Þegar stórt er spurt ...............................

Það er að færast skjálfti í kosningabaráttuna, svona á síðustu metrunum, maður má ekki lengur segja korteri fyrir kosningar.  Hver vill þriggja flokka vinstri stjórn spyrja stjórnarliðar og hrylla sig.  Maður skynjar að það er búið svona að leggja línurnar um hvað á að segja í baráttunni.

Spunameistararnir segja: Talið um hvað frammistaða ríkisstjórnarinnar sé glæsileg í alla staði, allt í blóma og sóma.  Ef það koma einhverjar raddir um að Jón og Gunna hafi það slæmt og það séu biðlistar á hinum ýmsu stöðum eins og BUGL eða á dvalarheimilum, eða fólk fer að tala um smotterí eins og lokun á iðjuþjálfun á LSH, þá segið þið bara að það sé búið að vera að vinna í málinu og nú sé hægt að fara að framkvæma.  Vonandi fer enginn að spyrja um fíkinefnalaust Ísland, eða milljarð í varnir við þeim vágesti.

Og ef fólk er svo ósvífið að fara að tala um að þið séuð búin að vera við völd í 12 ár. Þá er um að gera að tala bara um að þetta taki tíma, undirbúningurinn hafi verið erfiður og þetta sé allt að koma.   Glæsilegur árangur, og aldrei verið meira lagt til velferðarmála en einmitt nú. 

Ef fólkið trúir ykkur ekki enn þrátt fyrir allt þetta góðæristal og undirbúning.  Þá skuluð þið bara taka upp gömlu góðu taktana um ömurlega vinstri stjórn.  Segja að allt fari norður og niður ef vinstri öflinn nái hér taki.  Það hrífur alltaf.  Fólkið trúir þessu einfaldlega og þið verðið áfram við völd og getið í rólegheitum haldið áfram að einkavæða og gefa góðu fólki auðlindir þjóðarinnar.  Það er ennþá svolítið eftir eins og vatnið, orkan og svo á eftir að hnykkja á því að kvótinn haldist örugglega hjá sægreifunum. Við skulum þeim þó það eftir alla styrkina í kosningasjóðina. 

Ég segi ætlar fólk virkilega að láta svona tal hafa áhrif á sig eina ferðina enn.  Láta plata sig eina ferðina enn með að NÚNA gerum við það sem við vorum að lofa.  Af því að við erum búin að vera 12 ár að undirbúa málin.  Tekur það virkilega 12 ár að undirbúa allann glæsileikann ? 

Þeir segja okkur að aldrei hafi sjávarútvegurinn verið blómlegri, þegar skuldir hans hafa vaxið stjarnfræðilega.  Menn selja kvótann og fara út út greininni með milljarða, og þeir sem kaupa sitja uppi með skuldirnar þeir þurfa svo að finna leið til að borga herlegheitinn. Hvar endar það dæmi ?

Núna gott dæmi úr Bolungarvík.  Þar sem byrjað var á að selja kvótann.  Eigendur hafa svo örugglega haft aðrar áætlanir um hvað ætti að gera við þann gróða.  Ekki kemur hann bolvíkingum til góða, því þar máttu yfir 40 manns taka pokann sinn.  Það er nú enginn smá fjöldi umreiknað yfir í reykvíkinga.  Töluglöggir menn geta umreiknað það.  Ég er sauður í slíku. 

Ég verð samt að segja að mér finnst það frábært að vita að bæjarstjórinn í Bolungarvík er núna strax kominn af stað með að finna vinnu fyrir fólkið.  Hafi hann þökk fyrir það.  Mér er sem ég sæi það gerast annarsstaðar.  Ungur maður nýkominn vestur og maður finnur að hjarta hans slær á réttum stað.

Getur einhver ímyndað sér það óréttlæti sem er að gerast fyrir framan augun á okkur, að einhverjir geti bara átt óveiddann fiskinn í sjónum.  Og þessir menn geti svift fullt af fólki atvinnunni, og eignum sínum í leiðinni.  Því þeir sem eiga þarna hús selja það ekki á neinu markaðsverði.  Þeir geta í besta falli selt einbýlishús í Bolungarvík fyrir kjallaraholu í Breiðholtinu.  Eða nei ef til vill bara fyrir eitt geymslupláss í fjölbýlishúsi í Reykjavík. 

Nei sjávarútvegurinn hefur aldrei verið með jafnmiklum blóma og einmitt nú.  Frú Ásta Möller svaraði því til í kosningaútvarpi Útvarp Sögu að það þyrfti ekki að breyta neinu í kvótakerfi okkar, því þetta væri besta kvótakerfi í heimi, og aðrar þjóðir litu til þess með aðdáun.  Og vildu taka það upp. 

Ég segi bara það fólk í hinum dreyfðu byggðum landsins sem lætur plata sig eina ferðina enn til að kjósa þessa stjórn yfir sig, er ekki í tengslum við raunveruleikann.  Það er alveg á hreinu.

