  Þess vegna verður hann að víkja til að landið fái trúverðugleika.   Þetta sannaðist nú fyrir skömmu þegar Steingrímur upplýsti okkur um að enginn samningsmarkmið hefðu verið samin.  Þau sem einmitt áttu að liggja fyrir, fyrir umsóknina.  Hvað er hægt að klúðra meir en það? Ég bara spyr.  Bændur hafa aftur á móti unnið sína heimavinnu og eru með varnarlínur fyrir landbúnaðinn tilbúnar.

Jóhanna hefur sýnt að hún veldur ekki þessu starfi, hún er stöðnuð.  Meira að segja Össur hefur lýst yfir að það þurfi að skipta um kaptein í brúnni.  Hún er ósveigjanleg, frek og mjög sennilega komin með ofsóknaræði, því allir sem reyna að gagnrýna stjórnina eru skammaðir og taldir hatursmenn.  Það sjá það allir sem vilja sjá það að þetta gengur ekki með æðsta mann ríkisstjórnar í kröggum.  Svo er hún sennilega líka undirförul, því hvaða samningsmarkmið var hún að kynna Merkel, ef þau eru ekki til?

Ég er alveg viss um að Jóhanna hefur gert margt gott gegnum árin og hefur verið hugsjónamanneskja hér áður fyrr, en yfir 30 ára seta á alþingi er hverri manneskju ofviða.  Hún er komin á þann stað sem svo margir falla í að telja sig eiga stólinn og allt sem undir hann telst. Telur sig vera ómissandi.  Þetta er bara mannlegt. 

Um Steingrím veit ég svo sannarlega ekki hvar á að staðsetja hann, annað hvort er hann snillingur eða algjört fól. Það á eftir að koma í ljós. En með sterka fagráðherra í forsæti og utanríki, ætti að vera kominn meiri staðfesta fyrir fólk til að geta unað við þessa ríkisstjórn í 17 mánuði. Meðan grasrót og ný framboð kynna sig og koma með áherslur og sýn á hvernig hlutir megi betur fara.

Ég ætla meira að segja að koma með tillögu að þessum tveimur embættismönnum, ég sé fyrir mér Jóhannes Björn sem forsætisráðherra og Gunnar Tómasson sem utanríkisráðherra. Báðir þessir menn eru víðförulir hafa unnið mikið erlendis hjá opinberum stofnunum bæði fyrir Íslan og önnur ríki. Báðir þessir menn eru réttlátir staðfastir og hafa svo sannarlega þekkingu á okkar málum.

Þetta er það sem ég held að gæti bjargað okkur tímabundið, og aukið trú fólks á stjórnmálin og eytt óttanum um að allt fari hér yfir um ef kosið verður núna.

Eigið annars góðan dag elskurnar.

Hugleiðing um líf og heilsu.

Það hefur verið þungt í mér undanfarið.  Það er ekki auðvelt að sitja undir því að eftir tæp 30 ár komist yfirvöld að því að það eigi að kaupa af mér heimilið mitt og allt um kring sem ég hef verið að búa mig undir frá árinu 1986, eða fyrr.  Rústa því algjörlega, henda mér út úr húsinu, eyðileggja 30 ára skógræktun og skera niður garðplöntustöð sem ég hef rekið þarna á milli með greinilegri ánægju bæjarbúa, flestra.  Ég hef einnig þurft að sæta því að yfirvöld bæjarins hafa haft samband við mig mestmegnis gegnum það ágæta blað Bæjarins Besta, þó það sé flott og gott blað, þá á maður einhvernveginn meira von á svona persónulegri samskiptum um jafn mikilvæg málefni.

Ég hef þess vegna legið undir feldi eins og ljósvetningagoðinn um árið.  Mér hefur liðið illa, og ég skil ekki þörfina á þessari rústabjörgun, því það er langt seilst til að telja þetta eignarnám á lífi mínu almannahagsmuni, þar sem ég bý á jaðrinum og eini almannahagsmunaaðilinn er ég og mín fjölskylda sem bara viljum fá að vera í friði.

