FIskurinn á að vera í þjóðareign en ekki í einkaeigu örfárra handhafa kvóta.

Hversu lengi ætlum við að skella skollaeyrum við blóðtökunni sem fiskveiðistjórnunin er á landinu. Hversu djúpt þurfum við að sökkva áður en við förum að sýna samábyrgð í nýtingu náttúruauðlinda hér sjávarauðlindinni.  Hversu svangir og févana þurfa íslendingar að verða áður en þeir fara að hlusta á tíu ára rödd Frjálslynda flokksins um skynsamlega stjórn og nýtingu fiskveiða?  Hér er afskaplega merkilegt blogg frá bloggvini mínum Kristni Péturssyni  http://kristinnp.blog.is/blog/kristinnp/ um óréttlætið og vansann sem viðgengst hjá okkur, sóunina sem við látum sem við sjáum ekki, þó allt sé að brenna ofan af okkur lóðbeint til andskotans. 

Hér er verið að gefa nokkrum stórútgerðarmönnum alræðisvald yfir helstu auðlind okkar, í stað þess að þjóðin sjálf við fólkið í landinu fáum að njóta hennar. 

Hve lengi ætlum við að daufheyrast og leyfa stjórnvöldum að hantera þessi mál af þeirri léttúð og þjónkun við auðvaldið?

Það er ekkert annað en synd og skömm að verða vitni að svona deyfð og kæruleysi. 

Þetta eru peningarnir okkar, auðlindin okkar, lifibrauðið okkar sem nokkrir menn eru að leika sér með.  Eruð þið virkilega ánægð með það ágæta þjóð?

Ég er það ekki.  Og ég vil benda á að eini flokkurinn sem alltaf hefur haldið sjávarútvegsumræðunni til haga, reynt að vekja þjóðina upp með hvað er að gerast er Frjálslyndi flokkurinn.  Sú rödd má ekki þagna.  Því Frjálslyndi flokkurinn er sá eini sem kemur til með að tala um þessi mál eftir kosningar.  Það er nokkuð á hreinu að allir hinir flokkarnir "gleyma" þessu þjóðfélagslega réttlætismáli eftir kosningar, það hafa þeir nefnilega gert hingað til, en draga það svo upp korteri fyrir kosningar. 

Hér erum við í Frjálslynda flokknum að gefa fólki í soðið.  Þetta gerum við fyrir hverjar kosningar, og svo verður einnig núna í ár.  Á sumardaginn fyrsta munum við vera niður á Silfurtorgi og gefa fólki glænýjan fisk.

En við segjum Kvótan til fólksins.  Það er réttur hvers einasta manns að fá að bjarga sér, það er óþolandi að meðan sjórinn er fullur af fiski, skuli ungir athafnamenn ekki mega bleyta öngul í sjó vegna þess að nokkrum einstaklingum hefur verið færður fiskurinn á silfurfati.  Meðan þjóðin pínist og sveltur, þá fá þeir einir að ráða för og hafa fiskinn í sjónum sem sína prívat og einkaeign.  Sættir þú þig við það ágæti kjósandi?  Ef þú gerir það ekki, þá ættir þú að hugleiða hvort þínu atkvæði væri ef til vill betur varið með því að setja X  við F. 

Athugasemdir

[Rósa Aðalsteinsdóttir, 21.4.2009 kl. 21:07]

Sæl og blessuð

Glæsilegt hjá ykkur. Vona að Guðbjörg Salóme frænka mín komi og heilsi uppá ykkur.

Guð veri með þér og þínum.

Kær kveðja/Rósa

[Herdís Alberta Jónsdóttir, 22.4.2009 kl. 09:06]

Þú ert vígaleg með svuntuna og hnífinn Ásthildur, Gangi ykkur vel.

[Ásthildur Cesil Þórðardóttir, 22.4.2009 kl. 09:20]

Knús á þig Rósa mín, já ég vona að hún láti sjá sig til að fá fisk í soðið. 

Já það má segja það Dísa mín  Ekkert síður en Addi. 

[Jóhanna Magnúsar- og Völudóttir , 22.4.2009 kl. 11:56]

hehe, ég fór í svona svuntu sl. sunnudag, þá var ég á Landakoti og var að hjálpa mömmu í sturtu - tók völdin í mínar hendur þar sem hún þverneitað að láta starfsfólkið baða sig!

[Ásthildur Cesil Þórðardóttir, 23.4.2009 kl. 20:08]

Gott hjá þér Jóhanna mín