Þetta er svo rosalega krúttað.

Ég las þetta í 24 stundum minnir mig.  Og ég hef verið dálítið hugsandi yfir þessu máli öllu.

"Meirihlutinn féll á fyrstu kosningunni

Óvænt tillaga um varaformann umhverfis- og samgönguráðs var ekki samþykkt í fyrstu í gær. Ásta Þorleifsdóttir féllst svo á að greiða atkvæði með meirihluta. Sjálfstæðismenn töldu ekki með sinn eigin fulltrúa. "Krúttað," segir Ásta.

Reykjavík Segja má að nýr meirihluti sjálfstæðismanna og F-lista í umhverfis- og samgönguráði hafi fallið á sinni fyrstu atkvæðagreiðslu á fundi ráðsins í gær.

Þegar Gísli Marteinn Baldursson, formaður ráðsins, bar upp þá tillögu að Þorbjörg Helga Vigfúsdóttir yrði varaformaður, stakk Þorleifur Gunnlaugsson úr VG upp á Ástu Þorleifsdóttur af F-lista á móti, enda kom tillaga Gísla minnihlutanum á óvart; gert hafði verið ráð fyrir Ástu í varaformennskuna.

Því þurfti að ganga til kosninga um varaformanninn og kom í ljós að Ásta sjálf hafði einnig reiknað með embættinu. Studdi hún því ekki Þorbjörgu, heldur sat hjá.

Féllu atkvæðin jafnt. Þrjú gegn þremur, en sjö eru í ráðinu. Tillaga formanns var því ekki samþykkt.

Þá munu Gísli og Ásta hafa rætt málin sín á milli og var kosið í annað sinn. Þá lyftist höndin á Ástu afar hægt og alls ekki hátt, að sögn eins fundargests.

"Já, þetta var nú bara krúttað!" segir Ásta. "Í upphafi höfðum við gert samkomulag um að ef F-listi hefði tvo menn í ráði, þá fengi D-listi varaformanninn.

Þau í Sjálfstæðisflokknum höfðu talið hana Helgu Jóhannesdóttur til F-listans af því að eiginmaður hennar, Ómar, er formaður Íslandshreyfingarinnar! En Helga hefur alltaf verið í Sjálfstæðisflokknum. Þannig að þetta var krúttlegur misskilningur og verður leiðréttur á næsta fundi. En það var ljúft að finna að maður hefur svona mikinn stuðning meðal minnihlutans," segir Ásta og skellir upp úr.

Ekki náðist í Gísla Martein Baldursson borgarfulltrúa vegna málsins."

o00o

Já einmitt það.  Ástu finnst þetta svo krúttað og fyndið.  En ég verð að segja að þó ég sé að mörgu leyti ánægð með að Ólafi F. Magnússyni skuli hafa tekist að koma á framfæri mörgum kosningaloforðum F-listans með þessu nýja meirihlutasamstarfi, þó ég ætli ekki að réttlæta hvernig þau mál voru framkvæmd, þá finnst mér alveg nóg um,  ekki bara að öll fjögur efstu sætin á F-listanum erum í höndum Íslandshreyfingarinnar, og reyndar flestir á listanum eða tveir þriðju.  Heldur að þau skuli öll dansa hvert í sína áttina.  Ólafur og Ásta halda sig að vísu við málefnin sem lofað var í kosningunum, en á sama tíma þá eru það mest fólk úr Íslandshreyfingunni sem sest í ráð og nefndir innan borgarinnar.  Jakob Frímann hefur til dæmis aldrei starfað eða verið nálægt Frjálslynda flokknum.   

Þetta er svo krúttað segir Ásta, sjálfstæðismennirnir héldu að Helga Jóhannesdóttir væri á vegum Frjálslynda flokksins, af því að maðurinn hennar Ómar er formaður Íslandshreyfingarinnar.

 Er enginn sem sér neitt athugavert við þennan vinkil ? Hverslags fólk er það eiginlega sem hefur valist til forystu í þessari hreyfingu ? Þeim finnst ekkert að því að yfirtaka heilan borgarstjórnarflokk, hvað fengu þau mörg atkvæði í síðustu kosningum 2% Og þeim finnst þetta bara krúttað.

Ég segi fyrir mig, að þó ég ætli ekki að gera neina athugasemd við að Þau sitji þarna í borgarstjórn Ólafur og Ásta, meðan þau vinna að stefnumálum Frjálslyndaflokksins, þá finnst mér þetta alveg út úr kú.  Raunar er þetta fyndið ef maður lítur á það þannig.  Og síðan er það Margrét og Guðrún, sem hafa klofnað út úr samvinnu við Ólaf og Ástu, og þær ætla sko ekki að vinna að þeim málum sem þær lofuðu í kosningabaráttunni, þeim finnst ekkert að því að vinna gegn þeim loforðum sem þær gáfu því fólki sem þær sitja í forfsvari fyrir. 

Ef svo Margrét og Guðrún fara í hár saman, er þá Íslandshreyfingin komin niður í sínar frumeindir.  Og hvar er Ómar í öllu þessu, er hann ekki einmitt að ræða um siðferði í stjórnmálum.  Greinilega eru þau ekki á sama meiði formaðurinn og varaformaðurinn, ef hann er Ástu og Ólafsmeginn í dæminu, eins og þessi krúttlega sáttargjörð sýnir. 

