Af gefnu tilefni vegna Kastljóss.

Sem reyndar kom tárunum út á mér.  Vil ég ítreka að á landsfundi Dögunar voru eftirfarandi ályktanir samþykktar af félögum mínum:

Á síðasta degi landsfundar, sunnudeginum 17. mars, voru eftirfarandi tvær ályktanir samþykktar . Flutningsmaður beggja var Ásthildur Cesil Þórðardóttir, meðflutningsmenn voru Hólmsteinn Brekkan og Hugrún Steinunn Guðmundsdóttir

 

Fyrri ályktunin varðar opnun lokaðra meðferðarstöðva og í henni segir:

 

„Dögun vill stefna að því að opna lokaðar meðferðarstofnanir fyrir langt leidda vímuefnaneytendur.

 

Verði hlutverk stofnananna af tvennum toga.

 

Annars vegar þar sem  hægt er að vista langt leidd börn eða einstaklinga sem hafa verið sviptir sjálfræði og hins vegar að þeir sem misst hafa algjörlega tökin á lífi sínu og hafa leiðst út á braut glæpa, verði dæmdir í slíka meðferð. Einnig geti einstaklingar sem telja sig þurfa á langtíma meðferð að halda notið þessa úrræðis.

 

Að meðferðin taki í það minnsta eitt til tvö ár, og fylgi síðan eftirmeðferð til að hjálpa sjúklingum að komast aftur á rétt ról. Auk þessi verði húsnæðisúrræði í boði fyrir þá sem eiga ekki í nein hús að venda að meðferð lokinni.

 

Meðfram þessu þarf að stofna sérstakt embætti  með sérstöku fagfólki, sem metur ástand viðkomandi sjúklings og skoðar hvort árangur náist með slíkri meðferð og tryggi eftirfylgni.“

 

Síðari ályktunin er svohljóðandi:

 

„Dögun mun vinna að því við fyrsta tækifæri að halda stóra alþjóðlega ráðstefnu um vímuefnamál.

 

Þar myndi verða skilgreindur árangur í meðferðarmálum vímuefnaneytenda, a.m.k. sl. þrjátíu ár, og einnig hugað að hvernig þessum málum er betur komið í framtíðinni.

 

Á þessa ráðstefnu yrðu boðaðir helstu sérfræðingar í vímuvarnarmálum erlendis frá, til dæmis frá löndum sem hafa farið nýjar leiðir í slíkum málum. Einnig  yrði boðið vímuefnaneytendum, aðstandendum þeirra, fulltrúum félagsmála og heilbrigðisgeirans, dómurum, lögreglu og lögfræðingum, tryggingafélögum, almennings sem verður fyrir tjóni af völdum innbrota og líkamsmeiðinga og öllum þeim aðilum sem vímuefnaneysla kemur inn á borð til.

 

Tilgangur ráðstefnunnar yrði fyrst og fremst að leita nýrra leiða til að eiga við þann vanda sem sífellt virðist aukast á neyslu ungs fólks á Íslandi.“

Eins og ég segi og hef sagt síðastliðin 30 ár eða svo, það er mál að fara að huga að þessum málum af alvöru, það er eiginlega komið að "point of no return"

 

Athugasemdir

[Ásthildur Cesil Þórðardóttir, 22.4.2013 kl. 21:29]

Þetta er algjört forgangsverkefni hjá ríkri þjóð að Gera.. ekki bara tala um... eða ætla sér..... þetta er búið að dragast alltof lengi og of mörg líf sem hafa farið vegna áhugaleysis stjórnvalda á okkar öðruvísi börnum.  Þetta er hingað og ekki lengra.

[rhansen, 23.4.2013 kl. 11:54]

Orð eru til alls fyrst og sannarlega verðugt ykkar markmið.!......en það fer nu lika eftir þeirri Stjórn se nú tekur við hvort þið fáið ykkar orðum  hljómgrunn ...en gangi ykkur vel kæra Asthildur og sannarlega get eg stutt viðþetta mál ykkar .........

[Ásthildur Cesil Þórðardóttir, 23.4.2013 kl. 12:35]

Takk Rhansen mín, það skiptir mig afar miklu máli að þetta mál fái brautargengi, því miður virðist það vera þannig að Dögun sé eina framboðið sem ber hag þessa fólks fyrir brjósti.