Oft má satt kyrrt liggja, og hvar er rétturinn til að þiggja.

Það stormaði inn til mín kona í dag á kosningaskrifstofuna, hún veifaði framan í mig plaggi.  Nú er ég brjáluð Ásthildur sagði hún.  Þú verður að taka þetta mál upp og stafa ofan í fólkið. 

Heldurðu virkilega, sagði ég róandi að fólk sé svona einfalt ?

Ó já sagði hún fólk er svona einfalt.  Sjáðu bara hvað það kýs alltaf yfir sig aftur og aftur endalaust.

Hvaða snepil ertu með ljúfan mín, spurði ég.

Þetta hér, sagði hún og skellti á borðið fyrir framan mig.  Ég vil að þú skrifir þetta niður og birtir á blogginu þínu.

Jamm og hefst þá lesturinn:

Háttvirtur sjávarútvegsráðherra mætir í sína heimabyggð með þrjár gulrætur í farteskinu; 1 stk. göng, 1. stk. snjóflóðavarnargarð og 5 ára frystingu á lánum í rækjuiðnaði.

Göngin eru sjálfsögð samgöngubót á einum af hættulegasta vegi landsins, og áttu að vera löngu kominn.  Svo er einnig með varnargarðinn.  Og ef ráðherrann er að tala um tímabundinn vanda í rækjuiðnaðinum, þá spyr ég, hvar hefur þú alið manninn Einar Kristinn ?

Það er auðheyrt á málflutningi ráðherrans að þeir ætla engu að breyta í sjávarútvegsmálum, bara skyndilausnir, svo sægreifarnir fái sinn tíma til að koma sér betur fyrir í greininni.

Í dag eru 10 stærstu fyrirtækin með 52% aflahlutdeild.  Hvað verður þessi tala kominn upp í eftir 4 ár ? Og verður þá búið að hækka kvótaþakið og opna fyrir útlendinga inn í greinina?

Eins og Guðfaðir kvótakerfisins hefur nú þegar orðað.  Er þá ekki allt í lagi að fara að ræða Evrópusambandsaðild ?

Er ekki svolítill tvískinnungur í þvíl að hafna alfarið Evrópusambandsaðild og opna á sama tíma fyrir möguleika á kvótakaupum erlendra aðila ?  Því til þessa hafa helstu mótrök Sjálfsæðismanna gegn aðild verið verndun sjávaruðlindanna okkar.

Það verður ekki bæði sleppt og haldið, er það ?

 

Jamm svo mörg voru þau orð. Og ég held bara að ég taki undir hvert og eitt einasta þeirra. 

Athugasemdir

[Katrín, 7.5.2007 kl. 20:06]

Já það blöskraði mörgum í gær en ég verð að viðurkenna að ég svo sem átti ekki von á neinu bitastæðu frá ráðherranum.  Ljóst að ef engar breytingar verða á stjórnarheimilinu verður Bolungarvík og aðrar sjávarbyggðir um allt land komnar í eyði innan nokkura áratuga, jafnvel innan áratugs

[Ásthildur Cesil Þórðardóttir, 7.5.2007 kl. 20:57]

Ég hefði viljað vera þarna.  Ég vona svo sannarlega að Bolvíkingar nái vopnum sínum.  En það gerist ekki nema við steypum þessari ríkisstjórn það er nokkuð ljóst.