Landafræði.

5.5.2007 | 12:24

Það var skondinn frétt sem birtist í DV síðastliðin miðvikudag, en á baksíðu er að finna þessa stórkostulegu frétt:

Óttuðust ekki aðstæður.

Tveir stangveiðibátar urðu vélarvana á Skutulsfirði er þeir áttu skamma leið eftir í höfina við Suðureyri. Alls voru á siglingu saman 8 nýsmíðaðir stangveiðibátar frá Akureyri til Suðureyri. Fyrirtækið Hvíldarklettur ehf. rekur þar umsvifamikla ferðaþjónustu og festi fyrirtækið kaup á 22 bátum nýverið. Bátarnir 8 voru þeir fyrstu sem afhentir voru. Einn þeirra varð vélarvana og kom annar bátur til aðstoðar með því að taka hann í tog.

Vildi ekki betur til en svo að hinn báturinn varð líka vélarvana. Björgunarskipið Gunnar Friðriksson frá Ísafirði var sent á vettvang og sigldi með bátana í togi inn til hafnar á Ísafirði. Bátarnir eru sjö og hálfur metri á lengd og tveir og hálfur á breidd og hafa 160 hestafla vélar. Einn maður var í hvorum bát og hvorugan sakaði við atvikið.

Lárus Jóhannson, vaktstjóri Landhelgisgæslunnar, segir tilkynningu hafa borist til Vaktstöðvar siglinga fyrir miðnætti í gær. Hann segir að veður hafi verið gott til björgunar. “það var ekki mikil hætta á ferðum og björgunin gekk vel fyrir sig. Það er alltaf gott þegar vel tekst til og ekki verða slys á fólki” segir Lárus.

Elías Guðmundsson, framkvæmdastjóri Hvíldarkletts, er ánægður með hversu vel björgunin gekk. “Þetta var ekkert til að hafa áhyggjur af. Um var að ræða olíustíflu í báðum bátunum. Það var stutt í land og björgunarskipið dró þá síðustu kílómetrana. Það er mildi að ekki fór verr. Ég held að mennirnir hafi ekki óttast aðstæður,” segir Elías.

Fyrir utan svolítið klúðurslegt orðfæri, þá svona fyrir þá sem ekki þekkja til, stendur kaupstaðurinn Ísafjörður við Skutulsfjörð. Innsigling inn í fjörðin liggur fram hjá bátabryggjunni, svo ekki veit ég hvert þeir voru að þvælast ef þeir voru á leið til Ísafjarðar, nema þeir hafi ætlað að sigla inn að gömlu höfninni. En þeir voru á leið frá Akureyri til Suðureyrar, svo ég er að spá í hvaða erindi þeir áttu yfirleitt til Skutulsfjarðar. Eða er einhver annar Skutulsfjörður sem ég veit ekki um ?

Flokkur: Bloggar | Facebook

Athugasemdir

Ljós til þín !

Steina

Steinunn Helga Sigurðardóttir, 5.5.2007 kl. 12:54

Þú ert alveg yndisleg manneskja.

Kristín Katla Árnadóttir, 5.5.2007 kl. 13:05

skondnar svona fréttir þar sem maður þekkir staðhætti - maður veltir því stundum fyrir sér um hvað sé eiginlega verið að tala og hvar þetta fólk hafi verið.....

Hrönn Sigurðardóttir, 5.5.2007 kl. 13:47

Smá skýring. Eftir því sem ég best veit, voru bátarnir smíðaðir á Akureyri, fluttir á bílum landleiðina (að sjálfsögðu!) þaðan að Arngerðareyri innst í Ísafjarðardjúpi.

Sjósettir þar og siglt þaðan sem leið liggur út Djúpið til Suðureyrar. Sú siglingaleið liggur m.a. fram hjá Skutulsfirði. Vél eins bátsins stöðvaðist fljótlega á leiðinni, annar bátur tók hann í tog. Vél hans stöðvaðist þegar þeir voru í mynni Skutulsfjarðar og þangað sótti b/s Gunnar Friðriksson þá.

Eggert Stefánsson (IP-tala skráð) 5.5.2007 kl. 16:33

Takk öll sömul Já Arngerðareyri skil þig, en samt sem áður áttu þeir ekki leið inn í Skutulsfjörð, nema ef þeir ætluðu að skreppa á Ísafjörð. Þetta er samt svolítið fyndið Stefán minn.

Ásthildur Cesil Þórðardóttir, 5.5.2007 kl. 18:26