Dagurinn í dag var dálítið sérstakur hjá mér.

Undanfarnar vikur hefur verið unnið að því að leysa úr málefnum Alejöndru litlu.  Tíu ára barátta fyrir því að hún fengi ríkisborgararétt eða dvalarleyfi.  Þessu hefur nú lyktað með því að hún verður vistuð hjá mér uns hún verður 18 ára, og fær dvalarleyfi í þann tíma, síðan mun hún fá íslenskan ríkisborgararétt og getur eftir það ákveðið sjálf hvað hún vill gera.  Við höfum átt í tilfinningalegu ástandi þennan tíma.  því þetta þurfti að fara í ákveðið ferli.  Niðurstaðan kom svo í dag, hún fær að vera hjá okkur ömmu sinni og afa, þann tíma sem þarf þ.e. þrjú ár.  Þetta er mikil fórn fyrir pabba hennar og mömmu sem nú eru flutt aftur til El Salvador, en þau völdu betri framtíð fyrir barnið sitt fram yfir sínar eigin langanir, þetta kallast kærleikur.  Þau ákváðu sem sagt að treysta mér fyrir barninu sínu og fyrir það er ég afskaplega þakklát.  Því svo sannarlega vil ég bara það sem henni er fyrir bestu og glöð yfir að við Elli getum lagt okkar af mörkum til að hún fái þann rétt sem hún þarf. 

Síðan höfðu yfirmenn mínir fyrrverandi boðað mig á fund upp í áhaldahúsi, og færðu mér kveðjugjafir og þakkarorð fyrir störf mín sem eru nú orðin 30 ár alls, en með hléum frá september 1966.  Ég er afskaplega sátt við að geta loksins sinnt sjálfri mér og mínum málum.  En vil senda öllum bæjarbúum góðar kveðjur og þakklæti fyrir hve allir hafa verið mér góðir og hve fólk hefur gegnum þessi ár hvatt mig áfram, þ.e. bæjarbúar, og verið mér mikil hvatning til góðra hluta.  Ég get líka stolt hætt og veit að bærinn minn hefur notið góðs af því sem ég gat gert fyrir hann og bæjarbúa.  Það er gott að geta litið stolt yfir og séð að ég hef skilið vel við, nú tekur við að hlú að sjálfri mér og mínu, bæði gróðri og börnum.

Fiskarnir eru ánægðir í fínu tjörninni sinni.

Ég hef samt grun um að ég sé ánægðari að geta séð þá en þeir að vera til í sólinni og birtunni.

Strákarnir hafa unnið undanfarna daga í að laga heitapottinn sem var orðin eitthvað lúinn.  Veit samt ekki hvort það tekst, en ég get svarið það að það er svo miklu heilbrigðara fyrir svona flotta stráka að dunda sér við svona viðgerðir en að hanga inni í tölvuleikjum.

Hressir krakkar.

En mér var færð góð gjöf frá mínum yfirmönnum, bókina Jörðin. 

Já ég bjóst reyndar ekki við þessu, svo það kom ánægjulega á óvart.

Og svo gjöf frá starfsmannafélaginu líka.  Takk elskurnar fyrir að muna eftir mér.

Þessi dagur var því fullur að kærleika og umhyggju og gleði.

En ALejandra mín sagði við mig í gær; ef allt fer eins og ég vil, þá langar mig að halda veislu.

Þau fengu að baka köku ef þau tækju til í eldhúsinu. 

Svo voru þau bara að fagna og gera sér glaðan dag.

Stubburinn vildi endilega sulla í tjörninni.

Síðan grillaði Úlfur pylsur, meðan stelpurnar skreyttu kökuna.

Gaman gaman.

Kakan fína.  Betty Crooker eða þannig, stendur fyrir sínu.

Sjá ljúfeng er hún.

Og veislan í fullum sving.

Ég er innilega þakklát þeim sem unnu að þessu máli og gerðu það kleyft að mál Alejöndru fengju farsæla útkomu.  Þar komu margir að sem ber að þakka.

Og nú vil ég bara óska þess að þeir sem ekki vildu sjá þessa niðurstöðu sætti sig við hana og við getum öll haldið áfram á braut kærleika og fyrirgefningar.  Og verið áfram fjölskylda.  Það þarf að brúa bil og líma brot.  Það tekur tíma en ég vona að kærleikurinn lækni öll þau sár.

Stundum þarf að lyfta grettistaki.

Til að draumarnir rætist.

Því við þurfum alltaf að fylgja hjartanu okkar.

Þá fer allt vel.  Stelpurnar í hláturskasti, sennilega vegna spennulosunar. 

Innilega takk fyrir mig og okkur öll.  Megi gæfan fylgja okkur öllum.

