Svolítið um endurnýjun og forsetaframboð.

Ég fagna þessu framboði. Ég held að það séu nýjir og betri tímar framundan.  Það er verið að hreinsa til og þar má fyrst þakka Media Reykjavík, Jóhannesi Kr. Kristjánssyni og uppljóstrun hundruða blaðamanna um heim allan um leka um Panamaskjölin. 

Þessar uppljóstranir eru  nú þegar farin að hafa víðtæk áhrif um allan heim.  En ekki síst hér á Íslandi, smátt og smátt hrökklast þeir frá sem hafa mulið undir sjálfa sig á kostnað landsins og þjóðarinnar, með sitt fé á þurru í aflandsskúffufyrirtækjum. Eða bara látið leiðast út í ævintýri og von um gróða.

Fólk vissi að það var eitthvað rotið í samfélaginu, en að það næði alla leið upp í efstu lög þjóðarinnar var nánast eins og kinnhestur og hann illur.  

Ennþá eru nokkrir ráðamenn sem þrjóskast við og reyna að hanga í stólum sínum, en sífellt flæðir meira undan þeim, með meiri upplýsingum.  Best að það fólk sæi að sér og bæðist fyrirgefningar og léti sig hverfa.  Þeir yrðu menn að meiri fyrir vikið. 

Nýji utanríkisráðherran tilkynnti nokkrum dögum eftir að hún kom í embætti að hún hefði kannað málið og það hefði enginn áhrif í útlöndum. 

En það er einfaldlega ekki rétt.  Það heyrist frá fólki sem býr erlendis, sama hvar, að við erum álitinn bananalýðveldi og algjörir kjánar.  Að vísu gerðist það líka að hluta til þegar þjóðin kaus yfir sig aftur þá sem áttu mestan þátt í hruninu.  Síðan hefur margt bent til þess að við séum bæði óskrifandi og ólæst samfélag.  

En sem sagt ég ætlaði að tala um forsetaframboðið.  Einhvernveginn var það svo að það voru sáralítil viðbrögð við öllum þeim fjölda sem hafði gefið kost á sér, það varð smá neisti þegar Andri Snær gaf kost á sér.  En samt það vantaði eitthvað upp á.  

Núna er eins og allt sé tilbúið, eða þannig er mín tilfinning gagnvart Guðna Th.  Auðvitað eru óánægjuraddir og jafnvel hatursfullar umræður og þessi sífelldi hræðsluáróður.  En flestir taka vel í framboð hans.

Ég kaus Ólaf eftir að hann beitti neitunarvaldi sínu.  Og síðan, hann hefur reynst okkur góður forseti og þau hjón glæsilegt par sem vekur bæði aðdáun og virðingu hvar sem þau fara.  Ólafur auk þess vel lesin og inn í öllum málum og hefur svo sannarlega gert margt gott á sínum ferli.

En þegar hann ákvað að hætta við að hætta, fannst mér einhvernveginn að það væri ekki rétt.  Í fyrstu hugsaði ég að ef til vill væri best að hann sæti áfram, því það leit ekki út fyrir að í hans stað kæmi frambjóðandi með þá þekkingu á starfinu sem þyrfti til að sinna því að öllum öðrum ólöstuðum.  En samt 20 ár er langur tími í svona starfi.   Og það er einfaldlega kominn tími til að breyta til.  Fá nýjan mann í sætið.  Guðni hefur allt það að bjóða sem þarf að mínu mati.  Hann hefur kynnst sér þetta embætti ítarlega og oft verið spurður sem álitsgjafi um ýmis málefni varðandi þetta æðsta embætti þjóðarinnar.  Þar fer maður með reynslu og gefur af sér góðan þokka.

 

 

 

 

 

 

 

 

 

 

Guðni með eiginkonu sinni og börnum. 

