Á morgun, dagurinn sem minnst verður um langa tíð, hvernig sem fer.

Ég er farin að halla mér, búin að gera mitt til að fá fólk til að hugsa eins og ég vil  Það er bara ekki þannig, við verðum að virða hvers annars skoðanir og sætta okkur við það sem ekki verður að gert.  Ég hef dálítið gaman af að rökræða sérstaklega þegar ég hef sterkar skoðanir á málefninu. 

Þetta síðasta núna að telja fram hverjir ætli að segja nei og hverjir já, er dálitið á lágu plani að mínu mati, þó ég fagni því þegar sérfræðingar tjá sig um málin, sérstaklega útlendingar sem hafa engra hagsmuna að gæta.  ég tek mínar ákvarðanir út frá því sem mér finnst sjálfri en ekki af því að þessi eða hinn ætli að segja þetta eða hitt.  Og alls ekki eins og nú er verið að setja fram að eg sé í liði með einhverjum illa þóknanlegum hér á landi.  Þá er umræðan komin út um víðan völl, og öll rök þrotin og hræðslan ein tekin við.  Hvort sem það er hræðsla við hvað tekur við ef nei verður ofaná, eða hræðsla við að þeir sem segja Nei hafi haft rétt fyrir sér allan tímann.

Þetta verður bara tíminn að leiða í ljós.  En við erum auðvitað óttalegir þrasarar og barnslegar sálir, og svona frekar hégómagjörn og upptekin af því hvernig útlendingar hugsa um okkur.

Það hverfur þegar maður fer að ferðast og kynnast fólki erlendis.  Því þá sér maður að þau eru bara fólk eins og við, hugsa svipað, og margir hugsa fallega til okkar, og sjá í okkur baráttu sem þau gjarnan vildu sjá heima hjá sér.  Við erum fá og smá, en höfum þennan endalausta kraft til að standa upp, flest okkar, þegar okkur er misboðið. 

Það sem er greinilegt í þessu máli öllu saman er að forystumenn stjórnmálanna, flestir hverjir eru komnir langt út frá almenningi, þeir tala fallega á hátíðarstundum, en svo þegar þeir hafa virkilega tækifæri til að gera það sem þeir hjala um, þá er nú eitthvað annað uppi á teningnum.

Þess vegna verðum við sjálf að fara að læra að refsa þeim.  Láta þá finna fyrir því þegar þeir brjóta öll sín kosningaloforð, og gera okkar til að það fólk sem er algjörlega siðblint og vill ekkert nema sitja í jötunni, verði látið víkja.  Það þarf að hreinsa til og setja lög um hámarks setur fólks við stjórnvölin. 

Á morgun kemur í ljós þjóðarviljinn.   Þegar þar kemur verðum við að slíðra sverðin og taka höndum saman um að gera okkar til að rétta skútuna af. 

Ef neiið verður ofaná, þá er það ótrúlegt afrek neisinna, gegn öllum gengdarlausa áróðrinum sem flestir fjölmiðlar landsins lögðust á eitt við að framkvæma.  Og þeir hópar sem greinilega áttu næga peninga til að gera risastórar auglýsingar fyrir Jái, meðan neisinnar voru flestir að vinna af hugsjón og kærleika til lands og þjóðar.

Þar lögðu margir hönd á plóg, og ég vil þakka þeim öllum sem hafa verið með mér í baráttunni við að segja Elítunni og klíkuskapnum stríð á hendur. 

En á morgun mun þetta allt saman koma í ljós, og ég legg hér með mína vinnu í hendur almættisins, goða og gyðja og bið um að okkar málstaður verði ofan á. 

Hafið þökk fyrir öll sömul og góða nótt

Með kveðju frá Ísafirði.

Athugasemdir

[Vilborg Eggertsdóttir, 9.4.2011 kl. 03:09]

Góða nótt, frú Ásthildur og þakka þér fyrir að vera sjálfri þér samkvæm.

Reyndar virðist vera eitthvert næturrölt á þér en það auðvitað skiptir engu þar sem "tíminn" er í raun aðeins blekking sem við ákváðum að taka þátt í með því að fæðast inn í hið svokallaða  - jarðlíf -

[Jóna Kolbrún Garðarsdóttir, 9.4.2011 kl. 03:13]

heyr, heyr.... Hér er mitt nei!!   http://www.youtube.com/watch?v=1UEusvr0tp8&feature=mfu_in_order&list=UL

[Ásthildur Cesil Þórðardóttir, 9.4.2011 kl. 11:00]

Takk kærlega Vilborg.

Jóna þetta er aldeilis frábært myndband.  Já hér er fallegur dagur og ég ætla að fara og kjósa Neiið mitt hér rétt á eftir.

