Busavígslur.

Minn drengur er að byrja í menntaskóla.  Hann hefur verið busaður í 3 daga, komið blautur, málaður og moldugur heim.  Eyðilagði meðal annars peysu sem hann fór í. 

Hann hafði gaman af þessu, en það eru ekki allir þannig.  Margir kvíða þessum atburði, og í einstaka tilfellum veldur þetta því að fólk einfaldlega vill ekki fara í framhaldsskóla, þó það sé fátítt.

Ég fór á foreldafund núna fyrir nokkrum dögum, þar sem Busavígslur voru ræddar.  Ein móðir hafði miklar áhyggjur af þessu, dóttir hennar fékk flest verðlaun fyrir góða framgöngu og dugnað og námsárangur upp úr Grunnskólanum   Það er því nokkuð ljóst af áhyggjum móðurinnar að dóttir hennar hefur verið þungt hugsi yfir busunum.

Skólameistarinn og kennararnir sögðu hreint út að marga daga fyrir þennan atburð væru þau miður sín af áhyggjum um hvort allt færi úr böndum.

Einn forráðamaðurinn kom fram með það, að venjulega þegar nýtt fólk mætti til vinnu, þá væri reynt að koma vel fram við það og láta það finnast það velkomið.  Þarna væri alveg þveröfugt farið, og allt gert til að ýta fólki burt.

 

Ég held að það ætti hreinlega að banna þessar busavígslur.  Þetta er hvort sem er angi af gamla yfirráðatímabilinu, þar sem voru þrælar og kóngar.  Það er reynt á allan hátt að niðurlægja nýnemana og alltof margir eldri nemendur gangast svo upp í því að vera kóngar einn dag eða fleiri, að það þarf ekki mikið til að þeir gangi of langt.  Það kom auðvitað fram að kennarar væru viðstaddir og reyndu að hafa hemili á atburðum, en samt...

Væri ekki nær að nýnemar væru boðnir velkomnir í félagsskapinn, þar væri boðið í grillaðar pylsur og þeir sem eldri væru þjónuðu hinum nýkomnu og byðu þá þannig velkomna í hópinn?

 

Bara spyr, ég sé ekkert nema villimennsku í þessum sið, sem ég veit ekki hvernig hefur þróast og af hverju var byrjað á. 

Busar brenndir með straujárni

Athugasemdir

[Sigurður Alfreð Herlufsen, 29.8.2013 kl. 12:11]

Ásthildur, mikið er ég feginn að vera ekki einn með þessa skoðun, að busavigsla sé ekki menning heldur siðleysi.

Það sem undrar mig mest er að skólastjórnendur sitji og geri ekkert.

Þeir hafa valdið til að stjórna skólanum og það er í þeirra verkahring á banna þetta alfarið, sem er einföld aðgerð og hægt að gera með einu pennastriki.

Þá hefðu menn gert skyldu sína fyrir skólann og auðvitað fyrir sína eigin reisn, því að það er niðurlæging fyrir skólastjórann að láta þetta viðgangast.

[Ásthildur Cesil Þórðardóttir, 29.8.2013 kl. 12:58]

Fyrir mér er þetta frekar villimennska en menning.  Ég get svo sem skilið að skólastjórnendur hiki við að banna þetta, því það yrði mikil óánægja með það.  Þess vegna væri heppilegra að bannið kæmi að ofan, frá menntamálaráðuneytinu og jafnvel heilbrigðisráðuneytinu.  Það er löngu komin tími á að endurskoða þessa vitleysu.  Allavega skoða hvaða áhrif þetta hefur og getur haft á unglinga sem eru viðkvæm og eiga við örðugleika að etja.  Takk fyrir innlitið og ég er ánægð með að heyra þitt álit á þessu.

[Sigurður Alfreð Herlufsen, 29.8.2013 kl. 13:58]

Takk slömuleiðis Ásthildur.

Já þú nefnir menntamálaráðuneytið.

Það er góður punktur, og ég tek heilshugar undir, að ráðherra menntamála komi hér að, ef skólastjórar eru svona ragir við að sýna frumkvæði í uppeldismálum þjóðarinnar. Mér finnst nú að það sé samt þeirra starf að ganga fremstir á sínu sviði. En gott og vel, færum óskir okkar upp um eitt þrep og áköllum menntamálaráðherra.

Ég geri það hér með!

