Bara svona undir svefninn.

Ég er búin að eiga tilfinningaríkan dag.  Fyrst var að jafna sig eftir frábæran kvöldverð á Hótel Ísafirði, jólahlaðborð eins og þau gerast best.  Maturinn algjörlega frábær og vinur minn Halldór Smára við hljómborðið gaf veislunni glæsilega svip.  Hann er ekki síðri en Villi Valli, og þá er nú mikið sagt.  Strákurinn er algjörlega frábær á hljómborðið.  Svo komu félagar úr Litla leikklúbbnum og sungu, ungir krakkar.  Það er verið að setja upp sjóv með Ellý Vilhjálms, þau sungu eins og englar, og auðvitað Gummi Hjalta þar með gítarinn.  En þau vissu auðvitað ekki að Vilhjálmur Vilhjálms var einmitt hér í skóla, við vorum jafngömul og hann var hér í fjórða bóknáms, eða menntaskóla deild.  Áður en menntaskólinn kom. Þessi yndæli strákur, það var auðvitað áður en hann sjálfur varð frægur, bara bróðir Ellýjar.

Svo í dag fór ég með pabba mínum á jólahlaðborð á Hlíf.  Ákvað að hafa ekki myndavélina með.  En það var þvílíkt dýrð.  Kvenfélgaskonur í Ísafjarðarkirkju sáum um samkvæmið.  Þær voru flottar og allt með glæðibrag.  Skemmtiatriði og alles.  Séra Magnús Grætti mig alveg óvart, með sannri jólasögu frá upplifun hans sjálfs.  Pabbi minn skemmti sér mjög vel, og við sátum þarna í góðu yfirlæti í klukkutíma og vorum leyst út með jólagjöfum.  Innilega takk elsku Gei Gei og þið allar hinar fyrir okkur pabba.

Svo fór ég í Kapelluna í Hnífsdal, þar sem Evíta og fullt af litlum yndislegumbörnum voru að leika hátíðarleik.  Séra Magnús Var þar fremstur í flokki við að koma þessu heim og saman.  Verð að segja það hér að hann er alveg sérstakur maður.  Ég er ekki viss um að ég hefði yfirgefið kirkjuna ef hann hefði verið prestur hér þá.  En ekki af því að ég trúi á krist eða biblíuna.  Heldur bara af því að hann er svoddan ljúflingur.

Engill bíður eftir að leika. Reyndar átti ég þarna í kapellunni ekki færri en átta barnabörn.

Tvær Sólveigar Huldur og mamma Tinna. Yndislegar allar.

Fermingarbörn frá Hnífsdal spiluðu þarna stóra rullu.  Og ég var einmitt að hugsa í kvöld að þó svona langt sé liðið frá því að Hnífsdalur var innlimaður í Ísafjörð þá eru þau samt sem áður Hnífsdalingar, stoltir og flottir og sérstakir.

Alvaran alveg á fullu, beðið eftir að koma fram, og auðvitað verður þurrkað framan úr dömunni áður en hún fer fram.  En þetta er lítill engill.

Skaftafjölskyldan mín, vantar bara Daníel og Júlíönu en þau búa í Reykjavík með mömmu sinni.

Nokkur af barnabörnunum og svo séra Magnús.

Kvennakór Hnífsdalskapellu. Og ég fór að hugsa hversu margir kórar eru til hér.  Sennilega allt að tíu ef talið er.

Hér er svo lítill frændi minn að spila. Litla systir var líka að spila, en ég var þá með Evítu litlu á hnjánum svo mér tókst ekki að taka mynd af henni.

Sameinaður gospelkór og kvenfélagskór Hnífsdalskirkju.

Og með óminn um hin fyrstu jóla í eyrum mér læddi ég mér út úr þessari yndslegu athöfn.  Því ég var með steikina í ofninum og þurfti að koma mér heim.  En ég var með tárin í augunum og hjartað fullt af söknuði og tærum kærleika.  Þetta var bara svo fallegt.  Og þó ég sé ekki kristinn, þá er ég að átta mig á því hvað það er sem gerir kirkjurnar og söfnuðina að því sem þau eru. Það er ekki biblían, það er ekki heldur stofnunin Kirkja.  Það er fólkið sem af kærleika gefur allt sitt til af kærleikanum.  Ég hef nefnilega stundum velt fyrir mér af hverju skyggnir sjá ljós yfir kirkjum.  Það er uppsafnaður kærleikur þeirra sem taka þátt.  Þess vegna held ég að prestar eins og séra Magnús Erlingsson skerpi ljósið yfir kirkum sem hann kemur við sögu, á meðan ljósin í kirkjum sem til dæmis séra Gunnar heyrir til, deyfir ljósin sem þar skína, því miður. Því fyrir mér er kærleikurinn alheimsmál, ekki mál einhverra sem telja sig til ákveðinna söfnuða.  Og Hver sá sem miðlar og ræktar kærleikann lætur það ljós skina og gefur öllum ljós og vellíðan.

