Ánægjulegt kvöld.

15.4.2007 | 02:15

Átti frábært kvöld með vinum mínum. Áhugaverðar umræður um málefni innflytjenda þar sem þau hafa hug á að flytja til Íslands, en þessi ágæta vinkona mín sem er virtur arkitekt í Þýskalandi fékk viðvörun frá þýskri konu hér, sem sagði henni að "diploma" svo sem eins og arkitekt fengist ekki viðurkennt hér á landi fyrir útlendinga. Það er nefnilega svo að útlendingar sem vilja koma hingað fá ekki viðurkennda menntun sína. Skrýtið, ég sem var farin að halda að það væru bara við í xF sem værum rasistar.

En ég ætla ekki að vera með kaldhæðni. Ég bauð vinum mínum upp á grafin lax í forrétt, svo var hangilæri með uppstúf grænum baunum og rauðkáli, sem var vel þegið, og ís í eftirrétt.

Börnin nutu sín í heita pottinum, meðan við fullorðna fólkið brögðuðum á hangiketinu.

Notaleg stund í pottinum.

Páskaunginn lét líka stóra rullu, þar sem Britt hin þýska er dýravinur hinn mesti.

Þarna er mamma hennar og bróðir að hlú að páskaunganum sem er eins og vera ber lítill ungi.

Smá skýjamynd á þessu yndislega degi.

Stubburinn er boðinn í heimsókn í endaðan júlí, og þau vilja svo taka hann með sér, þegar þau koma aftur í byrjun ágúst. Veit ekki hvort ég þori að senda hanna svona aleinan út. En það er ef til vill hægt að kaupa gæslu fyrir svona stubb. Hann hefur komið heim til þeirra og þekkir til, svoleiðis að það er í lagi.

Flokkur: Bloggar | Facebook

Athugasemdir

Ég er ekki sérfræðingur á þessu sviði, en sem betur fer held ég að þú hafir rangt fyrir þér hvað starfsréttindi útlendinga varðar. Þetta var vissulega staðan á Íslandi til margra ára en eftir því sem ég kemst næst var þetta eitt af þeim atriðum sem breyttist með EES samningnum, enda mikilvægt atriði hvað varðar frjálsa för fólks.

Þjóðverjar ættu því (eftir því sem ég best veit) ekki að vera í vandræðum á Íslandi, en hitt er ennþá eftir því sem ég best veit að einstaklingar frá löndum utan EES geta átt verulega erfitt með að fá menntun sína viðurkennda.

G. Tómas Gunnarsson, 15.4.2007 kl. 02:39

Takk fyrir þetta svar. Ég ætla að segja henni þetta á morgun. Hún ætlar að skoða þessi mál. En það væri gott að fá þetta staðfest.

Ásthildur Cesil Þórðardóttir, 15.4.2007 kl. 03:03

Ég hef átt í mestu basli með það, enda með menntun sem ekki er kennd hér heima. En ég er íslendsk og lærði í Danmörk!

Anna Benkovic Mikaelsdóttir, 15.4.2007 kl. 09:59

Þið hafið það svo sannarlega lega huggulegt í kúluhúsinu og ég fæ vatn í munninn. Ég held að þú fáir gæslu fyrir stubbinn. Það á ekki að vera neitt mál.

Jenný Anna Baldursdóttir, 15.4.2007 kl. 09:59

Já heldurðu það Jenný ? hann er þrælspenntur að fara, við höfum nokkrum sinnum heimsótt þau, og síðast fóru þau með okkur í dýragarð sem er skammt fá, eða í Pforsheim.

Anna mín ef kaffibandalagið nær meirihluta, þá munu Frjálslyndir sjá til þess að þessi mismunun verði lagfærð. Og ég er viss um að hinir flokkarnir setja sig ekki upp á móti því. Þetta er óþolandi mismunun. Alveg eins og það er óþolandi að landinu skuli nú vera lokað fyrir öllum öðrum þjóðum en þeim sem koma frá Evrópusambandinu. Og meira að segja Rúmenar og Bulgarar eru útilokaðir vegna ákvæðis í samningunum um frestun.

Ásthildur Cesil Þórðardóttir, 15.4.2007 kl. 10:56

Ásthildur mín, ég vil Þig á þing!

Anna Benkovic Mikaelsdóttir, 15.4.2007 kl. 11:19

Takk fyrir traustið Anna mín. Ég verð að bíða í fjögur ár til þess. En ég hef ágætis samband við mína menn. Og við erum mjög svo sammála sem betur fer. Þau sjónarmið sem ég set hér fram eru í fullu samræmi við það sem þeir eru að hugsa líka. Og ég lofa að ef það bregst þá mun ég leiða þá á réttan kjöl aftur.