En undir feldinum, þ.e. undir sænginni minni í andvökunóttum þrátt fyrir róandi lyf og jafnvel svefnlyf, þá hef ég haft tíma til að skoða líf mitt gegnumheilt.  Og ég hef komist að niðurstöðu.

Ég ætla ekki að eyðileggja líf mitt og heilsu með að láta þetta draga mig niður andlega.  Ég tók ákvörðun um að láta bara hvern dag hafa sinn tíma, og hætta að velta mér upp úr þessu máli.  En ég mun ekki gefast upp. Ég ætla mér að reyna allt til að fá að halda áfram með lif mitt á þessum stað.  Og berjast fyrir því sem ég hef byggt upp.  Núna þegar ég er orðin ellilífeyrisþegi og hætt að vinna fyrir þetta sama bæjarfélag, sem mér þykir reyndar óskaplega vænt um og vill  hvergi annarsstaðar vera, þá finnst mér bæði hart og óréttlátt að þurfa að lúta því að eitthvað fólk geti bara skikkað mig til að gefa allt upp á bátinn sem ég hef unnið að frá því að ég var full af orku og trú á framtíðina. 

Láta einhverja teikniglaða arkitekta strika út allt mitt líf, án þess einu sinni að koma á staðinn og kynna sér málin. Ég og umhverfi mitt er allt í einu bara strik á blaði sem þeir leyfa sér að teikna út og suður, án þess að átta sig á því að þeir eru að þurrka út 30 ára lífsstarf.

En ég er komin að niðurstöðu. Ég ætla ekki að láta þetta eyðileggja heilsuna mína. Ég ætla sem sagt að lifa áfram hér ánægð og örugg, og gera það sem þarf til að vinna mitt mál.   Ef það tekst ekki, þá verður bara að hafa það, ég get þá sagt að ég hafi gert allt mitt og tapað.  En ef mér tekst á einhvern undarlegan hátt að fá leyfi til að vera bara hér áfram og vera til hér þar sem ég tilheyri, mun ég fagna.  Ég er nefnilega ekki ein í þessari baráttu, ég hef kallað til vætti og náttúruna sjálfa, svo er bara að sjá hvort það gengur upp.  En fyrst og fremst þarf ég að trúa á það góða í fólki, að það skynji að hættan er enginn, og allir vinna, ég að fá að vera hér áfram og þeir að þurfa ekki að eyða dýrmætum peningum í að rústa lífi mínu. 

Mitt vandamál er sennilega að vera bundinn þessum bæ, ég hef reyndar unnið honum allt það besta sem ég hef átt, núna í fegrun síðan 1978, en alls með hléum frá árinu 1966.   

Mér líður vel með þessa ákvörðun. Ég átti þess kost að verða reið og hatursfull og óska þessu fólki norður og niður. En það eina sem ég hefði haft upp úr því væri að skaða bæði sálina mína og líkamann. Og það vil ég alls ekki, eða að bara taka þessu eins og hverju öðru hundsbiti og reyna að láta mér þykja vænt um þetta fólk, og hugsa sem svo að það viti ekki hvað það er að gera, en muni reyndar fá sín málagjöld óháð mér.

Þess vegna ætla ég að berjast með þeim vopnum sem ég hef, en jafnframt ekki fara út í sálfræðilega vegferð haturs og illvilja.  Heldur þvert á móti treysta á að ég uppskeri eins og ég sái, góðvild, skilning og vilja til að sjá í gegnum fingur við mig með þetta óskamál mitt. 

Eigið góða nótt elskurnar.   

Já einmitt Ólína.

Lýst vel á þessar áhyggjur þínar.  Og það er engin spurning í mínum huga að það þarf óháða rannsókn á málinu.   Við hin sem bíðum eftir okkar úrbótum fyrir austan og vestan,  bíðum og hlustum eftir ákvörðunum ríkisstjórnarinnar um hvort hér eigi að vera eiginhagsmunapot norðanmanna, eða eðlileg forgangsröðun í samgöngumálum á landinu.  Hef trú á að þú standir fast á þínu í þessu máli. 