[Guðni Karl Harðarson, 9.4.2011 kl. 12:35]

Ástildur, í dag ákveðum við framtíð okkar sem íslendingar.  Með því að segja NEI sýnum við að það eru ekki stjórnvöld í þessu landi sem getur skipað almenningi að gera sem þeim líkar. Þau geta þá ekki gengið yfir okkur með ofurvaldi og heimtað að við samþykkjum að borga óútfylltan víxil sem fjárglæframenn stofnuðu til.

Ath. að ef við segjum NEI þá munum við geta fyrir alvöru tekið á fjárglæframönnunum og dæmt þá. Við værum búin að setja fordæmi. Við værum líka að segja að í framtíðinni verði ekki hægt að krefjast svona hróplega ósanngjarna krafna.

Með því að segja NEI setjum við fordæmi út í alþjóðasamfélagið að almenningur eigi ekki að borga upp skuldir fjárglæframanna! 

Ásthildur og þið öll! Eigið góðan dag og þessi dagur skal vera með jákvæðum hætti fyrir okkur til minnis fyrir framtíðina. Eitthvað til að ganga út frá!................

[Jóhann Elíasson, 9.4.2011 kl. 12:57]

Ég er búinn að kjósa Neiið mitt og hefði ekkert á móti því að geta farið svona fimm sinnum til að kjósa NEI , en ég get það því miður ekki og því set ég traust mitt á það að nógu og margir sjái hversu vitlaust það er að kjósa já.

[Ásthildur Cesil Þórðardóttir, 9.4.2011 kl. 12:59]

Já sammála, sérstaklega núna í ljósi nýjustu frétta af að Evrópusambandið ætlar að skikka okkur til að aðlaga sjávarútveginn að reglum sambandsins, og einhver loforð Össurar og có að fiskveiðirétturinn verði bara að hluta til hér heima.  Það á að draga þetta fólk fyrir landsdóm, það er mín skoðun.

Takk fyrir innlitið og já við skulum vona að allt fari vel.

[Ásthildur Cesil Þórðardóttir, 9.4.2011 kl. 12:59]

Jóhann  Segi sama.  En nú er bara eftir að bíða.

[Jóhanna Magnúsdóttir, 9.4.2011 kl. 13:59]

Fór í kjörklefann áðan, .. var enn að hugsa mig um, en endaði í Nei-inu!

Eigum öll góðan dag, hvernig sem fer.

[Maddý (IP-tala skráð) 9.4.2011 kl. 17:30]

Ég er búin að segja mitt NEI - takk fyrir þitt NEI Ásthildur mín,

Með kærri kveðju og þakklæti fyrir stuðninginn ....

[josef asmundsson (IP-tala skráð) 9.4.2011 kl. 18:32]

Mikið óskaplega er að yndislegt að sjá hvað allir eru brosandi ,hjartahlýjir og allt að því "Já"kvæðir hér að ofan.En ,nei ég sagði ekki "Já" ég sagði"NEI" Svo við erum sammmála um það.Hafið öllsömul góðan nætursvefn og afskaplega hlýjar kveðjur héðan frá Noregi.

[Ásthildur Cesil Þórðardóttir, 9.4.2011 kl. 19:32]

Takk öll fyrir innlitið og já verum jákvæð og segjum NEi

[Kidda, 9.4.2011 kl. 20:47]

Búin að merkja við Neiið mitt, við 4 í fjölskyldunni merktum öll við NEI.

[Gudmundur Júlíusson (IP-tala skráð) 9.4.2011 kl. 22:38]

Ásthildur, það væri synd að segja að þú legðir þig ekki fram til að betrumbæta Ísland!, þvílík staðfesta og óeigingirni í garð okkar ástsælu þjóðar, og skrif þín öll hafa verið  á þann veg að þjóðernishyggjan og elskan fyrir landinu hafa verið í forgrunni, engin skítköst og leiðindi gagnvart öðrum bloggurum  með aðrar skoðanirá málunum, heldur aðeins málefnanleg rök og kurteisislegar ábendingar af þinni hálfu.

Ég tek hatt minn ofan fyrir þér, (og eins og þú kannski veists, er ég með hatt )

[Ásthildur Cesil Þórðardóttir, 9.4.2011 kl. 22:38]

Gott að vita Kidda mín, nú krossa ég fingur og tær og bíð úrslitanna og tek þvi svo eins og manneskja sem að höndum ber.

[Axel Jóhann Hallgrímsson, 9.4.2011 kl. 22:52]

Ég setti NEI í pottinn, ég bíð spenntur eftir fyrstu tölum, núna eru 10 óbærilegar mínútur í þær.

[Ásthildur Cesil Þórðardóttir, 10.4.2011 kl. 10:19]

Já Axel minn fyrstu tölur voru góðar, og ennbetri fréttir sem biðu mín í morgun.   Til hamingju við öll.