Nú hef ég séð að það er strax byrjaður hræðsluáróður.  Hann er þannig að ESB sinnar hafi fengið hann til að fara í framboð, og þar með megi ekki kjósa hann.  Í því sambandi vil ég benda á að hann lagði mikla áherslu á vilja þjóðarinnar og frjálst og óháð Ísland og frjálsa þjóð.   Slíkt gengur ekki upp að mínu mati ef við gerumst aðilar að ESB.  Annað er að meira að segja Samfylkingin og áhrifamenn þar bæði Jón Baldvin, Össur og nú Helgi Hjörvar hafa sagt að Evrópuaðild sé ekki á dagskrá lengur.  Helgi sagði að evrópulestin hefði farið framhjá og kæmi ekki aftu næstu 10 15 árin. Þeir eru ef til vill búnir að átta sig á því að þetta niðurhal flokksins hefur heilmikið að gera með Evópuþráhyggju hans.

En svona burt séð frá því, er ekki  kominn tími til að við höldum áfram í stað þess að hanga á sömu þúfunni og ríghalda í allt það sem við þekkjum?  Nýr forseti, nýja ríkisstjórn fljótlega og nýtt hugarfar.  

Ég veit að það þarf vissan kjark til að breyta, en þegar ástandið er orðið eins og það er, meö öllu sínu vantrausti og upplausn sem er í þjóðfélaginu þá er um að gera að treysta nýju fólki til að gera einmitt það.  Það er sagt að nýjir vendir sópi best og það er orð að sönnu.  

Og alltaf koma ný tækifæri og nýjir siðir.  Við ættum að taka því fagnandi að það er til fólk sem vill taka við keflinu og halda því á lofti til hagsbóta fyrir okkur öll.

Vil svo ljúka þessu með því að þakka Dorrit og Ólafi Ragnari fyrir þeirra góðu frammistöðu, sérstaklega þykir mér vænt um hina glæsilegu forsetafrú.  Þau verða ekki á flæðiskeri stödd þó þau láti þetta gott heita.  

Eigið góðan dag.   

 

......

„Það er ekkert að óttast“

Athugasemdir

[Sigurður I B Guðmundsson, 5.5.2016 kl. 18:23]

En ætlar þú samt að styðja Elísabetu Jökuls????

[Ásthildur Cesil Þórðardóttir, 5.5.2016 kl. 19:48]

Ég ætlaði svo sannarlega að kjósa hana Sigurður, af því að ég hugsaði með mér að hún myndi allavega hressa upp á kosningabaráttuna.  Það Breyttist snögglega eftir að Ólafur hætti við að hætta.  Þá sá ég að það er ekki hægt að grínast með svona hluti. 

[Eyjólfur Jónsson, 5.5.2016 kl. 19:55]

Já og svo nota leka frá síðust 25 árum til að annaðkvort jákvæðra eða neikvæðra "umfjöllun" hjá RÚV.

[L. (IP-tala skráð) 5.5.2016 kl. 20:18]

Jú, nýir og betri tímar framundan.

TISA og TTIP samningar framundan og við þurfum forseta sem skiptir sér ekki af því ferli.

Þetta stefnir allt í gamla góða embættismannakerfið ...

[Ásthildur Cesil Þórðardóttir, 5.5.2016 kl. 20:43]

Við þurfum að líta fram á við Eyjólfur en ekki grúska í öskunni, hún er bara blöff.  

[Ásthildur Cesil Þórðardóttir, 5.5.2016 kl. 20:45]

Já einmitt Tisa og TTIP, það þarf virkilega að við getum kosið um þetta án afskipta forseta eða nokkurs annars sem eru að verja þessa einstaklinga. 

[Ásthildur Cesil Þórðardóttir, 5.5.2016 kl. 20:56]

Svo skrifar Björn Bjarnason sá mæti maður og vitnar í Morgunblaðið. 

