Hvernig er best að taka á barnaníði?

Mikið get ég vel skilið reiði fólks, og sérlega þeirra sem hafa orðið fyrir ofbeldi af hendi þessa manns.  Það er aldrei hægt að réttlæta barnaníð.  Þeir sem þetta gera eru oftar en ekki veikir einstaklingar, en hafa einhvern veginn lag á að koma sér vel svona opinberlega.  Og það er einmitt málið.  Ef þeir sem eiga að gæta barna hlusta ekki á þau þegar þau segja frá, reyna að þagga niður máli af því að "hann er svo góður maður" eða ekki segja frá þessu, því þetta er jú afi þinn.... eða eitthvað álíka, þá er það mitt álit að slíkt fólk er samsekt níðingnum.

Þau vita hvað er að gerast, eða þá þar liggi að baki aðeins grunur, ber þeim að láta þar til bær yfirvöld vita.  Lögreglu, barnastofu, Stígamót, eða bara þá aðila sem vernda börn. 

Þarna var fólk eins og forstöðumenn á Kumbaravogi og yfirmaður á Hótel Sögu, þar sem margir vissu um málið, og þarna á þessum 50 ára brotaferli voru fleiri prestar og kirkjunnar þjónar.  Þetta fólk á sinn stóra þátt í því að maðurinn hefur eyðilagt líf fjölmargra barna.  Þetta fólk á líka að ákæra svo fólk átti sig á að það er líka glæpur að þegja yfir svona málum. 

Sem betur fer hefur vitneskja aukist og alvarleikinn komið betur í ljós.  Samt er þetta til staðar ennþá í allof miklum mæli.  Og verður endalaust þangað til fólk fer að vera betur á verði, gagnvart svona níðingum. 

Þess vegna væri sennilega árangursríkara að gera vitorðsmenn að einhverju leyti ábyrga, þegar ljóst er að þeir hafa vitað en ekki gert neitt í málinu, eða jafnvel þaggað óþægilegar staðreyndir niður.

Fólk verður að átta sig á því hversu alvarlegur þessi glæpur er, þar sem saklaus börn vera fyrir barðinu á glæpamanni.  Og að ef þeir misnota á annað borð eitt barn, er alveg eins víst að fleiri börn verði fyrir barðinu á honum/henni.

En að beita svona menn ofbeldi, eða ráðast að hýbýlum þeirra er algjörlega óráðlegt. Það gerir ekkert annað en að þeir fái ákveðna samúð, sem dregur úr þeirri fordæmingu sem þeir eiga skilið.

Þeir eiga að fá að ganga gegnum lögregluferli, yfirheyrslur og síðan sakarvottorð, þar sem tilgreint er hvað þeir hafa gert af sér, þannig að þeir eigi hvergi að gera nálgast vinnustaði þar sem börn eru í hættu gagnvart þeim.

Hér þarf að taka á þessu mjög svo alvarlega máli að sem bestur árangur náist í því að koma í veg fyrir svona níðingsskap.  Reyna að koma þessum níðingum upp á yfirborðið, og hræða menn og konur frá því að stunda þessa óeðlilegu kynþörf sína, en leita sér frekar hjálpar. 

Karl Vignir í tveggja vikna varðhald

Athugasemdir

[Ásdís Sigurðardóttir, 9.1.2013 kl. 20:08]

Tek undir með þér.

[Ásthildur Cesil Þórðardóttir, 9.1.2013 kl. 20:40]

Gott að vita Ásdís mín.

[Valdimar Samúelsson, 9.1.2013 kl. 21:06]

Fólk verður að læra að kæra öll brot. Þegar lögreglan segir brot fyrnd þá þíðir það ekki að það megi ekki kæra. Þeim ber skylda að taka niður kæru. Það eru allir veikir á sálinni en það er engin afsökun. Brot er brot. Maður sem drepur er afbrotamaður hvort sem hann er í vímu eða annað. Eigum við að undanskilja menn sem fremja glæp í svefni . Já ég er reiður út á lögreglu og réttarkerfið a geta ekki tekið ásvona augljósum málum.

