Söngvakeppni Sjónvarpsins.

Eigum við ekki aðeins að lyfta huganum upp úr öllum þessum vangaveltum um pólitík, svik og spillingu og tala um söngvakeppnina.  

Ég er nokkuð sátt við þau lög sem komust í úrslit.  Þetta er svona mitt sjónarmið um lögin.

 

 

 

 

 

 

 

 

 

 

F.U.N.K. Þangað til ég dey, er skemmtilegt lag og grípandi, strákarnir fara afskaplega vel með það, raddirnar eru hreinar og hái tónn söngvarans í lokin algjör gæsahúð.  

Samt held ég að lagið komist ekki áfram, það er of "venjulegt" eða þannig.   Virkilega gaman að þessum drengum.

 

 

 

 

 

 

 

 

 

 

Lagið Amor var valið af dómnefndinni, og ég skil vel þann úrskurð, því lagið er öðruvísi og sérlega skemmtilega útsett með blístrinu og klinginu sem smellur á réttum stöðum.  Ég var strax mjög hrifin af laginu, en því miður þá var ég ekki alveg sátt við flutninginn, Ásdís María syngur mjög vel og allt það, en það var samt eitthvað sem vantaði.  Ég held að þau sitji heima, en er viss um að þessi bæði lög verða spiluð mikið í vor. 

 

 

 

 

 

 

 

 

 

 

Lífið kviknar á ný, sungið af  Siggu Eyrúnu er virkilega skemmtilegt lag, það er svona grískur keimur af því, Sigga fer vel með lagið og er flott á sviðinu, dansararnir eru líka flottar.  

Veit ekki alveg, en þetta lag gæti sigrað að mínum dómi.

 

 

 

 

 

 

 

 

 

 

Von. Verð að segja að ég var dálítið hissa að þetta lag hafi komist áfram.  Ekki af því að lagið sé ekki flott, það er flott, en það virkar bara á mig eins og ég hafi heyrt það mörgum sinnum áður, get bara ekki komið fyrir mig hvar.   Gissur Páll syngur eins og engill, og ég er viss um að enginn hefði gert það betur en hann.  Hann hefur líka útgeislun sem sennilega hefur skilað honum atkvæðum.

En ég held að íslendingar sendi ekki þetta fallega lag út, en það  er bara mín skoðun.

 

 

 

 

 

 

 

 

 

 

Eftir eitt lag.  Þetta lag er mitt uppáhalds.  Það er skemmtilegt, sérstaklega stefið, Gréta hefur þvílíka útgeislun og krúttleg með úkúleleið sitt.  Svo hefur hún afar góða rödd, ég mun því giska á að þetta lag  verði sent út, ef útsendingin heppnast eins vel og í forkeppninni. Gaman líka að sjá höfundana spila með. 

 

 

 

 

 

 

 

 

 

 

Enga fordóma.  Þeir voru flottir og skiluðu þessa lagi vel.  Ég held samt að lagið hafi verið valið út frá textanum frekar en laginu sjálfu.  Því það er ekkert sérstakt.  Eða þá tilþrif Pollapönkarana.  Man vel eftir laginu sem Botnleðja komst með í úrslit.  Margir vildu að sú sveit hefði komist áfram, en það er sama hér við viljum ekki taka sjensa á neinu slíku eftir Silvíu Nótt.  

En þetta er nú bara svona mitt álit og það gildir nú ekki mikið, því sjaldan vinnur lagið sem ég held með.  Svo ég er víst ekki alveg dómbær á landa mína í lagavali.  

En það er hægt að hafa gaman að þessu, lögin eru öll afar frambærileg og myndu öll sóma sér í Danmörku.  Svo er spurning, ætla menn að fara út með lagið á íslensku eða ensku, eða dönsku jafnvel?

Ég hlakka til að eiga notalega stund með sjálfri mér á laugardaginn og fylgjast með þessum ágætu listamönnum.  

Eigið góðan dag elskurnar  

Athugasemdir

[Emil Hannes Valgeirsson, 14.2.2014 kl. 00:28]

Að syngja á dönsku er ágæt hugmynd. Held að það verði annaðhvort strákabandið sem fer út. Lagið hennar Grétu finnst mér þó líklegast til að gera eitthvað í keppninni úti.

[Ásthildur Cesil Þórðardóttir, 14.2.2014 kl. 11:46]

Já af hverju ekki, það myndi falla vel í danina allavega. Já strákarnir eru líka flottir, sérstaklega er söngur F.U.N.K. hreinn milliraddir algjörlega hreinar. Málið er að undirleikurinn í keppninni var á bandi, svo er spurning hvernig tekst til þegar komið er út í alvöru beina útsendingu.

[Ásthildur Cesil Þórðardóttir, 15.2.2014 kl. 21:03]

Það var eitthvað að hljóðinu í keppninni. Sérlega kom þetta vel í ljós í Von, það heyrðist næstum ekkert í söngvaranum á stundum, hann drukknaði í undirleiknum. Einnig var hljóðið eitthvað skrýtið hjá Pollapönkurunum, og í fleiri lögum.