Ekki hægt að afgreiða málið eins og sakir standa

Endilega endurmetið stöðuna Guðfríður Lilja ekki bara tala svona og gera svo allt annað eins og venjulega.

Tek undir þetta með Guðfríði Lilju, þetta er reyndar sama og Ólína Þorvarðar sagði í Silfri Egils, ef uppi eru tvímæli um arðsemi af þessum göngum, þá ber að setja þau á samgönguáætlun og fylgja þeirri tímaröð sem er þegar á dagskrá. Ég er algjörlega sammála þeim tveimur í þessu og hafi þær þökk fyrir.   Þetta er svo greinilega hagsmunapot í heimabyggð Kristjáns Möllers að það er augljóst hverjum sem gengur með augun opin.  Það verður fróðlegt að vita hvernig atkvæði falla um ríkisábyrgð á gönginn. Ef fólk fer eftir sinni sannfæringu og lætur ekki Steingrím J og  Jóhönnu hóta sér stjórnarslitum eða einhverju álíka, er nokkuð ljóst að það er spursmál um hvort þetta verði samþykkt á Alþingi ég meina alþingi.  Vil einnig benda því fólki á að ÞAÐ ERU EKKI TIL PENINGAR Í ÞARFA HLUTI EINS OG UMÖNNUN ELDRI BORGARA OG ÖRYRKJA, OG MÖRG ÖNNU VELFERÐARMÁL.  Svo það er nóg til að eyða peningum í sem er betur komið en í Vaðlaheiðargöng.

„Hljótum að þurfa að endurmeta stöðuna“

Forgangur, loforð og efndir.

Það er öllum ljóst að mikill niðurskurður er á öllum sviðum, það er eiginlega sama hvar borið er niður, heilbrigðisstofnanir, öryrkjar, barnameðlög hafa víst lækkað um 30 %  og allt þetta í boði Norrænu velferðarstjórnarinnar.

Samanber þessa grein í stjórnarsáttmálanum;

Veitt verði heilbrigðisþjónusta við hæfi á viðeigandi þjónustustigi, óháð efnahag og búsetu.
Hlutverk sveitarfélaga í velferðarþjónustu við börn, fatlað fólk, aldraða og fjölskyldur verði aukið með flutningi verkefna frá ríki til sveitarfélaga.

Heilsugæslan um land allt verði sett í öndvegi sem fyrsti viðkomustaðurinn í heilbrigðiskerfinu.  
Aðgerðaráætlun í málefnum barna- og ungmenna verði fylgt eftir.

Stefnt verði að því að fólk geti búið heima eins lengi og kostur og vilji er til, meðal annars með því að samþætta heimaþjónustu og heimahjúkrun. Staðið verði við framkvæmdaáætlun um ný hjúkrunarrými fyrir aldraða.

Já Þetta átti nú aldeilis að vera í forgangi.

Svo er nú líka loforðin um heimilin, þau hljóða svona:

Greiðslu- og skuldavandi heimila

Djúp niðursveifla í kjölfar bankahrunsins hefur skapað misgengi á milli greiðslubyrði og greiðslugetu margra heimila í landinu. Þetta misgengi verður að leiðrétta með lækkun á greiðslubyrði þeirra sem verst standa þar til verðmætasköpun atvinnulífsins tekur aftur að aukast. Markmið ríkisstjórnarinnar er að koma í veg fyrir að tímabundinn greiðsluvandi leiði til vanskila og gjaldþrots, svo sem með hækkuðum og breyttum vaxtabótum og húsaleigubótum. Lykilatriði er að tryggja húsnæðisöryggi fjölskyldna og einstaklinga. Greiðslujöfnun sem nú nær bæði til verðtryggðra og gengistryggðra lána gerir kleift að laga greiðslubyrði að lækkandi tekjum. Þá gera ný lög um greiðsluaðlögun sem samþykkt voru á síðasta þingi það mögulegt að taka á vanda þar sem fyrirsjáanlegt er að greiðslu- og skuldabyrði verði  skuldurum ofviða til lengri tíma litið.  Loks gera frystingar greiðslna sem eru í boði hjá lánastofnunum heimilum kleift að bregðast við bráðavanda vegna skyndilegs tekjumissis. Ofangreindum úrræðum þarf að fylgja fast eftir.