[Ásthildur Cesil Þórðardóttir, 9.1.2013 kl. 21:09]

Ég get ekki skilið af hverju barnaníðingsmál geta fyrnst.  Einstaklingurinn nær sér ef til vill aldrei.  Af hverju á þá niðingurinn að sleppa af því of langt er um liðið.  Svona mál eiga að vera opin endalaust og hana nú.

[Steini (IP-tala skráð) 10.1.2013 kl. 01:26]

Þau eru opin og hanaú. Kynferðisbrot gegn börnum fyrnast aldrei.

[Jón Þórhallsson, 10.1.2013 kl. 11:24]

Hvað myndu fórnarlömbin vilja að gert verði við manninn?

[Ásthildur Cesil Þórðardóttir, 10.1.2013 kl. 11:49]

Steini af hverju er þá alltaf verið að hamra á því að brotin séu fyrnd?

Ég veit það ekki Jón, þekki ekki sársaukan og smánina sem fylgir svona ofbeldi, en ætli þau vilji ekki helst að maðurinn sé lokaður af, svo hann meiði ekki fleiri börn. 

[Ingibjörg Axelma Axelsdóttir, 10.1.2013 kl. 12:31]

Var ekki búið að breyta þessu? Hélt að kynferðisbrot fyrndust ekki lengur.

Hinsvegar kynferðisbrot sem voru þegar fyrnd fyrir breytingu, eru ennþá fyrnd.

[Ingibjörg Axelma Axelsdóttir, 10.1.2013 kl. 12:33]

Annars til þess að svara spurningu þinni þá er ég þeirrar skoðunnar að barnaníðinga eigi að gelda.

[Ásthildur Cesil Þórðardóttir, 10.1.2013 kl. 12:48]

Sammála, það er ekki hægt að hafa þessa menn gangandi lausa innan um börnin okkar.  Hér þarf eitthvað róttækt að gerast.  Og gera fólk ábyrgara fyrir því að segja frá ef það hefur minnsta grun um að svona sé í pottinn búið.  Börnin og sakleysi þeirra hlýtur að vera meira virði en einhver afskaplega ljúfur maður.  POJ

[Svanur Gísli Þorkelsson, 10.1.2013 kl. 13:08]

kynferðisbrot gegn börnum fyrnast svo sannarlega nema ef um nauðgun hafi verið að ræða. Lagaleg askilgreiningin á "nauðgun" verður til þess að flest brot gegn börnum geta fyrnst.

[Ásthildur Cesil Þórðardóttir, 10.1.2013 kl. 13:23]

Ljótt er að heyra.

[Sigurður I B Guðmundsson, 10.1.2013 kl. 15:01]

Hvar er Steingrímur Njálsson???

[Ásthildur Cesil Þórðardóttir, 10.1.2013 kl. 15:14]

Góð spurning, ætli hann hafi ekki fengið nýtt nafn og vegabréf, til að bjarga honum frá almenningi í landinu?

[Jósef Smári Ásmundsson, 10.1.2013 kl. 15:41]

Eftir því sem ég veit best er það nýtilkomið að kynferðisbrot gagnvart börnum fyrnast ekki.Gott ef það kom ekki til 2007.Veit ekki þetta með "nauðgun" sem Svanur er að tala um.En sem betur fer held ég að tímarnir séu að breytast í þessum efnum.En þessi mál virðast tengjast trúarbragðahreyfingum ansi mikið.Kaþólska kirkjan í Þýskalandi var að stoppa af rannsókn þar í landi vegna þess að þeir fengu ekki að hafa sjálfir þar hönd í bagga.Í noregi þar sem ég bý hefur kynferðisbrot Votta Jehóva verið mikið í fréttum undanfarnar vikur.Þeir segjast nú aldeilis taka á þeim málum og fara eftir tilmælum bíblíunnar sem segir að tvö vitni þurfi til að lagður sé trúnaður á orð fórnarlamba.