Athugasemdir

[Jóhanna Magnúsdóttir, 26.5.2011 kl. 20:25]

Til hamingju með þetta, - og mikið lítur þú vel út

[Jóna Kolbrún Garðarsdóttir, 26.5.2011 kl. 20:50]

Innilegar hamingjuóskir til fjölskyldunnar þinnar. 

[Ásthildur Cesil Þórðardóttir, 26.5.2011 kl. 21:17]

Takk dömur mínar, það ríkir gleði á þessu heimili í dag.

[Valdís Skúladóttir, 26.5.2011 kl. 21:35]

Innilega til hamingju með   prinsessuna ykkar

Já  það er yndislegt að sjá hvað er mikið fjör í ömmu og afa kúlu.

                              

[Ásthildur Cesil Þórðardóttir, 26.5.2011 kl. 21:48]

Takk Valdís mín, svo sannarlega ríkir hér gleði. 

[Axel Jóhann Hallgrímsson, 26.5.2011 kl. 21:59]

Til hamingju, fátt er betra en bardagi sem skilar sigri.

[Laufey B Waage, 26.5.2011 kl. 22:01]

Innilegar hamingjuóskir elsku Ía mín.

[Ásthildur Cesil Þórðardóttir, 26.5.2011 kl. 22:21]

Takk já svo sannarlega var þetta góð niðurstaða.  Og við vildum gera allt til að barnið fengi þetta tækifæri eftir 10 ára baráttu.  Og núna loksins liggur gatan greið, og bæði blóðmóðir og foreldrar sem hafa alið hana upp frá barnæsku, settu endahnútin á málið af sínum kærleika og ást á henni. 

[Þorsteinn Árnason (IP-tala skráð) 26.5.2011 kl. 22:29]

 Sendi ykkur hamingjuóskir í kærleikskúluna

[Anna Lilja (IP-tala skráð) 26.5.2011 kl. 22:36]

Alltaf svo skemmtilegar myndirnar þínar. Frábært með Alejöndru!

Kær kveðja til allra í kúlunni <3

[Ásthildur Cesil Þórðardóttir, 26.5.2011 kl. 22:42]

Takk Steini minn knúsaðu frúna

Elsku Anna Lilja mín mikið saknaði ég þín í fermingunni hann bróður þíns.

[Kidda, 26.5.2011 kl. 23:15]

Mikið er nú frábært að loksins hafi verið tekið rétt ákvörðun í hennar máli. Innilegar hamingjuóskir til ykkar allra

Knús í kærleikskúluna

[Ásthildur Cesil Þórðardóttir, 26.5.2011 kl. 23:25]

Takk Kidda mín, já svo sannarlega er þetta mikið gleðiefni fyrir Alejöndru og okkur hin líka.

[Helga Kristjánsdóttir, 27.5.2011 kl. 00:14]

Hjartans hamingjuóskir með allt.

[Ásthildur Cesil Þórðardóttir, 27.5.2011 kl. 00:47]

Takk Helga mín.

[Dísa (IP-tala skráð) 27.5.2011 kl. 10:04]

Til hamingju með góð endalok, bæði heima og í vnnu

[Ásdís Sigurðardóttir, 27.5.2011 kl. 12:40]

Dásamlegt niðurstaða elsku Ásthildur mín. Það kemur mér ekki á óvart að foreldrar stúlkunnar treysti þér fyrir barninu sínu, ég myndi treysta þér fyrir öllum mínum og þó þekki ég þig bara gegnum netið. Kærleikurinn býr í þínu hjarta og ranni og það er öllum ljóst. Mikið er ég glöð að bærinn kvaddi þig almennilega og þakkaði þér störfin, þú átt það örugglega skilið og meira til. Hjartanskveðja til þín elsku vinkona. Innilega til hamingju öll sömul með þessa niðurstöðu.

[Hörður Þórðarson, 27.5.2011 kl. 12:46]

Til hamingju.

[Ásthildur Cesil Þórðardóttir, 27.5.2011 kl. 13:19]

Takk Dísa mín.

Takk Ásdís mín fyrir þessi hlýju orð í minn garð. 

Takk kærlega Hörður. 

[Jenný Stefanía Jensdóttir, 27.5.2011 kl. 16:30]

Samgleðst ykkur innilega.  Kærleikskúla er lýsandi heiti á heimilinu þínu.

[Sigríður Inga Sigurjónsdóttir, 27.5.2011 kl. 16:37]

Til hamingju með þetta Ásthildur og takk fyrir krakkana í gær. Þau voru alsæl:)

[Ásthildur Cesil Þórðardóttir, 27.5.2011 kl. 17:30]

Takk Jenní Stefanía mín.

Takk Sigga mín, já ég sá að þau skemmtu sér vel þessar elskur.

[Jónína Dúadóttir, 28.5.2011 kl. 06:29]

Mikið samgleðst ég þér... ykkur... Ásthildur mín

[Ásthildur Cesil Þórðardóttir, 28.5.2011 kl. 10:12]

Takk Jónína mín.