Hér má til gamans lesa þessi háleitu markmið sér til heilsubótar og ánægju. http://www.stjr.is/Stefnuyfirlysing/

En eins og allir vita eru ekki til peningar til að styðja öryrkja, eldriborgara, heilbrigðiskerfið, skólakerfið, svo það verður allt að bíða. Það þarf að koma Vaðlaheiðargöngum í gegn, hátæknisjúkrahúsi og síðast en ekki síst snjóflóðavörnum hér vestra.

Um það mál segir svo í frummatsskýrslu ofanflóðasjóðs:

Ríkisstjórnin ákvað á þessu ári að til margþættra aðgerða á Vestfjörðum væri þörf og um einn þáttinn segir: "I. Aðgerðir vegna efnahagslegs samdráttar og efling innviða,  Markmið aðgerðanna er að hafa jákvæð skammtímaáhrif með tímabundinni fjölgun starfa auk áhrifa af umsvifum verktaka, en jafnframt jákvæð langtímaáhrif með bættum samkeppnissikilyrðum efnahagslífs og samfélaga á Vestfjörðum" (leturbreyting mín.)48) gerð ofanflóðavarna undir Gleiðarhjalla mun skapa störf tímabundið og skapar öruggari skilyrði til búsetu á því svæði. 

 Á bls. 2 um samantektir á niðurstöðum frumrannsóknarinnar stendur eftirfarandi:

Stór snjóflóð hafa aldrei fallið úrhlíðinni neðan Gleiðarhjalla svo vitað sé. Eftir að snjóathugunarmaður tók til starfa hafa fimm lítil flóð verið skráð á svæðinu en þrjú þeirra eru innan við framkvæmdasvæðið.  Eitt snjóflóð féll eftir Stakkaneshrygg og stöðvaðist um 100 m. ofan við efstu hús en annað féll sunnan við Stakkaneshrygg og stöðvaðist í um 110 m. hæð yfir sjávarmáli.  Einnig eru til óljósar heimildir um flóð sem féll kringum 1950 á svæði þar sem byggð stendur núna en var þá óbyggt. 

Ég hef búið undir þessari hlíð alla mína ævi og ég hef aldrei orðið vör við ótta hjá bæjarbúum.  Ekki hafa húsin verið svo vitað sé verðminni en önnur hús í bænum, þó skýrslan láti að því liggja, einnig er sagt að þessi 14. hái veggur muni hafa talsverð "jákvæð áhrif á samfélagið"

Einnig segir að garðarnir muni "dempa hljóð sem berast frá bænum og gæti upplifun af hljóðum úr náttúrunni (fuglasöng) fyrir ofan garðanna verið meiri. 

Þetta er nú samt sem áður útúr dúr, það er margt þarna sem orkar tvímælis, og að mínu mati ekki verið að gera ráðstafanir fyrir fólkið, heldur að RÉTTLÆTA hlut sem valdhafar vilja framkvæma, ég held í óþökk meirihluta bæjarbúa. 

En ég segi, væri nú ekki nær að nota þessa peninga sem virðast handbærir til varanlegrar uppbyggingar, til dæmis til að styrkja atvinnuuppbyggingu á svæðinu, nú ef þetta er eyrnamerkt jarðverktökum þá væri nær að nota þennan pening í Dýrafjarðargöng.  Það er nefnilega þannig að það eru fleiri sem farast á vegum úti í bílslysum en þeir sem farast í snjóflóðum, sérstaklega þar sem enginn stór snjóflóð hafa fallið svo vitað sé.

