Lýðræði og það sem við þurfum að huga að.

Þetta mál tekur á sig sífellt vandræðalegri mynd.  Verð að segja að það er tímabært að einhverjir taki þetta mál úr þeim farvegi sem það er (vandræðagangi) og geri eitthvað til að ljúka því á einn eða annan hátt. 

 

http://www.visir.is/bladamadur-dv-tjair-sig--hvetur-radherra-til-ad-lita-ser-naer-vid-asakanir-um-politiska-leiki/article/2014140809812

Þeir sem fylkja sér um Hönnu Birnu og innanríkisráðuneytið vilja, og leggja upp úr því að DV sé sorpblað og að Reynir Trausta sé ómerkileg persóna.  Það sem hér birtist segir að mínu viti aðra sögu.  Maðurinn er í raun að verja sitt fólk, og setur sjálfan sig í skotlínuna hvað það varðar.  Þarna þekki ég gamla vestfirska drengskapareðlið.  Tek það fram að ég þekki vel til Reynis frá Flateyri bæði hans móður og bræður, sem eru gersemar og menn af gulli.  

"Takið eftir þessu:„Það sem okkur fannst einna ósmekklegast var að Hanna Birna reyndi að höfða til Reynis á þeim forsendum að ríkt hefði gagnkvæmur vinskapur á milli þeirra tveggja. Þannig ætlaðist hún til þess að hann tæki þátt í einhverju plotti til að forða henni frá pólitískum óþægindum,“ útskýrir Jóhann".  

Er þetta sæmandi ráðherra í ríkisstjórn Íslands? ég segi nei, þetta er bara ekki ásættanlegt og ég held að gert sér ráð fyrir því í stjórnarskrá Íslands að ráðherra geti ekki beitt sér á þannan hátt í samskiptum við landslýð.  

Mér er á engan hátt illa við þessa persónu, og það kann vel að vera að hún sé hin ágætasta manneskja, en þetta dæmi gengur engan veginn upp.  Og réttlætiskenndin í mér segir að svona bara geti ekki gerst.  Við íslenskur almenningur getum ekki horft fram hjá þessu og látið sem ekkert sé.  Það getur svo sem vel verið að mér verði hengt fyrir þessa afstöðu mína, en málið er líka að þar sem ég er komin á eftirlaun og á ekkert inni hjá ríkinu gefi mér ákveðna stöðu til að tjá mig um þessi mál af sanngirni og heiðarleika.  

Svo bendi ég líka á að enginn úr stjórnarráðinu hefur treyst sér til að tala hennar máli, nema framsóknarmaddaman.  Það segir algjörlega sína sögu um ástandið.  

Svona er þetta bara, og því lengri tími sem líður frá því að Hanna Birna segi af sér, því alvarlegri áhrif mun þetta mál hafa á stjórnina og samstarfið.  Ég hafði ákveðna samúð með þessu fólki framan af, en sú samúð og traust er óðum að víkja, því ef ráðamenn geta ekki kippt svona hlutum í lag, þó óvinsæl séu, því ólíklegra er að þeir geti tekist á við stærri vandamál.  

 

 

 

 

 

„

Athugasemdir

[Bjarni Gunnlaugur (IP-tala skráð) 4.8.2014 kl. 09:18]

Hvað sem má segja um upphaf og tilurð þessa máls og hvað sem má segja um réttmæti þess að láta lögreglu rannsaka mögulegan "leka" úr innanríkisráðuneytinu þá er það alveg morgunljóst að Hanna Birna átti að víkja til hliðar þegar svo var komið.  Það gengur ekki að láta lögregluna rannsaka starfandi yfirmann.     Vegna þessa dómgreindabrests er sennilegt að Hanna Birna þurfi að fara að láta sig dreyma um rólegt sendiráð.

          Ef ekki og hún ætlar að sitja áfram þá hefur skapast afar slæmt fordæmi mögulegrar valdnýðslu án þess endilega að Hanna Birna hafi sjálf gerst sek um slíkt! 

[Jósef Smári Ásmundsson, 4.8.2014 kl. 09:54]

Hvort sem Hanna Birna reynist sek eða ekki verður þetta mál til eintómra vandræða fyrir hana. Ef hún verður sýkn saka líkur málinu þar með ekki. Ástæðan er sú að andstæðingar hennar benda einfaldlega á að pólitísk spilling hafi leitt til þeirrar niðurstöðu að hún varð sýknuð. Hún hafði fundi með lögreglustjóra, Valið lið bloggara og blaðamanna hliðholl henni hafa farið hamförum á bloggsíðum og blaðagreinum . Það er allt sem þrystir á að hún verði sýknuð. Það er eiginlega svo að hvert einasta mál í þjóðfélagu er litað flokkspólitíkinni og það virðist ekki hægt að ræða það án þess að vera samdauna henni. Þetta vandamál verður aðeins leyst með því að ýta flokkspólitíkinni til hliðar og Ráðherrar og aðrir starfsmenn ríkisins komi ekki úr þingmannaflórunni. Það er mín skoðun. Hanna Birna á að víkja og faglegur ráðherra á að koma í hennar stað. Það er fullt af fólki sem hefur menntun og hæfi sem þarf til í þetta viðkvæma og vandasama málaflokk sem innflytjendamál er.