[Óskar Helgi Helgason (IP-tala skráð) 28.5.2011 kl. 15:48]

Heil og sæl Ásthildur Cesil; líka sem og, aðrir gestir, þínir !

Árnaðaróskir; vil ég færa ykkur hjónum - og fjölskyldu allri, fyrir veglyndi ykkar, sem artarskap allan, í þágu þeirra, sem lakar standa - og staðið hafa, gegnum tíðina, Ásthildur mín.

Með kveðjum góðum; úr Árnesþingi /

Óskar Helgi Helgason 

[Ásthildur Cesil Þórðardóttir, 28.5.2011 kl. 16:52]

Takk minn ágæti Óskar og takk fyrir innlitið.

[Guðrún Emilía Guðnadóttir, 28.5.2011 kl. 19:41]

Til hamingju með þetta ljúfust mín líka að vera nú hætt að þræla þér út þó ég viti að það hafi verið gaman í vinnunni.

Kærleik í kúlu, það er ef það kemst meiri kærleikur fyrir

[Skafti Elíasson, 29.5.2011 kl. 11:18]

Gaman að lesa þetta mamma :) ég er með uppástungu fyrir tjörnina, setja fiskana í fiskabúr á sumrin og breyta tjörninni í sulltjörn fyrir krakkana.

[Ásthildur Cesil Þórðardóttir, 29.5.2011 kl. 17:39]

Skafti þetta er frábær hugmynd hjá þér, ætla ræða þetta við pabba þinn. 

Takk Milla mín, já vissulega naut ég þess að vinna í gróðrinum og gera Ísafjörð fallegan, nánast með stríðsöxi í hendi til að byrja með allaveg.  En svo verður maður einfaldlega þreyttur og vill fara að hlú að sínu eigin.  ég hafði engan tíma fyrir minn garð og sjálfa mig. 

[Sólveig (IP-tala skráð) 30.5.2011 kl. 13:06]

Sendi þér og þínum hamingjuóskir með góðan endi á málum Alejöndru, hef reyndar ekki fylgt með, fer ekki oft inná síðuna þína en alltaf annað slagið, en sé að þú ert ánægð með lyktirnar.

Einu tek ég eftir þegar ég kem á síðuna,  það er barnahópurinn sem er á myndunum oft ekki færri en 4, þannig að það virðist enginn vafi á því að amma og afi í kúluhúsinu af MIKIÐ aðdráttarafl fyrir börnin sem segir mikið um ömmuna og afann.

Sendi svo kæra kveðju í kúlushúsið

Sólveig

[Ásthildur Cesil Þórðardóttir, 31.5.2011 kl. 00:41]

Takk Sólveig mín, um daginn hitti ég einn af vinum barnanna minna, sem sagði við mig; Ásthildur þegar ég var að alast upp, þá var heimili þitt eins og félagsmiðstöð, þar gátu allir hist og dundað sér saman.

Það er að gerast líka núna ég hef hafn nokkra frábæra krakka hér í kring um mig, vini Úlfs og Alejöndru, sem koma hér og njóta þess sem kúlan hefur upp á að bjóða, svona einskonar félagsheimili, þau jafnvel gista hér nokkur saman.  &#39;Eg á bara eftir að lesa yfir þeim um að ganga frá eftir sig og bera virðingu fyrir því að ég er ekki einhver eldhústuska heldur amma sem er í fullri vinnu.  En ég veit að um leið og ég fær tækifæri til að tala yfir hausamótunum á þessum elskum þá verður umgegnin betri. &#39;Eg er nefnilega svona kerling sem nenni ekki að gera of mikið, og þau verða að skilja að þau öll sem eitt þurfa að taka ábyrgð á þeirra þætti í að taka til og vaska upp og ganga frá.  Ég veit að þessar elskur taka því vel og við getum öll bara verið ánægð með fyrrikomulagið.

[Sóldís Fjóla Karlsdóttir, 31.5.2011 kl. 21:21]

Til hamingju með þetta allt saman .....þú átt allt gott skilið ....og þú ert góður myndasmiður.

[Hrönn Sigurðardóttir, 31.5.2011 kl. 22:13]

Innilegar hamingjuóskir Bæði með Alejöndru og falleg starfslok.

Ég var fyrir norðan um helgina og sá að Tröllaskaginn var þakinn ösku

[Ásthildur Cesil Þórðardóttir, 31.5.2011 kl. 23:44]

Takk mínar kæru Sóldís og Hrönn. 

Hrönn Tröllaskaginn líka???

[Hrönn Sigurðardóttir, 1.6.2011 kl. 21:10]

Sem dramadrottning mikil hvað varðar ösku þá sá ég ekki betur Nema það sé svona mikil umferð um hann?