Veður og vor á Ísafirði.

Veðrið er eins og best verður á kosið þessa dagana.  Enda fer snjórinn hratt.

Þessar voru teknar í gær.

eins og sjá má eru menn farnir að undirbúa vorið hér á Ísafirði eins og annarsstaðar.

 

Ísafjarðarlognið auðséð.  Eins og heimamenn kannast við.

Stubbur á leið á Tai Kwon Do æfingu.

Þessar eru síðan í morgun.  Bestu vinir á morgnana.

Sleeping beauti.  Hún er ekki ennþá komin á rétt ról eftir páskana sú stutta

En allt gengur samt sinn vana gang á morgnana.

Skóli, leikskóli og vinna bíða fjölskyldunnar.

Albúin nema hún týndi hestinum sínum.

Og áfram með logið í morgun.  Nú er sólin smám saman að brjótast fram. 

Eigið góðan dag elskurnar. 

Hin nýja tegund mannúðarsamtaka og stuðningamannafélög.

Já tískan í dag er að stofna mannúðarsamtök kring um sjálfa sig nú eða stuðningsmannafélag.  Þá þarf ekki að gefa neitt upp til skatts. 

Það væri fróðlegt að fá nánari vitneskju um þessi mannúðarsamtök og stuðningamannafélög og hversu víðtæk þau eru. 

En hér eru dæmi:

 

15.4.2009 | 16:14

Bjarni Benediktsson skilgreinir sjálfan sig sem mannúaðarsamtök og greiðir ekki skatta af kosningaframlögum - sjá hér

Mannúaðarsamtök hans heita:  Bjarni Benediktsson                                                  Stekkjarflöt 8, 210 Garðabæ                                                  Stuðningsmannafélag BB - Blikanesi 23                                                  kt.: 561006-0240                                                  Forsvarsmaður:  Gunnlaugur Sævar Gunnlaugsson Af öllu því fjármagni sem hann hefur safnað hefur hann hvorki gefið upp né greitt skatta af þeim!Hann staðfesti þetta í viðtali við Mannlíf maí 2008 - en vildi ekki sýna bókhald sitt!! Stuðningsmannafélag BB
Blikanes 23
IS-210 Garðabær
Kort   Kennitala:

561006-0240

 

http://www.mannlif.is/ordromur/nr/1186

Hér til viðbótar eru nokkrir sem hafa stofnað stuðningsmannafélög.  Og ég segi nú bara, ef þetta er gert til að þurfa ekki að standa skil á bókhaldi eða skila inn sköttum, þá spyr ég eins og fávís kona, er þetta ekki fólki sem er að setja okkur hinum leikreglurnar, og er þetta ekki fólkið sem gengst í vþí að við hin stöndum skil á hverri krónu sem kemur inn?

 

Eignarhald2 júní. 2008

Stjórnmálamenn hafa sagt að nauðsyn sé að vita hverjir eru eigendur fjölmiðla. Ekki síður er áhugavert að vita hverjir eru eigendur stjórnmálamanna. Í nýjasta Mannlífi er fjallað um neðanjarðarhagkerfi tuttugu íslenskra stjórnmálamanna. Þeir geta safnað milljónum án þess að komi nokkurs staðar fram. Hér má sjá lista yfir stjórnmálamennina. Meira um málið í Mannlífi.

 Árni Páll Árnason alþingismaður, Túngötu 36 a.Félag um framboð Árna Páls Árnasonar, Túngötu 36 a 8.

Árni Páll er sjálfur forsvarsmaður. Kennitala: 531006-0970

 Birgir Ármannsson alþingismaður, Víðimel 47.Stuðningsmenn Birgis Ármannssonar, Unnarbraut 5.Forsvarsmaður er Stefán Jón Friðriksson. Kennitala: 691002-2410.

 Bjarni Benediktsson alþingismaður, Stekkjarflöt 18.Stuðningsmannafélag BB, Blikanesi 23.Forsvarsmaður er Gunnlaugur Sævar Gunnlaugsson. Kennitala: 561006-0240.

 Bjarni Harðarson alþingismaður, Austurvegi 27.Kosningafélag Bjarna Harðarsonar, Austurvegi 27.

Forsvarsmaður er Elín Gunnlaugsdóttir. Kennitala: 551206-1730.

  Björgvin G. Sigurðsson viðskiptaráðherra, Grænuvöllum 5.Kosningafélag Björgvins G. Sigurðssonar, Hrafnhólum 7.

Forsvarsmaður er Tómas Þóroddsson. Kennitala: 671006-1510.

  Guðlaugur Þór Þórðarson heilbrigðisráðherra, Logafold 48. Guðlaugur á Alþingi, félag, Logafold 48.

Guðlaugur er sjálfur forsvarsmaður. Kennitala: 451102-2060.

  Guðni Ágústsson, alþingismaður og formaður Framsóknarflokksins, Jórutúni 2.Stuðningsmannafélag Guðna Ágústssonar, Heiðargarði 18.

Forsvarsmaður er Eysteinn Jónsson. Kennitala: 621206-1250.

  Helgi Hjörvar alþingismaður, Hólavallagötu 9Stuðningsmannafélag Helga Hjörvar, Hólavallagötu 9.

Forsvarsmaður er Þórhildur Elín Elínardóttir. Kennitala: 521006-2260.

  Illugi Gunnarsson alþingismaður, Ránargötu 6a.Félag stuðningsmanna IG, Heiðargerði 120.

Forsvarsmaður er Óttar Guðjónsson. Kennitala: 610906-0950.