Þetta kalla ég öfuga forgangsröð. Meðan allt er í kalda koli í marglofaðri velferð að þá dansa menn í kring um Gullkálfinn eins og forðum, byggja  Hof, Hörpur, spítala sem ekki verður hægt að manna, og verið er að loka sjúkradeildum og sjúkrahúsum.

Getum við ekki á einhvern hátt komið vitinu fyrir þetta fólk, eða er það algjörlega heillum horfið? 

Það þýðir ekkert að segja að þetta sé svo nauðsynlegt eða að þessi peningur dugi ekki, og svo framvegis.  Það er nefnilega hægt með ráðdeild og sparnaði einmitt með  því að klippa niður svona ónauðsynlegar framkvæmdir sem geta orðið til þess að bjarga þeim sem minnst mega sín.  Bara ef forgangurinn er réttur, loforðin haldin og skynsemin fái að ráða. 

 

Þessar myndir teknar í fyrradag.  Fallegt vetrarveður á Ísafirði.

Síðbúin spaugstofa á Rúv.

Já þegar maður verður vitni að svona atburði þá hreinlega verður maður kjaftstopp.  Jón reyndi að svara eftir bestu getu og við verðum að virða hann fyrir það.   En hvort svona maður er hæfur í það embætti sem hann hefur komist í er svo allt annað mál.  Við hljótum samt að finna til þess  að hann er að minnsta kosti einlægur í því sem hann er að gera, þegar við miðum við fláræðið og lygina sem aðrir á hans nótum eru tilbúnir til að verja sig með. 

Málið er að við þekkjum og látum okkur hafa helv... lygina og hrokann í þeim sem á undan honum hafa farið.  En á sama tíma aumkvumst við yfir karlangann sem hefur komið sér í þessi ósköp af græðginni einni saman, og stendur nú svo til einn í að svara fyrir hana á mörgum vígstöðvum, og fréttamenn hafa svolítið gaman af að gera lítið úr honum. Enda hefur hann sjálfur skapað sér sviðið, en í staðin fyrir að geta bara kúlað og sprellað, þá er það alvaran sem hann þarf að glíma við. 

Ég viðurkenni að ég hef aldrei þolað hvorki tvíhöfða, fóstbræður né fígúru Jóns í vaktamálum enda nennti ég ekki að fylgjast með þeim þáttum.  En ég held að Jón og hans félagar hafi virkilega ætlað að breyta og laga pólitíkina.  Málið er bara að pólitíkin gleypti þá hráa, af því að þeir treystu á flokksmaskínu sem eins og nornin í Hans og Grétu, buðu þeim inn í pönnukökuhúsið, hvaðan varð ekki aftur snúið. 

Nú er alvaran að renna upp fyrir þeim, og það er erfitt að afsaka síðustu daga það þýðir ekki að reyna að segja fólki að svona sé Ísland, né að það sé ekki sé ekki hægt að sandbera götur af því það þurfi að sópa upp, og að salt dugi ekki í hláku.   Það er ekki einu sinni hægt að fela sig á bak við það að þeir hafi  haldið að andlega fatlað fólk hafi ENDILGA VILJAÐ BORGA matinn sinn, og það meira en borgarstarfsmenn fá matinn sin á. 

Guð minn góður hvað það var erfitt að horfa upp á manninn tala um þessi mál, ég held að Reynir Pétur hafi gert þessu betri skil ef út í það er farið.   Hann kann þó allavega að reikna.

Hvar er pólitíkin á vegi stödd, þegar trúðar af þessum kaliber fá umtalsvert fylgi án þess að hafa sýnt að þeir hafi neitt til þess að bera að geta ráðið við einföldustu hluti.  Á hvaða leið erum við að hafa lygamerði við stjórnvölin sem ef til vill eru að gerast föðurlandsvikarar til að eyðileggja sjálfstæði okkar og ekkert að gert.  Á hvað vegi erum við stödd þegar ekkert viðvörunarkerfi virðist í gangi til að stoppa slíka af?

