Mín sýn á aðgerðir ríkisstjórnarinnar til aðstoðar heimilum landsins.

Mikið er rætt og ritað um síðustu aðgerðir ríkisstjórnarninnar til bjargar heimilum landsins.  Þar sýnist sitt hverjum.  Sumir hafa fundið aðgerðunum allt til foráttu og láta reiði sína í ljós.  Þar fer fremstur í flokki Árni Páll Árnason, sem ekki getur leynt vonbrigðum sínum með útspil ríkisstjórnarinnar.

Ég hef svo sem ekki mikið álit á Framsóknarflokknum og því síður Sjálfstæðisflokknum í mörgum málum, eins og til dæmis sjávarútvegs- og umhverfismálum, þar sem þeir eru á kolröngu róli að mínu mati. 

En ég er þannig að mér er sama hvaðan gott kemur, og vil vinna því framgang.  Þess vegna finnst mér fólk sem fer með svona neikvæða og hatursfulla umræðu gjaldfella sig algjörlega í umræðunni.  Það er bara ekki hægt að taka mark á svona umræðu því miður. 

Ég viðurkenni að ég hef ekki mikið vit á þessum tillögum, og veit ekki hvort það kemur mér á einhvern hátt til góða, en ef það gagnast mörgum landsmönnum þá er ég alveg sátt við það.  Þessir menn eru þó að reyna að gera eitthvað sem síðustu ríkisstjórn mistókst hrapalega með, þ.e. að reisa skjaldborgina frægu.  Ef til vill er hluti ergelsisins einmitt sú að fólki eins og Árna Páli bar ekki gæfa til þess.   

En ég hef verið að lesa viðbrögð fólks sem hugsar einmitt þannig að það sé sama hvaðan gott kemur.

Jón Steinsson segir:

"1. Pakkinn er helmingi minni en stundum hefur verið talað um (og lofað), þ.e., 150 ma.kr en ekki 300 ma.kr.

2. Það er hámark á skuldaniðurfellingu hvers aðila upp á 4 m.kr sem setur þak á fjáraustur til stóreignafólks (sem líka skuldar mikið)

3. Nokkuð verulegur hluti er fjármagnaður í gegnum bankaskatt svo áhrifin á ríkissjóð eru líklega innan við 100 ma.kr. (Mikilvægt að hafa það hugfast að skallaívilnunin varðandi séreignasparnað kemur náttúrulega niður á afkomu ríkissjóðs.)

Auðvitað verður þetta baggi á ríkissjóði sem ekki má við slíku. En miðað við eindreginn vilja landsmanna til þess að leggja slíkan bagga á ríkissjóð (og skattgreiðendur) þá held ég að við megum vel við una ef þessi pakki setur endahnútinn á þetta mál allt saman".

 

Skynsamlega að orði komist að mínu mati, og málin krufin út frá skynsemissjónarmiði.

 

Afstaða Lilju Mósesdóttir kemur líka fram.

 „Það voru mikil svik við alla þá sem trúðu á mikilvægi norrænu velferðarstjórnarinnar að Steingrímur J. skyldi hafna tillögu minni um almenna leiðréttingu með 4 milljón króna þaki árið 2009. Þess í stað reyndu Streingrímur og Jóhanna að snúa öllu á haus með því að kalla sértækar aðgerðir almennar aðgerðir í anda norræna velferðarkerfisins.“

Þetta segir Lilja Mósesdóttir, fyrrverandi þingmaður Vinstri grænna, en hún er ánægð með aðgerðir sem ríkisstjórnin kynnti í gær til bjargar skuldsettum heimilum, en undrast um leið að fyrri ríkisstjórn skuli ekki hafa farið þessa leið á sínum tíma, þegar talað var hvað mest um skjaldborg fyrir heimilin.

„Nú eru það svokallaðir hægriflokkar sem fara í almenna aðgerð í anda norræna velferðarkerfisins fjórum árum seinna. Ekki nóg með það heldur ætla hinir svokölluðu hægriflokkar að láta hrægammasjóðina greiða fyrir leiðréttinguna (beinu leiðréttinguna og skattafsláttinn) en það fannst Steingrími og Jóhönnu ófært,“ bætir Lilja við.

Hún segir að jafnvel þótt aðgerðirnar í gær dugi skammt til að bjarga þeim sem verst eru staddir, þá séu þær í anda norræna velferðarkerfisins.

