Blóm, kisur og smávegis af pillum.

Enn heldur umræðan áfram um kosningarnar, þjóðin nánast klofin í tvær fylkingar, með og á móti forsetanum.  Það er samt ekki honum að kenna heldur því að fólk getur hreinlega ekki tekið lýðræðislegum kosningum, þar sem viðkomandi einstaklingur vann sigur í öllum kjördæmum.  Hver rætningsgreininn og skilgreiningin birtist eftir aðra allskyns "fræðingar" á sjó dregnir til að hamast yfir úrslitunum, gera sem minnst úr þeim og skíta út bæði manninn og þetta æðsta embætti ríkisins.  Já að mínu mati er þetta allt niðurlægjandi fyrir okkur öll, og hættulegt samfélaginu einmitt núna þegar við stöndum í harðvítugum deilum við erlend árásarsamtök.  Því að mínu áliti er ESB ekkert annað en árásarsamtök til að yfirtaka Ísland með makríl og öllu sem hér finnst.  Þeir sem ekki hafa áttað sig á því eru í besta fallið barnalegir.  Sumir vilja bara alþjóðavæðingu með hverju sem það kostar.  Aðrir gera sér hreinlega ekki grein fyrir hvað er í húfi.  Nú hafa þau sýnt grímulaust að við eigum að hlýta reglum Evrópusambandsins skilyrðislaust, og það áður en við höfum samþykkt inngöngu.  Hvernig verður það þá eftir á.  Jú bara tilekipanir og refsingar ef ekki verður farið að einu og öllu að vilja stórríkisins.  Þeir hafa ýmis meðul, um leið og við höfum lagst undir einokunina.  Það verða eiginlega endalok frelsis hér á Íslandi.

Og nú ætlar Örykjabandalagið að kæra útslit kosninganna.  Hafa þau skoðað þessa ákvörðun sína til enda?  Ef svo færi að kosningin yrði dæmd ógild... hvað tekur þá við?  Á að kjósa aftur?  Og hverjir verða þá í framboði?  Þóra Arnórsdóttir hefur gefið út að hún fari ekki aftur í kosningaslag. 

En svo má spyrja af hverju núna?  Það hafa farið fram margar kosningar með þessum "ólögum" sem eru í þessu máli.  Og er það ekki á höndum innanríkisráðherra ef hann hefur lofað að laga þetta fyrir kosningarnar núna.  Hefði þá ekki verið nær fyrir Bandalagið að kanna málið FYRIR KOSNINGAR?

Ganga úr skugga um að allt væri í sómanum fyrir sitt fólk?

Afsakið en þetta lyktar af einhversskonar samsæri um að reyna að breyta niðurstöðum nákvæmlega þessara kosninga.  Og þær hitta fyrir ranga aðila, sem sagt forsetan en ekki síður kjósendur.  Ég held að flestir séu búin að fá nóg af þessum illindum og rifrildi sem hefur verið í gangi.  Og ég er sannfærð um að það eru fleiri eins og ég sem vil ekki fara í annan leðjuslag.  Það er nóg komið.

Ólafur er rétt kjörin forseti til næstu fjögurra ára, og á að fá vinnufrið.  Nú þarf að taka saman höndum og gera það besta úr öllu.  Auðvitað eru alltaf gagnrýnendur á störf forseta og allra.  Við dettum öll ofan í þann pitt líka að ýkja og bæta okkar málstað á kostnað annara.  En þegar niðustaðan liggur fyrir, þá þarf að slíðra sverðin og standa saman sem þjóð.

Ég ætla að minnka lestur á netinu næstu daga.  ÉG er að verða miður mín yfir því hvernig fólk getur látið, og er ég þó ekki mannanna best.  Það er því gott fyrir sálina mína að sleppa því að lesa svona endalaust haturstal, en snúa mér að einhverju uppbyggilgera, og heilsteyptara og vona að þessar raddir hljóðni smám saman. 

En ég ætla að setja inn nokkrar myndir fyrir þá sem leiðist svona tal.  Ég get bara ekki stillt mig.  Segi bara okkur líður sjálfum illa ef við erum endalaust að velta okkur upp í öllu því ömurlega sem okkur finnst, og finnum hjá okkur þörf fyrir að endurtaka í sífellu sömu hlutina til að koma illu af stað.

Fyrst er nú að segja frá því að Lotta mín er með kettlinga í maganum.  Það átti ekki að gerast en dýralæknirinn trúði því ekki að þessi litla saklausa kisa væri ekki ennþá barn

Mig grunar reyndar að hér sé sökudólgurinn, hann var sem sagt meira bráðþroska en hún. En nú hefur hann hlotið sinn örlagadóm, engar bollur lengur

Jamm bumbukisan mín.

Veðrið heldur áfram að vera bjart og fallegt, að vísu hellirigndi í fyrrinótt, en svo var sólin komin aftur í morgun.

Minn eigin foss.

Gróðurinn er orðin ansi þurr og virkilega þörf á hellirigningu.

Rosemary blessunin í villiskóginum mínum. Nú er hún farin suður og selur sína fallegu muni í Kolaportinu.

Blómarós innan um blómarósir.

Þeim kom vel saman Úlfi og henni. Bestu kveðjur til þín Rosemary mín.

Júlíana og Daníel kíktu við, reyndar er Daníel búin að gista hér um tíma, honum finnst svo notalegt að vera í kúlunni. Nú eru þau á leið til pabba síns í Noregi og þaðan í sumarfré með fjölskyldunni það verður gaman, síðan koma þau rétt tímanlega til að fara til Fljótavíkur með okkur, nóg að gera hjá þessum elskum.  Öll barnabörnin eru að vaxa upp og verða stór og flottir einstaklingar.

