Kerfið er hrunið, og ekkert fyrir pólitíkusana að gera annað en að biðjast lausnar og láta öðrum eftir að þrýfa upp skítinn eftir 20 ára stanslausan vitleysugang.

Já það er málið, það þarf að semja upp á nýtt segja Hollendingar.  Það var þá það.  En getum við treyst stjórnvöldum til að semja upp á nýtt?  Ég tók nefnilega eftir því að fyrstu viðbrögð breta og hollendinga voru þau, að þau hefðu samið við ríkisstjórnina en ekki alþingi um greiðslu á Icesave.

Af hverju sögðu þessir aðilar einmitt það?  Jú þeir vita sem er að þeir geta ráðið við stjórnarflokkana sem ólmir vilja vera góðir og þægir, en verra með almenningsálitið og alþingi tekur að einhverju leyti mark á því.  Það er nefnilega sannleikurinn í þessu.

Nú eru íslendingar uppteknir við að rífast um hver beri mesta ábyrgð á hruninu og afleiðingum þess.  Það var og.  Í stað þess að einhenda sér í að vinna málið upp á nýtt, og hætta þessari vitleysu.  Þá dettum við í sandkassan og byrjum að rífast um hver sé sekastur, Sjálfstæðismenn og Framsókn, sem ollu hruninu ásamt Samfylkingunni, eða á hinn veginn núverandi stjórnvöld Vinstri Græn og Samfylking.

Er ekki allt í lagi heima hjá okkur?

Auðvitað bera allir þessir flokkar sína ábyrgð.  Það er komið ár frá því að allt fór í hönk, vissulega veldur sá miklu sem upphafinu veldur, en ábyrgð þeirra sem síðar komu að málinu og klúðruðu því jafn hrikalega og sést hér, er ekkert síðri.

Það þarf því ekkert að rífast um hver sé sekastur, heldur þarf að taka sig saman í andlitinu og fara að vinna heimavinnuna.  Standa saman um að gera það sem þarf til að bjarga Íslandi.  Hvernig væri að byrja á því að hlusta á Evu Joly?

Við íslenskur almenningur sjáum ekki nokkurn skapaðan hlut gerast.  Það er hægt að jarma sig hásan um hvað fólk hefur lagt af mörkum og unnið marga klukkutíma, en þegar enginn árangur sést, og svo er komið að öll þessi vinna og stríð var til einskis, og við stöndum ekki bara í sömu sporum og í upphafi heldur ennþá verri, á er komin tími til að fjórflokkurinn viðurkenni að hann ber ekki gæfu til að leiða þessi mál til lykta.  Þetta fólk þarf að ganga til forsetans og leggja þar inn umboð sín til að stjórna landinu. 

Bara það að alþingi skuli voga sér að taka sér frí til fyrsta október, þegar landið liggur helsært og fólk er í öngum sínum, er þvílíkt rugl að það hálfa væri nóg.  Það á sem sé ekkert að gera til 1. október, og þá upphefst sama karpið aftur.  Við erum búin að fá nóg.  Ég er búin að fá nóg, og mér sýnist flestir í kring um mig búnir að fá nóg.  Þó einstaka dyggir flokksmenn og sértrúarsöfnuðir kring um flokkana reyni að verjast.  Þá er byrjað að fjara undan alþingi og alþingismönnum og ráðherrum.

Viðurkennið bara að þið ráðið ekkert við ástandið þið eruð menn að meiri fyrir vikið.  Við getum ekki lengur tekið þátt í einhverskonar hetjuleik eða upphefðarleik kjörinna fulltrúa.  Þeir hafa einfaldlega tapað skákinni og eiga bara að viðurkenna það og biðja um að verða leystir frá þessu öllu saman.

Hér þarf miklu hæfara fólk og meiri bóga til að standa í hárinu á bretum og hollendingum, sem heimta allt sitt fé til baka af okkur sem höfum ekkert frá þeim tekið.  Á meðan greifarnir sem stálu fénu ganga lausir og leika sér um allan heiminn.

Menn eru teknir og stungið inn fyrir að stela kjötlæri eða lifrarpylsu, það er þjóðarátak í að hanka iðnaðarmenn sem selja sig svart.  Það er átak í að koma upp um öryrkja og atvinnulausa sem reyna að ná sér í aukaaur út úr kerfinu.  En auðkýfingarnir bankamennirnir og millistjórnendur sem voru á bólakafi i sukkinu sitja enn og deila og drottna svipta fólk aleigunni og meira en það.  