Forsetinn á að geta gripið inn í það ferli, en gerist það án þess að til þurfi að koma undirskriftir?

Já hann getur það.  samkvæmr 24 gr. Forseti lýðveldisins getur rofið Alþingi, og skal þá stofnað til nýrra kosninga,( áður en 45 dagar eru liðnir frá því er gert var kunnugt um þingrofið) enda komi Alþingi saman eigi síðan er tíu vikum eftir að það var rofið. 

„Þetta var ófremdarástand“

Að skammast sín.

Margrét ég get vel skilið að þú skammist þín fyrir að vinna í þessu trúðaleikhúsi.   Og víst hafið þið þrjú í Hreyfingunni reynt að siðvæða starfsvettvanginn.  En nú er lag,  það er gerjun í gangi og þú að því mér sýnist ert hluti af henni.   Því þætti mér miður ef þú ætlar að framlengja sirkusinn með því að verja þessa ríkisstjórn vantrausti.  Það hefur nefnilega aldrei verið jafnslæmt þarna eins og núna, þegar vanhæf ósamlynd ríkisstjórn reynir að lafa á hverju sem gengur.

Ég segi fyrir mína parta ég mun fylgjast mjög vel með hvað þið gerið í þeim málum.  Ég vil nefnilega burt með þessa ríkisstjórn og fá inn meira af grasrótarfólki og minni áhrif fjórflokksins.  Ég er viss um að slíkt væri möguleiki núna og aldrei meiri ein einmitt núna þegar fjórflokkurinn er með allt niður um sig gagnvart fólkinu í landinu.

Ef þú meinar eitthvað með þessari skömm, þá geturðu sýnt það svart á hvítu þegar kemur að vantrauststillögu á ríkisstjórnina.   Ef þú aftur á móti verð stjórnina, þá myndi ég í þínum sporum hætta að skammast mín, því þá ertu bara ein af þeim sem þú segist skammast þín fyrir.

Ég ætla að fylgjast vel með.

Skammast sín fyrir að vera þingmaður

Í vetrarveðri.

Í dag er veðrið brjálað, ég braust út í morgun til að kaupa með kaffinu handa gömlu vinnufélögum mínum, þeir hjálpuðu mér út úr skaflinum við bílastæðið mitt í gærdag.  Ísafjarðarbær er örugglega einn best mokaði bær landsins alla vegna og það er borin á sandur þó það þurfi ef til vill að sópa honum upp á vorin, annars er það frekar lítið mál, ég hef ekki orðið vör við að hann sitji mikið eftir á götunum því bæði hefur hann rignt burt eða fokið með veðri og vindum. 

Svo fór ég bara heim og er dauðfegin að þurfa ekki að fara út fyrir hússins dyr í dag meira.  Fór að athuga með hænurnar í gær og allt í gúddí hjá þeim. 

Það á víst að vera fundur í dag hjá bæjaryfirvöldum um stórslysið hér fyrir ofan okkur, veit samt ekki hvort þeir halda hann í svona veðri, það kemur bara í ljós.

Það er gott að kúra.

Á nokkuð að henda manni í ruslið?

Þennan litla saklausa ræfil fann ég í þvottahúsinu, dáinn. Hann var á stærð við eldspýtustokk. 

Hvað ætli þetta sé nú??

Jú annar kettlingur, hann heitir Blesi og ég er með hann í fóstri, þau eru frábær saman og nú er Lotta ekki upp um allt alltaðar klifrandi upp á hnén á manni og svoleiðis.

Nú kúra þau upp á eldhúsborði, stelast þangað þegar ég er farin að sofa

Ekkert smá áhugasamur með leikjatölvu.