En ég sagði ykkur frá því að ég keypti kræklinga í gær á torginu af strákunum í björgunarsveitinni.  og það kostaði mig 500 kr. kilóið.  sem er ekkert verð fyrir þá eðalvöru.  En við höfðum kræklingana í forrétt í kvöld og hér er litla krílið mitt að gæða sér á því sælgæti. Ég læt því myndirnar tala.

Nammi namm og hún glommaði í sig kræklinga.

Og svo er að opna skelina.

Já það þarf að beita kröftum.

Og smá leikaraskap.

Svo er lesið, og farið að sofa því á morgun kemur mamma, sú besta í heimi.  Og við hlökkum öll til að fá hana til okkar.

En þessi dagur var dýrð í upphæðum, bæði gleði og sorg, en fyrst og fremst þakklæti fyrir allt það góða og yndislega sem fólk er að gera hvort fyrir annað. Til að gleðja og hugga og bara vera til öðrum til uppbyggingar og gleði.  Innilega takk fyrir mig.

 

 

Athugasemdir

[Birna Dis Vilbertsdóttir (IP-tala skráð) 6.12.2009 kl. 23:26]

[Sigrún Þorbjörnsdóttir, 6.12.2009 kl. 23:51]

Ásthildur er flott með kræklinginn. Ég vildi að ég gæti fengið mínar dætur til að smakka svona lostæti  Kærleikurinn er ómetanlegur. Ef allir miðluðu af kærleik eins og þú væri heimurinn betri.

[Jóhanna Magnúsdóttir, 6.12.2009 kl. 23:56]

Var sjálf í kirkju í kvöld að prédika, það var vissulega notaleg stund; sendi þér upphafsbænina mína:

Bæn
Leiddu mig Guð - eftir þínu réttlæti, sestu niður með mér og rabbaðu við mig, gerðu beina brautina þína fyrir mér og gef mér ljós þitt svo ég sjái hvert ég á að stefna.  Gefðu mér daglegt brauð  og hjálpaðu mér við að fá að taka þátt í að baka það.  Sendu mér áfram englana þína. Því að þú ert vinkona mín og vinur sem gengur með mér í gleði og sorg.  Amen

[, 7.12.2009 kl. 00:05]

Þar held ég Ásthildur mín að þú hafir fundið innihald trúarinnar  Ég yfirgaf líka kirkjuna fyrir löngu en trúin mín kom aftur til mín og gefur mér styrk og von. Eigðu góða nótt og njóttu samfundanna við Báruna þína þegar hún kemur

[Jóna Kolbrún Garðarsdóttir, 7.12.2009 kl. 01:02]

[Jóhann Elíasson, 7.12.2009 kl. 04:41]

Alltaf er gott að koma á síðuna þína.  Mér líður alltaf betur á eftir.

[Skafti Elíasson, 7.12.2009 kl. 05:06]

Já alltaf gaman að skoða bloggið þitt mamma, takk fyrir það.

[Jónína Dúadóttir, 7.12.2009 kl. 08:00]

[Jenný Anna Baldursdóttir, 7.12.2009 kl. 08:10]

[Guðrún Emilía Guðnadóttir, 7.12.2009 kl. 08:42]

Séra Magnús er öðlingur, skemmtilegri og yndislegri mann erfitt að finna.
Þessi tími með börnunum okkar í kirkju eða ekki kirkju er ljósið elsku Ásthildur mín, ég tel ljósið vera sannleikann því við getum ekki neitað því, það er þarna.
Ég trúi á æðri mátt og það er fyrir mér yndisleg tilfinning.

Hefði viljað vera í messu hjá henni Jóhönnu vinkonu okkar, en það verður einhvern tímann.

Myndirnar eru flottar að vanda.

Kærleik í kúlu
Milla

[Dísa (IP-tala skráð) 7.12.2009 kl. 10:14]

Yndislegt að sjá og að helgin þín var svona góð. Mín var svona líka, ég var meira og minna umkringd góðu fólki og vinátta og væntumþykja umlukti allt og alla. . Svo verður dagurinn í dag frábær hjá ykkur að fá mömmu og dóttur heim.. Eins og þú sagðir í gær, ég held að ekkert geti slitið taugina milli okkar elsku vinkona mín.