Í Morgunblaðinu í dag birtist grein eftir Inga Hans Jónsson sem segist hafa verið meðal þeirra sem hvöttu Ólaf Ragnar til forsetaframboðs 1996. Inga Hans telur nú sé nóg komið hjá sínum gamla félaga í forsetaembættinu. Hann vitnar í viðtal við Ólaf Ragnar í Vikunni frá 1973 þar sem hann kvartaði undan „páfakomplexum“ einstakra manna sem hafnir séu á stall eða setja sig sjálfir á stall. Þá segir Ingi Hans:

 

„Þetta var dapurlegt en hárrétt og er það er ekkert síður í dag. En snúningspilturinn Ingi Hans er farinn annað til að velja sér forseta. Forseta sem er í stíl við kröfu ungs fólks um breytingar og draumsýnina um hið nýja Ísland. Ég vil þakka þér fyrir þitt framlag. Framundan er framtíðin sem vonandi verður í höndum nýrrar kynslóðar með nýja drauma og nýja sýn. Við erum orðnir gamlir og eigum að víkja úr vegi fyrir ungu fólki sem langar að gera eitthvað svipað og við gerðum fyrir nærri hálfri öld. Kæri vinur, það er óþarfi að óttast komandi tíma, því framtíðin kemur hvort sem við verðum þar eða ekki, þú og ég.“

[L. (IP-tala skráð) 5.5.2016 kl. 21:16]

Þessvegna er Guðni TH. tilvalinn.

Þessvegna verður að koma Ólafi frá, þessum varðhundi fullveldis.

Auðvitað á valdið eingöngu að liggja hjá ráðherra að samþykkja samninga eins og TISA og TTIP án nokkurrar aðkomu þings og þjóðar!

Skárra væri það nú, allt í gegnum EES samninginn ...

[L. (IP-tala skráð) 5.5.2016 kl. 22:01]

Taktu nú vel eftir Ásthildur.

" Loks er í fyrirspurn hv. þingmanns spurt að því hvort hugsanlegar samningsniðurstöður verði bornar undir Alþingi áður en þær yrðu undirritaðar.

Þar sem við það er miðað að TiSA-samningurinn muni ekki kalla á lagabreytingar hér á landi er samþykki Alþingis ekki áskilið til að samningur verði fullgiltur af hálfu Íslands, 

en í 21. gr. stjórnarskrárinnar segir að samþykki Alþingis sé þörf þegar samningar við önnur ríki sem fela í 

sér afsal eða kvaðir á landi, landhelgi eða kalla á lagabreytingar.

Þrátt fyrir að samningurinn muni ekki kalla á lagabreytingar tel ég engu að síður eðlilegt að Alþingi hafi (1)aðkomu að málinu áður en samningurinn verður fullgiltur af Íslands hálfu"

Gunnar Bragi Sveinsson.

(1) aðkoma, það að vera gestkomandi.

 

[L. (IP-tala skráð) 5.5.2016 kl. 22:25]

Enn þann dag í dag er talið að Svíþjóð hafi talist sem hluthlaus þjóð í seinni heimstyrjöldinni.

Samt þurfti að hernema tvær þjóðir til að tryggja flutning efna úr járngrýtisnámum svíþjóðar til þýskalands í gegnum Narvik Noreg og siglingaleiðina milli Noregs og Danmerkur.

Þjóðverjar og svíar fengu að eiga þessi viðskipti sín á milli óáreittir,enda gríðarlegir hagsmunir fyrirtækja og banka í húfi. Valda elítu sem stjórnar heiminum í dag.

[L. (IP-tala skráð) 5.5.2016 kl. 22:58]

Því verður að eyða þeirri sögufölsun að íslensk alþýða hafi eitthvert vald í þeirri alþjóðavæðingu sem á sér stað á Íslandi.

Stjórnarskráin skýr og okkur vantar forseta sem sýnir alþingi þjónkun.

Enda var Gunnar Bragi ekki alveg að segja satt ...

