Sjálfstæðisflokkurinn er valdakerfi.

Sjálfstæðisflokkurinn er valdakerfi.  Þetta sagði Egill Helgason í útvarpviðtali.  Ég hef svo sem lengi grunað þetta, og trúað því.  En það er auðvitað að koma berlega í ljós núna, þegar valdakerfið er fallið um sjálft sig.

Það var eftirtektarvert í Kastljósviðtali og fleiri viðtölum að Geir H. Haarde sá ekkert að því að þau þ.e. Sjálfstæðisflokkurinn sætti sig ekki við að missa forsætisráherrastólinn til Samfylkingar.  Hann sagði með þvílíkum hroka að það væri ljóst að þau gætu aldrei samþykkt þetta, og þess vegna væri það augljóst að Samfylkingin hefði þarna verið að slíta samstarfinu á þeirra kostnað.

Já, ég var hugsandi yfir þessum orðum Geirs.  Hann lagði sem sagt metnað Sjálfstæðisflokksins ofar þjóðarhagsmunum.  Því það eru ekki margir dagar síðan hann varaði mjög við stjórnarkreppu í landinu.  Ef hann hefði haft snefil að áhyggjum af landi og þjóð, hefði hann með gleði stigið niður af stólnum.  En hann kaus að gera það ekki, og gaf þar með þjóð sinni fokkmerkið í beinni.

Það getur vel verið að Samfylkingin hafi vitað fullvel að Sjálfstæðismenn myndu aldrei samþykkja ráðahaginn.  En það skrifast fyrst og fremst á Sjálfstæðismenn sjálfa að geta ekki stigið niður. Þeir gáfu þar með andstæðingum sínum tækifærið upp í hendurnar.  Þetta var veikleikamerki, hroki og græðgi eru það alltaf.  Undir þessa skoðun tóku líka fleiri forsvarsmenn Sjálfstæðisflokksins, Þorgerður Katrín, Bjarni Benediktsson og Sigurður Kári Kristjánsso sem ég heyrði í allavega.  Ég vona að fólk sem hefur kosið þennan flokk hingað til, vegna fagurorða og gylliboða láti nú af heimskulegum stuðningi við valdakrefi sem ekki hugsar um neitt nema sitt eigið stolt og upphefð. 

Ég hlustaði líka á Spaugstofusamtal milli Gunnar Páls Árnasonar og Sigurðar Kára, þar sem þessir ungu kappsfullu menn tókust á af krafti.  Ég segi spaugstofusamtal, því það var einmitt í anda þeirra ágætu félaga.  Þið gerðuð hitt og þið gerðuð þetta samtal.

Það sem ég hjó eftir í rifrildinu var þegar Gunnar Páll sagði að það hefði legið fyrir AÐGERÐARÁÆTLUN í október.  En kerfiskarlarnir í Sjálfstæðisflokknum hefðu DREGIÐ LAPPIRNAR OG ÞVÆLST FYRIR svo að sáralífið af þessum aðgerðum hefðu komist enn í gagnið. 

Þetta eru þær alvarlegustu ásakanir sem ég hef heyrt í málunum, síðan aðgerðirnar við bankahrunið.

Átta menn sig á hvað þetta þýðir? JÚ ÞAÐ ÞÝÐIR EINFALDLEGA AÐ MEÐAN ÍSLAND BRANN, VANN STÆRSTI FLOKKURINN AÐ ÞVÍ AÐ KOMA Í VEG FYRIR BRÁÐNAUÐSYNLEGAR AÐGERÐIR TIL BJARGAR ÞJÓÐINNI.  Og til hvers?  JÚ AÐ BJARGA EINHVERJUMM VALDAKERFISKÖLLUM ÚR SÍNUM RÖÐUM.  Ef þetta er ekki landráð, þá veit ég ekki hvað.

Þetta hefur svo sem ekki hlotið neina athygli, eða gert meira úr því, en er það ekki einmitt dæmigert fyrir gamla Ísland, það þykir sjálfsagt að valdsmenn þvælis fyrir góðum málum, láti sína kerfiskalla draga lappirnar, af því að þeirra hugmyndir voru ekki ofaná.  Og þeir þurftu að sópa undir teppið fyrir vini og vandamenn.

En ágætu blaða- og fréttamenn, ef þið ætlið að vera marktæk í Nýja Íslandi, Þá verðið þið að hysja upp um ykkur brækurnar og fara í rannsóknarblaðamennsku hvaða drulluhalar drógu lappirnar, og hverja var verið að vernda. 

Nú er ekki lengur hægt að segja að Sjálfstæðisflokkurinn hafi alræðisvald yfir fjölmiðlum.  Það verða sennilega færri drottningarviðtölin við forsvarsmenn þeirra.  Og þrýstingurinn á stjórnendur fjölmiðla minnkar.  En það virðist nú þegar vera að gerast samanber þessa frétt; http://www.dv.is/sandkorn/2009/1/26/halldor-rekinn-ut/

Ég tek fram að eflaust eru forsvarsmenn Sjálfstæðisflokksins besta fólk.  En þau virðast vera algjörlega siðblind enda alinn upp í anda þeirrar græðgi og hroka sem einkennt hefur flokkinn um langa hríð, eða frá því að Davíð Oddsson komst í forsvar fyrir hann með dyggum stuðningi Hannesar Hólmsteins, Kjartans Gunnarssonar og Jóns Steinars.

