Smá tiltal og krúttfærsla.

22.1.2009 | 14:20

Áður en ég set hér inn ljúfara efni og yndislegra, langar mig að koma á framfæri minni sín á það sem er að gerast.

Það er talað um að mótmælin séu að breytast í óeirðir og fólk hafi ekki lengur tök á ofbeldinu. Löggan segir að það sé undir mótmælendum komið hvort þeir taki á móti.

Þetta er hvorttveggja hálfsannleikur.

Í fyrsta lagi sýna langflestir lögreglumenn aðdáunarverða þolinmæði og þrautseigju. Þarna standa þeir hreyfingarlausir og taka móti eggjum og mjólk án þess að depla auga. Þeir eiga alla virðingu skilið. En innan um þessa virðingarverðu lögreglumenn og konur, eru ofbeldismenn sem ætti að vera búið að fjarlægja fyrir löngu. Þeir eru í lögreglubúningum en ættu ekki að fá að setja slíka upp, því búningurinn verndar þá. Þeir sýna af sér ofbeldi og ofstopa. Þeir ráðast tilefnislaust á hvern sem fyrir verður, miða á ljósmyndara og heimildargerðarmenn, til að varna því að ódæðin náist á myndband. Það er lögregluyfirvöldum ekki til sóma að verja þessa ofbeldismenn. Miklu frekar á að taka þá úr umerð. En þeir virðast vera þarna í skjóli yfirvalds sem dreymir um að stofna her. Þess vegna nýtur þessi stofnun því miður ekki trausts.

En ég vil biðja fólk um að láta lögregluna vera í friði, flestir þeirra eru fólk eins og ég og þú, sem hafa tapað miklu og eru skuldsettir. Það er líka langbest að gefa ofstopamönnunum ekki tækifæri til að haga sér eins og fílar í postulínsbúð.

Langflestir mótmælendur eru friðsemdarfólk, það er að vísu reitt, en hefur sýnt ótrúlega stillingu og þolinmæði. Innan um þá eru ofbeldismenn sem hafa yndi af átökum og gera sitt til að æsa ástandið upp. Það er erfitt að ráða við þá vegna þess að yfir þeim er enginn stofnun sem þarf að gæta að virðingu sinni. Þeir hafa engan yfir sér nema sjálfa sig. Þess vegna á að gera eins og Hörður biður um að reyna allavega að tala þá til, og fá þá til að láta af ofbeldinu. Það gerir illt verra fyrir alla hina og skemmir fyrir.

En að það sé undir mótmælendum komið að allt fari vel er kjaftæði. Það eru til margar myndir og frásagnir sem sýna einmitt að löggubullurnar efna oftast til illindanna, með framferði sínu. Það ættu yfirvöld að taka fyrir strax ef þau vilja halda trúnaði og trausti almennings á stofnunni Lögregla.

Annað sem ég vil koma á framfæri, af því að menn virðast ætla að hlaupa á tilboð Framsóknar um að styðja Vinstri græna og Samfylkingu vilji þeir koma á nýrri ríkisstjórn. VIÐ VILJUM ÞAÐ EKKI.

VIÐ VILJUM EINMITT SPILLINGUNA BURT, OG ENGA PÓLITÍK Í BILI HELDUR UTANÞINGSSTJÓRN MEÐ FÓLKI SEM HEFUR EKKI KOMIÐ NÁLÆGT PÓLITÍKINNI. Er þetta svona erfitt að sjá og skilja? Og hvað haldið þið að það myndi gera þessum flokkum ef svo yrði kosið í haust? Jú ég veit það, í fyrsta lagi myndu mótmælin halda áfram, þetta er ekki það sem verið er að biðja um. Og svo myndi fylgi Samfylkingarinnar halda áfram niður á við, einnig Vinstri grænna og Framsóknar. Vilja menn virkilega taka sjensinn á því?

Nei hér er best fyrir alla aðila að komið verði til móts við almenning um utanþingsstjórn sem fengi svigrúm til að endurskipuleggja lýðræðið og nýja stjórnarskrá og ný kosningalög. Í anda Njarðar P. Njarðvík og Vilmundar heitins Gylfasonar. Það verður aldrei ALDREI sátt um neitt annað, þó sumir séu með ráðherraglýjur í augunum. Og hana nú!.

En léttara hjal.

Dagurinn í fyrradag var fallegur, í gær var rok og svo er lika í dag.

Það blæs dálítið, lognið er að flýta sér.

Þetta er eins og það sé pottlok yfir fjöllunum.

Morgnarnir ganga sinn vana gang. Fyrst er Hanna Sól vakinn og sett framan við sjónvarpið, svo er Úlfur vakinn og svo vaknar litla skottið sjálf örlítið seinna. Brandur vaknar um leið og afi kemur fram.

