Silly me.

Ég skrifaði hér um daginn smá hugleiðingu um verktakan sem er að vinna hér fyrir ofan mig.  Sjá hér:http://asthildurcesil.blog.is/blog/asthildurcesil/entry/1386459/  

 

 

En nú verð ég að draga þetta allt saman til baka.  Því málið er að það sem var undirritað við þennan "uppáhaldsverktaka" ríkisins, að mínu mati, á bara ekki við um hann, heldur bara hina sem sendu inn tilboð.  Til dæmis þessi grein hér: 

 

„Verktaki skal gera ráð fyrir að þurfa að þrífa götur eftir sig eftir aðstæðum og reglulega (vikulega) þegar samfelldir efnisflutningar að eða frá vinnusvæðinu standa yfir“.

Þá hefur komið í ljós að göturnar hafa verið sópaðar vikulega, eða þannig.  Málið er að hvorki ég né aðrir íbúar í nágrenninu hafa tekið eftir sópnum, sem hefur farið hér vikulega yfir, þannig að sennilega er þetta einhverskonar ævintýrasópur sem sést ekki.  En hann sópar heldur ekki mjög vel, því annars hefðu íbúar bæði við í hverfinu eða aðrir sem ganga hér um orðið vör við sópunina.  En það er auðvitað okkur að kenna og okkar eftirtektarleysi, það á líka við um óhreinindi í hálsi og nefi eftir ryk sem við héldum að svifi yfir öllu, en er greinilega misskilningur.

Ég hitti nefnilega okkar ástkæra yfirmann verktakans í morgunkaffinu í morgun í áhaldahúsi bæjarins, hvar við áttum saman nokkuð "hreinskilnar umræður um "ágæti hvors annars og áliti mínu á verktakafyrirtækinu. Svo og áliti verkstjórans á mér. 

Og hann tjáði mér að hann og hans stóru vörubílar mættu aka fram hjá húsinu mínu að minnsta kosti 5 stykki a.m.k. sex sinnum á dag, rétt eins og aðrir bílar mættu aka um vegi bæjarins.  En búkollan væri ekki þarna á meðal.

 

 

 

 

 

 

 

 

Nei nei hún ekur ekki út af svæðinu, enda stendur það skýrt að það megi ekki gerast.  Svo þetta var auðvitað hrein lygi hjá mér.

 

 

 

 

 

 

 

 

 

 

 

Og ég sem fullyrti að þetta tryllitæki færi líka um götuna fyrir neðan mig, sex sinnum á dag, í kaffi, mat og kaffi, ó nei ég verð að biðjast afsökunar á þeirri lygi ekki satt?

 

 

 

 

 

 

 

 

 

 

 

Þannig að þessi smábílahjörð sex sinnum á dag fram hjá húsinu mínu með tilheyrandi ryki og mengun er bara hugarburður minn, og auðvitað verð ég að biðjast afsökunnar á því að vera svona agressív, gagnvart þessu elskulega fyrirtæki Í.A.V.   

Það er samt eitt sem er að þvælast fyrir mér, af hverju var sett í útboðið að göturnar skyldu vera sópaðar eftir aðstæðum, og reglulega (vikulega), og aðrir sem sóttu um gerðu ráð fyrir götusópara, en þessar elskur höfðu ekki fyrir því að ganga frá því, sem gerði að auðvitað var þeirra tilboð miklu lægra en annara, af hverju þessir aðilar gerðu ekki ráð fyrir slíkum?  

En ef til vill höfðu þeir þegar gert ráð fyrir þessum ósýnilega götusópara sem sópar án þess að við verðum vör við hann, þeir hafa örugglega hugsað sem svo að við yrðum fyrir nógu miklum átroðningi með endalausum þungaflutningum bæði fyrir ofan mig og neðan, með tilheyrandi ílum þegar svona tröll bakka, svo sóparinn skyldi vera ósýnilegur og ekki heyranlegur, það má þakka fyrir það. Það hefði ef til vill verið heppilegra að þeir hefðu útdeilt andlitsgrímum fyrir okkur íbúa og saklausa skokkara, til að lifa af þetta ryk, sem auðvitað er ekki nema í nösunum á okkur.

Og auðvitað hafa þeir vætt malarveginn sem þeir gerðu, svona að því ég hélt í fyrsta skipti í dag, (my mistake), (sem var auðvitað gott mál) þ.e. að gera veginn, til að eyðileggja ekki gatnamótin frá Skutulsfjaðarnrautinni að Grænagarðsnámu, enda spara þeir sér heilmikla olíu  með þeim hliðarveg. 

Svo er þetta,  

„Verktaki skal tryggia að steinar í fyllingu í fláafleyg garðs velti ekki niður fláa og valdi tjóni á húsum, lóðum eða fólki. Greitt er fyrir girðingu neðan fláafleygs samkvæmt grein 1.1'4, sú girðing stöðvar aðeins minni steina“.

