Yndisleg minning.

Var að fá í hendur lag sem vinur okkar Júlíusar míns samdi við ljóð sem ég orti í minningu hans.  Þetta lag og meðferð höfundar á því er alveg dásamleg mig langar þess vegna að deila því með ykkur. 

http://www.youtube.com/watch?v=5kQqED7bq7E&feature=share

Hér er ljóðið. 

Sorgin er sár

svíður hjarta.

Tómleiki og tár

tilfinning svarta.

Samt lifir sú von

að góð sé þín köllun

minn elskaði son

á Ódáinsvöllum. 

 

 

Ljúflingur og ljósið mitt

leggðu á veginn bjarta.

Löngunin og lífshlaup þitt

liggur mér á hjarta.

 

 

Í dýpstu sorg um dáinsgrund

döprum hug mig teymdir.

en fórnfýsi og fagra lund

í fylgsnum hugans geymdir.

 

 

Ekki barst þú mikið á.

Elsku sonur mildi.

Varst samt alltaf þar og þá.

Þegar mamma vildi.

 

 

Í mér sorgin situr nú

sárt er upp að vakna.

Hér ég vildi að værir þú

vinur þín ég sakna.

 

 

Englarnir nú eiga þig.

engan frið það lætur.

Við það sætta má ég mig

móðirin sem grætur.

 

 

Elsku Júlli ástin mín.

yfir þér nú vaka.

Allir vættir. Ævin þín

er óvænt stefnutaka.

 

Ég veit að elsku mamma mín

miðlar með þér gæsku.

Hún var æðsta ástin þín.

öll þín árin æsku .

 

 

Nú gráta blessuð börnin þín.

bestur alltaf varstu.

alltaf setja upp í grín.

alla tilurð gastu.

 

 

Sendi ég þér sátt og frið.

með söknuði í hjarta.

held þú eigir handan við,

hamingjuna bjarta.

 . 

 

Athugasemdir

[Dísa (IP-tala skráð) 19.2.2012 kl. 18:08]

Yndislega fallegt, bæði lag og ljóð . Knús til þín.

[Ásthildur Cesil Þórðardóttir, 19.2.2012 kl. 18:18]

Takk Dísa mín það er frekar stórt sár í hjartanu mínu  núna við þessa upprifjun.

[Kidda, 19.2.2012 kl. 20:18]

Þetta er svo yndislegur texti og lag til minningar um Júlla.

Risaknús í kærleikskúluna.

[Ásthildur Cesil Þórðardóttir, 19.2.2012 kl. 20:33]

Takk Kidda mín.

[Jens Guð, 19.2.2012 kl. 22:30]

   Ég deildi laginu á Fésbók. Þetta er virkilega fallegur minningaróður

[Jens Guð, 19.2.2012 kl. 22:40]

  Auðvitað er þetta sárt.  Mjög sárt.  Sonur minn er að kljást við þetta sama vandamál:  Vímuefnafíkn og að auki geðræn vandamál.  Það tætir mann að innan og er mikil sorg. 

[Ásthildur Cesil Þórðardóttir, 20.2.2012 kl. 00:25]

Takk Jens minn, já þetta nefnilega er eins og þú segir tætir mann að innan.  Og svo bætist sorgin ofan á allt.

[Helga Kristjánsdóttir, 20.2.2012 kl. 00:58]

Ásthildur,þennan fellega texta las ég,en hefði viljað heyra lagið er í vandræðum að ná hljóðinu. Góða nótt.

[Jóna Kolbrún Garðarsdóttir, 20.2.2012 kl. 02:09]

Fallegt

[Ásthildur Cesil Þórðardóttir, 20.2.2012 kl. 14:54]

Takk Helga og Jóna Kolbrún.

[Jóhann Elíasson, 21.2.2012 kl. 11:32]

Ljóðið er alveg meiriháttar það er svo mikil og falleg tilfinning íþví.  Við eigum alltaf minningarnar, sársaukinn hverfur aldrei, hann venst bara.....

[Ásthildur Cesil Þórðardóttir, 21.2.2012 kl. 12:54]

Takk Jóhann minn, já það er gott að geta komið mesta sársaukanum frá sér svona í bundnu máli.  Það hefur allavega hjálpað mér oft. 

[Ragnheiður , 22.2.2012 kl. 06:12]

Þetta er verulega fallegt og ég sé það alltaf betur og betur hversu laglegur Júlli hefur verið.

Knús elsku Ásthildur.

Jens, ég vona af einlægni að þinn sonur rati úr þessu

[Ásthildur Cesil Þórðardóttir, 22.2.2012 kl. 11:10]

Takk Ragnheiður mín

[Sigrún Aðalsteinsdóttir, 24.2.2012 kl. 22:11]

Mikið óskaplega er þetta fallegt ljóð hjá þér Ásthildur. Ég táraðist bara við það að lesa það (því miður gat ég ekki hlustað nema á fyrstu tvö erindin, þá fraus tölvan mín - en ég mun án efa hlusta í lagið í heild í vinnunni eftir helgi.

Þú ert svo sannarlega hæfileikarík manneskja og það á svo mörgum sviðum - hvaðan færðu eiginlega alla þessa orku?

[Ásthildur Cesil Þórðardóttir, 25.2.2012 kl. 00:59]

Takk elsku Sigrún mín.