[Ásthildur Cesil Þórðardóttir, 10.1.2013 kl. 17:32]

Jósef heyrði í útvarpinu áðan að það hafa verið samþykkt lög um það að barnaníð fyrnist aldrei, sem er gott mál.  Mér sýnist það segja frekar mikið um trú að svona viðbjóður skulu þrífast best í skjóli kirkna og trúarbragða.  Fólk virðist lifa í einhverri annari veröld en venjulegt fólk ef það hefur aðhyllst ákveðin trúarbrögð.  Þó eru ekki allir þessi marki brenndir, en alltof oft eru svona mál fylgifiskar klerka, biskupa og slíkra.

[Jens Guð, 10.1.2013 kl. 19:12]

  Það getur ekki verið tilviljun að svona mörg kynferðisbrot hafi átt sér stað í trúfélögum.  Listinn er óhugnanlega langur:  Karl Vignir - aðventístar,  Ágúst Georg - Margrét Möller - Landakotskirkja - kaþólikkar,  Ólafur Skúlason - ríkiskirkjan,  Bjarg,  Guðmundur - Byrgið,  Krossinn,  Ágúst Magnússon,  Gunnar Björnsson,  Kristilegu skólasamtökin í Vatnaskógi - Helgi Hróbjartsson (í kommenti við bloggfærslu upplýsir Magnús Víðir í Noregi að þegar hann hafi verið í Kristilegu skólasamtökunum hafi Helgi ekki verið eini barnaníðingurinn þar)... Þetta er listinn endalausi.

  Það er eitthvað samhengi þarna á milli. Hugsanlega spilar inn í sú trú að guð fyrirgefi allt (það skipti meira máli en hvort fórnarlömb fyrirgefi).  Sennilega spilar inn í að þegar kynferðisbrotamenn láta til skarar skríða innan veggja trúfélags þá upplifi þeir sig vera í vernduðu umhverfi með sinn pervertisma.  Þeir komast upp með þetta og forherðast.

  Þetta er eitthvað sem sálfræðingar og eða afbrotafræðingar þurfa að rannsaka og greina.      

[Ásthildur Cesil Þórðardóttir, 10.1.2013 kl. 20:52]

Sammála, nú er einfaldlega komið nóg af níðinshætti við börnin okkar.  Þetta verður að taka enda.

[Anna Benkovic Mikaelsdóttir, 11.1.2013 kl. 00:14]

Sammála, og vil bæta við að svona meðferð hæfir Jóni Ásgeiri og pabba og Björgólfi og pabba og Bakkavararbræðrum og fl....

[Jósef Smári Ásmundsson, 11.1.2013 kl. 11:06]

Nei.Anna mín þessi meðferð hæfir ekki neinum.En mig langar að bæta við að kynferðisafbrotamenn hafa í flestum tilvikum orðið sjálfir fyrir ofbeldi af þessu tagi á yngri árum.Þessvegna finnst mér að gera ætti meira í forvörnum,þ.e. að bjóða fórnarlömbum afbrotanna upp á ókeypis sálfræðimeðferð auk bótanna.Og mestu skiptir að sjálfsögðu að brotin uppgötvist sem fyrst.

[Þorkell Guðnason, 14.1.2013 kl. 14:10]

Í þessu sambandi verður mér oft hugsað til kjarnyrts svars hershöfðingjans Norman Schwarzkopf:

sem gæti þýtt: Það er hlutverk guðs að fyrirgefa ... Okkar hlutverk er koma þeim á hans fund.

"It is God's job to forgive(Osama Bin Laden). It is our job to arrange a face to face meeting."

General Norman Schwarzkopf (22.08.1934 - 27.12.2012)

[Ásthildur Cesil Þórðardóttir, 14.1.2013 kl. 16:14]

Já Þorkell, það má skoða það.  Allavega er líf barnanna okkar miklu veigameiri en þessara barnaníðinga.  Þau eiga skilið að fá að lifa í því öryggi sem við getum veitt þeim.  Í dag er langur vegur frá því, eins og dæmin sanna.