Annað sem ég vildi sagt hafa.  Skoðanakannanir eru að tröllríða hér öllu og flestir komnir með æluna upp í háls af slíkum.   En ég vek samt athygli á einu.  Í byrjun þegar stjórnarandstaðan talaði sem einn maður um samstöðu, þá var stjórnin fallinn samkvæmt þessum skoðanakönnunum.

En um leið og formennirnir fóru að tala út og suður um að ganga óbundnir til kosninga, þá breyttist að strax og stjórninn hélt velli samkvæmt könnunum.  Er þetta ekki umhugsunarefni fyrir þessa þrjá flokka sem byrjuðu með kaffibandalagið ?  Ef þeir tala einum rómi um að starfa saman eftir kosningar og gefa þjóðinni skýrt val, þá er ég viss um að þeir munu sigra.

Þessir flokkar geta skipt sköpum.  Þeir þurfa bara að ganga í takt, og sýna svo ekki verður um villst að þeir muni standa við það að starfa saman ef kosningaúrslit verða þannig.

Glæsilegur árangur ríkisstjórnarinnar eru bara innantóm orð.  Það er góðæri um allan hinn vestræna heim, og að þakka sjálfum sér það hér og nú er bara barnaskapur.  Það hafa komið fram skýrslur og varnaðarorð sem segja okkur að hér er ekki allt sem sýnist.  Og okkur ber að hlusta á þær raddir.  Að bjóða okkur upp á það korteri fyrir kosningar að þessi 12 ár séu bara undirbúningur fyrir öll góðu málefnin er svo út úr korti að hver einasti hugsandi maður ætti að sjá að það bara stenst enganveginn.  Og hvað svo, tekur þá önnur 12 ár að koma þessu góðæri á ? Og leiðrétta það sem þau hafa viljað gera öll 12 árin sem þau hafa verið við völd? Common segi ég nú bara.  

Það er ljóst að um 40 % manna er óákveðinn um hvað þeir ætla að kjósa.  Ég segi við þetta fólk, þá sem hingað slæðast og lesa.  Kynnið ykkur málefnin.  Skoðið hvað fólk hefur gert og hverju lofað.  Farið inn á Althingi.is og skoðið frumvörpin sem stjórnarandstaðan hefur lagt fram og af hverju þau góðu mál sem þau hafa lagt fram hafa ekki náð fram að ganga.  Það skyldi þó ekki vera af því að ríkisstjórnin hefur í raun og veru engar fyrirætlanir um að gera allt það sem þau hafa verið að "undirbúa" svo glæsilega síðastliðnu 12 árin.  Að öll fallegu orðin og allar fallegu áætlanirnar eru bara nýju fötin keisarans, sérsniðin til að villa ykkur sýn.  Til að fá atkvæðin ykkar enn og aftur.  Til að geta setið kyrr við kjötkatlana og ráðstafað öllu ennþá og aftur.

Það er nefnilega svo, að á fjögura ára fresti þá eigið þið þetta val.  Þið getið ráðið því hverjir ylja sér við kjötsúpuna.  Þið eigið þau völd.  En með því að yppta öxlum og segja að það sé sami rassinn undir þeim öllum, eða kjósa bara það sama af því að maður hefur alltaf kosið þá, eða að segja að ég hef það svo sem ágætt og þá er enginn ástæða til að breyta, þá eruð þið að grafa undan því lýðræði sem á að vera í hverju lýðræðisríki. 

Ég segi bara lýðræðið er dýrmætt.  Og það er auðvelt að glata því, ef maður er bara nógu kærulaus.  Völd spilla, það er ekki vegna þess að fólk sé vont.  Heldur liggur það bara í hlutarnis eðli og er bara mannlegt að þegar maður hefur setið of lengi við völdin, þá verður maður kærulaus og vill bara hafa sín völd áfram.  Þar verður enginn endurnýjun eða nýjar áherslur.  Aðalmálið verður bara að halda í þau völd sem maður hefur.  Ertu þú kjósandi góður tilbúinn til að taka þann slag.  Viltu breytingar ? eða viltu bara sömu súpuna áfram af því að hún er eitthvað sem þú þekkir.  Eða hefurðu þor til að leita nýrra leiða ?  Þegar stórt er spurt................................

Athugasemdir

[Kristín Katla Árnadóttir, 30.4.2007 kl. 22:08]

'Ég er allveg sammála þú ert mögnuð þú skrifar svo vel og skemtilega

þú átt að skrifa líka í blöðinn .

[Ásthildur Cesil Þórðardóttir, 30.4.2007 kl. 22:13]

Takk elskulegar   Stundum verður maður bara að tala út frá hjartanu.

[Ásthildur Cesil Þórðardóttir, 30.4.2007 kl. 22:32]

ég vildi óska að ég gæti sagt á pólsku, thailensku og spænsku og jafnvel fleiri tungumálum; hvað sem atvinnurekendur segja við ykkur um að ef þið kjósið ekki rétt, þá fáið þið reisupassann, þá er það bara svo að í kjörklefanum eruð þið frjáls, það veit enginn hvað þið kjósið.  Þannig er best að bara segja ekki neitt en nota atkvæðið af skynsemi.

