Veturinn er líka fagur. Og svo getur margt sýnst öðruvísi.

Já veturinn hefur sinn sjarma.  Barnabörnin fóru út í gær að renna sér á snjóþotum.  Þau eru ánægð með veturinn, svo sannarlega.  Enda er fátt skemmtilegra en að leika sér í snjónum.  Maður gerði það mikið í gamla daga, byggja snjóhús, renna sér á skíðum og sleðum.  Það er margt hægt að gera fyrir börnin á þessum árstíma.

Sumt fær annan búning.

Þessi gæti hafa verið fyrir utan hjá Eyvindi og Höllu.

Hulduhóllinn minn.

Og útsýnið í dag.

Meira að segja gallerí himinn er að myndast við að opna sig.  Annars styttist í að sólin láti sig hverfa frá okkur fram í endaðan janúar.  En hún þvælist þá ekki í augunum á manni á meðan við aksturinn.

Trén taka á sig ótrúlega fallegar myndir. Eins og í ævintýrunum.

Og blóminn fá allt annað yfirbragð.

Sýprisinn virkar niðurlútur, en er í rauninni ánægður með skjólið sem snjórinn veitir honum, og nægur er rakinn.

 

En bara örfáum skrefum í burtu, lítur dæmið öðruvísi út.  Hugsið ykkur að hafa báða þessa heima, inn í sínum eigin einkaheimi.  Lánsöm erum við.

Þar brosa blómin og segja HÆ!

Pernilla að blómstra í þriðja sinn í sumar. 

Hortensían kominn í jólabúninginn sinn.

Og eldþyrnirunninn, alveg í takti við jólin.  Já, hver árstíð hefur sinn sjarma, það er bara eins og með allt annað, við erum það sem við hugsum.  Við getum verið svartsýn og leið yfir kuldanum og myrkrinu, en við getum líka hlúð að því smáa og fagra, lesið úr náttúrunni, og fundið gleðina í öllu, bara ef við viljum það sjálf.  Það er þarna hvort tveggja, hvort kýst þú ?

Það er alveg sama með allt annað líka, við eigum það val að vera leið eða reið yfir hlutum, eða við getum glaðst og fagnað.  Bara eftir því sem við viljum taka á þeim með okkur sjálfum.  Við erum fyrst og fremst við sjálf, og við höfum frjálsan vilja.  Bara spurning um hvernig við vinnum úr honum.  Með jákvæðni verður lífið svo miklu MIKLU skemmtilegra.   Og eitt í viðbót, við breytum ekki heiminum, en við getum breytt okkur sjálfum, eða ákveðið að taka frekar pólinn á það jákvæða og góða, og horft fram hjá því slæma.  Heimurinn hvílir ekki á okkar herðum, en við getum ef til vill gefið alveg heilmikið með því að vera sólargeislar sem lýsa öðrum.  Eigið góðan dag elskurnar.

Athugasemdir

[Ásdís Sigurðardóttir, 31.10.2007 kl. 13:23]

Draumfagrar myndir. Kær kveðja vestur

[Ásthildur Cesil Þórðardóttir, 31.10.2007 kl. 13:32]

Kær kveðja til þín líka Ásdís mín.

[Huld S. Ringsted, 31.10.2007 kl. 13:49]

Þó ég og snjórinn séum ekki bestu vinir þá verð ég nú að viðurkenna að það getur verið ofsalega fallegt í snjónum

[Sunna Dóra Möller, 31.10.2007 kl. 14:06]

Rosalega er mikill snjór kominn til ykkar, þetta eru svo flottar myndir! Stundum væri ég alveg til í að snjórinn kæmi bara hingað og stoppaðir aðeins. Krakkarnir elska snjóinn....en hann stoppar alltaf svo stutt í einu hér fyrir sunnan....! Góð lesning lokaorðin í færslunni....ætla að hafa þau í huga í dag! Takk fyrir mig

[Kristín Katla Árnadóttir, 31.10.2007 kl. 14:29]

Fallegar vetra myndir og falleg blóminn þín Ásthildur mín.

