Það er að æra óstöðugan.....

Dagurinn í dag hefur verið vægast sagt furðulegur.  Þjóðinn stendur á öndinni og veit ekkert í sinn haus. 

Ég segi fyrir mig að margt af því sem sagt hefur verið og rætt um, hefur skýrt ýmislegt fyrir mér, svo sem eins og að bæði sjálfstæðismenn og framsóknarmenn eru hópsálir.  Þeir hafa ekki getað sagt neitt fyrr en þeir hafa haft tækifæri til að ræða við foringja sinn.  Hvað með að þingmenn eru kjörnir á þing til að vinna að þörfum landsmanna og þeir séu eingöngu háðir sannfæringu sinni?  Það er nú aldeilis ekki að sjá í þessu.  Þeir hafa þagað og þraukað í allann dag af því að þeir hafa ekki getað rætt málin og komið sér saman um sögur til að segja okkur, ja svei því bara.

Guðlaugur Þór talaði af mikilli "alvöru" um að það sem þyrfti að gera fyrst og fremst væri að hugsa um hag þjóðarinnar. Ja svei, hvenær hefur þessi styrkþegi hugsað um hag almennings? Höfum við orðið var við það þau ár sem hann hefur setið á þingi?

Sama með framsókn, þeir hafa ekki getað tjáð sig um eitt eða neitt, því forsætisráðherrann, foringinn hefur verið á þeytingi til og frá, aðallega til að hlaupa frá fréttamönnum, þegar hann hefur ekki verið að vísa lögreglunni á þá, eða hlaupa inn til forsetans og hingað og þangað, með glott á vör og loforð um að tala við fréttamenn síðar.  

 

Vita þessir menn ekki að fréttamenn eru spegill þeirra út á við til almennings? Þeim ber að flytja okkur fréttir af því sem er að gerast, sérstaklega á ögurstund.  Og ég verð að segja að Rúv hefur staðið sig ótrúlega vel í allann dag við að flytja fréttir, og gera það svo faglega og vel að aldrei var dauð stund.  Kærar þakkir RUV. 

Svo loks eftir dúk og disk berast fréttir af að forsætisráðherrann ætli að stíga til hliðar.  Og undirsátar hans eiga ekki orð til að lýsa yfir hve mikil fórn þetta sé af hans hálfu og óeigingirni til að bjarga þjóðinni allri.  Hann hafi tekið þessa ákvörðun einn og óstuddur, reyndar eftir að hann var búin að þrautreyna að hann átti ekki alveg stuðning hjá forsetanum um að rjúfa þing og boða til kosninga.  Allt í einu var ljóst að hann þurfti að víkja, þó hans menn hafi eytt núna fleiri vikum í að telja okkur hinum trú um að hann hafi ekki gert neitt rangt og þetta væri allt risastórt samsæri RÚV og "góða" fólksins til að koma honum í koll.  

Pabbi gamli kominn í spilið líka til að verja afkvæmið, þó hann fengi good morning og good bye, enda ljóst að honum hefur misfarist í að ala upp ungann sinn alveg hrikalega. 

En svo kemur þetta: 

"Og varðandi þetta með óákveðinn tíma þá er þetta nú bara ná­kvæm­lega það sem gerðist, eins og þeir sögðu þegar þeir komu út, þá var til­lag­an þannig að það var lagt til við þing­flokk­inn að [Sig­mund­ur] stigi til hliðar og Sig­urður Ingi tæki við embætt­is­skyld­um ráðherra um lengri eða skemmri tíma, eft­ir því sem semd­ist milli flokk­anna".

Þetta var nefnilega ekkert inn í myndinni fyrr en í kvöld þegar fréttir koma utanlands frá um málið, að forsætisréðherran hafi bara alls ekkert sagt af sér, heldur falið undirsáta sínum tímabundið að sinna stöðunni. Gamalli risaeðlu sem margsinnis hefur hrært vel upp í fólki með allskonar uppákomum.  

Nú þarf ég að fá mér banana bíðið meðan ég ét hann.

Ætla sjálfstæðismenn með "hetjuna" Bjarna Ben í fararbroddi að gúddera þetta?  Ætla þeir virkilega að spila þessa lönguvitleysu til enda?  Af því að þeir þurfa að koma sínum "góðu málum" áfram.  Svo hvaða góðu málum?  koma því sem eftir er af fjársjóðum landsins til einka vina og félaga?

Afsakið en ég er bara bæði reið og sár yfir þessari andskotans vitleysu.  Og að þetta fólk haldi virkilega að við kaupum þetta?

Ykkur er fjandann sama um þjóðina, ef þið virtuð hana viðlits hefðuð þið tekið mark á yfir 20.000 manna mótmælum í gær.  Málið er bara að það er svo erfitt að yfirgefa plusslagða stólana völdin og yfirráðin.  