21. gr. Forseti lýðveldisins gerir samninga við önnur ríki. Þó getur hann enga slíka samninga gert, ef þeir hafa í sér fólgið afsal eða kvaðir á landi eða landhelgi eða ef þeir horfa til breytinga á stjórnarhögum ríkisins, nema samþykki Alþingis komi til.

[L. (IP-tala skráð) 5.5.2016 kl. 23:12]

Og þá sjáum við hvaða forseti lýðveldisins í raun sveik kjósendur sína með atburðarrás sem leiddi þjóðina í þær ógöngur sem hún virðist ekki rata úr ...

[L. (IP-tala skráð) 5.5.2016 kl. 23:23]

" Augljósasta breytingin á stjórnarskránni og sú sem auðveldast yrði að skapa sátt um er að segja berum orðum að íslenska ríkinu sé heimil aðild að evrópska efnahagssvæðinu og Schenge-samstarfinu með þeim réttindum og skyldum sem því fylgja "

BJÖRN BJARNASON.

 

[L. (IP-tala skráð) 6.5.2016 kl. 01:00]

Hvort ætlum við að vera þjóð eða  samfélag meðal þjóða?

Það er greinilegt að þeir sem ætla að arðræna þjóðina vilja forseta sem bugtar sig og beigir fyrir valdi alþingis og nauðgar þjóðinni með 21 greininni.

SPYRJUM FORSETAFRAMBJÓÐENDUR UM STJÓRNARSKRÁNNA!

STJÓRNARSKRÁ SEM ÞEIR EIGA EFTIR AÐ SVERJA EIÐ TIL!

STJÓRNARSKRÁ SEM ER GRUNNSÁTTMÁLI ÞJÓÐARNNAR!

STJÓRNARSKRÁ SEM ALLIR EIGA AÐ KUNNA UTANBÓKAR.

STJÓRNARSKRÁ SEM HEFUR VERIÐ ÞVERBROTIN FRÁ UPPHAFI!

[Ásthildur Cesil Þórðardóttir, 6.5.2016 kl. 10:36]

Takk fyrir þín innlegg L.  Já Valdið vill hafa forseta sem er þeim þóknanlegur.  En þeir hafa bara ekkert um það að segja, þó þeir ef til vonist til þess. 

[Pétur D. (IP-tala skráð) 6.5.2016 kl. 13:10]

Ásthildur, af hverju viltu styðja forsetaframbjóðanda sem studdi Icesave-svikasamninginn á sínum tíma? Forsetaframbjóðanda sem mun láta næstu vinstristjórn óáreitt sölsa land og þjóð undir 4. ríkið (ESB)?

Forsetinn á einmitt að vera verndari sjálfstæðis þjóðarinnar og varnagli gegn landráðum misvitra ríkisstjórna, en ekki eitthvað viljalaust og valdalaust slytti ("sameiningartákn").

Ég vil skora á alla að kjósa Ólaf Ragnar, fyrst að slagurinn muni standa milli hans og Guðna. Það er óþarfi að vera með kveðjustund fyrir Ólaf og Dorrit, því að þau eru ekkert á förum. Svo verðum við að sjá til hvort ekki komi fram verðugir frambjóðendur að fjórum árum liðnum. 

[Ásthildur Cesil Þórðardóttir, 6.5.2016 kl. 13:19]

Þetta er þitt álit Pétur minn.  Ég hef ekki þessa trú á Guðna.  Hann talaði um frjála þjóð í frjálsu landi.  Ólafur hefur gert margt gott, en það er einfaldlega kominn tími til að skipta um skipstjóra.  Icesave og ESB eru ekki lengur issue og við verðum að horfa til nýrra tíma, en ekki alltaf bara stara í baksýnisspegilinn.  Það er mín skoðun.  Ég er harður ESB andstæðingur og mun alltaf vera.  VIð erum líka í meirihluta sem þannig hugsum.  Enda er meira að segja Samfylkingin að bakka út úr þeirri vegferð, þegar þeir áttuðu sig á því að niðursveiflan varð einmitt vegna þeirra ákvörðunar þeirra.  Ég vil heldur ekki sjá þann flokk, né yfirleitt neinn af fjórflokkunum við stjórnvölin eftir næstu kosningar.  Ég vil nýja tíma og hreinsun á spillingu eins og hægt er.  Það er komið nóg af slíku.  

