Kvótakerfið, fyrirmenn og aðrir.

Sumt fólk telur sig æðra öðrum.  Þeim er reyndar vorkunn, því þeir hafa fæðst með gullskeið í munni og muna ekkert eftir neinu nema að þeir séu fæddir í forréttindahópi.  Forréttindahópi þeirra frumkvöðla sem eignuðust auð sinn með því að stofna og reka gott sjávarútvegsfyrirtæki.  Frumkvöðlar sem byggðu upp heilt samfélag á ystu mörkum hins byggilega heims. Frumkvöðlar sem vildu sínu fólki vel.  Hugsuðu vel um starfsfólkið sitt og voru til fyrirmyndar í því bæjarfélagi sem þeir höfðu átt góðan þátt í að skapa. 

Niðjarnir voru ekki jafn heppnir, því smám saman fjaraði undan fyrirtækinu og með réttu eða röngu leið það svo undir lok.  En víst er að niðjarnir allt til þessa dags hafa verið vafðir inn í bómull.  Sumir þeirra harðduglegt fólk sem héldu fyrirtækinu og öðrum slíkum gangandi í stoltu samfélagi á nyrstu brún.  Nú er öldin önnur.  Nú er Snorrabúð stekkur. 

Nú hefur sú stjórn sem situr svipt þetta bæjarfélag máttarstólpum sínum.  Og það er ungur maður sunnan úr Reykjavík sem fólk leggur traust sitt á.  Bæjarstjóri ungur að árum sem núverandi meirihluta Bolungarvíkur auðnaðist að ráða til sín.  Þeir hrundu af sér bláa okinu í fyrravor.  Ég tel að það sé þeirra gæfa mitt í svartnættinu.

 

Þeir eru aftur farnir að hóta Kaffibandalagi

Framboðsfundir okkar í Norðvesturkjördæmi hafa leitt það í ljós að að flokkarnir sem mynduðu hið alræmda og óvinsæla Kaffibandalag eru enn við sama heygarðshornið. Að því bandalagi standa Vinstri Grænir, Frjálslyndir og Samfylking, eins og kunnugt er. Hvað eftir annað hótuðu talsmenn flokkanna að stefna að ríkisstjórnarmyndun ef þeir ættu þess kost. Þetta heyrðum við bæði á framboðsfundinum á Akranesi og á Ísafirði.

000

Svo talar sjávarútvegsráðherrann okkar spurning hvort það sé sæmandi ráðherra að tala svona, því hann er jú ráðherrann okkar allra eða hvað ?

Það skyldi þó ekki vera að þessi ágæti maður eigi sinn þátt í að tæta niður það sem forfaðir hans byggði upp ? Eða á þessi sjávarútvegsráðherra ekki þátt í arfa vitlausu kvótakerfi sem er að eyðileggja sjávarbyggðir landsins ?  'Eg var allavega stödd á fundi hér í Íþróttahúsinu á Ísafirði, þegar hann ásamt Einari Oddi þeim merkismanni lofuðu fólki hér að þeir myndu aldrei samþykkja kvótasetningu á smábáta.  Það loforð hafði ekki storknað i þeirra hálsi fyrr en þeir höfðu svikið allt sem þeir sögðu þar.  Og af einstakri hugulsemi við vin sinn þáverandi sjávarútvegsráðherra.

Þessi ágæti maður bloggar hér og segir þetta.  En hann leyfir engum að tjá sig á blogginu.  Hann er annað hvort of merkilegur, eða of viðkvæmur til að leyfa fólkinu í landinu að tala við hann um það sem brennur á. Hvort skyldi  það nú vera.  Silfurskeiðin er ef til vill svolítið beisk á bragðið eftir allt saman.

Það eru ljótar sögur sem maður heyrir af þessu besta kvótakerfi í heimi.  Og það er líka ljótt að heyra að sjómönnum er bannað að tjá sig um ástandið.  Bannað að segja frá þeim kröfum sem þeim er gert að fylgja.  Sem eru í engu samræmi við hið margrómaða besta kvótakerfi í heimi. Bannað að segja frá því að þeim er bannað að koma með þetta eða hitt að landi, það á að fara í hafið aftur.  Bannað að tjá sig um hvað er að gerast á gróflegri yfirtöku á fiskimörkuðunum.  Bannað að vera frjálsir menn. Þögnin ein skal ríkja. Þannig þrífst ofbeldi alltaf best.