  Ingibjörg Sólrún Gísladóttir, utanríkisráðherra og formaður Samfylkingarinnar, Nesvegi 76,Sólrún 2005, Nesvegi 76.Ingibjörg Sólrún er sjálf forsvarsmaður. Kennitala: 510205-0300.Ekki náðist til hennar né aðstoðarmannsins.

 Kristján Möller samgönguráðherra, Marbakkabraut 32.Félag stuðningsmanna KM, Marbakkabraut 32.Forsvarsmaður er Almar Þór Möller. Kennitala: 001006-1540.

 Ragnheiður E. Árnadóttir alþingismaður, Lindarflöt 44.Stuðningsmannafélag REÁ, Lindarflöt 44.Forsvarsmaður er Guðjón Ingi Guðjónsson. Kennitala: 571006-0220.

 Sigurður Kári Kristjánsson alþingismaður, Melhaga 16.Melasól, félag, Melhaga 16.Enginn forsvarsmaður. Kennitala: 701002-3180.

 Þorgerður Katrín Gunnarsdóttir, menntamálaráðherra og varaformaður Sjálfstæðisflokksins, Tjarnarbraut 7.ÞKG stuðningsmannafélag, Tjarnarbraut 7.Enginn skráður forsvarsmaður. Kennitala: 471106-0380.

 Össur Skarphéðinsson iðnaðarráðherra, Vesturgötu 53.Félag áhugamanna um framboð Össurar, Bræðraborgarstíg 52.Enginn forsvarsmaður. Kennitala: 520199-2099.

 Dagur B. Eggertsson borgarfulltrúi, Óðinsgötu 8b.Kosningasjóður Dags B. Eggertssonar, Óðinsgötu 8b.Dagur er forsvarsmaður. Kennitala: 590106-2910.

 Björn Ingi Hrafnsson, fyrrverandi borgarfulltrúi, Hálsaseli 52.BIH stuðningsmenn, Hálsaseli 52.Björn Ingi er forsvarsmaður. Kennitala: 631205-0540.

 Hanna Birna Kristjánsdóttir, forseti borgarstjórnar, Hellulandi 2.HBK félag, Hellulandi 2.Forsvarsmaður er Vilhjálmur Jens Árnason. Kennitala: 461005-0630.

 Kjartan Magnússon borgarfulltrúi, Hávallagötu 42.Stuðningsmenn KM, Víðimel 62.Forsvarsmaður er Birgir Ármannsson. Kennitala: 551097-2269. 

http://helgafell.blog.is/blog/helgafell/entry/854250/

 

Kosningafundur í Reykjavík Norður. Mín sýn á hann.

Kosningafundur í Reykjavík Norður. Ég hef svona verið að lesa hvað fólk segir eftir fundinn í gær,  og séð að þar er af flestum,  fólkið metið eftir því hve „leiðinlegt“ þar var, eða hrokafullt, eða að hann hafi nú verið ágætur en enginn trúi honum lengur, og þessi var flottust.   Sem sagt af því hvernig það kom fyrir, en ekki hvað það hafði fram að færa.Síðan hvenær hefur einhver bjargað heiminum með snoppufríðleika?  Og er það mælikvarði á gott gengi að hafa hálfan salinn undirlagðan af sínu fólki sem klappaði og blístraði við hvert orð sem hraut af munni?  Ekki það að menntamálaráðherra kemur ágætlega fyrir,  en ég er ansi hrædd um að hana skorti reynsluna sem mikilvæg er til að gegna svo mikilvægu hlutverki.  En það er mín tilfinning. Nei útlit eða málfar skiptir nákvæmlega engu máli í þeirri stöðu sem við erum í gott fólk.  Heldur hreinlega það sem menn voru að segja og leggja til.  Samfylking og Vinstri græn voru spurð sérstaklega um þessi 6000 þúsund störf sem þau væru að byggja upp.  Það fylgdi spurningunni að þau störf sem verið væri að skapa væru ekki til þess fallinn að skapa afleifð störf eða gefa af sér arð, heldur einungis útgjöld.  Það var reyndar fátt um svör.  Og ekki var spurt um tónlistarhúsið sem ákveðið var að leggja  nokkur hundruð milljónir í til að koma í gagnið.  Hús sem skapar ekki tekjur og verður til lengri tíma litið baggi á samfélaginu því eitthvað kostar að reka það næstu árin og lítið mun koma inn á móti í kreppunni.  Þó verð ég að segja stjórninni til hróss að þau hafa unnið meira gott á sínum 70 dögum, eða þeim tíma sem þau hafa setið en fyrri ríkisstjórnir á 18 árum.  Alltaf má samt gera betur.Illugi gerði mest í að rífa niður það sem ríkisstjórnin er að gera, og það var reyndar hjákátlegt að heyra hann tala um að það þyrfti að lækka vexti strax og gera þetta og gera hitt,  hvar hefur hann verið síðastliðið hálfa árið eða svo, eða síðustu ár ef út í það er farið?  Framsóknarmaðurinn átti í erfiðleikum, því hann átti ekki upp á pallborðið hjá klappliðinu.  Sérstaklega var neyðarlegt þegar hann reyndi að segja okkur að Framsóknarflokkurinn væri friðarflokkur sem vildi ekki stríð, með Írak á bakinu er það ansi erfitt.    Hann stóð sig samt ágætlega miðað við málefnin og aðstæður. 

Þráin kom ágætlega út,  nema að það er ekki nóg bara að hlú að heimilum landsins, þó það sé bráðnauðsynlegt.   Það er einfaldlega ekki rétt að með því skapist störf í þjóðfélaginu.  Þar þarf meira til.  Ég vona samt að Borgarahreyfingin komist yfir 5% múrinn og verði alvöru afl.  Það er erfitt að hasla sér völl.  En það er gott fyrir lýðræðið í landinu ef þeim tekst þetta.

