Það er fyrst og fremst fólkið sem er svo gott, hreina vatnið, fámennið og ferska loftið.

Ég hef heyrt marga þá sem vilja ólmir skrifa undir Icesave vilja það til að halda andlitinu gagnvart útlöndum.  Þeir hugsa ekki lengra en svo að best sé bara að borga og þegja, sama hvernig það fer með þjóðarhag og skuldsetur börnin okkar og barnabörn. 

Ég var farin að halda að Samfylkingin væri sami trúflokkurinn og Sjálfstæðisflokkurinn, og er reyndar enn á þeirri skoðun.  Samt er gott að vita að innan þess stjórnmálaflokks eru líka efasemdarmenn rétt eins og í vinstri grænum, þó þar á bæ sé meira afgerandi andstaða.  Sem betur fer hafa þau Ögmundur Jónasson, Guðfríður Lilja og Lilja Mósesdóttir sýnt að þau taka kosningaloforð sín hátíðlegar en stundarvinsældir í útlöndum. 

En eftir hverju erum við að hlaupa?

Eiginmaður mitt var að aka í Dölunum um daginn og hirti upp ferðamann amerískan, sem ekki er í frásögur færandi.  En þeir tóku tal saman og Elli spurði auðvitað hvort hann hefði komið til Íslands áður.  Ferðamaðurinn er frá sveitinn kring um Boston. 

Ég hef komið hingað árlega í 22 ár, sagði maðurinn.

Og hvað er það sem dregur þig hingað svona oft og mikið, spurði minn karl.

Jú það er fyrst og fremst fólkið, sem er svo vinalegt og gott fólk.  Í öðru lagi hreina vatnið ykkar , og svo fámennið og hreinaloftið.  svaraði maðurinn.

'Eg veit að þetta er ekkert einsdæmi, margt fólk kemur hingað árlega til að njóta einmitt gestrisni þjóðarinnar, ferska loftsins og hreina bragðgóða vatnsins okkar.  Sumir verða að koma árlega til að hlaða batteríin, sumir jafnvel kaupa sér sumarhús hér á landi til að geta átt hér samastað.  Það er líka aukning í slílku. 

Það er því að mínu mati ódýrt áróðursbragð að segja að við séum svo óvinsæl í útlöndum að við þurfum að borga þungar skuldir til að halda vinsældum.  Óróðurinn hefur þyngst mikið undanfarið og ég er ekki alveg að skilja af hverju stjórnvöldum, þ.e. tvíeykinu Jóhönnu og Steingrími er svona umhugað um að koma þessum skuldaklafa á okkur, af því að það er ljóst að það þarf ekki að greiða svona mikið. Það er leið til að semja um lægri upphæðir, og okkur munar um slíkt á þessum síðustu og verstu tímum.

Mín reynsla er frekar sú að almenningur í útlöndum hafi áhyggjur af þjóðinni sem slíkri. Og það er mín meining að það sé alltaf farsælla að standa í lappirnar og berjast fyrir réttlætinu, en að gefast upp.  Mér er sem ég sjái hvar við værum stödd núna ef við hefðum lyppast niður í Þorskastríðunum.  Þá væru sennilega enginn fiskimið lengur hér við land. 

Sleikjugangur og undirgefni er allstaðar illa liðin, og fyrirlitleg.  Slíkt hefur ekkert með sanngirni eða kurteisi að gera. 

Það eru sárafáir að tala um að borga ekki, en fólk vill fá sanngirni og að geta staðið undir því sem samið verður um.  Það er því regin misskilningur hjá þeim sem bara vilja kvitta undir og borga að verið sé að neita að greiða skuldirnar.  Þó svo mann langi helst til þess. 

Og ég spyr mig aftur og aftur, af hverju er svona erfitt að ná til óreiðumannanna og kyrrsetja eignir þeirra.  Það er alltaf sama sagan, verndin nær bæði til stjórnmálamanna og óreiðuútrásarpésa.  Og ég veit að útlendingar furða sig á því mjög svo. Þeir furða sig miklu meira á þeirri linkind sem þjófunum er sýnd, en að við streitumst við að borga þann klafa sem á okkur er lagður.

En í mínum huga er Jóhanna Sigurðardóttir og allt hennar hyski sem aðhyllist ESB, landráðafólk.  Steingrímur og nokkrir þar innanborðs dansa svo með, af einhverjum ástæðum.  En sem betur fer eru í báðum þessum flokkum fólk sem efast og dregur lappirnar.  Megi félagar þeirra hlusta á þau rök og skoða nú hvað þessi óskapnaður Icesave felur í sér. 