[Ásthildur Cesil Þórðardóttir, 30.4.2007 kl. 22:48]

Takk Jóna mín. Ég er ekki í framboði, en ég fylgi þeim flokki.  Og ég lít svo á að þessir þrír stjórnarandstöðuflokkar eigi þann eina kost að starfa saman, vilji þeir virkilega breytingar.  Og það er mín bjargfasta skoðun.  Ég lít svo á að þeir hafi í sinni stefnuskrá málefni sem þeir geti vel komið sér saman um. Og unnið að góðum málum saman.  En þeir geta ekki unnið það sér sem hver og einn og alls ekki í einhverri valdabaráttu.  Sameinaðir stöndum vér, sundraðir föllum vér á að vera það mottó sem þeir eiga að tileinka sér, og standa og falla með þeirri kenningu.  Það er mín innsta sannfæring. 

[Ásthildur Cesil Þórðardóttir, 30.4.2007 kl. 23:08]

[Heiða Þórðar, 30.4.2007 kl. 23:14]

Flottur pistill hjá þér Ásthildur. Falleg kveðja frá mér til þín inn í nóttina

[Ásthildur Cesil Þórðardóttir, 1.5.2007 kl. 00:22]

Takk elskuleg mín og sömuleiðis

[Jenný Anna Baldursdóttir, 1.5.2007 kl. 01:05]

Elsku Ásthildur brilljant pistill og ekki hægt að segja þetta betur.  'Eg vona að hinn almenni maður skynji þörfina til að skipta út þreyttu valdabatteríi og hleypa nýjum að.  Fólki sem ekki hefur misst baráttuanda og þörfina fyrir réttlátara þjóðfélagi.  Merkilegt samt að aldrei skuli vera hægt að segja einfaldlega eitthvað annað en "við göngum óbundin til kosninga".  Geir sagði í Kastljósinu í kvöld að ef sjtórnin héldi velli þá væru það skilboð til D og B að halda áfram saman í stjórn.  Vó hvað það rennur mér kallt vatn milli skins og hörunds.

Nú verð ég að telja niður.  En-tu-tre- fyrir svefninn.  Smútsj.

[Arnar (IP-tala skráð) 1.5.2007 kl. 02:13]

Sæl Ásthildur

ég ætla að gefa mér það leyfi að afrita greinina þína og setja hana inn á bloggið mitt
er það ekki allt í lagi?

kveðja úr rvk
Arnar Bergur Guðjónsson

[Ásthildur Cesil Þórðardóttir, 1.5.2007 kl. 10:54]

Jú það er í fínu lagi Arnar minn. 

[Ásthildur Cesil Þórðardóttir, 1.5.2007 kl. 10:55]

Ég segi nú ekki margt Jenný mín.  Við skulum berjast hlið við hlið í sameiginlegum slag.

[Anna Benkovic Mikaelsdóttir, 1.5.2007 kl. 11:25]

Ásthildur mín, tilhamingju með daginn og ég tek undir að þessi grein á að birtast í Mogganum

[Ásthildur Cesil Þórðardóttir, 1.5.2007 kl. 12:14]

Held að þeir myndu ekki birta hana þar.  Hún er líka of löng.  Til hamingju líka með þennan frábæra dag Anna mín.

[Guðsteinn Haukur Barkarson, 1.5.2007 kl. 12:35]

Frábær grein sem er skrifuð af ástríðu, ég tek undir þau sjónarmið að þú ættir að fara þá leið að skrifa í moggann, ég hef engan stjónmálamann nema þig, séð skrifa af slíkri ástríðu og réttlætiskennd, sem er einmitt það sem vantar í ALLA stjónmálamenn, sama hvað þeir heita. Guð blessi þig Ásthildur !

[Ásthildur Cesil Þórðardóttir, 1.5.2007 kl. 13:13]

Takk fyrir þessi orð Guðsteinn minn. 

[Ásthildur Cesil Þórðardóttir, 1.5.2007 kl. 14:05]

Það hefur enginn í flokknum mínum sagt að fólk ætti að fara sem þegar er komið. Það hefur ekki einu sinni verið rætt um að loka landamærunum.  Það hefur hins vegara verið talað um að fara varlega í óheftum innfluttning frá milljóna þjóðum.  Svo óheftum að við getum ekki tekið sómasamlega á móti því fólki.  Hér til dæmis talar formaðurinn Guðjón Arnar um þessi mál m.a.  Þetta er okkar afstaða.  Hún fer alveg saman við það sem ég hef verið að segja hér Inga mín elskuleg.  En það er til fullt af fólki sem lemur hausnum við steininn og er í rauninni ekki hægt að ræða þessi mál við slíka á eðlilegum nótum. http://www.visir.is/apps/pbcs.dll/section?Category=VEFMIDLAR&Template=VefTV&ChannelID=10&ProgID=32047&ProgType=2001&ItemID=29103&progCItems=1

Ég býð þér að hlusta á Guðjón Arnar í frábærum kastljósþætti hjá Agli.  Og takk fyrir að verja mig knús til þín.