[Jenný Anna Baldursdóttir, 31.10.2007 kl. 16:26]

Vó hvað þetta eru dásamlegar myndir kona!! Og andstæðurnar, þú ert svo sannarlega heppin kona.

Ég er ein af þeim sem fagna alltaf árstíðarskiptum, og mér finnst veturinn svo yndislegur. 

Knús í snjóinn og hér var ég nærri því búin að skrifa gleðileg jól

[kidda, 31.10.2007 kl. 17:30]

Sé að það hefur verið ekta vetrarveður í gærkvöldi Svona veður vantar alveg hérna á höfuðborgarsvæðið.

Heppin að hafa svona tvo heima sem eru báðir jafnfallegir

Takk fyrir myndirnar

Knús

[Ásthildur Cesil Þórðardóttir, 31.10.2007 kl. 17:43]

Já Huld mín það er fallegt í hreinum hvítum nýföllnum snjó.

Já Sunna Dóra mín hér er komin bara ansi mikill snjór.  Takk fyrir hlý orð  

Takk Kristín Katla mín

Einmitt Jóhanna mín, ævintýraveröldin okkar, og það snjóar líka í Sahara furðulegt nokk. 

Takk knúsídúllan mín Jenný  Hann er yndislegur veturinn og jamm hehehe Gleðileg Jól.

Já það var ekta veður í morgun Ólafía mín, þær voru teknar í morgun.  Já heimarnir mínir eru ævintýrið mitt.

Og knús til ykkar allra.

[Solla Guðjóns, 31.10.2007 kl. 17:44]

Ég er hugfanginn af þessum andstæðum og dýrka bæði.Lífið sjálft hvenær sem er.

Kúlan tekur á sig ævintírablæ í snjónum

[Ásthildur Cesil Þórðardóttir, 31.10.2007 kl. 17:47]

Já hún verður svakalega dularfull Ollasak mín, stundum er hún eins og geimskip tilbúið til flugtaks, þá er dimmt úti, en kúlan upplýst.  Skal senda einhverntímann inn svoleiðis mynd. 

[Jakob Falur Kristinsson, 31.10.2007 kl. 17:49]

Mann langar bara til að flytja vestur aftur þegar ég sé svona fallegar myndir Ásthildur. hér er ekkert nema rok og rigning, eins langt aftur og elstu menn muna.

[Ásthildur Cesil Þórðardóttir, 31.10.2007 kl. 18:11]

Vertu bara velkominn heillakarlinn.

[Ragnheiður , 31.10.2007 kl. 20:16]

Flottar myndir ! Rosalega er kominn mikill snjór fyrir vestan !!

[Katrín Snæhólm Baldursdóttir, 31.10.2007 kl. 20:22]

Yndislegar myndir.....verur ekki dimmt í kúlunni þegar hún er svona hulin snjónum??? Sé hana fyrir mér fulla af kertaljósum...vó hvað þetta er allt alltaf flott hjá þér..hvort sem það er vetur sumar haust eða vor.

Dásamlegt bara.

[Jóhanna Magnúsar- og Völudóttir , 31.10.2007 kl. 21:08]

Skemmtilegir kontrastar!.. Snjórinn svona hvítur og svo blómstrandi  jurtir í björtum litum. Það kom örlítil snjóföl á jörðina hér fyrir sunnan síðustu helgi, gúbbarnir mínir; dóttursonurinn og sjúpsonurinn (3 og 4 ára) ætluðu út að búa til engla  ... hmmm.. svolítið grunnt fyrir það.. en þeir bíða spenntir eftir þykkara snjólagi.

[Ásthildur Cesil Þórðardóttir, 31.10.2007 kl. 21:10]

Takk Ragnheiður mín.

Jú Katrín, það verður frekar dimmt þegar snjórinn hylur, en það er bætt upp með  - eins og þú segir - kertaljósum og svo jólaljósum. Seríum, og svo auðvitað bara öðrum ljósum. 

