Ísafjörður - Silfurtorg kl. 16.00 fjögur í dag. Komið og...

24.4.2009 | 12:56

Ísafjörður - Silfurtorg kl. 16.00 fjögur í dag. Komið og þiggið veitingar og skemmtun.

Það er komin hiti í mannskapinn hér á blogginu. Menn hamast eins og aldrei fyrr. Mynda meirihluta og keppast um að segja hverjir komist á þing og hverjir detti út. Jamm og jæja. Málið er að ekkert liggur ljóst fyrir fyrr en talið hefur verið upp úr kjörkössunum. Og nóta bena eftirlitsaðiljar hafa farið gegnum kosningarnar og skoðað hvort möguleikar hafi verið á svindli. Það kæmi mér ekkert á óvart miðað við sögurnar.

Skondnast er að hlusta á sjálfstæðismenn vara við vinstri slysum og óskapast hver allt verði nú hræðilegt ef það sem þeir kalla vinstristjórn kemst að eftir kosningar. Þeir bókstaflega geta ekki á heilum sér tekið. Hverjir voru það aftur sem stuðluðu að þeim hörmungum sem við erum í í dag? Eru það mennirnir sem ætla nú að bjarga landinu og telja sig vera þá einu þess umkomna?

Eru menn ekki alveg með öllum mjalla þar á bænum?

Það er reynt að ljúga, ég hef heyrt allskonar sögurburð hér, þeir tala við unga fólkið og lýsa því hvaða hræðilegu hlutir gerast ef þeir ná ekki völdum aftur. En unga fólkið kemur til okkar og spyr er þetta satt. Ungt fólk í dag er nefnilega ekki kjánar eins og sumir virðast halda. Ungt fólk í dag vill heyra sannleikann. Það vill heyra uppbyggilegar umræður um hvernig forystumenn flokkanna vilja vinna og hvað þurfi að gera til að laga ástandið.

Ég held að það sitji ennþá í sumum þeim eldri lygarnar sem voru bornar á borð fyrir síðustu bæjarstjórnarkosningar hér. Ég ætla ekki að ræða þær, þess þarf ekki. Þær eru vitað mál og ekki til sóma þeim sem þar sátu og hringdu út til að sverta og rakka niður sameiginlegt framboð Vinstri grænna, Samfylkingar og Frjálslynda flokksins. Þegar skoðanakannanir sýndu að þeir myndu ná meirihluta.

Nei lygar og fals eru ekki bara óheiðarleg vinnubrögð, heldur líka afskaplega siðlaus eins og þessi flokkur virðist vera alveg í gegn. Þó marg gott fólk sé þar innanborðs þá er eins og þeir smitist af vitleysunni og láti spila með sig fram og til baka.

En það kemur að því að fólkið fær nóg. Vonandi er sá tími upprunninn núna. Sjálfstæðismenn hefðu bara gott af að hvíla sig í áratug eða svo, fara í almennilega naflaskoðun, ekki bara kattarþvott, og gera upp við fortíðina og Davíðstímabilið, græðgina, óheiðarleikann og potið.

Taktu ekki níðróginn nærri þér.Það næsta gömul er saga,að lakasti gróðurinn ekki það ersem ormar helst vilja naga.

Þessa vísu fékk ég hjá bloggvini mínum Jakobi Fal. Hún segir meira en þúsund orð.

En í dag kl. 4 ætlum við hjá Frjálslynda flokknum, Vinstri Grænum og Samfylkingu að halda sameiginlega veislu á Silfurtorgi. Við ætlum að bjóða ykkur bæjarbúar góðir upp á fiskisúpu, í gær gáfum við fólki fisk í soðið. Núna er Júlli minn að elda þessa líka dýrindis fiskisúpu, sem verður í okkar boði. Samfylkingin og Vg ætla svo að koma með atriði líka.

Þetta er svona til að sýna að flokkar geta vel unnið saman, ef fólkið í þeim er þroskað og vill virkilega vinna af heilindum að velferð kjósenda. Það er minnsta málið af öllu að gera hlutina saman.

Hátíð í Kosningastræti

Nágrannarnir í Aðalstræti á Ísafirði taka höndum saman og bjóða til hátíðar föstudaginn 24. apríl frá kl. 16 – 18 fyrir utan kosningamiðstöðvarnar. Lifandi tónlistGrillaðar pylsur og fiskisúpaLíf og fjör og óvæntar uppákomur

Hér áttu merkin þrjú að koma en því miður þá gat ég ekki sett þau hér inn.

Á morgun verður kosið til Alþingis. Það er mikið í húfi að vel takist til. Best væri ef sem flest sjónarmið og framboð kæmu manni inn. Það mun auka breiddina á umræðum og úrlausnum. Margt gott fólk býður sig fram og vill vinna að því að bæta skaðan sem orðið hefur. Það er samt ljóst að þeir sem mestan þátt eiga í því að allt fór eins og það fór, er ekki fólkið sem líklegt er til að endurreisa það sem tapast hefur, fyrst og fremst traust og virðingu þjóðarinnar sem heildar. Það traust getur ekki vaknað nema við sýnum og sönnum að við þorum að skipta út spillingunni og treysta þeim sem ekki hafa komið að henni fyrir lífsegginu okkar. Það krefst bæði kjarks og ákveðni. En er það ekki allt í lagi. Lýðræðið virkar ekki nema við sjálf getum komið að því að refsa og umbuna. Ef við bara kjósum alltaf það sama á hverju sem gengur, þá uppskerum við þá spillingu sem við höfum horft upp á núna. Þess vegna er mikilvægt að hlusta ekki á fagurgala eða hræðsluáróður, heldur hlusta á hvað fólk hefur að segja, og hvernig það vill leysa málin. Og ekki síst hvað það hefur haft fram að færa áður. Loforð og vinsældargjörðir korteri fyrir kosningar er ekki trúverðugt og er einmitt sami gamli leikurinn sem komið hefur okkur í þá stöðu sem við erum í í dag. Þess vegna þarf að vanda valið, og kjósa rétt. Það er réttur okkar að kjósa samkvæmt sannfæringu okkar, en ekki fyrir atbeina einhvers eða bónar. Við eigum fyrst og fremst að velja það fólk sem hefur sýnt að það er traustsins vert. Ef það er haft í huga, þá óttast ég ekki niðurstöður þessara kosninga. Eigið góðan dag og endilega komið fáið ykkur heita fiskisúpu, grillaðar pylsur og hlustið á músik í boði þriggja flokka á Silfurtorgi kl. 4 í dag.Megi heiðarleiki, vinnusemi og traust vera þeir eiginleikar sem fólkið velur á morgun.