Ástþór kom með þá tillögu að setja á stofn markaðsskrifstofu og flytja inn störf, nýta gott fólk sem nú gengur atvinnulaust til þess.  Þessi hugmynd er allra góðra gjalda verð og leitt að heyra að fólk tekur ekki mark á þeim hugmyndum vegna þess að þær koma frá Ástþóri.  Sýnir hve við erum föst í fordómum og þvergirðingshætti, eins og umfjallanir um fundinn sýna mér svart á hvítu. Karl Matthíasson hefur ekki fengið góða einkunn hjá mörgum, leiðinlegur, úti á túni og svo framvegis.  Þó kom hann með vel úthugsaðar og góðar tillögur sem skipta máli.  En fólk hlustaði ekki.  Hvað sagði hann?  Jú hann sagði að það ætti að auka fiskveiðar um hundrað þúsund  tonn.  Það ætti ekki að bæta því ofan á kvóta stórútgerða, heldur færa það í hendur smábáta og krókaveiðibáta um landið.  Sjórinn er fullur af fiski sem ekki má veiða.  Um daginn var höfnin í Vestmannaeyjum iðandi af loðnu, sem ekki mátti hrófla við.  Hér fyrir vestan er sjórinn sjóðandi af síld.  Steinbít hefur verið erfitt að ná í vegna þess að þorskur og Ýsa synda yfir honum, og þau má ekki veiða.  Og það er sama hvaða flokkur annar en Frjálslyndir eiga í hlut, það má ekki hrófla við fiskveiðikerfinu.  Til þess hafa kvótakóngar greitt of mikið í styrki til ákveðinna stjórnmálaflokka.  Ég heyrði í útvarpinu um daginn skipstjóra tala um könnun á brottkasti sem gerð var mig minnir 1991, þá kom í ljós að brottkast var ekki undir fimmtíu þúsund tonnum.   Aflaverðmæti sem hent er beint í sjóinn aftur, vegna þess hvernig kerfið er byggt upp.  Þar fara mikil verðmæti til ónýtis, meðan landið svíður og brennur.  Er eitthvað vit í því?  Ég segi nei.  Það er nefnilega alveg hárrétt hjá Séra Karli að við þurfum að fara að draga fram stígvélin og bretta upp ermarnar og vinna í fiski, það gefur okkur gjaldeyri og er vel til þess fallinn að koma okkur á lappirnar aftur. Hann talaði líka um ferðamennsku, um það eru reyndar allir sammála sem betur fer. Síðan kom hann að því að lækka raforku til Garðyrkjubænda.  Reyndar kom Katrín inn á það líka.  Við getum ræktað allt okkar grænmeti sjálf, og við getum líka flutt út grænmeti.   Við flytum inn grænmeti fyrir fleiri milljarða á ári, sem við gætum svo vel ræktað hér heima, með því að lækka rafmagn til gróðurhúsa yrði það arðbært.  Það kemur okkur líka til góða heitavatnið, við myndum líka fá hollara grænmeti  því hér er minna um eiturefnanotkun í flestum tilfellum.  Ég tók líka eftir því að Sigmundur Davíð hnýtti endalaust í Samfylkinguna, en biðlaði til Vinstri grænna.  Það var ljóst hvað hann var að hugsa.  Stjórnendur stóðu sig að mörgu leyti ágætlega, þó voru þær greinilega hlutdrægar.   Það var til dæmis dónalegt að segja við Karl Matthíasson að það væri óþarfi að fara í fýlu þó menn væru stöðvaðir í málflutningi, þegar forystumenn litlu flokkanna höfðu setið um hálftíma þegjandi meðan hinir fengu að svara óáreittir spurningum úr sal.  Ég hefði haldið að stærð flokka ætti ekki að segja til um lengd andsvara, heldur ætti hver og einn að hafa nokkurn veginn jafnan tíma til að koma sínum málefnum á framfæri við þjóðina.   Þessir fundir hljóta að þurfa að taka mið af því, en ekki hverja fólkið í salnum vill spyrja, því oft eru það fyrirfram ákveðnir aðiljar sem koma fram og spyrja sína menn til að fá viðbrögð. Það verður alltaf erfitt að koma fram með ný framboð.  Það er ekki bara vegna fáránlega strangra reglna, heldur líka vegna þess hve íslendingar eru fastir í gömlu fari, og vilja helst ekkert út af því breyta.  Ef fólk væri víðsýnna og hugsaði lengra en bara um að krossa alltaf við það sama, þá ættu Frjálslyndir að mælast mikið hærra , og ekki síður Borgarahreyfingin sem er beinlínis stofnuð af fólkinu í landinu sem krafðist breytinga, o g jafnvel  Lýðræðisflokkurinn, þó oft séu þau dálítið úti á túni í umræðunni, þá kemur Ástþór með margar góðar hugmyndir sem vert er að taka mark á.  Reyndar þarf að taka mið af því að það eru um 40% fólks sem ekki gefur upp hvað það ætlar kjósa, og það er allstór þögull hluti. En fyrst og fremst þarf almenningur í þessu landi að hafa kjark og þor til að refsa sínu fólki ef það kemst í stjórnunarstöðu og stendur sig ekki vel.  Það eina sem getur bjargað lýðræðinu í dag er að þjóðin sjálf siðbæti þingmenn sína með því að þora að refsa þeim með því að kjósa einhverja aðra tímabundið, til að láta þá finna á eigin skinni að þeir hafa ekki staðið sig.  Það versta sem við gerum er, að láta menn komast upp með hvað sem er, lygi, spillingu, undirferli eða fals.  Það er  mannskemmandi að þurfa aldrei að standa skil orða sinna og gjörða.  Og það er í okkar valdi að halda þeim á mottunni.   Það getum við séð á því hvernig stjórnmálum er komið í dag.  Fólk ráðvillt og veit ekki hverjum treysta skal, og endar svo bara með að setja exið á sama gamla staðinn og ekkert breytist.  Eins og ég hef sagt oft og mörgum sinnum;  Lýðræði kostar.  Það kostar það að við höfum kjark til að láta til okkar taka og umbuna og refsa.  Að við nennum að kynna okkur hvað menn hafa fram að færa og hvað þeir hafa lagt til.   Verkin sýna merkin.  Ekki fagurgali né þöggun. 