[Ásthildur Cesil Þórðardóttir, 4.8.2014 kl. 10:29]

Þakka ykkur báðum málefnaleg og góð innlegg. Og ég er alveg sammála því að þessu máli lýkur hvorki með sekt eða sýknu. Það er besta tillagan sem ég hef séð í þessu máli Jósef er að ráðin verði faglegur ráðherra með menntun til að takast á við þetta vandasama starf, Hanna Birna er jú ekki löglærð og heldur ekki hennar nánustu ráðgjafar.

Þetta mál bara hverfur ekki rétt si sona, þó einhverjir voni það. Því þarf að taka á þessu máli af festu og sanngirni. Við verðum að geta treyst æðslu stjórnsýslu landsins, svo einfalt er það.

[Ásthildur Cesil Þórðardóttir, 4.8.2014 kl. 10:31]

Svo má benda á að þetta hlýtur að ganga nærri henni á allann hátt, og mun koma niður á heilsu hennar ef svona heldur áfram. Þess vegna verður að fara að vinna af festu í þessu og taka af skarið.

[Heimir Lárusson Fjeldsted, 4.8.2014 kl. 21:26]

Þið megið skammast ykkar fyrir ykkar þátt í aðförinni að Hönnu Birnu.

[Sigurður Þorsteinsson, 4.8.2014 kl. 21:26]

Já Ásthidlur mín, það er þetta með Reynir Traustason sé heltekinn af vestfirska drengskapareðlinu. Nú finnst mér ekki skipta nokkru einasta máli í hvaða stjórnmálaflokki ráðherra er, ef þeir hafa brotið af sér, ættu þeir að segja af sér.

Nú vill svo til að ég þekki af egin skinni hvernig þetta vestfiska drengskapareðli virkar.

Þannig var að ég var að vinna verkefni fyrir sveitarfélag og kynntist þá innviðum þess allvel. Þá byrjar vestfiski drenskaparmaðurinn að skrifa um konu eina sem varð fyrir því að fella karlmann, sem aldrei skildi hafa verið. Aftur og aftur birtast greinar, dag eftir dag, viku eftir viku og þar sem ég þekkti vel til, var farið ítrekað með rangt mál.

Ég ákvað að slá á þráðinn, enda taldi ég rannsóknarblaðamennsku sannarlega af hinu góða.

Viðbrögðin komu mér algjörlega í opna skjöldu.

,,Ef þú heldur þig ekki frá þessu máli, dreg ég eitthvað fram til þess að taka af þér æruna, og ef ég finn það ekki, bý ég það til."

Ég sleit símtalinu, en var að fara á fund með tveimur af þekktustu fjölmiðlamönnum okkar Íslendinga. Sagði þeim frá þessari hótun, sem kom þeim ekki á óvart og komu strax með tilgátu hver vinnur svona. Af því að við eigum nokkur hundruð fjölmiðlamenn, er hreint með ólíkindum að þeim báðum skildi detta sami maðurinn í hug.

Konan sem tekin var niður, átti eftir að fá á sig fleiri greinar, og fjöldi þeirra innihéldu hrein ósannindi, sjálfsagt samdar af vestfirsku drenglyndi.

Það er ekki langt síðan að Bjarni Benediktsson mátti sitja undir því að um 600 níðgreinar, væru skrifaðar um hann í DV. Sannleikurinn var ekki það sem keyrðu þau skrif áfram. Bjarni átti að hafa framið glæpi og mátti skilja að aðeins tímaspursmál væri hvenær hann færi í steininn. Aðalhöfundurinn er sennilega fyrir algjöra tilviljun sá sami og nú skrifar um Hönnu Birnu. Lét hann ekki líka hafa eftir sér ,,Ég fyrirlít Sjálfstæðisflokkinn"

En allt þetta er víst skrifað af vestfirsku drenglyndi. Nú vill svo til að ég þekki vel til margra Vestfirðinga og þeirra drenglyndi er af allt annarri gerð.

[Valdimar Jóhannsson (IP-tala skráð) 4.8.2014 kl. 22:43]

Hanna Birna hafði ekki setið lengi í embættinu þegar lekin varð.

Henni láðist að reka Steingríms J. og Jóhönnu pakkið úr ráðuneytinu í tíma og þess vegna fór sem fór.

Bjarni Ben var sneggri í sínu ráðuneyti og rak pakkið á báða bóga.

Svona eru stjórnmálin á Íslandi.

