Síðasti naglinn í líkkistuna.

Þetta er síðasti naglinn í málflutningi ríkisstjórnarinnar að það sé ekki hægt að ná betri samningum.  Fyrst var það Ólafur Ragnar sem gekk í lið með almenningi og nú Eva Joly, fyrir utan ótal jákvæðar umfjallanir í fjölmiðlum erlendis, sem sýna að það hefði átt að tækla málin allt öðruvísi en að gefast strax upp og játa á sig allan klafann, kynna ekki einu sinni okkar málstað. 

Í stað þess að viðurkenna þessar staðreyndir og fara að vinna samkvæmt íslenskum hagsmunum, forherðist ríkisstjórnin og nú segja þeir að stjórnin muni fara frá ef þessum óskapnaði verði hafnað í atkvæðagreiðslu.

Og ég spyr hvað er að þessu fólki?  Af hverju getur það ekki stutt við íslenska hagsmuni og farið eftir þeim göngustíg sem Joly er að benda á? 

Er það vegna skoðanakannanna um að þeir geti beygt almenning til að segja já við klafanum af ótta við hræðsluáróður þeirra?

Ég er alveg viss um að ef þeir hefðu snúið bökum saman með þjóðinni.  Stutt við bakið á Ólafi Ragnari og fagnað ákvörðun hans.  Tekið svo höndum saman við stjórnarandstöðuna og fólkið í landinu hefðu þeir komið út með mun hærri tölur í skoðanakönnun en bara 53%.

Fimmtíu og þrjú prósent daginn eftir allt havaríið og stanslausan áróður ríkisútvarpsins og þeirra sjálfra er nefnilega enginn sigur.  Því þegar rykið fer að sjatna og fólk fer að sjá að við erum að ná eyrum fólks í útlöndum, þá situr eftir lygin um að það hafi ekki verið hægt að gera betur.  Því það er næsta ljóst það var nefnilega hægt að gera svo miklu betur.  Ef þeir hefðu haft fólk sem þekkti og kunni og gat til að senda út og semja, í stað þess að senda pólitískan vin sinn.

Af hverju er þessi þumbaragangur þá?  Ég  verð að viðurkenna að ég skil hann ekki.  Er það bara vonin um að komast inn í ESB, eða liggur eitthvað ennþá meira þarna á bak við sem við ekki skiljum?

Ríkisstjórnin verður líka að átta sig á því að hún er ekki mjög vinsæl.   Það sem gerir að fólk vill hafa hana áfram, er að bæði Sjálfstæðismenn og Framsóknarmenn eru stórskaðaðir eftir setu við völd í yfir 20 ár, og eru hinir raunverulegu hrunmeistarar í raun og veru, ásamt Samfylkingunni.  Því má segja að við séum í pattstöðu eins og dæmið lítur út í dag.  Ef við fellum frumvarpið og þar á meðal ríkisstjórnina, þá er hættan á að Sjálfstæðisflokkur og Framsókn komist að.  Þau spor hræða.  En munu þau hræða fólk til þess að fá yfir sig skuldaklafa fyrir sig, börnin sín og barnabörnin til langs tíma?  Ég er ekki viss um það.

Og svo má líka segja að það er nokkuð ljóst að Hreyfingin og sennilega Frjálslyndi flokkurinn muni bjóða sig fram í næstu alþingiskosningum.  Þar ásamt Vinstri grænum eru komin fram öfl sem eiga engann beinan þátt í hruninu.  Það getur því orðið kostur fyrir þá sem vilja ekki Icesaveklafan og ekki stóru stjórnarandstöðuflokkana og ekki ESB. 

Best væri að litlu framboðin annað hvort byðu fram saman, eða mynduðu kosningabandalag.  Borgarahreyfingin hefur staðið sig vel á vaktinni.  Þau hafa verið samkvæm sjálfum sér og eins og þau sögðu, verið gluggi almennings inn á Alþingi, opnað augu almennings fyrir fíflaganginum sem þar  viðgengst. 

Svo er alltaf möguleiki á því að forsetinn myndi utanþingsstjórn til að fara með völdin í landinu.  Það er ljóst í mínum huga að mikill meirihluti þjóðarinnar vill ekki láta nauðga upp á sig þessum vonda samningi.  Það er því ekki fallegur leikur að setja dæmið upp svona.  Að með því að hafna samningnum fari stjórnin frá.  Það er álíka ósmekklegt og að stjórnin neyddi samherja sína í ríkisstjórninni til að samþykkja hann þvert á vilja sinn, og þar með svíkja drengskaparheit sín um að kjósa samkvæmt sinni sannfæringu. 

Þið hefðuð átt að hlusta á Ögmund, sem sagði að stjórnin hefði ekki leyfi til að fara frá.  En nei það ætlið þið ekki að gera samkvæmt útspili viðskiptaráðherrans.  Nú skuluð þið kjósa rétt eða taka afleiðingunum.  Um leið og þið gerið þetta, setjið þið bönd á lýðræðið.  Það sama lýðræði og okkur var lofað að yrði virkt þegar þið kæmust að. 