[Ásthildur Cesil Þórðardóttir, 7.12.2009 kl. 13:34]

Gaman að heyra Dísa mín.  Það er yndislegt að eiga góðar stundir með fjölskyldunni og aldrei þýðingarmeiri en einmitt á þessum tíma.  Þessi taug er römm elskuleg mín og hún slitnar ekki svo glatt. 

J'a Milla mín það hefði verð gaman að hlýða á Jóhönnu.  Hún er ein af þessum kærleiksríku manneskjum, sem við þurfum á að halda í samfélaginu á þessum tímum.

Takk fyrir innlitið elsku Jenný mín.

Knús Jónína

Takk Skafti minn. 

Gleður mig að heyra Jóhann.

Knús Jóna Kolbrún.

Dagný, já ætli það sé ekki rétt hjá þér.  Ég hef fundið taktinn sem ég vil dansa eftir.

Þetta er virkilega falleg bæn Jóhanna mín.  Ég segi sama og Milla, það hefði verið gaman að hlusta á messuna þína.

Sigrún ég veit að sú litla var svöng, en hún glommaði í sig fleiri kræklinga, og fannst þeir góðir. 

 Knús til þín Birna Dís

[Anna Ragna Alexandersdóttir, 7.12.2009 kl. 14:08]

[Sigrún Jónsdóttir, 7.12.2009 kl. 14:43]

[Maddý (IP-tala skráð) 7.12.2009 kl. 18:20]

[Magni Guðmundsson (IP-tala skráð) 7.12.2009 kl. 19:57]

Kæra Ásthildur.

Þakka þér góðar umsagnir um framleiðsluvöruna okkar. Það voru ekki björgunarsveitarmenn að selja krækling, heldur félagið Vesturskel ehf sem byrjaði að rækta krækling árið 2007 og var að kynna sýna fyrstu framleiðslu. Þú hefur eðlilega ályktað eins og kannski fleiri að af því Jói í Ísnum sem er framámaður í Björgunarfélagi Ísafjarðar var að selja og kynna, en hann er einn af stofnendum Vesturskeljar ehf. Ég vildi bara koma þessu á framfæri svo ekki yrði misskilningur af. Við reiknum með ef allt fer eins og við ætlum, að á næstu árum verði þetta ekki bara fyrir jólin heldur stöðugt framboð allt árið. Bestu kveðjur til þín og þinna. Magni

[Ásthildur Cesil Þórðardóttir, 7.12.2009 kl. 20:30]

Takk Anna Ragna, Sigrún og Maddý.

Fyrirgefðu Magni minn misskilningin.  En það er eins og þú segir eflaust vegna Jóa sem ég taldi þetta vera björgunarsveitina.  Ég þakka innilega fyrir mig og mæli hiklaust með þessari eðalvöru.  Kræklingurinn smakkaðist æðislega með köldu hvítvíni.  

Vil ráðleggja þeim sem ekki eru vanir svona kræsingum, að það á að setja bara smávatn í pott, ekki salta neitt, því kræklingurinn er nógu saltur beint úr sjónum.  Það þarf bara að fljóta upp á hann hálfan vatnið þarf að vera sjóðandi þegar skelin er sett í vatnið, og um leið og skelin opnast er hann tilbúinn.  Og hann er góður, því get ég lofað. 

[Kidda (IP-tala skráð) 8.12.2009 kl. 09:46]

Fer ekki ofan af því að það er betra mannlíf út á landi heldur en hérna á höfuðborgarsvæðinu.

ps. ég gæti aldrei borðað krækling

Knús í kærleikskúluna

[Ragnheiður , 8.12.2009 kl. 13:21]

Þú hittir naglann á höfuðið með kirkjuna og það samfélag allt,án þess gæti ég ekki verið í mínum erfiðleikum í lífinu en það er ekki þar með sagt að ég trúi hverju orði í Biblíunni- það er allt önnur Ella

Hjartans kveðja

[Ásthildur Cesil Þórðardóttir, 8.12.2009 kl. 13:39]

Kidda mín maður getur alltaf prófað eitthvað nýtt.  En eg get alveg trúað því að allt mannlíf sé einfaldara og einlægara úti á landi.  Öðruvísi allavega.

Ragnheiður mín, já þetta er það sem mér finnst líka samhugurinn og ósérhlífnin er það sem stendur uppúr ásamt kærleikanum.