[Bergljót Gunnarsdóttir, 4.8.2014 kl. 23:51]

Hvar er þetta gegnsæi sem allir flokkar hafa talað um að taka upp í stjórnsýslunni. Í stað þess eru allar gardínur dregnar niður, menn gera stanslaus mistök, sem þeir neita að sjálfsögðu, enda enginn til frásagnar nema þeir sjálfir og örfáir undirmenn sem skjálfa af hræðslu um að missa vinnuna ef þeir opna munninn. Það er svikið og prettað og logið á báða bóga, en almenningur er svo vanur því að það ypptir nánast engin öxlum, enda virðist það stórhættulegt ef það er reynt.

Reynt er að sverta þig opinberlega, hvort sem þú ert gerandi eða mótmælandi.

Væru þessir hlutir í lagi,þ.e.gegnsæið, þyrfti Hanna Birna ekkert að óttast, sé hún saklaus, en lægi annars illa í sínum sóðaskap, sé hún sek.

Ég legg því til að frambjóðendur í pólitísk embætti hætti að tuða um opið og gegnsætt stjórnkerfi, en fari í staðinn að vinna samkvæmt því.

Maður gæti haldið að við byggjum í einræðisríki, en ekki í svokölluðu lýðfrjálsu landi, mér er spurn?

[Ásthildur Cesil Þórðardóttir, 5.8.2014 kl. 11:13]

Já Bergljót algjörlega sammála þínum pistli. Ef allt væri heiðarlegt og opið þá þyrfti Hanna Birna ekkert að óttast.

Sigurður ljót þykir mér sagan sem þú segir hér, og ekki Reyni til sóma. En takk fyrir að segja hana hér.

Það er ekki verið að pönkast neitt í neinum Heimir, við viljum bara fá að vita sannleikann í málinu og undanskot og vörn Hönnu Birnu eru ekki beinlínis sannfærandi, og hvern er hún að verja?

Valdimar, ekki var ég hrifin af Jóhönnu og Steingrími, og get alveg tekið undir með þér að það er nauðsynlegt að skipta um fólk í ráðuneytum, sem ef til vill beinlínis vinnur gegn yfirmönnum sínum, eins og heyrst hafa sagnir um, en það á reyndar við á báða bóga. Hins vegar var Hanna Birna búin að ráða sér aðstoðarmenn, sem hafa nú réttarstöðu grunaðra og málið komið til saksóknara. Það er því á mjög alvarlegu stigi, og barnalegt að láta sér detta í hug að það sé vegna skrifa manna á netinu eða embættismenn sem séu að hilma yfir með dagblaði.

[Jens Guð, 6.8.2014 kl. 00:58]

Upphaf málsins: Boðuð var mótmælastaða vegna brottreksturs hælisleitanda sem átti á Íslandi ólétta kærustu, barnsmóður sína. Sama dag var laumað úr Innanríkisráðuneyti Hönnu Birnu til Morgunblaðsins og visir.is innanhússskjali um að hælisleitandinn væri mansali og kærastan væri fórnarlamb mansals og ekki raunveruleg barnsmóðir hans. Á daginn kom að þetta voru ósannindi. Á þeim tímapunkti sem röngum upplýsingum var laumað að Morgunblaðinu og visir.is og þessir tveir fjölmiðlar slógu upp frétt byggðri á lýgi frá innanríkisráðuneytinu voru tennur dregnar úr mótmælendum.

Hverra hagsmuna voru starfsmenn innanríkisráðuneytisins að gæta með því að dreifa lygasögum? Hælisleitandinn var rekinn úr landi. Eftir stóð að aðstoðarmaður Hönnu Birnu er uppvís að því að hafa dreift til Morgunblaðsins og visir.is grófum lygum. Hanna Birna hefur ranglega haldið því fram að ítarleg rannsókn hafi farið fram á upptökum lekans. Aðstoðarmenn hennar hafa sömuleiðis orðið uppvísir af ósannindum um lekamálið.

Góðir stjórnmálamenn eru þeir sem eru einlægir og heiðarlegir. Alltof mikið er af stjórnmálamönnum sem ljúga og skammast sín ekki.

[Ásthildur Cesil Þórðardóttir, 6.8.2014 kl. 11:15]

Tek undir hvert orð hjá þér Jens, þetta er andstyggilegt og því verra vegna stöðu þessa fólks, þ.e. sjálfur dómsmálaráðherra ber ekki meiri virðingu fyrir lögum landsins en raun ber vitni.

[Bergljót Gunnarsdóttir, 7.8.2014 kl. 02:26]

Ansi er ég hrædd um að einhver væri búinn að segja af sér í nágrannalöndun af minna tilefni, en ég held svei mér þá bara að það hugtak þekkist ekki meðal íslenskra stjórnmálamanna.

[Ásthildur Cesil Þórðardóttir, 7.8.2014 kl. 09:58]

Nei það virðist vera þannig Bergljót mín, það hvarflar ekki að þeim að þau þurfi að standa skil á verkum sínum, eða athöfnum. Þessu verðum við að breyta.