[Anna Sigríður Guðmundsdóttir, 29.8.2013 kl. 14:44]

Sammála ykkur Áshildur og Sigurður Alfreð.

Busun er ómenningar-ofbeldi, sem viðkvæm börn þola ekki. Undarlegt að yfirvöld horfi framhjá þessari villimennsku.

Er verið að sortera nemendur eftir tilfinningum/hrottaskap, inn í framhaldsskólana? Er ekki búið að kúga börn nóg með eineltisofbeldis-grunnskólunum fornaldarlegu?

Sem betur fer hafa einhverjir framhaldsskólar ekki svona villimennsku á dagskránni, eins og til dæmis Fjölbrautarskólinn á Selfossi og Tæknimenntaskólinn. Alveg til fyrirmyndar hjá þeim skólum.

M.b.kv.

[Jóhann Elíasson, 29.8.2013 kl. 17:12]

Auðvitað er þetta villimennska og ekkert annað.  Þennan stutta tíma sem ég var að kenna í framhaldsskóla fann maður vel þá spennu og þann kvíða sem myndaðist fyrir þennan "viðburð" og eitraði allt skólastarfið.  Ég er alveg sammála ykkur um það að skólastjórnendur ættu að koma í veg fyrir þessa vitleysu og stuðla frekar að því að skóla- og frístundastarfið verði uppbyggilegra.................

[Jens Guð, 29.8.2013 kl. 18:02]

  Ég tek undir þau sjónarmið sem hér koma fram.  Það er galið að í einn dag sé eldri nemendum frjálst að níðast á og niðurlægja yngri nemendur.  Busavígslur af því tagi ættu að varða við lög.

  Það er alkunna að eldri nemendur með sadískar ofbeldishneigðir ganga langt í að næra sínar kenndir við busavígslur.   Það er sömuleiðis alkunna að ofbeldisfullar busavígslur hafi orðið upphaf á einelti. 

  Fyrir nokkrum áratugum var busi nefbrotinn í busavígslu í Bændaskólanum á Hólum í Hjaltadal.  Nefið lá langt út á kinn.  Á þessum árum var enginn að hugsa um lýtalækningar.  Maðurinn sat uppi með nefið út á kinn alla ævi.  Það fór ekki framhjá neinum að hann var viðkvæmur fyrir lýtinum.  Til að mynda hélt hann iðulega hendi yfir nefið þegar hann kynntist nýju fólki.

  Þegar við Jón Steinar Ragnarsson vorum bekkjarfélagar í Myndlista- og handíðaskóla Íslands  þá breyttum við hefðinni.  Í stað óþægilegrar og niðurlægjandi busunar þá bauð bekkurinn okkar nýnemum upp á glæsilegt kaffihlaðborð.   

[Ásthildur Cesil Þórðardóttir, 29.8.2013 kl. 18:29]

Þakka ykkur öllum, innlitið, mikið get ég séð fyrir að einmitt þú og Jón Steinar hafið brugðist svona skynsamlega við Jens minn. 

En ég var að ræða við móður í dag sem á dreng sem er ekki allra, og á erfitt með að vera í fjölmenni, hún sagði honum að hann skyldi bara fara og ræða við stjórnendur um að hann vildi ekki taka þátt í þessu.  En mamma þá verð ég bara stimplaður vonlaus aumingi það sem eftir er.

Það verður ákveðin sortering í þessu atferli sem er bara skelfilegt fyrir sum börn.  Þau sem ekki vilja taka þátt verða stimpluð og útundan það sem eftir er, þau sem ekki standa sig nógu vel í busuninni fá að heyra að þau eru ekki "kool" en þeir sem eru frakkir og ákveðnir fá þarna ákveðna úthlutun sem accepted.

Eins og einhver benti á, getur þarna byrjað einelti.  Og hvað með þau börn sem hafa orðið fyrir einelti í Grunnskólanum? er þeim nægilegur gaumur gefin?.  Eða þora þau ekki að byrja í framhaldsskóla vegna fyrri reynslu?

Ég tel að það þurfi að fara vel í gegnum þessar spurningar og sé einhver vafi á því að rétt sé með farið, þá á skilyrðis laust að stöðva þetta hér og nú.

Menntamálaráðuneytið getur tekið af skarið og hreinlega bannað busun, það er nokkuð ljóst að í flestum framhaldsskólum myndu stjórnendur taka því fagnandi og sem tækifæri til að afnema ofbeldið strax. 

