Spurt með von um svar.

Mér þykir vænt um Framtíðarlandið og ég gekk í samtökin fljótlega eftir að þau voru stofnuð.  Mér finnst frábært þegar grasrótin bregst svona við valdníðslu stjórnvalda. Og ég vona svo innilega að ég geti verið áfram í samtökunum. 

En það er bara ýmislegt að bögga mig í því sambandi, og af því að ég vil hafa það sem sannara reynist, þá ákvað ég að ganga hreint til verks og spyrja mína ágætu félaga í samtökunum spurninga til að fá svör.  Og ég vona að svörin verði þannig að ég geti sæl og ánægð haldið áfram að vera stoltur félagið í samtökunum.  Þetta voru spurningarnar sem ég sendi inn til Framtíðarlandsins;

 

Ágætu félagar í framtíðarlandinu, ég gekk í samtökin vegna þess að ég heillaðist af þeim krafti og góðu málefnum sem þau börðust fyrir.  Þegar svo var farið að tala um framboð leist mér ekki alveg á blikuna, vegna þess að þó ég sé alveg á því að vernda náttúru landsins og mér hafi algjörlega ofboðið framganga stjórnvalda í Kárahnjúkavirkunarmálunum og öðrum stórvirkjunum og álversæðis, þá er ég í stjórnmálaflokki sem ég hef valið mér út af öðrum góðum málefnum.  Ég sá því fram á að þurfa að segja mig úr samtökunum.  Sem betur fer varð ekkert úr því.  En síðan hafa verið að heyrast raddir um skörun milli ykkar og Íslandshreyfingarinnar – lifandi lands.Meðal annars hef ég séð að félagar í þeirri pólitísku hreyfingu  segja að sá flokkur byggi á kenningum Andra Snæs. Þetta hefur sett bakslag í mig.  Ég vil spyrja ykkur í einlægni hvernig þessum málum sé háttað.Hvar skarast Íslandshreyfingin og Framtíðarlandið ?  Eru félagar í Framtíðarlandinu að vinna sem félagar í hreyfingunni fyrir Íslandshreyfinguna ?Er Framtíðarlandið nokkurskonar óformleg bakland Íslandshreyfingarinnar ?Er það tilviljun að Framtíðarlandið fór af stað með sína undirskriftaherferð um leið og Ómar kynnti sitt framboð ? Úr þessu þarf ég að fá skorið svo ekki verði um villst. Ég er pólitískur andstæðingur Íslandshreyfingarinnar, og þau hafa opinberlega sagt að þau vilji ekkert með minn flokk hafa,  svo þetta þarf þetta að vera á hreinu fyrir mér..Það þarf líka að vera alveg á hreinu gagnvart öðrum landsmönnum sem eru í hreyfingunni, en eru í öðrum stjórnmálaflokkum.  

Til þess að eyða allir svona óvissu verðið þið að gefa út yfirlýsingu um að Framtíðarlandið sé ekki á nokkurn hátt tengt Íslandshreyfingunni.  Ef það er ekki gert, mun ég líta svo á að hér sé á ferðinni laumuspil sem ég get ekki sætt mig við.   

Með kveðju Ásthildur Cesil.

Ég vona að ég móðgi engann  þegar ég bið um þessi svör.  Og ég vona líka að svörin verði þannig að ég geti verið áfram í þessum frábæru samtökum.  Sem alltof sjaldan gerist að fari af stað, og fái fólk með sér.  En það á bara ekki að blanda stjórnmálum inn í svona grasrótarhreyfingu, þá fer allt einhvernveginn á verri veginn.  Því vona ég innilega að ég sé bara gamalt rótarhorn sem sjái skrattan í hverju horni, og fái að vita að ég þurfi ekki að hafa áhyggjur af því.  

Svona er ég nú bara, það er nú það. 

Athugasemdir

[Ásdís Sigurðardóttir, 29.3.2007 kl. 02:06]

Flott hjá þér Ásthildur mín, þetta er nefnilega eitt af því sem ég vil fá skýr svör við. Látið ekki standa á svari þið sem hafið svörin.

[Anna Benkovic Mikaelsdóttir, 29.3.2007 kl. 05:24]

já það er nú líklegt að þetta skarist eitthvað

[Birgitta Jónsdóttir, 29.3.2007 kl. 07:32]

Hlakka til að sjá svörin frá þeim. Ég gekk líka í þessa hreyfingu sem var í upphafi þverpólitísk. Held að meira og minna allir sem eru í framtíðarlandinu séu flokksbundnir öðrum flokkum.

[Katrín Snæhólm Baldursdóttir, 29.3.2007 kl. 07:57]

Ég gekk líka í framtíðarlandið sem þverpólitíska hreyfingu fólks sem vil breytingar. Vil hvergi vera í pólitíkinni svo mér þætti líka vænt um að heyra hvernig þessum málum er háttað.

[Ásthildur Cesil Þórðardóttir, 29.3.2007 kl. 08:18]

Ég skal birta svörin hér, þegar þau berast.  Þetta hefur verið mér umhugsunarefni núna um nokkurn tíma.  Og mér þykir leitt að geta ekki verið einlæg með samtökunum.  Þess vegna vil ég fá skýr svör. 

[Ásthildur Cesil Þórðardóttir, 29.3.2007 kl. 09:32]

Held að þú sért ekki alveg að skilja hvað ég er að fara Jón Kristófer minn, mér finnst samtökin mjög góð, og er sammála stefnu þeirra og gekk þar af leiðandi í þau.  En ég er ekki sátt við það ef þau eru einhverskonar bakland fyrir Íslandshreyfinguna gegn öðrum flokkum.  Ég vil bara fá svör um það.  Og mér fyndist mjög gott að fá svar frá þeim.  Menn mega svo fabúlera í kring um það allt saman. 