Eins og sjá má þá er ég ekki upp á marga fiska þessa dagana (fyrri myndin) og hér pöntuðum við pizzu saman, Ólöf með vinkonu sinni, mamma hennar og við hin.  Kettlingarnir voru hreynsaðir af eyrnamaur og svo bara huggulegheit.

En svona er veðrið í dag, og notalegt að kúra sig inni hlusta á veðrið fyrir utan, og þurfa ekki að fara út fyrir hússins dyr. Nema ef þessi fja.... fundur verður.

Lognið okkar eitthvað mikið að flýta sér núna. Eigið góðan dag elskurnar.

Eftir höfðinu dansa limirnir.

Landlægt óhreinlyndi stjórnmálamanna er orðin slík að fólk er farið að trúa hverju sem er upp á hvern sem er.  Leðjuslagurinn er þegar byrjaður og bendir ótvírætt til þess að pólitíksar eru farnir að veðja á aflausn ríkisstjórnarinnar og kosningar. 

Það er eitt sem ég skil ekki ef þetta er rétt, hvers vegna er Hreyfingin þá í samkrulli við Frjálslynda flokkinn og Borgarahreyfinguna og grasrótarsamtök um kosningabandalag fyrir næstu kosningar ef þau eru svo í einhverskonar krókbragði við ríkisstjórnina. 

Þar að auki hefur Þór Saari gefið út yfirlýsingu um að þetta sé alls ekki rétt: http://www.mbl.is/frettir/innlent/2012/01/08/hugarburdur_og_dylgjur/

Þó ég viti svo sannarlega ekki hverju ég á að trúa, þá gengur þetta tvennt ekki alveg upp í plottinu hjá Bjarna.  Ég ætla því að fylgjast með og sjá hvað þau gera í þessu máli, þegar staðan kemur upp.  Það verður örugglega fylgst vandlega með hverjir muni verja þessa ömurlegustu ríkisstjórn allar tíma falli. 

Það fyrsta sem þarf að endurreisa hér á okkar litla landi er trúin á stjórnmálamenn, sem eru komnir svo langt niður í trausti fólks að flestir taka allt sem þau segja sem lygi hver sem í hlut á.

Síðan þarf að fara gegnum allar embættisfærslur ráðamanna undanfarin áratug eða meira og upplýsa almenning um hvernig þetta fólk hefur staðið að málum.  Alla lygina, óheiðarleikan nú og heiðarleikann upp á yfirborðið svo við sjáum svart á hvítu hverjir eru trausts verðir og hverjir ekki.  Fyrr en það hefur verið gert er ekki hægt að styðja neinn af núverandi stjórnmálamönnum með einhverju öryggi. 

Það hefur marg oft komið upp m.a. á Landsþinginu fræga að heiðarleiki og opin stjórnsýsla eru efst á lista fólksins í landinu.  Það er svo langt í frá að kjörnir fulltrúar okkar, sem eru í vinnu hjá okkur hafi lagt sig niður við þær lágmarkskröfur.  Þetta fólk lætur eins og það geti hagað sér eins og það vill, deilt og drottnað með almannafé, og kann ekki einu sinni að skammast sín þegar upplýst er um óheilindi þeirra.  Með þessu hafa þau eyðilagt orðspor sitt og annara. 

Þau ættu að hafa í huga að þau eru þjónar okkar, í vinnu hjá okkur, fá launin sín frá okkur, og þar af leiðandi eigum við að vera í fullum rétti að sparka svikurunum burt, ekki bara á fjögurra ára fresti heldur um leið og óheilindin koma í ljós. 

Á þessu þarf að taka af festu og hörku af okkur fólkinu í landinu, og það sem allra fyrst.

Samkomulag um stuðning?

Það er talað fallega um mannréttindi og réttindi einstaklingsins, en hvar er hann þegar út í raunveruleikann er komið?

Mér er eiginlega þungt um hjartað þessa dagana.  Ég var nefnilega komin á svo gott ról andlega og farin að líta björtum augum fram á veginn, þegar mér var bent á frétt í BB um eitthvað sem heitir Landmótun neðan Gleiðarhjalla - tillaga að mótvægisaðgerðum. 

