Kleinubakstur og kettlingar.

ég ætlaði að vera löngu búin að setja inn myndir frá kleinubakstri 10 bekkjar og foreldra í Grunnskólanum á Ísafirði.  Þau fara í ferðalag í vor og hafa unnið mikið við fjáröflun með dyggum stuðningi foreldra og kennara.  Þetta var virkilega gaman við vorum þarna í 4. klst við bakstur og held að afsaksturinn hafi verið um 400 kg. af kleinum sem aðstendendur nemenda voru búnir að panta fyrir fram.

En fyrst nokkrar myndir aðrar.

Litlu skotturnar systur Júlíönu og Daníels, þær vilja stundum koma og heimsækja ömmu í kúlu.  Skemmtilegar litlar prinsessur. 

Það hlýnar smátt og smátt, þessi mynd var tekin kring um páskana, dálítið blautt en hlýtt.

En hér koma myndirnar frá kleinubakstrinum.

Hann fór svolítið hægt af stað, hér er umsjónakennarinn þeirra Herdís Hubner.

Mömmur og líka pabbar þó þeir væru færri.

Og strákarnir voru ekkert minna áhugasamir en stelpurnar, það var gaman að sjá.

Þeir tóku strax að sér að vigta og blanda deigið, ein mamman sá svo um hrærivélina.

Ég hef ekki bakað kleinur í mörg herrans ár, gerði það oft þegar krakkarnir voru litlir til að eiga með kaffinu, og jólakökur. Það var gaman að rifja þetta allt upp í góðum félagsskap.

Aðstaðan í matareiðslustofu skólans er alveg til fyrirmyndar.

Og allir unnu vel saman, það var kátt á hjalla og þó vinnan væri dálítið eintóna þá bætti upp spjall og hlátur.

Og allir voru mjög áhugasamir.

Já það þarf að gera hlutina rétt.

Og svo var hnoðað og hnoðað. Þeir foreldrar og krakkar sem ekki mættu misstu af heilmiklu.

Þetta var virkilega skemmtilegt.

Og svo var að steikja það þurfu mömmurnar og stóru systurnar að sjá um því feitin er varasöm.

Heiða Bára frænka mér er ein af þessum tíu bekkingum.

Og svo er að losa hrærivélarskálina það þurfti að hnoða meira hveiti upp í deigið miðað við uppskriftina.

En eins og sjá má var aldrei slegið slöku við.  Ætli við höfum ekki bara sett með í kökubakstri hér?

Alejandra mín, ég var hér á hennar vegum.

Allir sátu við sama borð og viðingin gagnkvæm svoleiðis á það að vera í samskiptum unglinga og fullorðinna.

Eftiráhnoðkonurnar

Það var stelpa sem tók myndirnar fyrir mig, ætli hún hafi ekki verið dálítið skotin í strákunum.

Nammi namm, erfiðasta við að baka kleinur er að hafa feitina mátulega heita, ekki of heita og alls ekki of kalda.

Og kleinurnar hrúgast upp, því margar hendur vinna létt verk.

Svo er að skera, og snúa hver og einn hafði sína pligt í því.

Já svona var þetta, einn hópur í að vigta og mæla, annar á hrærivélinni, þriðji að hnoða meiri mjöl upp í deigin, svo fletja út og skera, snúa uppí kleinuna, steikja, og svo að taka fullbakaðar kleinur og ganga frá þeim kæla og setja í poka.

Og allir unnu sem einn maður, það var virkilega gaman að upplifa.

Heiða Bára fékk undanþágu við að vera í steikingunni af því að hún er svo vön að hjálpa til heima hjá sér. Mamma hennar og pabbi eru nefnilega mikið bökunar og matarfólk hafa verið í mörg ár með matarklúbb og slíkt.

Dugnaðarforkar.

Það mættu svo margir að við urðum að opna stofu númer tvö.

Loks sá fyrir endann á bakstrinum.

Þá var eftir að ljúka við að setja kleinurnar í poka og Dísa mín þessar kleinur voru næstum því eins góðar og hjá mömmu þinni. 

Ganga frá og þrífa var næst á dagskrá.

Og það voru margir sem gengu í það verk.

OG ég segi bara innilega takk fyrir mig kæru kennarar Bergljót og Herdís, krakkar, foreldrar og aðrir aðstandendur fyrir frábærlega ánægjulegar stundir niður í Grunnskóla fyrir nokkru síðan.