 

 

Og Andrea Ólafs:

 "Andrea segir ekki fá betur séð, en þetta sé „bara nokkuð mikið í anda þess sem við í Hagsmunasamtökum heimilanna höfum barist fyrir í mörg ár núna og er loks að koma til framkvæmdar með þeim almenna hætti sem við höfum lagt áherslu á.“

Hagsmunasamtök heimilanna hafa lengi kallað eftir því að loforð um skjaldborg heimilanna yrði efnt og Andrea telur greinilega að vatnaskil hafi orðið í umræðunni um skuldamál heimilanna.

„Mín fyrstu viðbrögð eru því jákvæð, mér líst ákaflega vel á að farið verði í þessar aðgerðir strax á næsta ári , en hefði þó lagt til að hafist yrði handa núna strax með bankaskatti um áramótin,“ bætir hún við".

 

Fleiri hafa tekið í svipaða strengi.  Þessu fólki tek ég mark á í þessu sambandi. 

Mér finnst einhvernveginn að okkur beri að grípa þann bolta á lofti sem ríkisstjórnin hefur kastað upp.  Mér fannst líka gott hjá þeim að ráða hóp sérfræðinga til að vinna að þessum málum, og sýnist að þeir hafi fengið frjálsar hendur með það. 

Það gerir ekkert annað en að svekkja og ergja fólk þegar menn eru endalaust að fá útrás fyrir eigin vandamál með því að djöflast í öllu sem reynt er að gera vel.  Það er þó verið að reyna.  Og eigum við ekki að bíða og sjá hvernig tekst til, og leyfa því að koma í ljós áður en drullað er yfir allt og alla?

Bara spyr. 

Mín tilfinning þegar ég hlustaði á þann mann sem kynnti tillögurnar að þarna væri eitthvað alveg nýtt og notalegt og að menn hefðu virkilega lagt sig fram um að gera það besta úr öllu.  Auðvitað er aldrei hægt að gera öllum til hæfis.  Það er einfaldlega ekki hægt, en þegar það er sýnilegt að verið er að vinna af heilindum að því að lagfæra það sem brást í hruninu, þá ber okkur einfaldlega að gefa því tækifæri á að þróast.  Við eigum að standa saman sem þjóð um að vernda okkar fólk sérstaklega gegn hrægammasjóðunum og ofurríkum bönkum sem hafa makað krókinn illilega allan tímann þegar hinn venjulegi maður er að missa allt sitt. 

Illgirni, hatur og öfund eiga afskaplega lítið upp á pallborð hjá fólki svona yfirleitt.   

 

 

Athugasemdir

[Jack Daniel's, 2.12.2013 kl. 15:11]

Lestu þetta Cesil.

http://skessuhorn.is/skessuhorn/adsendar-greinar/nr/182427/

[Ásthildur Cesil Þórðardóttir, 2.12.2013 kl. 16:06]

Takk fyrir þetta Keli minn, já þarna er önnur sýn, ég ætla að sjá hvernig þetta snýst allt saman.  En á meðan ættu menn að minnka skítkastið. Eins og ég segi ég þekki þetta ekki, en vil vera bjartsýn.

[Jóhann Elíasson, 2.12.2013 kl. 16:12]

Ég hef skoðað þetta töluvert og sé ekki betur en að þarna séu loksins komnar aðgerðir sem eitthvað vit er í.  Það var vitað með 110% leiðina að hún væri í besta falli eins og að pissa í skóinn sinn (enda er LANDRÁÐAFYLKINGIN fræg fyrir svoleiðis úrræði) enda hefur það komið í ljós að yfir 70% þeirra sem fengu það úrræði eru í mjög miklum fjárhagserfiðleikum í dag.  Enda sér það hver heilvita maður að þegar þú skuldar meira en sem nemur eignum þá áttu ekki þér  viðreisnar von....... 

[Ásthildur Cesil Þórðardóttir, 2.12.2013 kl. 16:15]

Takk fyrir það Jóhann.

Var að sjá ályktun frá Dögun, sjá hér:

Til fjölmiðla

Ályktun vegna tillagna ríkisstjórnarinnar um leiðréttingu verðtryggðra fasteignalána

Framkvæmdaráð Dögunar fagnar því að loksins hafi verið gripið til almennra aðgerða til leiðréttingar á stökkbreyttum lánum heimilanna.   Tillögur sérfræðinga ríkisstjórnarinnar stefna í rétta átt og falla að verulegu leyti að þeirri stefnu sem Dögun lagði upp fyrir síðustu Alþingiskosningar.