Síðasta áfallið var þegar ég las það í Bæjarins Besta sem virðist vera okkar milligönguaðili mín og bæjarstjórnarinnar, að það ætti að kaupa upp húsið mitt, fréttinni fylgdi flenni mynd af húsinu.  Ég fékk taugaáfall og þurftfi læknisaðstoð og vanlíðán í fleiri mánuði. 

Síðan hitti ég bæjarstjórann svona af tilviljun og hann tjáði mér að þetta væri allt bara í farvatninu og ekkert ákveðið, en ef þeir keyptu húsið myndi ekki þurfa þennan "vegg" fyrir ofan. 

Jæja samkvæmt þessari tillögu, sem nótabene er gerð af HEIMAMANNESKJU sem greinilega hefur ekki haft tíma til að skoða aðstæður, kemur svo í ljós að það á ekki bara að kaupa upp húsið mitt, gegn mínum vilja, heldur líka að taka sneið af Garðplöntustöðinni og eyðileggja tæpra þrátíu ára ræktunarstarf þar fyrir ofan, sem við hjónin höfum haft mikla ánægju af gegnum tíðina. 

Þetta segi ég, bara eins og það kemur fram, því ekki hefur verið haft samband við mig út af þessu, ég les bara ákvarðanir í BB og svara á blogginu.  Er það ekki þannig sem stjórnsýslan á að virka?

Segi bara svona.  En við þetta þá fékk ég annað taugaáfall og er ennþá að berjast í því, ég hef legið í rúminu og eina ástæðan til að fara fram úr er að ég á tvo unglinga sem þarf að hugsa um og gefa að borða. Ég fékk tíma hjá lækni og fékk aftur þessi geðlyf sem ég hafði svo giftursamlega hætt með áður. 

Það er verið að rústa lífi mínu og ég get ekkert gert í því.  Vegna þess að þetta er jú til að vernda okkur frá snjóflóðum, sem að vísu hafa ekki fallið hér svo lengi sem menn muna.  En aðalmálið tel ég er að út úr þessu fást peningar til framkvæmda í bæjarfélaginu.  Svo hvaða máli skiptir þá sálarlíf einnar kerlingar. 

Ég segi nú samt bara, væri ekki viturlegra að nota þessa peninga ofanflóðasjóðs í eitthvað þarfara eins og til dæmis að borga jarðgöng og laga vegi um landið.  Því ég held að þegar málin eru skoðuð þá farist fleiri á vegum úti sérstaklega fjallvegum, en þeir sem farast í snjóflóðum.  Enda er tildæmis hér afskaplega vel skipulögð snjóflóðaeftirlitsnefnd. 

Þeir hafa til og með látið meta upp húsið mitt, en ég hef ekki heyrt neitt um það heldur, ég hugsa að ég lesi það í Bæjarins besta, þegar þeir eru tilbúinir að gera það opinbert.

Svo er sagt að það takið þrjú ár að rústa lífi mínu og ævistarfi, byrjar næstkomandi ágúst.  Huggulegt, ég verð sennilega annað hvort á geðlyfjum allann þann tíma eða komin á geðdeild.  Nema mér takist það grettistak að lyfta mér upp og sigra sjálfa mig.

Nú veit ég ekkert hvar ég stend, ég get fengið húsið sem sumarbústað, en hvar á ég þá að vera á veturna?  Ég er með tvo unglinga á heimilinu sem eru í skóla, svo ekki gengur að setjast upp hjá börnunum í útlöndum yfir vetraratímann.  

Það eru allskonar fallegir fyrirvarar í stjórnarskrá Íslands.  En þegar allt kemur til alls, þá er hægt að klæða græðinga í þannig búning að enginn leið er til að berjast á móti henni.  Ég skal möluð niður í grjótið klöppuð í stein og gert harla lítið gert. 

Eigið góðan dag elskurnar.  Nú reynir á hjá mér.