Smá mömmó, veður, og ýmislegt skemmtilegt.

Kæru bloggvinir ég hef ekki haft mikinn tíma til að heimsækja ykkur eða vera hér, ætlar að bæta úr því á morgun.  Meðan Sjálfstæðisflokkurinn stendur í því að eyða sjálfum sér, og rífast um það hver eigi mestu sökina, Ástþór og kó hamast á Borgarahreyfingunni hafa fundið sér verðugan andstæðing þar og Framsókn reynir að ákveða hvort þeir eigi að birta bókhaldið eða ekki, þá hef ég verið á fullu við að ganga frá listum, fara yfir meðmælendalista og setja þá í rafrænt form, með dyggri hjálp Rannveigar Bjarna á Akranesi og Ragnheiðar Ólafs.  Það er rosalega mikið mál að komast yfir að lesa og rita inn nöfn kennitölur og heimilisfönd fólksins sem mælir með framboðum.  En nú þarf að skila þeim þannig inn.  Það er líka erfitt að lesa svona eiginhandaráritanir og ef kennitalan er óskýr er maður í vondum málum.  Sem betur fer sprengdum við efra markið á meðmælendalistum og það er bara besta mál.  Svo þurfti að koma Elísabetu einum frambjóðandanum okkar til manna, en hún býr á Ingjaldsandi og þangað var bara fært fuglinum fljúgandi, svo það voru góð ráð dýr.  Eða dýr góð ráð.  En það eru auðvitað mannréttindi að geta verið í framboði og komast til að votta það með undirskrift.

En fyrir hádegi á morgun þarf allt að vera klárt allir listar komnir á réttan stað í okkar tilfelli í Borgarnes.  Og nú loksins er hægt að fara að einbeita sér að sjálfri kosningabaráttunni.  Reyndar hafa okkar menn og konur verið á faraldsfæti og hitt mann og annan og það er gott hljóð í fólki. 

Svo það gleðilegast sem gerðist í dag var að litlu krílin okkar komu heim. 

Veðrið lék við okkur alla páskana en fallegasta veðrið var í gær og í dag, eins og svo oft áður.

Afi leitar að páskaegginu sínu, Úlfur hafði falið það.

Úbbs og þarna var það hehehe

Eins og ég sagði var veðrið fallegt í gær.

Við erum boðin í mat til sonar míns í Hnífsdal.

Og það er óhætt að segja að litirnir séu ferskir og sterkir.

Við vorum boðin í þennan líka gómsæta kalkún og afi gamli var boðin líka.

Þau spöruðu páskaeggin sín allan daginn og þangað til eftir matinn. 

Og afi gamli les einum óþekktaranganum lífsreglurnar. 

Hann var líka kátur og reifur og reif af sér brandarana, eins og hann getur svo vel á góðri stund.

Veðrið var svo ekki síðra í dag.  Það var loftbrú því fólkið var að koma sér heim eftir páskagleðina.

Okkur datt í hug að það væri vel við hæfi að fá nokkra steina frá Júlla til að skreyta glugga kosningaskrifstofunnar, og hér er listamaðurinn að skreyta.

Þeir eru margir ótrúlega flottir, hann er alltaf að gera flottari listaverk.

Fiskinn til fólksins.  Það er mottóið.

Fallegur dagur að kveldi komin og við bíðum með óþreyju eftir að flugvélin komi með okkar kríli.

Meira að segja himininn er dulúðugur, eins og hann vilji gera allt dularfullt.

Þetta er hin eina og sanna Snæfjallaströnd

Og svo eru þær komnar!!!  Sama fóstran og þær fóru með kom með þær heim aftur.

Og það er náttúrulega tekið til hendinni.

Það var líka greinilegt að þeim fannst gott að koma heim.  Hanna Sól hafði mikið orð á því hvað allt væri gott og gaman á Hellu.   Það er svo margt hægt að gera ef þið farið á Hellu amma og afi, sagði hún spekingslega, þar er hægt að fara í klippingu, og svo er hægt að fara í sund.

Og svo þurfti að segja frá og ræða málin eftir matinn.

Skreyta sig með páskaungum og svoleiðis.

Já maður er sko voða fín!!!

Amma nú máttu taka mynd.

Og Ásthildur fékk líka páskaunga.

Svo þurfti að máta sig við töskuna hennar Hönnu Sólar

Ótrúleg þetta barn.

svo var rúminu breytt í rennibraut.

Það er nefnilega svo gaman.

Ég er hætt að láta lesa fyrir mig, sagði Hanna Sól.  Ha sagði amma á ég ekki að lesa fyrir þig.  Jú kannski bara núna, við eigum eftir að klára söguna frá því síðast sagði sú stutta. 

En fyrst þarf að bursta tennurnar og þvo ennibein og augu, nebba, flipa, hökuskegg og hálsakot

Nú eru allir sofnaðir á kærleiksheimilinu nema amma, sem ákvað að skrifa smá mömmó, svona af því að það var svo langt síðan dóttlan mín hefur fengið myndir af skottunum sínum.