Allt þetta á svipuðum tíma og skipstjóri var gerður gjaldþrota vegna brottkasts á fimm þorskum, eða voru þeir sjö ?

Ég vil hvetja sjómenn alla sem einn að taka sig saman og tala hreint út um hvernig þetta kvótakerfi er að fara með byggðirnar, vistkerfið og þá sjálfa.  Hvernig þetta er smátt og smátt að drepa niður allt frumkvæði og veita sægreifunum öll völd.  Þeim sem vilja eignast allann fiskinn í sjónum fyrir sig og selja svo undirsátunum - þrælunum aðgang.  Eða er ef til vill best að hugsa bara sitt og hafa sitt á þurru taka ekki sjens á að vera sviptur eigum sínum eða atvinnu.  En vita hvað þeir ætla ekki að kjósa í kjörklefanum 12 maí.  Þar er hver maður einn með sjálfum sér.  Og það eru ennþá lög sem segja að hér ríki lýðræði þá maður eigi sífellt erfiðara með að trúa því.

Með því að segja ekki neitt, gera ekki neitt kallar fólk yfir sig 4 ár af þessu sama.  Eru menn sáttir við það ?

Ég er dóttir manns sem vann sig upp úr engu í að verða mikill útgerðarmaður og síðan kvótaeigandi.  Ég er stolt af föður mínum.  Hann er ríkur maður í dag, seldi sinn hlut í útgerðinni og hætti.  Hann bað aldrei um að eignast kvóta.  Hann spilaði með eins og allir hinir.  En hann var af gamla skólanum unni fólkinu sínu og byggðinni.  Það hefði aldrei hvarflað að honum að fara með alla sína peninga burtu og skilja fólk eftir á vonarvöl, verðfella eignir og gera fólk að ánauðugum þrælum.

En við þær aðstæður sem ríkja í dag, hefði faðir minn aldrei orðið ríkur, hann hefði aldrei getað byrjað í útgerð.  Honum hefðu verið allar bjargir bannaðar.  Því það eru einhverjir aðrir sem hefur verið úthlutað fiskinum í sjónum.  Og þau stjórnvöld sem nú sitja hafa ákveðið að festa það eignarhald í sessi. 

Þess vegna skulu menn trúa varlega flírulegu brosi, loforðum og smjaðri.  Það mun ekki endast nema fram yfir 12 maí. 

Og ég segi eins og barnið Mamma mamma sjáðu MAÐURINN ER NAKINN !

Athugasemdir

[Jenný Anna Baldursdóttir, 4.5.2007 kl. 21:37]

Mér hleypur kapp í kinn við lestur þessa pistils.  Verð bálreið en ég veit afspyrnu lítið um sjávarútvegsmál.  Núna er ég mun fróðari.  Djö... óréttlæti og svínsháttur.  Þessir íhaldseggir ættu að skammast sín.  Áfram með kaffilbandalagið.

[Ásthildur Cesil Þórðardóttir, 4.5.2007 kl. 21:46]

Já áfram Kaffibandalag, örkum glöð í takt inn í nýja tíma svo sannarlega.

[Anna Ólafsdóttir (anno) (IP-tala skráð) 4.5.2007 kl. 22:44]

Guðjón var flottur í Kastljósinu í kvöld - rétt eins og í Silfrinu. Haltu áfram að koma hugsjónunum á framfæri Ásthildur - þú hefur svo margt fram að færa sem verður að minna á reglulega. Mér finnst alltof lítið hafa farið fyrir kvótaumræðunni í öðrum kjördæmum en NV. Ég þori ekki að segja meir, eins og þú veist verður mér alltaf svo heitt í hamsi þegar ég hugsa um kvótahneykslið. Hvet þig til að fylgjast með Kompás á sunnudaginn. Skilst að hann fjalli um sjávarútvegsmál. Nema þeir fresti þættinum fram yfir kosningar. Hvað vitum við um það sem gerist bak við tjöldin 

[Ásthildur Cesil Þórðardóttir, 4.5.2007 kl. 22:47]

Já Anna mín ég hef heyrt um það.  Vona að þeir fái að sýna þáttinn.  Takk elskuleg.  Og ég skil.