Nei og aftur nei.  Ég tel mig mæla fyrir munn margra með að segja að við viljum þetta ekki, við erum búin að fá nóg og lengra verður ekki haldið á þessari braut.  Við viljum ykkur frá, ekki einhverjar skítareddingar, heldur hreint borð og nýjar kosningar.  

Og þó ykkur takist að hanga eins og hundar á roði fram að næstu kosningum, þá verður fallið jafnvel ennþá dýpra þegar kemur að þeim.  Vegna þess að fólk er algjörlega búið að fá nóg af leikaraskap, væmni um hvað þið séuð mikið að hugsa um almenning( sést vel á hvernig heilbrigðiskerfið er komið, hvernig komið er fyrir öryrkjum og öldruðum og raunar öllu velferðarkerfinu)

Vona að mótmælin vaxi og dafni og verði að lokum svo hár kór að jafnvel þið og forsetinn heyri, því þetta er bara komið gott.  

Kæru landsmenn við skulum áfram láta í okkur heyra og halda áfram uns fullnaðarsigri er náð, við getum það og við viljum það.  

„Má vel vera að einhverjir misskilji þetta“

Athugasemdir

[Óskar Helgi Helgason (IP-tala skráð) 6.4.2016 kl. 00:00]

Sæl Ásthildur Cesil - sem og aðrir gestir, þínir !

Ásthildur !

Vel hægt: að taka undir með þér, gagnvart þessum ógeðfelldu feðgum (Sigmund Davíð og föður hans), svo sannarlega.

Ásamt - ýmsu öðru.

En: hvað fær þig til / trekk í trekk, að birta myndir af þessu viðurstyggilega flaggi, hérna að ofan (táknmynd: svokallaðs Lýðveldis 1944 - 2008), sem rifjar aðeins upp ömurlegar minningar, um heimskulega tilburði Íslendinga, um sitt óheppilega sjálfstæði frá Dönum - sem reyndist svo hermdargjöf ein, eins og berlega kom í ljós, Haustið 2008.

Er illu heilli - notað enn, af alls lags þjóðrembings fólki, sem annað hvort:: þekkir ekki þann undirtón falskrar tilveru sinnar undir því, eða: er alveg slétt sama um, fyrir hvað það stendur:: þ.e. arðrán fámennrar valdaklíku græðgis aflanna, í landinu.

Ég vil gerast svo djarfur: fornvinkona góð, að benda þér á geðugri kosti til flöggunar:: hér á síðu þinni, sem annarrs staðar, sem er gamli Hvítbláinn (sem Ungmennafélag Íslands notar, í ríkum mæli), eða þá gömlu Þorsk- eða Fálka fánana, t.d.

Svona - þér: að segja, Ásthildur mín.

Með beztu kveðjum - sem oftar, af Suðurlandi /    

[Anna Sigríður Guðmundsdóttir, 6.4.2016 kl. 01:27]

Já Áshildur mín. Þessi dagur hefur verið mjög umhugsunarverður, svo ekki sé meira sagt.

Ég vil fá að sjá alla 600 eyjaskjóls-félagana strax. Annars er ekkert heiðarlegt né gagnlegt við þessar götu-sakamála-sorteringar fjölmiðla-klíkunnar! Á að finna bara einhverja andstæðinga til að fórna eftir tækifærishentugleika svikadómstólastjóranna og svikablaðamanna/fjölmiðla?

Það dugar ekki lengi né vel, að koma bara með nýtt eyjaskjóls-sett eftir hannaðar og misjafnlega illa og óheiðarlega atkvæðataldar kosningar. Þyskistutalning í opnum atkvæðakössum í venjulegum sendiferðabílum án eftirlits? Reynslan hefur kennt ýmislegt, um kosningasvika-aðferðir gömlu frekjukallanna í bakherbergjunum?

Er fólk búið að gleyma hvernig kosningasvik fara fram í alþingiskosninga-svikatalningum á Íslandi?

Það skiptir ekki máli hvað flokkarnir heita. Forseti Hæstaréttar er mafíustjóri Íslands, sem ekki virðir mannréttindi, lög né réttindi. Dæmir bara eftir mafíuteiknuðum hentugleika-dóplínum!

Held að Sigmundur Davíð og frú ættu að viðskiptayfirgefa gamla frekjukallinn föður hans, sem ráðskast með hann á skammarlegan hátt! Það er fjandi hart þegar ungt fólk fær ekki að lifa sínu lífi í friði fyrir gömlum frekjupólitíkusum bakherberjanna dóplínuðu-leggjandi og hótandi!