Ef þetta er útspilið sem á að leika til að knýja fram vilja ykkar, þá held ég að það muni ekki takast, vona ekki.  Fólk verður að hætta að láta kúga sig til að taka ákvarðanir vegna ótta um afdrif.   Það hefur sýnt sig að allur hræðsluáróðurinn sem stjórnin hefur haldið uppi undanfarið ár, er ekki á rökum reist.  Og nú hefur Eva Joly bæst í hóp þeirra sem eru að bjarga okkur frá glötun, með sínu framlagi. 

Ég bið ykkur því að íhuga á hvaða leið þið eruð.  Það gæti farið svo að þið stæðuð einangruð og rúin öllu trausti, og flokkar ykkar í rúst, ef þið ætlið ekki að taka fjölda áskorana um að taka höndum saman við okkur hin, og þá sem tala máli okkar erlendis. 

Með því að snúa bökum saman og tala einum rómi til hagsbóta fyrir Ísland, getum við náð miklu betri árangri, og sýnt fram á að það er verið að fara illa með okkur af stórum þjóðum á þann hátt að ofbeldi kallast.  Eva Joly hefur líka sýnt fram á þann flöt að bæði bretar, hollendingar og allt regluverk ESB á sök í málinu, alveg eins og þeir ráðamenn hér sem sváfu á verðinum, og gáfust svo allt upp, þegar bretar og hollendingar hnerruðu.  Þið ætlið ekki að gefa okkur neitt tækifæri, af því að það má ekki viðurkenna að þið hafið haft rangt fyrir ykkur allan tímann. 

Þá verður hér um að litast eins og Eva Joly segir, engir eftir nema fiskimenn og fiskvinnslufólk, ég kann að flaka, Addi Kitta Gau líka.  En ég held að menntamennirnir og allir hinir verði að vera með líka.  Viljum við kasta öllu frá okkur, bara til að þurfa ekki að viðurkenna mistök?

Joly harðorð í garð Hollendinga

Athugasemdir

[Ragnar Gunnlaugsson, 8.1.2010 kl. 11:50]

Nú líkar mér við þig.

[Ásthildur Cesil Þórðardóttir, 8.1.2010 kl. 11:58]

Stundum hittir maður naglann á höfuðið þó líkistunagli sé

[Þorsteinn Árnason (IP-tala skráð) 8.1.2010 kl. 13:59]

Þú slærð engin vindhögg. Förum við ekki að verða tilbúin :))

[Ásthildur Cesil Þórðardóttir, 8.1.2010 kl. 14:15]

jú við verðum tilbúin.  Þetta verður maður á mann barátta, svo er bara spurning hvort lýðræðið sigri, eða við sitjum áfram í böndum fjórflokks og spillingar.

[Ásdís Sigurðardóttir, 8.1.2010 kl. 14:35]

Gæti ekki verið meira sammála, æðislegar myndir hér að neðan.

[Ásthildur Cesil Þórðardóttir, 8.1.2010 kl. 14:42]

Takk Ásdís mín. 

[Jóhann Elíasson, 8.1.2010 kl. 14:48]

Góð grein.  Ég er alls ekki viss um að það væri nokkuð vera að SjálfstæðisFLokkinn og Framsókn yfir sig núna, það getur ekki orðið verra en það sem við höfum núna.

[Ásthildur Cesil Þórðardóttir, 8.1.2010 kl. 21:57]

Ég er farin að hallast að því líka.  Hafði nokkra trú á þessu fólki í byrjun.  En er að sjá betur og betur að Samfylkingin og hluti af Vinstri Grænum stundar undanlát við breta og hollendinga, til að styggja þá ekki, svo þeir taki við okkur inn í ESB.  Þetta er algjör sturlun og á vonandi eftir að setja þetta fólk í einangrun og helst í fangelsi fyrir landráð.

[Jóna Kolbrún Garðarsdóttir, 9.1.2010 kl. 03:13]

Heyr, heyr

[Ásthildur Cesil Þórðardóttir, 9.1.2010 kl. 11:51]

Takk fyrir það Jóna Kolbrún.

[Kristinn (IP-tala skráð) 10.1.2010 kl. 21:48]

Ég er kominn með æluna upp í háls af öllu þessu kjaftæði. Það er kominn tími til að hjálpa heimilum landsins, þ.e. á ÍSLANDI !  Mér er andskotans sama um heimili í Bretlandi og Hollandi. Steingrímur J(údas) ætti að gera sér grein fyrir því að fólkið sem hann er að setja í þessa brjáluða skuldaklafa, eru ATKVÆÐI í næstu kostningum, og það verður rækilega mynnst á það þegar þar að kemur. Mundu það Steingrímur, að nú gleymir fólkið ENGU !!! EKKI ÉG.

[Ásthildur Cesil Þórðardóttir, 10.1.2010 kl. 22:26]

Nei við skulum ekki gleyma þessu máli í næstu kosningum, sem gætu orðið fyrr en seinna, sýnist mér á öllu.