Þetta er bara ekki allt í lagi, svo það sé á hreinu.  Og við þurfum að láta vita að okkur finnst það andskotan ekki í lagi, og að við viljum eitthvað annað og meira réttlæti en það sem birtist okkur hvern dag nú.

Það sagði við mig prestur í dag, réttlætið er innbyggt í mannssálina og ég óttast að þegar óréttlætið er orðið svona mikið, þá gerist eitthvað ófyrirsjáanlegt.  Að fólk hreinlega ofbjóði svo mikið að einhversstaðar springi eitthvað með skelfilegum afleiðingum.  Ég deili þessum ótta með honum. Þetta einfaldlega gengur ekki lengur.

Eigið góðan dag elskurnar og munið að við verðum að standa saman um að koma okkur út úr þessu.  Það þýðir ekki að við eigum að láta kjörna fulltrúa klúðra hverju málinu á fætur öðru.  Það þýðir að hver er sjálfum sér næstur og við verðum að standa saman um að heimta að við fáum hæfar manneskur til að leiða okkur út úr þessu, án þess að pólitíkin sé neinsstaðar nálægt.

Semja verði aftur um Icesave

Athugasemdir

[, 29.8.2009 kl. 22:29]

Sem talað út úr mínu hjarta Ásthildur mín.

[Jóna Kolbrún Garðarsdóttir, 29.8.2009 kl. 23:06]

Nákvæmlega, ég er sérstaklega sammála þessu með réttlætið.  Á meðan við sjáum ekki réttlæti, mun ekki skapast friður hérna á Íslandi. 

[Ragnhildur H. (IP-tala skráð) 29.8.2009 kl. 23:49]

Eg sendi þer mikið lof og þakkir fyrir þessa afbragðsgóðu grein Ásthildur .Þetta ástand þolum við ekki lengur !!!!

[Sigríður Inga Sigurjónsdóttir, 30.8.2009 kl. 08:25]

Sammála þér Ásthildur, algjörlega.

[Ásthildur Cesil Þórðardóttir, 30.8.2009 kl. 10:51]

Takk fyrir góðar undirtektir stúlkur mína.  Og velkomin hér inn Ragnhildur. 

Svo sannarlega er mér þungt í huga, og ég er þess fullviss að við getum haldið miklu betur á spöðunum en þetta. Og unnið okkur út úr þessu með meiri reisn.  Og burtu með alþjóðagjaldeyrissjóðinn og burtu með ESB.  Það er mín meining.

[Auður M (IP-tala skráð) 1.9.2009 kl. 11:35]

Innilega smamála þér, Ásthildur.  Þetta er mjög erfitt ástand.  Og stjórnin ræður ekki við neitt.  Harkan gagnvart öldruðum og öryrkjum segir sína sögu. Þjóðarátakið sem þú skrifar um er hreinlega neyðarlegt miðað við þann raunveruleika, sem blasir við.  "Greifarnir flotta sig bæði hér heima og út um allan heim.  Væri nær að vinna hraðar í málum þeirra.

[Ásthildur Cesil Þórðardóttir, 1.9.2009 kl. 14:10]

Einmitt Auður mín og það er tekið eftir þessu erlendis.  Þar eru blaðagreinar um að útrásarvíkingarnir séu ennþá á sínum skútum og einkaþotum að leika sér, og þeir spyrja hvað eru íslensk stjórnvöld að hugsa.

Svo heyrði ég sagt að það lægi nú þegar fyrir úttekt sem ætti ekki að gera opinbera fyrr en 1. nóvember, hvers vegna að bíða í tvo mánuði?  Halda menn að eitthvað breytist á þeim tíma, eða eru þeir jafnvel vissir um að við munum gleyma og hætta? Spyr sú sem ekki veit.

Heyrði líka að þó það yrði þjóðaratkvæðagreiðsla um aðild að ESB þá væri nú þegar búið að ganga frá því að það yrði ekki bindandi niðurstaða heldur leiðbeinandi.  Er það hreinlega hægt?  Geta stjórnvöld gengið svo fullkomlega á svig við fólkið í landinu?