[Agla (IP-tala skráð) 6.5.2016 kl. 15:30]

Ég virði það við þig, Ásthildur, að þú sýnir frú Dorrit Moussaeiff þá kurteisi að þakka henni fyrir ´góða frammistöðu´ á liðnum árum.Hver veit nema hún bæti við nokkrum árum í viðbót.

Trúlega hefur það ekki verið auðvelt fyrir hana að sinna því hlutverki að vera Forsetafrú á Bessastöðum en ég er þér sammála um að hún hafi staðið sig vel í því hlutverki og mér finnst óréttmætt að misjafnlega vel unnar fjölmiðlafréttir um fjármál fjölskyldu hennar og fjölskyldu tengsl hennar séu, að því er virðist, orðin samofin umræðum um hæfni frambjóðanda í forsetakosningunum.

Kannski sýna umræðurnar um fjármál Moussaeiff fjölskyldunnar og tenging þeirra við forsetakosninguna þörf á ´nýju hugarfari´og þá kannski  aðallega meðal kjósenda (og fjölmiðla sem hafa mikil áhrif á afstöðu kjósenda). 

Í þínum skrifum á netinu reynir þú  alltaf að taka málefnalega afstöðu  til umræðuefnisins frekar en að slá stórt um þig með persónulegum svívirðingum og Gróusögum um þá sem hafa aðra skoðun en þú.Það setur þig í sérflokk bloggara og þess vegna fylgist ég með því sem þú leggur til þjóðfélagsumræðunnar.

Kveðja

[Kolbrún Hilmars, 6.5.2016 kl. 15:48]

Ásthildur, það virðast allir sammála í umræðunni að hinn ágæti forsetaframbjóðandi Guðni sagnfræðingur sé ESB sinnaður.  Það eitt er nóg til þess að fella hann sem valkost fyrir þá sem vilja ekki ESB aðild.  Myndi frambjóðandinn lýsa yfir afdráttarlausu hlutleysi og loforði um að vísa öllum ESB tengdum málum til þjóðarinnar horfði öðru vísi við.  Við erum nefnilega að velja okkur forseta sem er OKKAR, ekki stjórnmálanna.
Af fyrri reynslu vitum við að ÓRG neitar að skrifa undir umdeild lög og vísar þeim til þjóðarinnar.  Sumir segja að ÓRG hafi brugðist í fjölmiðlamálinu en það er ekki rétt.  Þáverandi stjórnvöld drógu nefnilega lagafrumvarpið til baka í stað þess að efna til þjóðaratkvæðagreiðslu.

[Ásthildur Cesil Þórðardóttir, 6.5.2016 kl. 17:19]

Þakka hlý orð í minn garð Agla.  Mér þykir vænt um að fá þetta innlegg frá þér.  Og ég er sammála því að það hefur ekki verið auðvelt fyrir Dorrit að vera forsetafrú hér á hjara veraldar, en það er aldrei hægt að sjá það á henni.  Alltaf hlý og glaðleg.  

[Ásthildur Cesil Þórðardóttir, 6.5.2016 kl. 17:23]

Kolbrún mín, það getur verið að margir séu hræddir um að Guðni sé ESB sinnaður maður.  Ég veit ekki til þess, enda finnst mér ESB ekki vera issue í þessu máli.  Það er ekki á dagskrá lengur sem betur fer.  Hann sagði líka að hann myndi setja þau mál í þjóðaratkvæðagreiðslu sem vörðuðu þjóðina alla, þetta mál er tvímælalaust þannig, og meira að segja verður ekki farið í neinar viðræður um þessi mál án þess að spyrja þjóðina fyrst.  