Spurningin er svo í mínum huga, hvað veldur því að þau "Mamma og Pabbi" leggja allt í sölurnar til að sannfæra okkur um að þetta eina sé það besta, sem allir sem vilja sjá það vita er er ekki rétt. Hvað hangir á þeirri spýtu? Von um upphefð?  Hræðsla við sært stolt?  Eða að þurfa að éta ofan í sig stóru orðin?  Ég hélt nefnilega að þau bæði væru heilsteyptar manneskjur, og hef því orðið fyrir gríðarlegum vonbrigðum.  Þegar maður gerir engar kröfur til fólks, eins og fyrrverandi ríkisstjórna, þá er ekki mikið að ergja sig yfir, nema að reyna með öllum tiltækum ráðum að koma þeim frá.  En þegar maður ber væntingar í brjósti, og sér svo að einmitt það fólk er nákvæmlega sama rottuliðið og hinir, og gleyma almenningi um leið og þau eru komin við hlýja kjötkatla, þá verður maður sár og vonlaus. 

Er engum treystandi til að hreinsa spillinguna og skera burt rotið og fúið samtryggingakerfi íslenskrar pólitíkur í dag. 

 

Andstaða líka í Samfylkingu

Athugasemdir

[sigurður (IP-tala skráð) 12.8.2009 kl. 13:00]

Þetta er merkileg færsla! Samkvæmt henni er ég hluti af einhverju hyski og landráðamaður. Það er ekki falleg umsögn svo ekki sé nú meira sagt. Það er sannfæring mín að það sem rétt að kanna hvaða kosti við höfum innan EB án þess þó að gefa afslátt af ýmsum grundvallaratriðum er varða kjör og sjálfstæði þjóðarinnar. Við erum jarðarbúar og eigum að lifa í sátt og samlyndi við aðrar þjóðir og náttúruna. Íslendingar hafa notið vinsemdar í öðrum löndum þegar á hefur þurft að halda s.s. tengt náttúruhamförum o.fl. Við njótum sömu réttinda og aðrir varðandi læknisaðstoð tryggingar, námsvist o.fl. án þess að greiða meira. Ég tel mig eki vera landráðmann þó ég vilji skoða samstarf og samvinnu við aðrar þjóðir. Málflutningur þinn er ekki sannfærandi og dæmir sig sjálfur.

Varðandi Icesave og þær efnahagshörmungar sem dunið hafa yfir þjóðina þá erum við líkt og allir aðrir landsmenn ekki sátt við hvernig komið er. Þar hefur almenningur verið leikinn grátt og við sitjum eftir með skuldir óreiðumanna. Ég vil ekki borga fyrir þá sem hafa rænt og ruplað. Hins vegar verð ég eins og aðrir að skoða þá valkosti sem eru til staðar. Vega og meta hvað er best og farsælast fyrir þjóðina. Eftir að hafa hugleitt málið og lesið allt sem komið hefur fram fyrir sjónir almenning er það mín niðurstaða að við höfum því miður ekki aðra valkosti en að reyna að semja um málið. Hafa skýra fyrirvara og ná hagkvæmri lausn. Það að sega að við borgum ekki er að lemja hausnum við steininn. Það er ekki valkostur. Við erum eins og aðrir skuldarar bundnir af því og getum ekki hlaupist frá málinu. Það er ekki hyski eða landráðamenn sem legið hafa nótt yfir málinu vikum saman og af innstu sannfæringu komist að þeirri niðurstöðu að semja um málið sé réttasta niðurstaðan þó súr sé.

Og fólk er ekki hyski og landráðamenn þó þeir séu ekki sammála þér. Góðar stundir.

[Ásthildur Cesil Þórðardóttir, 12.8.2009 kl. 13:30]

Að mínu mati er það þannig þegar það fólk sem hefur tekist á hendur að leiða okkur út úr vandræðunum, en vill ekki hlusta á skynsemisraddir og betri lausnir, hættulegt lýðræðinu.  Það á að þröngva Icesavesamningnum í gegn með góðu eða illu og það hafa heyrst raddir um hótanir og tiltöl.

Það þarf að hlusta og skoða alla möguleika.  Að mínu mati er það ekki gert, heldur er haldinn hræðsluáróður um að ef við samþykkjum ekki samninginn eins og hann er matreiddur, þá verði allt í steik, og þjóðir heims neiti að hjálpa okkur og jafnvel verði okkur þungur ljár í þúfu. 