Ég vil líka bjóða ykkur öllum góðrar nætur og ég ætla að gefa mér tíma á morgun til að lita við hjá ykkur elskuleg mín.

 

Aldrei fór ég suður.

Aldrei fór ég suður var vel heppnað í alla staði eins og þeirra umsjónarmanna var von og vísa.  Steinsnar frá mér fengu þeir stóra skemmu í þetta skipti, en það heyrðist ekki múkk heim til mín, þó hávaðinn væri mikill.  Mikil traffik var að staðnum, en það truflaði mig ekki neitt.  Þessi nú orðið árvissa hátið er hreint til fyrirmyndar og gefur Skíðavikunni punkt yfir iið.  hafi þeir þökk fyrir.

Hátíð ungra og gamalla, hér er fólk á öllum aldri að hlusta á allskonar músikk.

Villi Valli lætur sig ekki vanta, Matta bloggvinkona Helga og Gummi okkar aðalmúsikant í yngri kantinum... eða segjum svona mið, þú ert nú ungur ennþá Gummi minn, en ekki sama smábarnið og fékk að taka lagið hjá mér á jólaböllunum forðum, þegar þú varst bara 6 ára.

Þessir verða einhverntímann góðir.  En þarna spila Þröstur og Þúfutittlingarnir og það var kántrífjör.

Salurinn var fullur af fólki, allt rólegt og eins og sést á öllum aldri.

Við misstum því miður af stjórsveitinni, en hér eru Fjallabræður að gera sig klára á sviðið, þ.e. hljómsveitin, þeim fylgir síðan allstór karlakór.

Þeir eru flestir frá Flateyri og eru rosalega flottir.  Fóru eða eru að fara til Færeyja, til að votta þeim virðingu sína vegna þess hve Færeyingjar stóðu vel við bakið á okkur í hruninu.  Flottir Flateyringar.

Mikið stuð í strákunum og mikið gaman.

Evíta Cesil fékk að fara með afa og ömmu á djammið.

Með fullan sal af fólki og drynjandi karlakórsraddir Fjallabræðra yfirgáfum við þennan skemmtilega stað, og hlökkum auðvitað til næstu hátíðar.

Flottur og skemmtilegur söluturn, sérhannaður fyrir eigendurna.  Hér er frumkrafturinn á fullu.  Ég held að það sé ekki bara fólkið, heldur líka orkan í fjöllunum og fjölskrúðið í náttúrunni sem blæs okkur í brjóst þeim frumleika sem alltaf er hér hjá okkur.

Ef til vill ekki bæjarins bestu, en héðan þarf enginn að fara svangur. 

Sumir koma þá aðrir fara, hér er Elvar Logi leikari og flotti leikhúsmaður með fjölskylduna að koma sér á tónleikana.  Og þið sjáið í bakið á Evítu og afa að fara heim.

En ég segi bara njótið kvöldsins og restarinnar af páskunum.  Dagurinn í dag var reyndar óskaplega fallegur og sólríkur.  En þær myndir fáið þið að sjá á morgun.

 

 

Gróður - gifting - singstar og bara hvað viljið þið fá að heyra?

Jamm ég sagði ykkur að þessi dagur yrði fullbókaður hjá mér.  Hér er brot af honum.

Vinnan upp í gróðurhúsi er alltaf svo friðsæl og unaðsleg.

Svo var komin tími til að opna skrifstofuna okkar í XF.

Þar var fjölmennt þó ekki hafi verið neitt auglýst opnunin.  Það gefur gott start.

Hér er fólk á öllum aldri

Þessar elskur eru framtíðin okkar.  Og þess vegna mikilvægt að vel takist til.

Formaðurinn okkar undirbýr sig á að fara á hátíðina Aldrei fór ég suður.  Hann hefur gott pláss fyrir auglýsingar  Enda kann hann sjálfur að taka á því.

Margir góðir félagar komu í heimsókn.

svo var það giftingin.  Auðvitað er flott að geta gefið svona einstaka tækifærisgjöf frá flottum listamanni.

Athöfnin fór fram á íslensku og spænsku, því hér sameinuðust Ísland og El Salvador í annað sinn í minni fjölskyldu.

þessi góði maður þýddi jafnóðum orð prestsins yfir á spænsku.

Isobel og Ísaac Logi fylgdust með þegar pabbi og mamma giftu sig.  Nota bene, svona gengur þetta alls ekki fyrir sig í El Salvador.  Fólkið mitt þaðan hefur þurft að aðlaga sig íslenskri hefð eins og við bara gerum að gifta okkur eftir dúk og disk. 

'Eg viðurkenni að ég klökkna alltaf við svona athafnir.  Séra Magnús er líka yndisleg manneskja, þó ég sé ekki kristin þá virði ég hann afskaplega mikils sem manneskju.  Brúðurin var í kjól frá ömmu sinni, þessi flotti kjóll var uppháhaldskjóll ömmu hennar í móðurætt. Er það ekki sætt?

Elsku Rolando og Olga innilega til hamingju með giftinguna, og megi allir góðir vættir vaka yfir ykkur og vernda.

Í dag sameinaðist þessi fjölskylda í eitt.  Ísland- El Salvador.  Megi þeim öllum vel farnast.

Þetta hér nær er babusas uppáhaldsrétturinn minn frá El Salvador. Maiskökur flott kryddaðar með kjöti og grænmeti inní, og svo rosalega vel krydduðu hrásaladi með og rauðlauk  nammi namm.  Enda var þetta tekið fram yfir rosalega flottar hnallþórur íslenskar.