Ja hérna hér.  Ég legg til að spaugstofumenn fari um þetta sínum höndum, eða það þarf ef til vill ekki, þetta er einn stór brandari allt saman.  Það versta er að fólk kennir F-listanum um klúðrið, meðan það er algjörlega í höndum forystumanna Íslandshreyfingarinnar, sem hefur í raun hertekið Frjálslyndaflokkinn í borginni.

Ég hef heyrt forystumenn flokksins míns segja að þeir beri ekki ábyrgð á Ólafi Magnússyni og borgarstjórnarflokki F- listans, nema að því leyti að þeir eru ánægðir með að ná fram málefnum sem þeir hafa unnið að, og eru flest á landsvísu.  Það verður fróðlegt að sjá stefnumál Íslandshreyfingarinnar í næstu kosningum.  Ef þau geta ekki komið sér saman um málefnin meðan þau sitja í nafni annars flokks. 

En nú er bara að bíða og sjá hverju fram vindur.  Allt er í óvissu, og óvíst hvernig þetta allt saman endar.  Svo er líka að sjá að Sjálfstæðisflokkurinn sé að klofna líka niður í frumeindir sínar.  Og ég er ekki viss um að Tjarnarkvartettinn haldi vatni eða vindi ef út í það er farið.

Það verður því mikið fróðlegt að fylgjast með framvindunni í borgarmálunum á næstunni.   Þar sem hver heggur annan í herðar niður.  Eitt er víst að ég er voða ánægð með að geta horft á þetta úr fjarlægð og hlutlaust. 

Vonandi verður þetta til að siðferði og heiðarleiki verða tekin til skoðunar hjá kjörnum fulltrúum landsins.  Ástandið eins og það hefur verið hin mörg undanfarin ár eru til skammar. 

Athugasemdir

[Steingrímur Helgason, 15.2.2008 kl. 10:08]

Betri er hálfur skaði, en enginn skaði ???

[Ásthildur Cesil Þórðardóttir, 15.2.2008 kl. 10:39]

Já það má auðvitað segja það

[Jóhanna Magnúsar- og Völudóttir , 15.2.2008 kl. 11:39]

Ásthildur - þetta er bara fáránlegur Sirkus ... það þyrfti að fara að búa til plakat þar sem væru birtar myndir af fólki og skýring hvaða flokki það tilheyrir. Mér finnst þar að auki stjórnsýslulögin alveg fáránleg að fólk starfi í umboði annarra flokka og líka fáránlegt að fólk  hafi GEÐ í sér til þess.

[Brynja skordal, 15.2.2008 kl. 12:12]

Hafðu góða helgi mín kæra

[Ásthildur Cesil Þórðardóttir, 15.2.2008 kl. 12:32]

Mér finnst þetta siðlaust Jóhanna, meðan fólk kýs flokka en ekki mannakosningar.  Yfirleitt eru það málefnin og loforðin sem ráða, þó stundum kjósi menn fólk sem það treystir, og þá venjulega fólk sem hefur staðið sig vel, og fólk veit það.  Þessar ágætu manneskur eru nýliðar og hafa aldrei sýnt neitt til að byggja á, nema Ólafur F. 

Takk sömuleiðis Brynja mín.

[Solla Guðjóns, 15.2.2008 kl. 13:04]

Þetta er allt orðin hálfgerður skrípaleikur.Áður sem hingað til er póítíkusarnir að skaða trúverðuleika sinn og eru sjálfstæðismenn þar fremstir í flokki sem svo oft áður.

[Solla Guðjóns, 15.2.2008 kl. 13:07]

Ég vildi gjarnan fá að kjós menn og málefni en ekki flokk...

Skilaboðin til okkar kjósanda ery samt einhvernveginn á þann veg ÞAÐ ER SAMA HVAÐ ÞÚ KÝST

[Ásthildur Cesil Þórðardóttir, 15.2.2008 kl. 13:53]

Já það er alveg rétt Solla mín.   Margir menn taka ekkert tillit til vilja kjósenda, bara ef þeir í krafti meirihluta komast upp með hvað sem er.  Þetta er orðið óþolandi ástand, og komin tími til að breyta til.  Skipta um stjórnendur,  mér sýnist Samfylkingin ráða  litlu í þeim málefnum sem Sjálfstæðisflokkurinn beitir sér fyrir.  Núna rassskellt í álversmálum, en gerir ekkert í málinu, að því er virðist.  Málefni öryrkja og aldraðra þokast miklu seinna en haldið var fram fyrir kosningar.  Og svo framvegis.  Hvenær ætli límið í Samfylkingunni þoli ekki meira ?  Eða er það ef til vill tonnatak sem heldur þeim við Sjálfstæðisflokkinn ? 

[Solla Guðjóns, 15.2.2008 kl. 14:56]

Lýst ekki á ef það er tonnatak

[Ásthildur Cesil Þórðardóttir, 15.2.2008 kl. 16:27]

Nei Grettistak er skárra