Stórum áfanga er náð með því að stjórnvöld viðurkenni forsendubrest í verðtryggingu lána og að sótt skuli vera í ránsfeng kröfuhafa til að bæta fjölskyldum hluta af tjóninu sem óábyrg bankastarfsemi leiddi af sér.

13% niðurfærsla nær hins vegar skemmra en æskilegt hefði verið og mun ekki færa til baka nema örlítið brot af þeim 300 milljarða hagnaði sem stóru bankarnir þrír hafa bókfært frá árinu 2008.

Mikilvægt er að lengra verði gengið í leiðréttingum verðtryggðra lána og sérstaklega brýnt að námslán og sjálfskuldarábyrgðarlán verði einnig leiðrétt til sama vegar.

Barátta almennings fyrir réttlæti og víðtækari leiðréttingum heldur því áfram og málaferli munu vonandi leiða í ljós að verðtrygging lána er bæði siðlaus og ólögmæt.

Brýnt er að bæta réttarstöðu neytenda gagnvart lánastofnunum, afnema verðtryggingu og koma á sanngjörnu og hagkvæmu húsnæðiskerfi þar sem leigu- og búseturéttaríbúðir geta leyst öfgafulla séreignarstefnu fortíðarinnar af hólmi.

2.desember 2013

Fyrir hönd Framkvæmdaráðs Dögunar Benedikt Sigurðarson formaður framkvæmdaráðs (GSM 869-6680) [e-mail]  

Það er ekki verið að reyna að leysa öll heimsins vandamál.  Heldur er þetta fyrsta skref í rétta átt, sem ber að fagna, en um leið leggja áherslu á næstu skref.  

[Marinó G. Njálsson, 2.12.2013 kl. 18:46]

Tek undir með þér, Ásthildur.  Þetta er kannski ekki fullkomin aðgerð, en stærsta skref í rétta átt sem tekið hefur verið af stjórnvöldum frá hruni.

[Guðmundur Ingólfsson, 2.12.2013 kl. 21:13]

90 miljarðar er einn fjórði af stóruloforðunum 70 miljarða borgha skuldarar sjálfir. Á kjörtímabilinu 2009 til 2013 voru skuldir heimilanna færðar niður um 211 milljarða króna. Að auki voru greiddar 74 milljarðar í vaxtabætur til heimilanna. Aðgerðin til að koma til móts við skuldug heimili var því um 285 milljarðar

[Ásthildur Cesil Þórðardóttir, 2.12.2013 kl. 21:56]

Takk fyrir þitt innlegg Marínó, mér var einmitt hugsað til þín í dag, þegar ég var að setja þetta inn.

Guðmundur verðum við ekki bara að vona að þetta sé upphafið af einhverju meira? 

[Ásthildur Cesil Þórðardóttir, 4.12.2013 kl. 11:08]

Góð grein frá Marínó G. Njálssyni: http://eyjan.pressan.is/frettir/2013/12/03/marino-segir-arna-pal-orvaentingarfullan-yfir-thvi-ad-sigmundur-david-standi-vid-lofordid/

[Ómar Geirsson, 7.12.2013 kl. 18:11]

Blessuð Ásthildur.

Átti leið framhjá og vildi nota tækifærið og þakka þér fyrir góðan pistil, og jákvæða sýn á það sem skiptir mestu máli ef eitthvað á að fara á betra veginn.

Og það er sú einfalda staðreynd að ekkert gott gerist ef ekki er reynt að gera eitthvað gott.

Eitt leiðir að öðru og það er tilbreyting að núna er útgangspunkturinn eitthvað jákvætt og gott.

Allar gönguferðir hefjast á fyrsta skrefinu, og það skref er ekki tekið ef alltaf er skammast yfir því að öll skrefin eru ekki tekin í einu.

Í stað þess að vera jákvæður og tryggja að önnur skref séu tekin í kjölfarið.

Til dæmis jólagjöfin í ár, stöðva Útburðinn í eitt skipti fyrir allt.

Enn og aftur takk fyrir góða pistil.

Kveðja að austan.

[Ásthildur Cesil Þórðardóttir, 7.12.2013 kl. 18:22]

Takk vinur, já það er komið nóg af svartagallsrausi og leiðindum, nú þarf að taka höndum saman um að blása glæður í það sem verið er að reyna að gera rétt.