En svona er veðrið, og þarna má sjá húsið þar sem Aldrei fór ég suður fer fram, þangað ætla ég á eftir. Þegar ég skrifa þetta er ég að fylgjast með í beinni útsengingu, og núna er Mammút að spila.

En börnin koma í kúlu til ömmu og afa.  Hér er Evíta litla Cesil.

Það er bara svo spennandi að koma í heimsókn.

Tjörnin sko!!! hehehehe...

Stubburinn fékk singstar um daginn og það hefur verið svona dálítið hávaðasamt undanfarið, hér eru bræðurnir að syngja Abbalag.

Þetta er náttúrulega hin besta skemmtun þannig sko....

Svo fórum við á aldrei fór ég suður.... misstum rétt af stórsveitinni, en hlustuðum á frábæra Fjallabræður.  Ég er að hugsa að það skiptir ekki máli þó einhverjir fari.... það er einhvernveginn orkan hér í fjöllunum og umhverfinu sem ekki verður tekin frá okkur.  Það er bara þannig við verðum aldrei drepinn niður, því um leið og búið er að nappa einhvern burtu, koma þrír nýjir í ljós.  Þess vegna erum við.... og við erum flottust!!!

Ég ætla að koma með nokkrar myndir frá hátíðinni seinna, því nú ætla ég að fara að glápa á sjónvarpið, sleepless in Seattle  fyrst og svo Columbo uppáhaldið mitt.  Svo set ég sennilega inn myndir frá Aldrei fór ég Suður mín elskuleg.  Knús

 

Vor í Vín, veður á Ísó og svoleiðis nokkuð.

Það er nóg að gera hjá mér í dag skal ég segja ykkur.  En fyrst að veðrinu.

Þessi er tekin fyrir um það bil tíu mínútum.  Það er logn  og blíða.  Ég er ennþá bálreið yfir magtuggunni frá verðurfræðingnum á miðvikudaginn um éljaveðrir og rokið sem aldrei kom.  Þetta er nefnilega ekki í fyrsta og verður ekki í síðasta sinn sem menn reyna að koma því að að það sé vont veður á Ísafirði.  Fyrir nokkrum árum að sumarlagi þegar ég var að fara í vinnuna fyrir kl. sjö um morgun, heyrði ég í útvarpinu að það yrði ekki flogið á Ísafjörð og Vestmannaeyjar vegna þoku.  Ég stansaði og horfði upp í heiðskíran himininn og setti puttan út í loftið sem stóð svo kyrrt að það blakti ekki hár á höfði.  Af því að ég er komin með alveg upp í kok á svona vinnubrögðum, þá hringdi ég í fréttamanninn sem þar var.  Ég spurði hvað hann hefði fyrir sér í því að það væri ekki flogið á Ísafjörð vegna þoku.  Nú ég hringdi á flugvöllunn, var svarið.  Nú sagði ég, það er skrýtið hér er glampandi sól og logn.  Getur þú þá staðfest að það verði flogið? spurði maðurinn.  Nei sagði ég, ég er bara kerling út í bæ og get ekki staðfest neitt, en það get ég sagt þér að ef ekki verður flogið á Ísafjörð í dag, þá er það í sjálfu sér stórfrétt.  En ég er nú orðin ansi þreytt á ykkar rangfærslum um veðrið.  HVað heldurðu að ég sitji bara hér og drekki kaffi og segi eitthvað út í loftið, svaraði hann reiður....... já sagði ég einfaldlega, já ég held það bara.  Þegar ég hringdi svo sjálf inn á flugvöll, þá var þar símsvarinn frá kvöldinu áður sem aflýsti flugi þann daginn vegna þoku í REYKJAVÍK.

En ég ákvað með sjálfri mér þegar ég byrjaði að blogga að senda myndir á hverjum degi til að sýna það svart á hvítu að veðrið er ekki svona vont hér, eins og fjölmiðlar hafa komið fólki til að halda.  Og ég hef staðið við það oftast nær.  Hér hafa birst myndir næstum daglega af veðrinu og fólk hefur svo sannarlega séð að hér er oftast dýrindisveður. 

En nóg um það.

Hér er ennþá allt á fullu á Skíðaviku.

Stemning, gott veður og örugglega gott færi.  Hér eru líka frábærar gönguleiðir upp á Seljalandsdal og niður í Tunguskógi.  Hér er líka hægt að vera á skíðum langt fram eftir sumri upp á Botnsheiði og Breiðadalsheiði.

Hér verður svo aðalfjörið í dag.  Aldrei fór ég suður, þeir byrjuðu reyndar í gær, og það var örtröð og bílar allstaðar.  En ég heyri ekki mikið hingað inn.  En aðalslagkrafturinn verður í dag og kvöld.  Þetta húsnæði er nýbyggt af verktakafyrirtækinu KNH, þeir eru mikið í vegagerð og allskonar slíkri verktöku.  Flott hjá þeim að bjóða Mugison og có að hafa hátíðina hér.

Greinilega hafa mínir fuglar verið þarna og komið heim til að ylja sér.

Frída hin sænska.

Vorið er komið í Vínarborg.  Bára mín sendi mér þessar myndir þaðan.

Hér er hún í skólahverfinu.

Eins og sjá má er allt komið á fullt þar að blómstra.

Ungviðið hleypur um.

Hér er svo fallega stelpan mín stóra.

Ég ætla upp í gróðurhús að gera eitthvað gagn.  Við ætlum svo að opna kosningaskrifstofuna kl. eitt í dag. 

Okkar góða forystufólk hér í Norðvestrinu tilbúin í slaginn. 