[Ylfa Mist Helgadóttir, 1.11.2007 kl. 00:07]

Heyrðu kona! Þú ert bara með fullt af myndum af mér á blogginu þínu? Mér var bent á það af fjölskyldumeðlimi. Ég verð augljóslega að fara að gá að mér þegar þú ert á ferðinni með myndavélina þína ;) Það er bannað að taka af mér myndir þar sem eg er með undirhöku !!!!

Annars er ég búin að lesa alveg heillangt aftur og verð að segja að þú ert afbragðs penni og tekur skemmtilegar myndir.

[Steinunn Helga Sigurðardóttir, 1.11.2007 kl. 07:47]

flottar myndir. það er svo rétt hjá þér að við ráðum hverning við veljum að sjá hlutina, það er í raun frjáls viljií öllu okar lífi.

hafðu fallegan dag í dag.

AlheimsLjós til þín

steina

[Laufey B Waage, 1.11.2007 kl. 09:16]

Það er bara allt komið á kaf hjá ykkur (kannski ekki alveg á ísfirska vísu - ég er búin að vera svo lengi fyrir sunnan). Sú litla föl sem féll á okkur hér syðra um helgina, var fljót að hverfa. Takk fyrir fallega myndasýningu. 

[Gló Magnaða, 1.11.2007 kl. 09:22]

Ylfa greinilega enn með óráði hehehe....

Náttúran gerist nú ekki flottari en þakin snjó. Og svo verður líka allt svo hreint og bjartara.

[Ásthildur Cesil Þórðardóttir, 1.11.2007 kl. 10:16]

Einmitt allt svo bjart og hreint við snjóinn  satt er það Eygló.

Það er allof langt síðan Laufey mín.

Ljós til þín líka Steinunn mín.

Lofa að taka þetta til greina með undirhökuna, hehehe... hef ekki séð að þú ættir slíka  Takk annars.  

[Svanur Sigurbjörnsson, 1.11.2007 kl. 13:27]

Flottar myndir. 

Fyrir minn smekk mega snjómyndirnar fá örlitla birtuaukningu í Photoshop en motivið er flott, ekki spurning.  Takk fyrir að deila þessu með okkur.  Bestu kveðjur- Svanur

[Einar Indriðason, 1.11.2007 kl. 15:26]

Flottar myndir.  Hvar er þetta annars á landinu?

[Ásthildur Cesil Þórðardóttir, 1.11.2007 kl. 16:33]

Takk Svanur minn, ég er ekki mikið fyrir að photoshoppa  Bestu kveðjur til þín líka.

Ég er á Ísafirði Einar. 

[Einar Indriðason, 1.11.2007 kl. 16:48]

:-)

Ég heimsótti Ísafjörð síðasta sumar.  Kem til með að heimsækja Ísafjörð aftur, og Vestfirðina. 

[Ásthildur Cesil Þórðardóttir, 1.11.2007 kl. 16:55]

Það er gaman að heyra og vertu velkominn. 

[Kolbrún Baldursdóttir, 1.11.2007 kl. 20:34]

Það er sannarlega kominn vetur þarna fyrir vestan. Reyndar mjög hráslagalegt hér fyrir sunnan líka.  Ég hef bara einu sinni komið á Ísafjörð og það akandi. Ég er ekki viss um að ég þyrði að koma með flugi, svo margir búnir að tala um erfiðar flugferðir til Ísafjarðar.
Annars tengjumst við aðeins Ásthildur svona óbeint í gegnum bróður þinn og svilkonu. Engin blóðtengsl þó að mér vitandi. 

Bestu kveðjur.

[Jens Guð, 2.11.2007 kl. 10:59]

  Þó að það fari um mann smá kuldahrollur við að sjá þessar fallegu myndir af vestfirskum snjó þá má fagna snjónum líka.  Hann hreinsar loftið og heldur eitruðum snákum og pöddum fjarri. 

[Ásthildur Cesil Þórðardóttir, 2.11.2007 kl. 11:32]

Nú verð ég vorvitinn Kolbrún mín, ég á þrjá bræður á lífi, Dadda Gunna og Nonna.  Hver þeirra er tenginginn.  Eða raunar Gugga, Stína eða Badda

Takk Jens minn.  Jamm snjórinn er líka góður fyrir vatnsbúskapinn.