Þegar frostið brennir fold.

Ég hef verið með hugan við veðrið og lætin heima undanfarið, og í nótt þá kviknaði þessi hugmynd.

Þetta skriftarforrit er svo fandi erfitt svei mér þá.  En ég reyni þetta aftur.

 

Þegar frostið brennir fold,

fannir hylja laut og móa,

eyjan góða ofurköld

með ísilagða flóa.

-0-

  Æðir rok um eyðisand,

og ógnumþrungnar sprungur.

Í vetrarham vort ættarland

þá vaknar hugur þungur. 

  -0-

Í sálinni er stríð og stál,

stungur bakið svíða.

Lastabrestir, lygamál,

lífga upp sorg og kvíða.   

-0-

Raunir hafa miklar mædd

mennina við ysta haf.

Herrann sjávar,  holdi klædd

hörmunganna versta traf.

 -0-

Bundið hefur bakið við,

bjargarlausa sjómannshönd.

 

Bændur hafs og búalið

 

bjáninn hefur lagt í bönd.

 -0-

 Hagnaðinn og hafsins auð,

hefur gefið öðrum, hann

Almenningur er í nauð,

illvirkið það vonda vann.    

-0-

Þungan hug og þjóðarsorg,

þrautum pínd er byggðin.

Reiði er yfir bæ og borg

brostin forna dyggðin.  

 

-0-

 

 

Upp nú rísum öll sem eitt,

 

í ráðsmenn æpum vilja.

 

Því við viljum þessu breytt,

 

það verða þeir að skilja.

 

-0-

 

 

 Veit að það eru hnökrar á þessu, en ætti samt að vera nokkuð ljóst.  En það er sama blíðan hér í Vínarborg,  ég er að fara út að borða með vinum mínum hérlendum í kvöld. 

Með góðri kveðju og einni mynd af fannbörðu ísaköldu landi. 

 

 

Athugasemdir

[Laufey B Waage, 1.2.2008 kl. 09:48]

Þú ert rík Ía mín að hafa fengið þessa náðargáfu - hagmælskuna - í vöggugjöf. Takk fyrir að leyfa okkur hinum að njóta.

[Ásthildur Cesil Þórðardóttir, 1.2.2008 kl. 09:58]

Takk Laufey mín, þetta kom nú bara svona til mín í nótt, meðan ég bíaði litlu stúlkunni minni, sem hafði vaknað, og vildi pelann sinn.

[Kristín Katla Árnadóttir, 1.2.2008 kl. 10:40]

Mikið er er þér gefið svo hagmælt takk fyrir þetta elsku Ásthildur mín þú er yndisleg kær kveðja.

[Ásthildur Cesil Þórðardóttir, 1.2.2008 kl. 11:34]

Takk stelpur mínar.  Það er gott að fá smáhrós.  En þetta kom bara svona ljóslifandi, ég breytti engu þegar ég skrifaði það niður.

[Jóhanna Magnúsar- og Völudóttir , 1.2.2008 kl. 12:02]

Það er aldeilis andagift .. sterkt  og frábært hjá þér Ásthildur!  Varð að kíkja hér í hádegishlénu .. allt of mikið að gera annars í vinnunni til að skoða blogg  ..

[Ásdís Sigurðardóttir, 1.2.2008 kl. 12:35]

Þetta er alveg magnað Ásthildur mín, sé inn í hug þinn á þeirri stund sem þetta fæddist.  Kær kveðja til þín og þinna.

[Kidda (IP-tala skráð) 1.2.2008 kl. 12:46]

Þú klikkar ekki mín kæra sama hvort það eru ljóð, myndir eða sögur. Já eða að vera manneskja

Knús til Vinar

[Ásthildur Cesil Þórðardóttir, 1.2.2008 kl. 13:10]

Lítið hádegishléið þitt Jóhanna mín.  Takk.

Já ætli þú farir ekki nærri um það Ásdís mín.

Takk Kidda mín.