Svo fer ég í giftingu kl. þrjú, og svo ætlum við að kíkja á Aldrei fór ég suður hjónin.  Stórsveitin á nefnilega að spila, með Íris Kramer sem stjórnanda og við viljum ekki missa af því.  Svo er stutt að fara bara hér í næsta hús. 

En eigið góðan dag elskurnar mínar.

Skíðavikan og fjölskylduskemmtun í Tungudal.

Dagur þjrú í hríðarbyl og roki eins og veðurfræðingurinn ítrekaði ekki minna en þrisvar í sjónvarpi allra landsmanna um daginn.  Vestfirðir voru eini landshlutinn sem það átti við, það var sól allstaðar annarsstaðar.  Það þurfti auðvitað að vara fólk við að koma vestur ekki satt!!! 

Reyndar lætur þetta vonda veður á sér standa, því hér er hið besta veður, þó sólina vanti, en hún hefur auðvitað falið sig vegna snjókomuspárinnar og roksins sem átti að vera.

Var að aka stubbnum upp á dal.  Í dag er fjölskylduhátíð á dalnum.

Ég var svo snemma í því að það voru ekki margir komnir, en kl. 12 á að kveikja upp í grillinu og bjóða krökkunum upp á pylsur, það er furðufatadagur þarna eins og alltaf á föstudaginn langa, og sælgætisregn, krakkarnir máluð, en sú hefði byrjaði einmitt hér á Skíðaviku fyrir mörgum árum.

Fólk er að gera sig klárt í slaginn.

Nú þegar komin smábiðröð í lyfturnar.

Krílin jafnt og þeir fullorðnu eru í allskonar búningum.

Og fjölskyldurnar streyma að úr öllum áttum.  Það verður örugglega fjör hér á dalnum í dag, og ekki spillir veðrið fyrir.

Eigið góðan dag og skemmtilegan, fátt er heilsusamlegra en sameiginleg skemmtun fjölskyldunnar við heilbrigðar íþróttir.

Og verið velkomin á Skíðaviku 09.

Gleðilega páska kæru bloggvinir.

Það er steinhljóð í kúlunni núna.  Úlfur veit ekki hvernig hann á að vera, amma ég var stundum að kvarta yfir stelpunum en nú veit ég ekki hvað ég á að gera án þeirra sagði hann. Það er svo hljótt í húsinu.

Já þær fóru nefnilega óvænt til pabba síns þessar elskur, flugu suður í morgun.  Við afi fórum með þær inn á flugvöll og ég fékk að leiða þær alla leið út í flugvélina og óla þær niður.  Þær voru rosaglaðar að fá að fara til pabba síns. 

En veðrið var rosalega gott.  Ef þið hafið hlustað á veðurfregnirnar í gærkveldi í sjónvarpinu, þá endur tók veðurfréttamaðurinn bara þrisvar að það yrði vont veður á Vestfjörðum, vesta veðrið, það yrði éljaveður og rok á Vestfjörðum, um leið og hann sýndi sól og blíðu yfir allt landið.  Annarsstaðar.  Stundum dettur manni ýmislegt afskaplega neikvætt í hug, þetta kemur alltof oft fyrir, til að það geti verið bara tilviljun.

Þessi mynd var tekin hálf níu í morgun og þið sjáið auðvitað alla stórhríðina og rokið ekki satt?  Nei hér hefur verið mikil flugumferð í allan dag, vegna þess að við erum að fá gesti í heimsókn á Skíðaviku og Aldrei fór ég suður. 

Hanna Sól að fíflast við ömmu sína  Hún fékk að gista hjá Sigurjóni í gær, og reyndar Úlfur líka, svo við vorum bara einar í kotinu við Ásthildarnar, því afi fór aðeins út á lífið.

Nú er enginn lítil sullukolla sem "sullar niður" eins og hún orðar það.  Það er kúkalykt segir hún þegar það þarf að skipta á bleyjunni.  Og svo syngur hún hástöfum allur matur á að fara.... eða Úlli Búlli bí, sem er barnagæla sem ég hef sett saman fyrir krakkana, nú eða bara Allir krakkar eru í skessuleik.  Vá hvað amma saknar þeirra.  Reyndar höfum við nýtt tímann vel í dag upp í gróðurhúsi við að skipta plöntum og gróðursetja. 

Það var tilhlökkun í morgun að fara í ferðalag.

Þau fengu smásleikjó til að láta tímann líða fljótar.

Svo vorum við komin út á flugvöll.

Það vildi svo heppilega til að ein fóstran af Tjarnarborg gamla leikskólanum þeirra var einmitt að fara suður og ætlaði að sinna þeim á leiðinni.  Besta mál að það var einmitt einhver sem þær þekktu.

Og amma fékk að fara með alla leið út í flugvélina og setja þær í sætin sín.  Nú eru þær komnar í skjól hjá ömmu og afa á Hellu.  Nú er um að gera að njóta fríisins

En ég óska ykkur öllum gleðilegra páska, og vona að þið hafið það öll sem best!!