ÚLfurinn minn að breytast líka úr barni í ungling.  Lífið þeytist fram hjá manni, án þess að maður eiginlega taki eftir því. Þess vegna er svo mikilvægt að gefa þeim tíma þessum elskum og njóta samvistum við þau meðan þau hafa tíma fyrir okkur.

Þetta er nefnilega tíminn sem við leggjum inn það góða og fallega og að bera virðingu fyrir öllu sem lifir, og hlú að því sem er minnimáttar.

ÁLfar og tröll, allt í sama pakkanum. Ef við gætum lifað í slíkri harmoníu og aðrar verur og vættir, þá væri lífið einfalt.

Dhalía frá því í fyrra, flottari en nokkru sinni.

Nelly Moser og Villa De lyon vilja frekar hanga en klifra, þá verður bara svo að vera, en Skjaldfléttan er að byrja á að klifra, svona geta áhugamálin verið misjöfn.

Nellikurnar, pelargoníurnar og petuníurnar lifa í sátt og samveru og þrífast bara vel saman.

Eina fyllta pelagonían sem ég veit um, og hún er frá bónda úr djúpinu.

En nú ætla ég mér að fara út og rótast í moldinni. Það gerir mann moldugan upp fyrir haus, en sú mold og drulla er öll utaná. Þá nægir að fara í bað. Hin drullan sem sest inn í mann er erfiðari, þá þarf helst að fara í andlega íhugun og skoða sjálfan sig að innan. Lofa sjálfum sér að reyna að vera betri manneskja og stilla sig um allt það ljóta. Því eins og við vitum flest kemur sú drulla tífallt til baka, sem við sendum út í samfélagið.

Eigið góðan dag elskurnar

Athugasemdir

[Laufey B Waage, 5.7.2012 kl. 11:32]

Vá hvað Úlfurinn er orðinn þroskaður að sjá.

Gott þú ætlar að einbeita þér að eihverju jákvæðara og uppbyggilegra Ía mín. Ein uppáhaldssetning sem ég hef lengi haldið á lofti hljómar svona: Það sem þú beinir huga þínum að - það vex.

[Helga Þórðardóttir (IP-tala skráð) 5.7.2012 kl. 11:48]

Dásamlegur pistill og ég er þér svo hjartanlega sammála. Umræðan undanfarið hefur alveg gengið fram af mér og ég hef líka forðað mér út í garð. Takk fyrir þessar yndislegu myndir.Njóttu nú sumarsins Ásthildur mín á þessum dásamlega stað og í faðmi fjölskyldunnar.

[Ásthildur Cesil Þórðardóttir, 5.7.2012 kl. 12:05]

Það er alveg hárrétt hjá þér Laufey mín.  Já drengurinn er að vaxa úr grasi. 

[Helga Kristjánsdóttir, 5.7.2012 kl. 13:24]

Þessi tölva á ekki hjarta til að senda,þá geri ég það.

[Lilja Guðrún Steinsdóttir (IP-tala skráð) 5.7.2012 kl. 13:31]

Takk fyrir þennan pistil Ásthildur mín, þú ert góður penni. Við ættum öll að fara að þínum ráðum um sinn.

Ég óska þér til hamingju með fallegu barnabörnin þín, eigið þið góðar samverustundir í sumar!

[Vilhjálmur Stefánsson, 5.7.2012 kl. 14:37]

Fallegar myndir og sérstaklega af Köttonum. Og flottur pistill hjá þér,Guð gefi þér og þínum góða helgi...

[Kidda, 6.7.2012 kl. 09:56]

Enn og aftur ertu með frábærann pistil. Það er langbest að sleppa því að lesa alla neikvæðnina sem er í gangi og vera freka úti í moldinni :)

Lotta er afskaplega falleg kisa, ef það væri ekki svona langt á milli okkar þá væri ég alveg til í að taka að mér kisustrák sem væri líkur henni :)

Alltaf jafngaman að fylgjast með ömmubörnunum þínum, það er eins og þau séu í fjölskyldunni hjá mér.

Gróðurmyndirnar klikka heldur aldrei, alltaf svo gaman að skoða blómin þín <3

Knús í blómakúluna <3

[Ásthildur Cesil Þórðardóttir, 6.7.2012 kl. 16:57]

Takk Helga mín Þórðar, sá ekki innleggið þitt fyrr, hef ekki verið í sambandi.  En innilega takk fyrir góðar óskir og hlý orð

Æ Helga mín hin, slæmt að eiga ekki hjarta, en gott að þú átt eitt slíkt allavega

Takk Lilja Guðrún mín

Takk Vilhjálmur minn  Jamm þær eru flottar kisurnar.

Kidda mín það verður örugglega til leið að koma kisu til þín ef svo ber undir.  En kisustrákar geta ekki orðið þrílitir, það eru bara læður.  En við skulum sjá, það er hægt að gera þær ófrjóar þessa elskur alveg eins og að gelda fress og þá verða þau bara gæludýr og hamingjusöm. 

[Sigrún Aðalsteinsdóttir, 7.7.2012 kl. 02:06]

Lífið snýst um að vinna, éta og sofa. En ef við hlúum að því sem er okkur dýrmætast fáum við það margfalt til baka. Þannig lít ég á þessa tilveru. Alltaf koma vel fram við alla þó maður sé ekki alltaf sammála en að leiðarlokum mun það skila sér.

[Ásthildur Cesil Þórðardóttir, 7.7.2012 kl. 09:39]

Já það virkar örugglega þannig Sigrún mín, það held ég líka.