Bendi til dæmis á grein í Financial Times. http://www.ft.com/cms/s/bf7cbbae-86c0-11de-9e8e-00144feabdc0,Authorised=false.html?_i_location=http%3A%2F%2Fwww.ft.com%2Fcms%2Fs%2F0%2Fbf7cbbae-86c0-11de-9e8e-00144feabdc0.html%3Fnclick_check%3D1&_i_referer=http%3A%2F%2Fvidhorf.blog.is%2Fblog%2Fvidhorf%2F&nclick_check=1

Og hér er af eyjunni um þessa umfjöllun FT.

Innlent - miðvikudagur, 12. ágúst, 2009 - 09:36
Financial Times: Icesave gæti leitt til langrar stöðnunar á Íslandi. Byrðinni verði jafnað meira

Breska fjármálablaðið Financial Times segir í leiðara í dag, að Icesave-greiðslurnar sem Íslendingum er ætlað að inna af hendi samkvæmt samkomulaginu við Breta og Hollendinga gætu leitt til stöðnunar í íslensku efnahagslífi í áratug. Það hafi gerst í Chile árið 1982 þegar landið var neitt til að taka á sig miklar skuldabyrðar vegna fjármálakreppu í Suður-Ameríku.

Blaðið spyr hvort slík niðurstaða sé í hag einhvers. Bent er að afleiðingin yrði sú að Íslendingar, sem þegar séu reiðir Gordon Brown forsætisráðherra vegna hryðjuverkalaganna í fyrrahaust, mundu fjarlægjast umheiminn. Stuðningur þjóðarinnar við umsókn um aðild að Evrópusambandinu fari þegar minnkandi. Tekin sé áhætta með land sem hafi landfræðilega mikilvæga legu og búi yfir mikilvægum auðlindum. Bent er á að Rússar fylgist grannt með framvindu mála; þeir hafi verið fyrstir til að bjóða Íslendingum efnahagsaðstoð.

Financial Times segir að það sé gagkvæmur hagur Íslendinga og umheimsins að upplýsa um dimmar hliðar sem kunni að vera á bankahruninu á Íslandi. Samskipti með minni átökum gætu leitt til samvinnu um rannsókn þess máls og jafnvel endurheimt fjármuna, en Íslendingar hafi ekki tök á að vinna það mál einir.

Í leiðaranum segir að ekki skorti ásakanir í tengslum við þessi mál fyrir utan það óstöðuga fjármálaveldi sem síðari daga Víkingar á Íslandi hafi byggt upp. Kjósendur á Íslandi hafi ítrekað kosið ríkisstjórnir sem staðið hafi fyrir stöðugt auknu frjálsræði í efnahagsmálum en á sama tíma leyft eftirlitsaðilum að sofa á verðinum.

Á hinn bóginn hefðu stjórnvöld í Hollandi og Bretlandi átt að sjá að fyrirheit Icesave-netreikninganna væru ekki öruggari en möguleikar Íslands til að baktryggja þá.

Loks stingur blaðið upp á því að byrðinni af ósómanum (”the mess”) sé jafnað meira á milli þjóðanna en gert hafi verið og telur að það geti leitt ríkulegrar uppskeru.

Það skyldi þó aldrei vera að það yrðu bretar og hollendingar sem kæmu vitin fyrir ríkisstjórn Íslands.

[Ásthildur Cesil Þórðardóttir, 12.8.2009 kl. 13:45]

Vil reyndar taka fram að ég nota hér orðið Hyski sem fjölskylda eða samstarfsmenn, en ekki pakk.  Það er nefnilega hægt að nota það þannig líka. 

[sigurður (IP-tala skráð) 12.8.2009 kl. 14:56]

Þú fullyrðir að fólk vilji ekki hlusta á skynsamlegar ábendingar o.s.frv. Ég veit ekki betur en að fjárlaganefnd (fulltr. allra flokka) hafi setið yfir málinu á níundu viku. Kynnt sér málin frá öllum hliðum. Kallað fyrir færustu sérfræðinga, fengið hundruð skjala með ábendingu o.s.frv. Niðurstaða þessa ágæta fólks sem var kosið af þjóðinni er ekki enn að fullu ljós. Í fjölmiðlum og í viðtölum hefur ítrekað komið fram að þau eru ekki sammála enda flókið mál. Hitt hefur þó komið margsinnis fram frá fulltrúum minni og meirihluta að nefndarmenn eru ánægðir með þá skoðun sem hefur farið fram. Guðbjarti Hannessyni, formanni nefndarinnar (og þá fjölskyldumeðlim Jóhönnu) er hrósað fyrir vandvik og skipulögð vinnubrögð. Varla passar það við þína framsetningu?