Úlfur tilbúinn og bíður eftir rútunni.

Brandur er mjög áhugasamur um morgunmat telpnanna.

Svo er knúsast svolítið áður en prinsessur klæða sig upp til að fara í leikskólann.

Jamm ég sagði prinsessur, svona var Hanna Sól klædd í gær.

É pðinseðða sagði skottið.

Hún ákvað líka að fara með bók í skólann. En amma gat laumað henni frá.

Hér er hún að segja Úlfi til með tölvuna. Hún verður tveggja ára núna 23. janúar.

A sjáðu! segir hún og fylgist vel með öllu.

Afi og skottan, hún er að skoða mynd sem Steingrímur S.T. Sigurðsson heitinn teiknaði af ömmu hér á balli fyrir mörgum árum.

Hanna Sól er byrjuð á sundnámsleiði. Hún er að vísu flugsynd en það er eiginlega svona hundasund, nú á hún að læra að synda venjulega.

Og stinga sér og alles.

Þetta þarf allt að lærast.

Það var fullt af krílum sem eru á námskeiði, þrjú holl líka.

Og mamma, Hönnu Sól vantar svona froskalappir í réttri stærð, hún var alltaf að missa þessa. Hún þarf líka að venjast þeim.

Synt áfram í röð. Sumir krakkana voru rosalega dugleg. Hanna Sól var líka mjög dugleg miðað við að hún var þarna í fyrsta skipti.

Þetta kemur allt saman.

Þær eru saman á leikskólanum á Suðureyri.

Svo var voða notalegt að skríða í heita pottinn eftir sundið.

Ekki sleppa þessi börn við aðgerðir útrásarvíkinganna. Þeirra vegna verða þau að taka á sig rúmar 6 millur á barn, svo þeir geti leikið sér og flutt fjármagn á Caymaneyjar með aðstoð stjórnvalda. Nei það er ekkert réttlæti í því.

Sem betur fer er þetta bara ský, en ekki það sem það lítur út fyrir að vera. Eigið góðan dag elskurnar.

Munið að þið mótmælið í mínu nafni. Og ef þið verðið fyrir einhverju eins og táragasi, piparúða eða kylfum, þá snertir það mig líka, og vekur mér reiði. Það er alveg skýrt.

Flokkur: Bloggar | Breytt s.d. kl. 15:00 | Facebook

Athugasemdir

Ég er nú ekki alveg sammála því að búningurinn verndi lögreglumenn. Það hefur aldrei verið veist að mér og ráðist á mig með ofbeldi nema einmitt í lögreglubúningi.

Svo er eitt dálítið fyndið sem ég fattaði yfir sjónvarpinu í gær. Eftir að við urðum bloggvinkonur er ég farin að fylgjast með veðrinu á Vestfjörðum sem ég gerði aldrei áður. Hafði alveg áhyggjur af ykkur kúlubúum í öllum þessum stormviðvörunum.

Helga Magnúsdóttir, 22.1.2009 kl. 14:36

Sammála.

Þetta er reyndar ekki appelsínugul bylting. Hjá Karli Jónssyni heitir þetta Búsáhaldabyltingin. Eitthvað er það svona í heimilislegum stíl eins og myndirnar þínar.

Haukur Nikulásson, 22.1.2009 kl. 14:36

Ég kvitta heils hugar undir þennan pistill þinn. Takk fyrir þetta.

Mikið er hún Hanna Sól dugleg í sundinu. Og pðinþeððan flott að vanda

Sigrún Þorbjörnsdóttir, 22.1.2009 kl. 14:41

Helga ég meinti að búningur lögreglunnar á að vera til að vernda þá. Það er þung refsing við að ráðast á lögreglu í búningi, og það á að vera svo. Búningurinn er að hluta til þeim til varnar. Þannig meinti ég það. En það vill brenna vð að fólk taki reiði sína út á lögreglunni, sér í lagi drukkið fólk um helgar. En eins og þú veist er alltaf best að reyna að tala fólk til, ekki byrja á að beita ofbeldi. Takk fyrir umhyggjuna elsku Helga mín, hún snertir mig.

Takk Haukur minn. Búsáhaldabyltingin er gott nafn á hana.

Knús Sigrún mín. Ja ég er voða hress og stolt af Hönnu Sól í sundi. Og litlaskottið er heimsins yndislegasti perluprakkari.

Ásthildur Cesil Þórðardóttir, 22.1.2009 kl. 14:56

Yndislegar myndir takk fyrir mig

Ásdís Sigurðardóttir, 22.1.2009 kl. 15:34

Ég er svo heilshugar sammála þér Ásthildur. Verum í appelsínugula liðinu. Sætar myndirnar af börnunum að venju og flottar myndirnar af fjöllum og himni. Ná alveg þessari risjóttu tíð. Takk fyrir mig