En við getum svo sem lagt okkar af mörkum með því að sameinast um að koma þessu máli á dagskrá og vekja virkilega athygli á því sem þarna er að eiga sér stað. 

[Sigmar Þór Sveinbjörnsson, 29.8.2013 kl. 21:05]

Góður og þarfur pistill um busavígslur hjá þér Ásthildur, tek undir hvert orð sem þú skrifar.

Gott að allir sem hér gera athugasemdir taka undir orð þín. Takk fyrir að vekja menn til umhugsunar um þennann ósið.

[Helga (IP-tala skráð) 29.8.2013 kl. 21:51]

Fyrir fjöldamörgum árum síðan þá var ég búin að skrá mig í menntaskóla. Eftir að hafa fylgst með busavígslum næstu tvö ár á undan þá treysti ég mér ekki til að mæta í skólann og hætti við. Var með mjög brotna sjálfsmynd á þessum tíma og gat ekki hugsað mér að undirgangast þá niðurlægingu og píningu sem fylgdi busavígslu í þessum skóla.

Finnst það löngu tímabært að þessi siður sé tekinn til endurskoðunar.

[Úlfar Viktor (IP-tala skráð) 29.8.2013 kl. 22:18]

Mikið ótrúlega er ég þér ósammála. Ef þetta yrði bannað í skólum myndi fjölga einkabusunum og busunin yrði jafnvel harkalegri. Sú sem gengur og gerist í menntaskólum í dag gerir mjög fáum einhvern harm heldur þvert á móti. Ég var busaður fyrir 3 árum síðan og ég get sagt þér það að það var einn besti skóladagur lífs míns, ég kynntist fullt af fólki í gegnum það og þetta var ótrúlega gaman. Ég fæ grænar bólur á að lesa svona sorp eins og þegar fullorðið fólk talar um að banna alla busun. Það mun ekki gera neinum gott, ég get lofað ykkur því.

[Ásthildur Cesil Þórðardóttir, 29.8.2013 kl. 23:02]

Sigþór  mín er ánægjan, þetta þarf að skoða og rannsaka vel, og taka á málinu.

Helga mín, þú ert ekki sú eina sem hefur þurft að standa nákvæmlega þarna, eins og ég sagði hér áður þá hætta sumir við, einmitt vegna brotinnar sjálfsmyndar af ýmsum ástæðum og þetta þarf að skoða vel, og þar með taka á þessu af festu.

Úlfar, hvað áttu nákvæmlega við um "einka busun"?, þú ert auðvitað ekki alveg að skilja málið.  Þegar þú segir að þetta hafi verið einn besti dagur lífs þíns, þá á það við um marga, m. annars þetta barnabarn mitt.  En svo eru aðrir sem ekki falla í þann hóp, og eiga í erfiðleikum með að meðtaka þessa "busun" og geta jafnvel ekki hugsað sér að fara í gegnum það sem þar á sér stað. Skólastjórnendur og yfirvöld bera ábyrgð á nemendum ALLRA ekki bara sumra.  Og það er þeirra að stöðva þetta, eða allavega setja af stað könnun eða rannsókn á því hvað þetta gerir þeim nemendum sem höllum fæti standa.  Það hlýtur að vera krafa allra foreldra að krefjast þess að slík rannsókn fari fram, og það með að unglingunum okkar sé ekki hent fyrir róða í kæruleysi yfir einhverri skemmtun nokkurra nemenda. Það er of mikið í lagt og of hættulegt sumum nemendum til að það sé réttlætanlegt að viðhalda þessum barbariska sið. 

[Erlendur (IP-tala skráð) 29.8.2013 kl. 23:12]

Þau eru orðin nokkuð mörg árin síðan ég fluttist hingað á vinstri ströndina en mér sýnist að ofsinn og öfgarnar í busa vígslum hafi aukist mikið síðan ég var busaður í MR á öldinni sem leið. Okkar busun var tiltölulega harmlaus og var ég tolleraður eftir svolítinn eltingaleik um Lækjargötuna. Ég er nokkuð viss um að Guðni rektor hefði ekki leyft nokkurm manni að komast upp með hrottaskap og sýnist mér að skólastjórar og kennarar í dag séu ekki vandanum vaxnir.