Allt þett fólk hefur unnið samviskusamlega að málinu og sumir eru ekki þér sammála og telja skynsamlegast að leysa málið með samning. Þetta fólk er í fullum rétti að fylgja sinni sannfæringu jafnt og þú án þess að vera kallað landráðmenn eða öðrum illum nöfnum. Vissulega má nota orðið "Hyski" yfir fjölskyldu en í samhengi þínu og tengingu við landráðamenn skilja örugglega flestir framsetningu þína sem ómenni eða óþjóðalýð. Slíkt er ekki málefnalegt né skoðunum þínum til framdráttar.

Vonandi leysast þó mál og við getum einbeitt okkur að því að leysa skuldastöðu heimila og fyrirtækja.

[Ásthildur Cesil Þórðardóttir, 12.8.2009 kl. 21:07]

Það er misskilningur hjá þér að ég vilji ekki að það verði samið.  Ég er að tala um Áróðursherferð m.a. Steingríms um að það verði að samþykkja samninginn eins og hann liggur fyrir.  þetta sé sá besti samningur sem hægt sé að fá.  Svo mörg orð voru þau og þetta hefur hann ítrekað og Jóhanna tekið undir.

Þessi samningur bendir ekki til vandaðra vinnubragða, þar sem látið hefur verið að öllum kröfum breta og hollendinga, en enginn varnagli sleginn.  Og víst var kallað á marga færustu sérfræðinga eins og Steingrímur benti á.  En þeir sem ekki voru sammála honum voru ekki réttu sérfræðingarnir.  Sem betur fer er að komast annað hljóð í strokkinn hjá stjórnvöldum, af því að þau hafa séð að þetta gekk ekki upp.  Og boltinn byrjaði að rúlla fyrir alvöru þegar Eva Joly krifaði bréfið sitt.  Og síðan hafa margir spekingar tekið undir með henni.

Hér er til dæmis einn.  En hann hefur auðvitað ekki rétt fyrir sér, af því að hann er ekki á sömu skoðun og Jóhanna og Steingrímur. 

Þingið getur hafnað samningnum

Lee Buchheit er einn helsti lagasérfræðingur heims á sviði þjóðarskulda.

Íslendingar ættu hvorki hafna né fullgilda Icesave-samkomulagið heldur setjast niður með Bretum og Hollendingum og semja um grundvallaratriði samkomulagsins, segir Lee Buchheit.

Buchheit er einn helsti lagasérfræðingur heims á sviði þjóðarskulda og fundaði hann með fjárlaganefnd í dag. Hann segir að þjóðþingið geti einfaldlega sagt að það sé ótímabært að annað hvort staðfesta eða hafna ríkisábyrgð á samning þar sem vantar mikilvæga forsendu, það er hversu mikið þurfi í reynd að greiða úr Íslenska ríkissjóðnum.

Hann vísar þar til þess að alger óvissa sé um endurheimtur á eignum Landsbankans. Þar hafi matið til þessa hlaupið á 65% til 95% heimtum. Þessi óvissa geri það að verkum að þingið geti með réttu hafnað samningnum.

Buchheit telur að Bretar muni ekki líta á það sem samningsrof ef Alþingi hafnar ríkisábyrgð á Isesave-samninginn. Samningurinn sjálfur feli í sér að þjóðþingið þurfi að staðfesta hann og því hafi Bretum og Hollendingum átt að vera það ljóst að hann gæti strandað í þinginu.

Hann segir að semja eigi um þessi grundvallaratriðin þegar eignum Landsbankans hefur verið komið í verð. Ekki sé hægt að semja um lánskjör og lánstíma þegar upphæðin sem verið er að semja um er ekki ljós.

Buchheit segir ennfremur að að það sé ótækt að Íslendingar gangist undir svo viðamiklar skuldbindingar eins og felast í Icesave-samningnum meðan enn ríkir óvissa með eitt af grundvallaratriðum samningsins sem er endurheimtur á eignum Landsbankans.