Og kettlingarnir halda að þeirra staður sé fyrir framan tölvuna, ég er samt búin að venja þá á að þeir geti ekki setið uppréttir beint fyrir framan skjáinn, svo þeir reyna að vera á lágu nótunum.

Það er eitthvað svo heimilislegt finnst þeim að vera þarna.

Já svona notalegt eitthvað.

Eigið góðan og gleðilegan sumardaginn fyrsta.   

Athugasemdir

[Anna Sigríður Guðmundsdóttir, 19.4.2012 kl. 17:43]

Áshildur mín. Takk fyrir frábæran pistil og flottar myndir af eðlilegu samfélagi, þar sem virðing og samstaða er höfð að leiðarljósi. Þarna sáum við landsmenn uppskriftina að heilbrigðu samfélagi á myndrænan hátt. 

Ég óska þér og öllum í bloggheimum og annarstaðar gleðilegs sumars, með sól í hjarta og sól í huga.

M.b.kv.

[Ásthildur Cesil Þórðardóttir, 19.4.2012 kl. 18:31]

Takk Sömuleiðis Annar Sigríður mín og takk fyrir góða viðkynningu. 

[Axel Jóhann Hallgrímsson, 19.4.2012 kl. 18:34]

Ég áttaði mig á því þegar ég var búinn að renna í gegnum myndirnar,  að ég var farinn að slefa. Namminamm!

[Ásthildur Cesil Þórðardóttir, 19.4.2012 kl. 18:46]

Hahaha já þær voru góðar og mikið borðað á meðan á bökuninni stóð Axel

[Dísa (IP-tala skráð) 19.4.2012 kl. 20:58]

Gleðilegt sumar . Já, ég segi eins og þú, það er orðið langt síðan ég hef bakað kleinur. Þykist löglega afsökuð eftir ítrekuð handleggsbrot. En mér fannst einmitt skemmtilegast þegar krakkarnir tóku þátt og Siggi var ekki sísta hjálpin, bæði þótti honum kleinurnar góðar og líka gaman að sullast í því. En þetta er mjög góð leið til fjáröflunar, því margir kunna ekki að baka kleinur og krakkarnir geta hjálpað og það er meira gaman að taka þátt en að aðrir geri allt fyrir þau. Ég get rétt ímyndað mér allan kliðinn og fjörið á staðnum . En ég man eftirvæntinguna þegar við vorum að koma heim úr skóla og fundum kleinuilm þá var spurningin hvort hún hyrfi þegar komið var framhjá húsi Eiríks og Rósu, ef ekki, var mamma að steikja og þá var enn betra að koma heim en hina dagana.

[Ásthildur Cesil Þórðardóttir, 19.4.2012 kl. 21:29]

Já nammi namm þá vissi maður að það voru kleinur í boði.  mmmmm...

[Ragnheiður , 20.4.2012 kl. 00:26]

Namminamm girnilegar kleinurnar. Held að þetta sé bara í fyrsta sinn sem ég skrifa eitthvað um mynd sem ekki er kisa á fyrst haha

Gleðilegt sumar

[Guðrún Emilía Guðnadóttir, 20.4.2012 kl. 08:26]

Gleðilegt sumar Ásthildur mín, mikið er gaman að sjá myndirnar ég þekki nú þó nokkra.

Kisurnar okkar eru svona líka reyna að troða sér sem næst manni þetta er bara yndislegt.

Knús kveðjur í kúlu
Þín Milla

[Ásthildur Cesil Þórðardóttir, 20.4.2012 kl. 09:52]

Gaman að heyra Ragnheiður mín hehe já þær voru góðar kleinurnar.

Sömuleiðis Milla mín ég var eiginlega viss um að þú myndir þekkja þarna einhverja.  Og kisurnar eru yndislegar. 

[Kidda, 20.4.2012 kl. 12:46]

Mikið rosalega langar mig í nýsteiktar ömmukleinur. Kisurnar eru frábærar, þær eru stundum ekkert skárri en hundarnir með að vilja vera þar sem maður er.

[Ásthildur Cesil Þórðardóttir, 20.4.2012 kl. 13:02]

Þær eru ekkert skárri þessar, elta mann um allt hús vilja strokur og knús.

[Jens Guð, 20.4.2012 kl. 19:53]

  Assgoti verður maður svangur í kleinur við að skoða myndirnar.  Hehehe!  Svei mér þá,  ég verð að skjótast út í bakarí og kaupa kleinur.

[Ásthildur Cesil Þórðardóttir, 20.4.2012 kl. 20:16]

Hahahaha Jens minn góður eins og venjulega.