Nú gott fólk liggur fyrir að mynduð verður minnihlutastjórn Samfylkingar og Vinstri Grænna, með stuðningi Framsóknar og Frjálslyndaflokksins.  Þetta hlýt ég að kalla áfangasigur mótmælenda, íslenskrar alþýðu sem geystist fram með skýr skilaboð til stjórnvalda.  Það tók langan tíma að ná eyrum ráðamanna, lengi vel var eins og þau væru með eyrnatapppa, en loks brast stíflan og þá var ekki aftur snúið.  Það er því vel að óska íslenskum almenningi til hamingju með að hafa gert þá hugarfarsbreytingu meðal þjóðarinnar að ekkert verður eins og áður.  En sú saga endar ekki hér.  Nei við verðum að halda ráðamönnum við efnið.  Vera á verði ef við sjáum spillingarmerkin aftur.  Vald spillir, þess vegna ætti að vera tímamörk á bæði hve lengi stjórnmálamenn mega sitja á þingi og vera ráðherrar. 

Ég vil líka þakka Herði Torfa og öllu hans frábæra fólki fyrir þeirra framlag að ýta okkur framúr tímarúmi doðans út á göturnar með potta og pönnur.  Ég geri ráð fyrir að slagkrafturinn minnki í mótmælendum í aðdraganda kosninganna.  En við skulum samt sem áður láta vita af okkur og að við fylgjumst með.  Og ég tel líka nauðsynlegt að halda áfram með undirskriftirnar og átakið Nýtt Ísland, það er framtíðin.  Við lifum núna í núinu og því sem þarf að bjarga hér og nú.

Ég vil óska þessari ríkisstjórn alls góðs og vona að þau taki á brýnum málum, vil þó taka fram að ESB umræðan á ekkert erindi inn í þá pollíu.  Hana ber að geyma fram yfir næstu kosningar.  Verkefnin eru ærin þó orkunni sé ekki beint í allar áttir. 

Athugasemdir

[Ásthildur Cesil Þórðardóttir, 27.1.2009 kl. 12:58]

[Katrín, 27.1.2009 kl. 13:01]

hafa frjálslyndir samþykkt að veita þeim hlutleysi? 

[Ásthildur Cesil Þórðardóttir, 27.1.2009 kl. 13:03]

Mér heyrðist á Guðjóni í viðtali nú áðan að það hefði ekki ennþá verið rætt við þá.  En hann sagði að Frjálslyndir myndur taka jákvætt í þá ósk. 

[Sigrún Jónsdóttir, 27.1.2009 kl. 13:34]

Tek undir allt nema að siðblint fólk get ég ekki kallað ágætt fólk

[Ásthildur Cesil Þórðardóttir, 27.1.2009 kl. 13:48]

Nei það er sennilega rétt hjá þér Sigrún mín.  En það er einmitt eðli siðblindunnar að finna enga sök hjá sér.  Ætli hún sé ólæknanleg ?

[Herdís Alberta Jónsdóttir, 27.1.2009 kl. 13:56]

Hrædd um að hún sé ólæknanleg................. flottur pistill og enn og aftur það sem margir eru að tala um, þú kemur þessu bara svo vel í orð..... Það er líklega erfitt að sjá spillinguna ef maður þekkir ekkert annað og er partur af henni.... þeir sem ekki vöknuðu á síðustu mánuðum eru illa haldnir.

[Freyja (IP-tala skráð) 27.1.2009 kl. 14:28]

Var á fundi í síðustu viku þar sem hagfræðingur hélt erindi.  Hann sagði að það hefði verið rannsakað að 2% mannkyns væri siðblint, en siðblindir dragast að völdum og peningum. Hann sagði einnig að í bankakerfum væru 3-5 % siðblindir.  Segir þetta okkur eitthvað?

[Ásthildur Cesil Þórðardóttir, 27.1.2009 kl. 14:53]

Freyja þetta segir heilmikið um valdastrúkturinn.  Og við eigum og þurfum að vera a verði.  Þessi nýju gæði fólksins sem ætlar að bjarga okkur er einmitt tilkominn vegna okkar mótmæla, látum þau finna að við erum ennþá á verði.

Takk Dísa mín.  Það er alveg rétt, þegar fólk er innan um siðblingingja, og hlustar á slíkt daginn út og inn, verður það samdauna spillingunni, og hættir að greina rétt frá röngu. 

[Ásdís Sigurðardóttir, 27.1.2009 kl. 15:48]

Ég lít inn reglulega

[Linda Linnet Hilmarsdóttir, 27.1.2009 kl. 15:54]

Knús knús í hús og ljúfar góðar kveðjur......

[Sigrún Þorbjörnsdóttir, 27.1.2009 kl. 17:05]

Ég hjó eftir þessu sama hjá Geir. Ótrúlegt hvað stólarnir þeirra eru merkilegri heldur en fólkið í landinu. Ég geri ráð fyrir að Íslendingar séu búnir að uppfæra gullfiskaminnið yfir í stálminni. Við látum ekki fara svona með okkur aftur. Knús og takk fyrir pistilinn.

[Jenný Anna Baldursdóttir, 27.1.2009 kl. 17:39]

Heyr, heyr, Ásthildur.

[Ásthildur Cesil Þórðardóttir, 27.1.2009 kl. 18:02]

Þú ert krútt Ásdís mín

Takk sömuleiðis Linda mín.

Knús Helga mín

Svo sannarlega vona ég það Sigrún mín.  Stálminni skal það vera

Takk Jenný mín

[Gunnar Skúli Ármannsson, 27.1.2009 kl. 21:44]

Sæl Ásthildur, mjög góð færsla hjá þér og ég tek undir hana heilshugar. Nú er um að gera að breyta starfsreglum innan stjórnsýslunnar þannig að það verði ólíft fyrir snákana. Þá munu þeir hypja sig.