 

'I stað þess að fagna þegar bent er á aðrar leiðir eða aðra nálgun á samningsstöðu okkar, þá fara menn í skotgrafir og reyna að verja klúður sinna manna.  Það er von að pólitíkin sé ekki á hærra plani en hún er. Menn skirrast ekki við að verja hvað sem frá þeirra mönnum kemur og kóa með öllu sem þeir láta frá sér, hversu ósannfærandi sem það er.  Og það má ekki hlusta á fólk sem kemur með önnur sjónarmið.

Ég ætla lík að benda þér á það Sigurður, að ég hef rétt á að hafa mína skoðun á þessu.  Þú lætur það hljóma eins og ég sé einhver allsherjar dómari í málinu.  Ég er að viðra mínar skoðanir og það sem mér finnst.   Og þetta er bara mín meining.  Gjammið í Samfylkingunni um inngöngu í Evrópusambandið er orði svo þreytt og vitlaust að það tekur engu tali.  Sennilega verður þessi flokkur einhversstaðar fyrir neðan miðju, þegar við fáum loksins að greiða atkvæði um traust á stjórnmálaflokkunum.  Þá vona ég líka að Ögmundur og þeir sem með honum standa verði ofaná í Vinstri grænum.  Reyndar tel ég það mjög líklegt.  Steingrímur stendur stórskaðaður og ekki bara hann heldur Jóhanna líka og öll Samfylkingin.

[Jens Guð, 12.8.2009 kl. 21:33]

  Frábær hugleiðing og eins og skrifuð frá mínu hjarta.

[Róbert Tómasson, 12.8.2009 kl. 22:17]

Sammála þér að mörgu leiti Ásthildur, við eigum að semja aftur um Icesave og mér finst að við eigum að semja um fasta, viðráðanlega prósentu af þjóðartekjum, þar með er það orðið hagur Breta, Hollendinga og Þjóðverja að þjóðartekjur hækki sem mest hér á Íslandi og það getur varla verið slæmt.

Hins vegar er ég einn af þeim sem vill sjá hvað er í boði við inngöngu í ESB þ.e. ég vill sjá samninginn kláran til undirskriftar og fá þá að velja eða hafna eftir minni sannfæringu.  Heimurinn er að breytast hvort sem okkur líkar betur eða verr, Kínverjar lokuðu sig af í einhver hundruð ár og þegar þeir opnuðu landamærin aftur voru þeir sem áður höfðu verið með þeim fremstu í heiminum í vísindum og menningu, nánast steinaldar menn í samanburði við umheiminn. 

Skoðum allt með opnum huga og afneitum engu án þess að hafa kynnt okkur það vel og rækilega.

kær kveðja

[Ásthildur Cesil Þórðardóttir, 12.8.2009 kl. 22:34]

Takk Jens minn.

Róbert, vissulega skal skoða alla möguleika með opnum huga.  Málið er að ég hef farið víða síðastliðnar vikur og ég get sagt þér að þar sem ég kom varaði almenningur í þeim löndum okkur mikið við að fara inn í Evrópusambandið.  Þarna er ég að tala um pólverja, þjóðverja, austurríkismenn og dani.  Hef heyrt svipað frá breskum almenningi og sænskum.  Af hverju vara þeir okkur við.  Jú þeir segja að ef við förum þarna inn, bíði okkar annað hrun, því ESB sé á fallanda fæti.  Og fólkið segir, þeir hafa ekkert að bjóða ykkur þeir vilja bara nýta sér auðlindir ykkar.  Enda er stefna forsprakka ESB að sameina Evrópu í eitt ríki, undir einni stjórn og einum fána.  Er það eitthvað sem við sækjumst eftir ?

[Róbert Tómasson, 13.8.2009 kl. 04:27]

Flutti heim frá Danmörku fyrir 4 árum eftir að hafa búið þar í 5 ár.  Þar eins og hér eru skiptar skoðanir á ágæti ESB og ég reikna með að því sé svipað farið í hinum löndunum sem þú nefnir.  Bakkabræður lokuðu sig inni þegar þeir sáu meint herskip (sólina rísa) og dóu á endanum úr hungri.

Ég er almennt þeirrar skoðunar að ef til inngöngu í ESB kæmi þá hefði það verið betra fyrir svona ári síðan þegar samningsstaða okkar var margfalt betri en hún er í dag.  Það er mikið talað um slæma stöðu t.d. Íra og Spánverja í dag þrátt fyrir að þeir séu í ESB, ég vildi hins vegar fá svar við því hvernig þessar þjóðir stæðu ef þær væru þar ekki. 

