Kosningaslagur - eða hanaat ?

Nú er allt að fara á fullt í pólitíkinni.  Mér þykir alveg nóg um allan hamaganginn.  Það eru gerðar skoðanakannanir og svo er gengið út frá þeim sem úrslitum kosninga, og frambjóðendur látnir svara fyrir niðurstöðurnar.  Er þetta rétt nálgun? 

Af hverju er ekki meiri tíma eytt í málefnin spurði minn ekta maki.  Væri það ekki nær ?  Og ég er sammála honum.  Væri ekki nær að gefa fólki tækifæri á að segja hvað það vill gera eftir kosningar, heldur en þessi hraðaspurningamáti, og að reyna að fá fólk til að segja eitthvað krassandi.  Etja fólki saman eins og í hanaslag ?

Mér finnst þetta ógeðfeld nálgun.  Og ég er alveg viss um að ég er ekki ein um þá skoðun.  Það er verið að trylla fólk, og fá upp hasar.  Er mönnum alveg sama hvað flokkarnir vilja gera ? Er það orðið aukaatriði. 

Og svo er lagður dómur á fólkið.  Þessi er bestur, þessi er ömurlegur, þessi stóð sig verst.

Ágætu samlandar ég segi nú bara, hvar er skynsemi ykkar, hér eiga að fara fram kosningar um hverjir eiga að stjórna landinu okkar næstu fjögur árin.  Er það eitthvað X-faktor eða júróvisjón í ykkar augum.  Finnst ykkur virkilega skipta mestu máli hvernig fólkið er klætt eða hversu flott það er? Slíkt er komið beint frá henni Ameríku og þykir ekki par fínt.  Hverslags dans er verið að bjóða okkur upp á. Hvers eiga þeir að gjalda sem hafa góð mál, og vilja vel, en komast ekki í gegnum vinsældarkeppnina ?  Eða haldið þið virkilega að sætasta stelpan á ballinu sé endilega best hæf til að stjórna og ráða ?

Nei ég segi nei.  Við þurfum ... og aldrei meira en einmitt núna að vanda valið vel, og gera upp hug okkar.  Skoða stefnuskrár og viljayfirlýsingar.  Skoða hvað flokkarnir vilja gera okkur til hagsbóta, þá skiptir fjandann engu máli hversu flottir menn eru í tauinu, hvernig bindin eru á litinn, eða hvort menn brosa ekki nóg.  Þið eruð meira og minna veruleikafyrrt, og ég held að það sé einmitt verk fjölmiðlanna, að æsa ykkur upp úr öllu valdi til að skapa stemningu og fjör.  Haldiði virkilega að það sé það sem við þurfum á að halda núna á þessum síðustu og verstu?  Ég segi nei.  Við þurfum að fá að vita hvar raunverulega mun verða í spilunum eftir kosningar. 

Í mínum huga er það enginn spurning að sú velferðarstjórn sem gæti orðið ef núverandi stjórnarandstaða sigrar kosningarnar, er það besta sem gæti orðið hér.  En það er bara mín skoðun.  Ég bið ykkur að skoða í alvöru hvað ykkur finnst best í stöðunni, við erum að tala um framtíðina og hvað getur orðið til betri eða verri vegar.  Erum við ánægð með ástandið eins og það er ? Eða finnst okkur kominn tími til að breyta.  Það er málið sem við þurfum að hugsa um núna.  En ekki láta spana okkur í hanaslag, þar sem sú ákvörðun nær aldrei upp í heilabúið á okkur, heldur situr í brjóstkassanum og imbakassanum og útvarpinu.  Gætið að ykkur, hér er alvara á ferð en ekki skemmtiþættir.

 Annars verð ég að geta þess svona í lokin að stubburinn er algjörlega búin að spilla páskaunganum.  Hann hoppar og gaggar allan daginn, nema þegar hann er tekinn upp og gælt við hann.  Hver vill ekki láta spilla sér þannig ?

 Stubburinn og páskaunginn að horfa á sjónvarpið.

 Stubburinn og unginn að læra saman.

Annars hringdi lítil stubba í mig í dag, amma, ég get því miður ekki séð ungann, því ég er að fara suður.  En ég hef verið að hugsa um þetta hvort er það strákur eða stelpa ?

Ég veit það ekki elskan mín, svaraði ég.

Sko amma, ef þetta er stelpa, þá vil ég að hún heiti Lína, en ef það er strákur, þá á hann að heita Hnoðri.  

Athugasemdir

[Ásdís Sigurðardóttir, 10.4.2007 kl. 23:33]

Sæl mín kæra. Þarna hittirðu einmitt naglann á höfuðið. Halda menn að þetta sé eitthvað X-Factors-júróvisijóns-idol?? Nei þetta er bara blákaldur veruleikinn og við verðum að hugsa, ekki bara gera eitthvað sem er inn í dag eða eftir vikur eða 12.maí. Ég er reyndar ekki sammála því að það sé til bóta að skjóta X-D út í næstu stjórn, vil hafa þá áfram en með öðrum. Það hlýtur að finnast lending.  Ég veit auðvitað ekki hvað er best, en það besta sem mér finnst fyrir mig er Status Quo, ég er á góðum öryrkja level, fæ 100% þjónustu í kerfinu og er glöð, ég get allavega ekki farið fram á meira, en ég verð líka að hugsa um aðra. Er að pæla mikið í þessu get lofað þér því. En, ég vorkenndi þínum mannni soldið í kvöld, þetta snýst allt orðið um útlendingana, ekki málefnin ykkar. G.N. og kær kveðja

[Ásthildur Cesil Þórðardóttir, 10.4.2007 kl. 23:39]

Góða nótt.  Það er ekki alveg rétt að þetta snúist um útlendingana, það er alltaf dregið málin að þeim punkti.  Einmitt til að fá fútt.  það átti að ræða landbúnaðarmál og utanríkismál í kvöld.  Innflytjendaumræðan var í gær.  Svo það átti að tala um aðra hluti í kvöld.  En ég segi líka góða nótt. 

[Jenný Anna Baldursdóttir, 11.4.2007 kl. 01:57]

Ég er sammála Ásthildur að þessar útlitseinkunnagjafir og 1 poeng hér og annar þar er frámunalega hallærislegur útgangspunktur.  Það sem skiptir máli er nottla stefna flokkanna í flestum mikilvægum málum.  Ég ætla ekki út í umræðuna um innflytjendurna, er búin að blogga um hana vonandi í síðasta sinni. 

Mikið skelfing eru þeir sætir strákarnir þe Stubbur og Hnoðri eða sæt saman þau Lína og Stubbur hehe.  Sofðu vel

[Ásthildur Cesil Þórðardóttir, 11.4.2007 kl. 08:55]

Takk Jenný mín já þau eru sæt saman, eða sætir saman.  Vonandi er þetta lína, því það lengir örugglega líftíma hennar. 

[Rannveig H, 11.4.2007 kl. 11:59]

'Eg er hjartanlega samála þér,ég verð ekki bara reið heldur sorgmædd hvernig þessi umræða er að þróast og hvernig pólitík er að verða.En ég veit allavega hvað ég vil .kveðja

[Ásthildur Cesil Þórðardóttir, 11.4.2007 kl. 12:45]

Glöð að heyra í þér Rannveig mín

[Anna Benkovic Mikaelsdóttir, 11.4.2007 kl. 19:35]

Já það vantar betri málefnaumræðu!

[Ásthildur Cesil Þórðardóttir, 11.4.2007 kl. 19:36]

Einmitt Anna mín.