Það væri leitt ef þessi hefð legðist af, en ef svo er komið að vígslan sé orðin svo fjarlæg upprunalegu útgáfunni, væri réttast að leggja þetta af, kannski í nógan tíma til þess að efribekkingar þurfi ekki að hefna sín á busum fyrir meðferpina sem þeir sjálfir urðu fyrir.

[Úlfar Viktor (IP-tala skráð) 29.8.2013 kl. 23:20]

Sæl aftur Ásthildur,

Ég skil hvert þú ert að fara og ég er ekki að misskilja neitt. Já, það leynast viðkvæmar sálir sem eiga erfitt með að fara út fyrir þægindarrammann og það hefur verið minnsta mál í heimi a.m.k. í mínum skóla að leyfa þeim nemendum að sleppa við busun, það þarf enginn að ganga í gegnum eitthvað sem hann vill ekki. Þeir sem vilja ekki taka þátt í þessum degi mega líka alveg verið heima fyrir þennan eina dag á meðan. En busun er ekki eins slæm og fjölmiðlar eru farnir að fjalla um hana. Bara síður en svo.

[Ásthildur Cesil Þórðardóttir, 29.8.2013 kl. 23:56]

Erlendur takk fyrir þitt innlegg, það getur vel verið að kennarar og stjórnendur séu ekki vandanum vaxnir, en ég hef séð að það er þrýstingur á þá að þetta fari fram svona.  Ég skal viðurkenna að fundir með unglingunum og ábendingar geta auðvitað skift sköpum, að fá þá til að skilja að í sumum tilvikum getur þetta haft vond áhrif á nemendur til frambúðar, ég helt nefnilega að börn og unglingar séu besta fólk, og ef rætt er við þau um svona mál og þeim sýnt fram á sú hætta sem skapast getur af því sem þeir telja græskulausut gaman, muni flestir átta sig á því að vitandi um þá hættu sem þau skapa nýnemum er ekki áhættunnar virði.  Ég vil trúa því allavega.

Takk Úlfar fyrir svar þitt.  En eins og ég hef bent á, þá geta nemendur sloppið við busun, en málið er að þar með eru þeir búnir að stimpla sig út úr költ-samfélaginu og eru bara LÚÐAR þaðan í frá.  Það er bara ekki boðlegt.  Þú ert að tala um að þeir geti bara verið heima þennan "eina dag, hér er búið að vera slík veisla nú í þrjá daga, hvorki meira né minna.  En svo ef þeir eru heima þennan dag, eða daga í þessu tilfelli þrír dagar, þá eru þeir komnir með sekt í mætigu.   Plús vera stimplaðir sem vesalingar meðal hinna.

Þetta er bara enganveginn ásættanlegt fyrir fjölda nemenda, og því á að skoða þessi mál út frá þeirra afstöðu, enginn spurning.

[Jóhann (IP-tala skráð) 30.8.2013 kl. 14:27]

Ég verð að vera sammála honum Úlfari, það er ekkert mál að sleppa við busunina og þegar ég var busaður fyrir 5 árum þá voru nokkrir sem ákváðu að vera svokallaðir "eilífðarbusar" og þá var gert nokkra brandara þess máls og minna en mánuði seinna var öllum alveg sama og allir orðnir vinir. Busun er stór hluti af því að verða hluti af hópnum alveg eins og á vinnustöðum þar sem nýji starfsmaðurinn er sendur að sækja "steinatemjarann" eða "plankastrekkjarann" eða hvað sem það er, harmlaust grín sem heldur áfram gegnum árin. Vitanlega gerist það að sumir ganga of langt í busun og það er alveg skelfilegt en það finnst mér ekki vera ástæða fyrir að banna atburðinn allann. Að mínu mati þá hefur nútíma samfélag einkennst af ofgnógt vælukjóa, ætlum við að fara sömu leið og kaninn þar sem liggur við að það sé lögsótt mann fyrir að kalla annann asna?

[Ásthildur Cesil Þórðardóttir, 30.8.2013 kl. 16:36]

Þessi umræða hefði aldrei komið upp ef þetta hefði bara verið allt í lagi.  En því miður hefur það gerst oftar en ekki að svona busanir hafa farið úr böndunum.  Og ef þú hefur lesið svarið hennar Helgu hér að ofan þá varð það einmitt til þess að hún fór ekki í framhaldsnám.  Þegar fólk er fyrirfram brotið og hefur brotna sjálfsmynd, þá getur svona atvik ráðið úrslitum, það segir ekkert um það að manneskjan sé heigull eða Vælukjóar. 