Ég get ekki neitað því að ég hef meir efasemdir gagnvart inngöngu nú en fyrir ári síðan, en áður en ég ákveð mig endanlega vill ég samningin uppá borðið því fyrir mér er þetta ekki spurningin um hvað við missum, heldur hvað við fáum í staðin.

kveðja

[Ásthildur Cesil Þórðardóttir, 13.8.2009 kl. 09:09]

Já Róbert minn.  Það er alveg skiljanleg afstaða hjá þér og ég skil hana vel.  Málið eins og það snýr að mér er, að við höfum nú þegar vitneskju um allt sem við fáum.  Það hefur komið fram í viðtölum við æðstu embættismenn Evrópusambandsins, og einnig í viðtölum við ráðamenn í ESB löndum.  Eins og spænska sjávarútvegsráðherrann sem getur ekki beðið eftir að komast inn í íslenska fiskveiðilögsögu.  Við fáum heldur engar varanlegar undanþágur um náttúruauðlindir okkar, og víst hefur komið fram að ESB veldið hefur umráð yfir náttúruauðlindum í löndum ESB.  Það fengu bregar að reyna, þegar þeim var tilkynnt að orkulindir þeirra yrðu nýttar í þágu Evrópu ef kæmi til þrenginga.  Það varsmáaletrið sem við könnumst svo vel við úr tryggingabransanum.  Það er einhver misskiliningur í gangi um að ESB bjargi þjóðum upp úr vandræðum.  Það er bara ekki þannig, nú má vel líta til Lettlands og sjá hvað er að gerast þar.  Ekki kemur sambandið til hjálpar þar.  Evrópusambandið hugsar fyrst og fremst um heildina, og möskvarnir eru stórir.  Auðvelt fyrir smáríkin að detta niður um götin þar. 

Það er því mín einlæga skoðun að þeim pening sem fer í þessar aðildarvíðræður sé kastað út um gluggann.  Og mér skilst að það sé ekki neinir smá aurar.  Auk þess kostar heilmikið að vera í sambandinu, veit ekki hvort það er meira en það sem menn fá til baka í styrkja formi.  Allavega kvarta bretar yfir því að þeir leggi mikið til og fái ekki nema brot af því til baka.

Þetta er því sannkallað Pandórubox, og von að Pandórudrottningin hafi ágirnst það á sínum tíma. 

[Ásthildur Cesil Þórðardóttir, 13.8.2009 kl. 09:10]

Það fengu bretar að reyna átti þetta að vera.  Með kveðju Ásthildur.

[Kidda (IP-tala skráð) 13.8.2009 kl. 09:53]

Væri alveg sátt við að borga Iceslave ef það væri miðað við sanngjarna prósentutölu af þjóðartekjum eins og Róbert talar um. Skrýtið að þeir sem vilja borga eftir þessum samningi sem verið er að ræða á þinginu núna upp í topp vilja meina að við sem erum á móti þeim samning séum að hafna alfarið að borga. Helst vildi ég að beðið væri með að semja upp á nýtt þar til í ljós væri komið hve mikið náist að ná af hinum raunverulegu glæponum. Að búið sé að elta hverja einustu krónu og ná sem þeir hafa komið undan.

Knús í kúluna

[Ásthildur Cesil Þórðardóttir, 13.8.2009 kl. 13:51]

Takk Kidda mín og mikið rétt.  Ég skil ekki hvað er í hausnum á fólki sem vill endilega borga meira en þarf.  Bara til að þau geti haldið haus Jóhanna og steingrímur, og svo auðvitað Svavar Gestsson.  Sem er yfirklúðrarinn í þessum máli.  Knús á móti.

[Þórarinn Þ Gíslason (IP-tala skráð) 14.8.2009 kl. 11:24]

Sæl Ásthildur.

Frábær pistill og þarfur.

Kveðja

[Steinunn Helga Sigurðardóttir, 15.8.2009 kl. 14:01]

gott !

s

[, 16.8.2009 kl. 12:31]

Góður pistill.

[Dísa (IP-tala skráð) 21.8.2009 kl. 20:57]

Ertu ekki örugglega lifandi Dúllan mín? Veit þú ætlaðir í Fljótavík, en hélt ekki að þú yrðir svo lengi.

[Ásthildur Cesil Þórðardóttir, 22.8.2009 kl. 18:17]

Kom heim í gær, var veðurteppt í ofsaroki og þurfti að fljúga og alles, en er að komast í gang, set inn fyrstu myndir af Fljótavík á eftir mín kæra Dísa, takk öll fyrir innlitið.