[Herdís Sigurjónsdóttir, 29.3.2007 kl. 09:47]

Ég er kjaftslopp og kannski einsgott að ég er að skrifa en ekki tala..þú heldur þó ekki í alvöru Jón Kristófer að Andri Snær hafi komið af stað umhverfisvakningu í Sjálfstæðisflokknum? ...ef svo er þá ertu á villigötum.

Ég hlakka til að sjá svörin ... ég er ekki meðlimur í Framtíðarlandinu, en keypti samt Íslandskökur

[Jenný Anna Baldursdóttir, 29.3.2007 kl. 10:27]

Ég hef líka mikinn áhuga á að komast til botns í þessu.  Þarfar spurningar Ásthildur.

[Herdís Sigurjónsdóttir, 29.3.2007 kl. 14:42]

Jón Kristófer, sérstakt að skrifast á hér á síðu Ásthildar.

Hvað mig snertir og hef ég nú verið Sjálfstæðiskona í all mörg ár, að búið er að vinna að umhverfismálum fyrir tíð kenninga Andra Snæs. Ég lít á umhverfismál og náttúruvernd sem stærra mál en svo að það byggi eingöngu á því að vera á móti uppbyggingu álvera og að lokum þá treysti ég Sjálfstæðisflokknum alveg jafn vel að sinna umhverfismálum og þeim félögum mínum hjá VG.

[Hlynur Þór Magnússon, 29.3.2007 kl. 15:20]

Sæl, góða Ásthildur. Ég er líka félagsmaður í Framtíðarlandinu. Mér finnst málefnið gott. Ekki veit ég fremur en þú um hugsanleg tengsl samtakanna við tiltekið framboð eða nokkur sérstök öfl yfirleitt, en ég læt það ekki trufla mig neitt. Kannski er ég bara svona kærulaus í þeim efnum.

[Anna Ólafsdóttir (anno) (IP-tala skráð) 29.3.2007 kl. 17:06]

Ég er í Framtíðarlandinu en mér hugnast það ekki ef Framtíðarlandið ætlar að tengja sig við Íslandshreyfinguna. Sé ekki hvers vegna samtökin ættu að gera það eitthvað frekar en að spyrða sig við VG. Mér finnst þurfa þær hreinu línur að um sé að ræða þverpólitísk samtök. Hélt að það væri þannig en..... segi eins og þú .... vil skýrar línur.

[IGG , 29.3.2007 kl. 17:14]

Sæl mín kæra og þið öll. Eins og fleiri hér er ég félagi í Framtíðarlandinu en aftur á móti er ég ekki í neinum stjórnmálaflokki. Ég þykist þó vita að ekki sé meira samasemmerki á milli Framtíðarlandsins og Íslandshreyfingarinnar en Framtíðarlandsins og annarra flokka. Félagar í Framtíðarlandinu hafa auðvitað fullt frelsi til að velja sér pólitískan vettvang rétt eins og sum ykkar sem hér hafa sagt álit sitt - ekki satt?

Aðstandendur Íslandshreyfingarinnar láta vonandi frá sér heyra um þetta mál. Kveðja, Ingbjörg G.G.

[Ásthildur Cesil Þórðardóttir, 29.3.2007 kl. 17:15]

Jón Kristófer ertu að segja að það sé allt í lagi að gera hvað sem er, ef það bitnar bara ekki á mér ? Ég vil hafa hlutina á hreinu.  Þess vegna bið ég um svör.  Og þeir svara mér örugglega með glöðu geði.  Það er ég viss um.

Hlynur minn, ég flokka það ekki undir kæruleysi að vilja fá að vita hvernig er í pottinn búið.  Þegar framboð hefur lýst því yfir að því sé beinlínis stefnt gegn þeim flokki sem ég vinn með.  Þau fara auk þess með rangt mál, þegar þau segja að Frjálslyndi flokkurinn sé stóriðjuflokkur, og Margrét fer þar vísvitandi með rangt mál.

Ég vil bara vita hvort Framtíðarlandið vinnur að framboði eins flokks í landinu, á kostnað annara því í Framtíðarlandinu er margt fólk sem aðyllist aðra flokka, og er í samtökunum sem þverpólisískum samtökum.  Ég álít að Ómar hafi skaðað Framtíðarlandi með því að fara í þetta framboð, því miður.  Og þar sem hann er annar hausinn á þessum þverpólitísku samtökum, hljóta þau að þurfa að gefa það upp, hvar í ferlinu skildust leiðir. 

Mér sýnist líka að það hafi fleiri verið að hugsa á sama veg og ég, og það er öllum fyrir bestu að hreinsa þetta út.  Koma hreint fram, ég er raunar hissa að umræðan hafi ekki komið upp fyrr.  En Framtíðarlandið hlýtur að fagna því að fá tækifæri til að segja hreint út hvernig málum er háttað.  Það er ekki hægt, nema að spurt sé. 

[Ásthildur Cesil Þórðardóttir, 29.3.2007 kl. 17:56]

Takk fyrir það Jón Kristófer minn ég hef örugglega misskilið þig.  Það eina sem vakir fyrir mér er að fá þetta bara alveg á tært, vegna þess hve þetta skarast óneitanlega. 

[Ásthildur Cesil Þórðardóttir, 31.3.2007 kl. 15:53]

Framtíðarlandið hefur ekki svarað þessari fyrirspurn minni ennþá.  Og nú er Ómar farinn að skella því fram að Frjálslyndi flokkurinn sé stóriðjuflokkur ásamt Sjálfstæðisflokki og Framsókn.  Hvernig sem hann finnur það út.