Og ég hugsa líka til þeirra sem hafa orðið fyrir einelti í grunnskólanum, ætli þá fýsi að gangast á vald kvalara sinna sem eru þá væntanlega komnir upp í menntaskólann, og að þeim sé "gefið skotleyfi" á fórnarlömb sín.  Hér er af mörgu að taka, og þarf að skoða vel.  Það má banna ofbeldið, en halda þeim sið að busunin sé á kurteislegum nótum. 

Ég kaupi heldur ekki að það fólk sem er viðkvæmt og vill komast hjá busun sé bara tekið inn rétt si sona.  Það er ekki tilfinning þeirra barna sem vilja komast undan þessu, en þora ekki til að fá ekki á sig stimpil. 

[JEG, 30.8.2013 kl. 20:09]

Busanir eru ferlegar ...... og óþolandi. 
Auðvitað ætti þetta að vera skemmtilegt og gleðilegt ..... og tilvalið að blása til pylsupartýs eða álíka...... sleppa öllu sem getur kostað að flíkur og annað skemmist ..... ekki allir sem hafa svo mikið fjármagn að þeir hafi efni á að fötin séu eyðilögð í einhverju ærlsa-dullu-busun þar sem leikurinn fer oft yfir strikið.

Veit að á Laugarvatni er bara farið í spes föt þegar busað er og ef ég man rétt þá er þetta mest vatsslagur ..... og þeir sem busa eru málaðir.

En að skemma föt og vera með skepnuskap á að banna.  Þetta á að vera .....eins og þið segið.... skemmtilegt að byrja í nýjum skóla.  Og sumir þola einmitt ekkert svona sem hræðir.

[Dísa (IP-tala skráð) 30.8.2013 kl. 23:16]

Sammála því að breyta ætti fyrirkomulaginu, það þarf ekki að gera lítið úr fólki. Allt í lagi að gera eitthvað til gamans, en svo ætti að gera eitthvað skemmtilegt saman til að taka á móti. En þrjár busavígslur í sama skóla er langt út fyrir mörkin. hef oftar heyrt um að ákveðin sé dagsetning og fólk geti þá klætt sig við hæfi svo ekki sé verið að eyðileggja föt. En ef er endurtekið sama haustið fer það útúr öllu hófi og getur fælt jafnvel hugrakka frá. Fer ekki fólk líka í skóla til að læra?

[Ásthildur Cesil Þórðardóttir, 31.8.2013 kl. 10:50]

Sammála þér JEG, auðvitað á þetta að vera gleðisamkoma og skemmtun fyrir alla nemendur.

Segðu Dísa mín, eitt skipti er alveg nóg og stundum meira en nóg.  En þrír dagar er of mikið.  Ég hélt að fólk færi í skóla til að læra. 

[Guðni Karl Harðarson, 3.9.2013 kl. 10:55]

Sammála ykkur! Auðvitað er þetta villimennska. En krökkunum finnst þetta gaman og gefur þeim svona einhverskonar spútning inn í byrjun námsins.
Ég held reyndar að það geti verið þegjandi samkomulag (að minnsta kosti í einhverjum skólum) þar sem nemendafélög semja um þetta við skólayfirvöld. Þegar að komið er saman.



************************************************
http://hvetjandi.net
http://book.hvetjandi.net/templates/441190/index?lang=en
http://www.rentalcars.com/?affiliateCode=hvetjandi
************************************************

[Guðni Karl Harðarson, 3.9.2013 kl. 11:04]

Sem vísar til þess að Skólayfirvöld ættu að gefa nemendunum færi á einhverju öðru með því að semja þetta ÚT við þau!

[Ásthildur Cesil Þórðardóttir, 3.9.2013 kl. 19:19]

Já einmitt Guðni, það er málið, að reyna samningaleiðina við krakkana og gefa þeim sjálfum færi á að leiðrétta kúrsinn og breyta þessum busamálum í eitthvað uppbyggilegt og gott.

[Hrönn Sigurðardóttir, 8.9.2013 kl. 16:28]

Þetta er bannað í Fjölbrautaskóla Suðurlands og hefur verið bannað í tvö eða þrjú ár. Hef engan heyrt kvarta yfir því.

[Ásthildur Cesil Þórðardóttir, 8.9.2013 kl. 17:35]

Gott að heyra.  Þeir eru miklu menningarlegri þar en víða annarsstaðar.