Ég er nú búin að skima eftir þessari girðingu, og hef ekki rekist á hana, nema hjá einu húsi, Seljalandsvegi 64a, en það er girðing sem eigandi hússin á, en hún er orðin frekar skökk vegna álags.  En ef til vill þarf ekki að setja upp slíka girðingu, þó greitt sé fyrir hana, hinir fátæku forsvarsmenn fyrirtækisins geta því sett þá upphæð í sína fátæku vasa.  

 

Já ég átti "vinsamleg" orð við manninn sem sér um verkið.  Hann tjáði mér að eftir að bréf barst til bæjarstjórnar Ísafjarðar frá mér um slaklegt eftirlit, þá kom eftirlitsmaður ofanflóðasjóðs til hans og þeir fóru saman yfir umkvörtunaratriðin, og fannst lítið til um, hér þyrfti að sópa, og hér tína upp smágrjót og sona..... en ég hélt einhvernveginn að eftirlitið ætti ekki að vera í höndum þeirra sem sæju um verkið, heldur í höndum stjórnar bæjarins.  Sillý me.  Auðvitað er þetta allt í höndum verktaka og ofanflóðasjóðs, og það á ekkert að vera að kvarta yfir svona tittlingaskít, og hvað með að útboðinu væri svona "hliðrað til" fyrir svona gott fyrirtæki sem er uppáhalds valdamanna Íslands, og auðvitað eiga þeir heilt lið af lögfræðingum sem eru í startholunum við að verja sína menn, í stóru sem smáu.

Þess vegna verð ég auðvitað að biðjast afsökunnar á því að hafa vogað mér að benda á það sem mér finnst augljóst, en er auðvitað ekki, því það hentar ekki við okkur smámenninn sem byggja þetta land, halda því uppi með sköttum okkar og því sem við þurfum að borga stórmennum eins og þessu fyrirtæki sem virðist sitja að öllum stór verkefnum á Íslandi í dag.  

Og hvað veit ég svo sem, sillý me.   

Athugasemdir

[Ásthildur Cesil Þórðardóttir, 16.5.2014 kl. 20:29]

Jamm við almenningur eigum ekkert að vera að reyna að standa á einhverju rétti sem við teljum okkur hafa. Hann er bara ekki til, bara draumur og Sillý mí.

[Ingibjörg Naomi Friðþjófsdóttir (IP-tala skráð) 16.5.2014 kl. 21:45]

Frábær grein hjá þér..

[Ásthildur Cesil Þórðardóttir, 16.5.2014 kl. 23:00]

Takk fyrir það Ingibjörg, við erum víst bara til skrauts og til að klastra upp í peningagötin svo "hinir" fái sitt ekki satt?

[Gunnar Th. Gunnarsson, 17.5.2014 kl. 19:14]

Senda bara inn lögreglukæru. Verktakar eiga að fara eftir reglum.... punktur.

[Ásthildur Cesil Þórðardóttir, 17.5.2014 kl. 23:16]

Já Gunnar það verður sennilega þrautarráðið, en það hefur ýmislegt gerst síðan ég sendi bæjarstjórninni bréf, það hefur verið sópað, og malarvegurinn vökvaður, og síðan er búkollan hætt að koma hér framhjá í mat og kaffi, og einhvernveginn hefur þetta svona frekar hljóðnað. En ég stend vaktina, fjandans kerlingarvargurinn sem ekki nokkur friður er fyrir. :) En eins og þú segir, reglur eru reglur og það sem samið hefur verið um á að standa.

[Jens Guð, 18.5.2014 kl. 23:13]

Þetta er eiginlega sápuópera. Eða öllu heldur valdníðsla.

[Ásthildur Cesil Þórðardóttir, 19.5.2014 kl. 11:23]

Já í krafti valds og auðs og lögfræðingaherskara valtar þetta fyrirtæki yfir allt og alla, að mínu mati.

[Gunnar Th. Gunnarsson, 19.5.2014 kl. 17:47]

Nei, hvorki í krafti valds né auðs. Lög og reglur ná yfir alla, fólk þarf bara stundum að sækja rétt sinn.

Nær væri að segja "Í krafti frekju og yfirgangs".

[Ásthildur Cesil Þórðardóttir, 19.5.2014 kl. 17:51]

Æ já, ég er að verða frekar þreytt á þessu, til dæmis sagði verkstjórinn að hann bæði sópaði og bleytti malargöturnar reglulega, en það er misbrestur á því, í allan dag hef ég setið í rykmekki frá þeim. Það sem ég er ósáttust við er að það virðist ekki vera neitt aðhald eða eftirlit frá bæjarins hálfu. Það er eins og þeir bara láti vaða á súðum með þessa frekjularfa.