Bjarni Benediktsson hefur svo ekki skilið að örupphæðir lægstu nettóframfærslu-upphæða hér á landi duga ekki til að halda heimili og heilsu! Þar með er hann bullandi vanhæfur og verður að víkja, ef hann byrjar ekki á að leiðrétta aftökukjör þrælanna og sjúklinganna/eldriborgaranna fátæku! Það er starfandi ríkisstjórn ennþá, svo hann ætti bara að byrja strax! Litla stelpan valdamikla í sjalla-ritarastólnum ætti að velta staðreyndum fyrir sér, sjálfrar sín og annarra vegna! Það er ljótt að fara illa með ungt og grunlaust fólk, sem telur sig geta breytt einhverju í pólitík frekjukallanna.

RÚV fær ekki þakkir frá mér fyrr en allur listinn með þessum 600 verður birtur! Annars eru þetta bara pólitískar aftökusorteringar, sem gera engum neitt gott. Hvorki RÚV-starfsfólki né þeim sem komast upp með að halda áfram sinni svika-eyjapeyja-iðju. Meðvitaðir eða ómeðvitaðaðir. Bankar ráðleggja alls ekki nein heilræði.

Vona að þig berdreymi aldrei foringjana í Hæstaréttar-stjóradeild Íslands, því þá mun það kallast hræðileg martröð en ekki draumur, Áshildur mín.

Það verður fróðlegt að fylgjast með leikriti morgundagsins.

M.b.kv.

[Axel Jóhann Hallgrímsson, 6.4.2016 kl. 06:35]

Menn hljóta að spyrja sig hvort forsætisráðherrann fráfarandi (eða frífarandi) sé hreinlega með fulle fem!

[Ásthildur Cesil Þórðardóttir, 6.4.2016 kl. 09:22]

Óskar minn mér þykir leitt ef fáninn okkar fer í taugarnar á þér, en hann er nú einu sinni tákn þjóðarinnar allra, og með því að birta hann vil ég undirstrika að hann er okkar sameiginlega tákn allra og áskorun um að verja tilvist hans.  

Ég er sammála því Anna Sigríður mín, við þurfum að fá nöfn þessara manna upp á borðið áður en lengra er haldið, það hefur frést fyrir að sumir nátengdir sjálfstæðisflokknum séu þar meðal, allavega var látið að því liggja að Sigmundur Davíð teldi sig hafa eitthvað til að smjatta á í sambandi við Sjálfstæðisflokkinn, og þar sem er reykur þar er oftast eldur undir.  

Já við skulum fylgjast með þessu "leikriti" til enda. 

Veistu að ég held að svo sé ekki, hann er annað hvort algjörlega tómur í hausnum eða það er eitthvað alvarlegt að þarna.  

[Óskar Helgi Helgason (IP-tala skráð) 6.4.2016 kl. 11:55]

Komið þið sæl - að nýju !

Ásthildur Cesil !

Þvert: á móti.

Þetta sóðalega og ömurlega flagg - er TÁKNMYND innistæðulauss drambs og þjóðernishroka, þrátt fyrir fagurgala þinn, sem ýmissa þeirra / sem virðist einkar lagið, að loka augunum fyrir öllum þeim mistökum og flumbrugangi, sem hafa einkennt þetta samfélag:: allar götur, frá landnámstíð 7. - 9. alda fornvinkona góð.

Því miður: virðist þú vera ein allt of margra, hér á landi, sem gerir þér ekki almennilega grein, fyrir íslenzka lítilmótleikanum.

Undir þessu dekur flaggi þínu - fara Sýslumenn og aðrir erindrekar glæpsamlegrar Banka Mafíunnar og ónýtrar stjórnsýslu að heimilum og fyrirtækjum landsmanna:: upp á, hvern einasta dag ársins - og komazt upp með það !!!

Með sömu kveðjum sem fyrri - ívíð þyngri þó, að þessu sinni / 

[Ásthildur Cesil Þórðardóttir, 6.4.2016 kl. 13:14]

Svo og allir hinir Óskar minn, menn flagga þessum fána á sérstökum dögum, menn flagga fyrir látnum vinum og vandamönnum með þessum fána og draga hann að húni við sérstakar gleðifregnir.  

[Óskar Helgi Helgason (IP-tala skráð) 6.4.2016 kl. 13:29]

Komið þið sæl - sem fyrr, og áður !

Ásthildur Cesil !

Það er engin réttlæting: flöggunar þessarrar ömurleikans dulu, að benda á það, á nokkra vegu.

Eins - og ég gat um hér gærkveldis, þá benti ég á þrefaldan valkost / og mun skaplegri, til úrbóta - en þessa gerfi- Lýðveldis dulu núverandi öngþveitis í landinu, mætti farga:: endanlega, að skað lausu.

Með sömu kveðjum: sem seinustu /