Ég neita að lifa í fortíðinni.  Ólafur Ragnar hefur verið okkkur góður forseti, en 20 ár eru langur tími og okkur ber að leyfa honum að fara sína leið.  

[Kolbrún Hilmars, 6.5.2016 kl. 17:42]

Ásthildur, ég nenni nú heldur ekki að lifa í fortíðinni en hef hins vegar áhyggjur af framtíðinni.  En hvernig sem fer í þessum forsetakosningum þá vona ég svo sannarlega að þú hafir réttara fyrir þér en ég  :)

[Ásthildur Cesil Þórðardóttir, 6.5.2016 kl. 20:42]

Vona það líka Kolbrún mín 

[L. (IP-tala skráð) 7.5.2016 kl. 00:29]

Þegar ég sá þessa ljósmynd http://icelandmonitor.mbl.is/news/politics_and_society/2016/05/05/new_contender_for_presidential_race/ þá var ég viss um að Guðni myndi bjóða sig fram.

Píratar og stuðningsfólk þeirra vilja einhvernveginn halda ESB komplexum sínum leyndum.

Frasar eins og að neita lifa í fortíðinni eru frasar um að alþjóðavæðingin sé frelsun og framtíðin.

Ólafur Ragnar tilheyrir fortíðinni.

En það sem varð Íslandi að falli og athlægi um allann heim er framtíðin.

Grei grei ...

[L. (IP-tala skráð) 7.5.2016 kl. 01:22]

Guðni Th. er framtíðin, enda eru allar viðurkenndar nútíma athyglishórur stimplaðar ESB stimpli.

Það að Guðni Th. taki slaginn sem "alvöru"  " mótvægi " við sitjandi forseta, ætti að klingja bjöllum.

Fjölmiðlar í lýðræðisþjóðfélagi stjórna atburðarrásinni og snúa forsetakosningum í farsa og gefa skít í þá sem hafa boðið sig fram ...

[Agla (IP-tala skráð) 7.5.2016 kl. 14:04]

Sem betur fer búum við í lýðræði þar sem málfreslsi ríkir. Þeim forréttindum fylgja líka ákveðnar skyldur þó ekki séu þær allar lögbundnar.

Mér finnst t.d. lágkúrulegt að nota eignir og fjármál Moussaieff fjölskyldunnar sem vopn í kosningabaráttunni um forsetaembættið því enn hefur ekkert komið fram sem sýnir að núverandi Forseti  tengist þeim á neinn hátt.

Fjölskylda forsetafrúarinnar er ekki fjölskylda forsetans heldur tengdafjölskylda (In Laws). Í CNN viðtalinu margumtalaða var hann spurður um fjölskyldu sína en ekki tengdafjölskyldu og því engin ástæða til að efa að svar hans hafi verið sannleikanum samkvæmt.

Að því er virðist er ekki heldur nein ástæða til að ætla að Frú Dorrit Moussaieff hafi svikið skattayfirvöld á Íslandi um  svo mikið sem eina krónu.               

Í rauninni finnst mér að einkamál maka forseta eigi að vera utan skotmáls. Þá hugsa ég t.d. kosningabaráttunnar þegar Kristján Eldjárn var kjörinn forseti og kjaftagangs um að eiginkona hans keypti ýmislegt-m.a. ljósbleikan morgunslopp- í Hagkaupum og væri þess vegna ekki frambærileg sem forsetafrú Íslands.

Kær kveðja.

[Ásthildur Cesil Þórðardóttir, 8.5.2016 kl. 10:24]

Agla ég man eftir þessu með forsetafrúna, minnir að þau hafi búið á Ísafirði þegar þetta var,löngu áður en hún varð forsetafrú.  Það er alveg dæmigert fyrir fólk að dæma annað fólk eftir klæðaburði eða öðru slíku.