Ég er á kafi í að safna saman pappírum vegna framboðsmála Frjálslyndaflokksins.  Ég er ekki viss um að allir geri sér grein fyrir hve mikil vinna liggur í því að fá alla pappíra bæði undirskriftir frambjóðenda og meðmælendalistana.  Sérstaklega er þetta erfitt úti á landi þar sem langar vegalengdir eru og erfitt að komast milli staða.  Hjá okkur eru sjö bændur í fraboði, og sumir búa afskekkt einn bóndinn alla leið á Ingjaldsandi, þangað er ekki fært nema á snjósleða eða á skíðum.  Konan sú er ekki með fax eða netpóst svo það eru góð ráð dýr.  Þetta mun samt allt saman heppnast, því hér er samstilltur hópur sem vinnur vel og örugglega.  Fólk er líka jákvætt og bjartsýnt.  Við ætlum svo að opna kosningaskrifstofuna okkar á laugardaginn.  Við erum milli Vinstri grænna og Samfylkingarinnar, svo við erum í góðum málum.  Erum reyndar með gott samstarf við Vinstri græna, þar sem þessir þrír flokkar eru saman í framboði til bæjarstjórnar undir merkjum I-lista.  Þannig að við höfum starfað mjög vel saman þetta tímabil.  Samvinna er af hinu góða  og gott fólk getur alltaf starfað saman og lagt hvort öðru lið. 

svona hitt og þetta með fallega litla fólkinu mínu.

Það er margt skemmtilegt að gerast í pólitíkinni, og skrýtið nokk þá er þátttaka almennings í þeirri tík algjörlega í lágmarki.  Annað hvort er fólk dofið af þem raunveruleika sem blasir við þeim, eða það er algjörlega búið að fá nóg af skrumi, óheiðarleika og innantómum loforðum frá frambjóðendum, sama gamla tuggann aftur og aftur. 

Við í Frjálslyndaflokknum hefðum svo sem ekki þurft að skrifa nýja bæklinga, þvi það sem við sögðum  og vöruðum við fyrir tveimur árum er það sama í fullu gildi enn i dag. Svona er þetta bara.

Það er líka fyndið hvernig Sjálfstæðismenn lenda endalaust í að þurfa að synda í skítnum sem þeir hafa sjálfir drullað upp, reyna að kenna einhverjum öðrum um og skilja svo ekkert í af hverju þeir hafa ekki hljómgrunn þjóðarinnar!!!.  Þeir eru nefnilega vanir því að þurfa ekkert að hafa fyrir velgengninni, sauðirnir hafa alltaf skilað sér vel af fjalli.  En þeim hefur heldur betur fækkað, og nú eru bara einstaka sauðir eftir sem trúa blint á almættið.  Allir hinir hafa snúið sér eitthvað annað í sinni leit að betra þjóðfélagi, loksins búnir að átta sig á því að það er líf eftir Sjálfstæðisflokkinn.  Og farið hefur fé betra, segir og skrifa.

En ég ætlaði að senda nokkrar myndir.

Amma taktu mynd af mér og Brandi, sagði skottan mín í morgun.  þau eru bestu vinir og hann kemur alltaf upp til hennar að fá smástrjúk og aðdáun á morgnanna. Nautnadýr þessi köttur.

Skrýmslið litla hræðir hann svo burt.... skil ekki hversvegna

síðasti leikskóladagur fyrir Páska.

Þannig er það bara, gleðin ein.

Það var bara þrítekið í veðurfregnum sjónvarpsins hve versta veðrið yrði á Vestfjörðum yfir páskana, við skulum nú sjá til með það.... Haraldur Ólafsson eða hvað sá ágæti maður annars heitir, gat þess í upphafi veðurfrétta, um miðbik þeirra og svona í restina, svo það færi nú ekki fram hjá neinum að það yrði gott veður um allt land nema á vestfjörðum.  Ætli hann sé á prósendum einhversstaðar? segi nú bara svona.  En við skulum sjá til, hér skal ég senda út veðurfréttirnar daglega til að sjá hvort það verður svona hræðilegt veður eins og hann þurfti að þrítaka.

en það var sundsýning hjá Hönnu Sól og félögum í gær.  Þar voru margri foreldrar ömmu og afar, þessi mynd er tekinn frekar snemma og ekki margir komnir.

Vissuð þið að bringusundið sem við öll þessi eldri þruftum að læra número unó, er erfiðasta sundið.  Í dag læra þau það síðast.  Hver man ekki að þurfa að vera á hrollköldum laugarbakkanum heillengi til að læra hreyfingarnar?  Núna er þeim kennt allt hitt á undan, því bringusundið þarf rosalega samhæfingu líkamans.

Hér eru framtíðar sunddrottningar og kóngar Ísafjarðar.

Og þau stóðust prófið öll.

 

Fengu ekki bara aðdáun mömmu pabba afa og ömmu heldur líka viðurkenningu fyrir vel unnin störf.

Þau eru okkar framtíð.

Kúlan hefur verið full af yndislegum barnabörnum síðan páskafríið

Reyndar eru þessar elskur botnlausar enda von, þau eru að vaxa og þroskast.  Þeirra er framtíðin, og við eigum að hafa það í huga þegar við göngum að kjörborðinu þann 25 apríl.  Við eigum ekki að hugsa aðeins um okkar eigin hag eða að það sé svo gaman að vera með í flotta liðinu, þeim sem hafa alltaf ráðið og komið okkur á kaldan klaka.  Við eigum að hugsa um hvað verður um börnin og barnabörnin, hvar er þeirra hag best borgið.  Þó það sé rosagaman að vera með í Valhallartöffaraslag með flotta fólkinu, þá nær það ekkert lengra en að veita þeim brautargengi til áframhaldandi rústunar, einkavæðingar og klíkuskapar.  Hvað eruð þið að hugsa sem veitið þeim þetta vald, en eruð ekki í klíkunni?  Mér er það hulin ráðgáta og endilega ekki vera svekkt yfir því að við hin skulum hugsa svona.  Þið eruð hvort sem ykku líkar betur eða verr að viðhalda valdastrúktor sem að mínu mati er algjörlega ólíðandi, og mér þætti vænt um að þið útskýrður af hverju þið veljið einmitt það.  Ég bara skil það ekki.

En svo býð ég ykkur öllum góða nótt elskurnar.