Myndir og svoleiðis.

Veðrið hér minnir óneitanlega á umhleypingarnar heima,  hér er búið að vera hlýtt og vorveður, en austurríkismenn vantrúaðir á að vorið sé komið.  Enda kom á daginn að nú hefur kólnað ískyggilega og í morgun var allt hvítt af snjó. 

En ég lét mig hafa það í gær að aka svolítið um sveitirnar og taka myndir,  það var frekar erfitt, því ég þurfti bæðí að hafa augun á landslaginu og veginum.  Og svo vera tilbúin að taka snöggar ákvarðanir um að stöðva ökutækið og stilla sér upp.

En hér má sjá ömgurnar vera að gera heimavinnuna, Hanna Sól með skákverkefni og amman að ráða krossgátur, ég fer sjaldan eitthvað í ferðalag án þess að hafa slíkar meðferðis.

Það er galsi í þessum litlu skvísum mínum

Og margt sér til gamans gert

Fallega ömmustelpan mín.

Mæðgurnar við matarborðið, mamma þurfti að aðstoða Hönnu Sól með skákdæmin.

Svo þarf að koma þeim í skólan og leikskólan  á morgnana, þá er gott að hjálpast að.

:Þessar myndir eru teknar í fyrradag.  Það var bjart og fallegt veður, en afar kalt og frost.

Hér erum við komin í sveitina við hesthúsin, eins og sjá má er grasið farið að grænka og akrarnir tilbúninir til útplöntunnar.

Sumt komið lengra en annað.

Sem sagt bara beðið eftir vorinu.

Hér verður örugglega maís.

Mér finnst fólk utan Íslands ekki vera jafnmiklir fagurkerar og við þegar kemur að raflínum, þær eru miklar og skemmandi fyrir útsýnið, en það er víða um heim.

Vindmyllurnar eru líka víða, þær eru auðvitað náttúrlega hagkvæm auðlind.

Hér er eitt þorpið, svona kúra þau inn á milli akranna.  En þau eru saman í klösum með einni yfirstjórn, ég held að Mattersburg sé aðalþorpið í þessum klasa hér.

Hér sjást vindmyllurnar betur.

Ég þarf að fara yfir lestarteina á leiðinni í hesthúsið, Christína segir mér að það séu mörg dauðsföll á ári þegar fólk fer yfir á rauðu eða gulu, og tekur sjensinn.  Samt sem áður er ekki farið í að fjárfesta í slám sem opna og loka. 

Austurríkismenn eru í sumum málum á eftir okkur, þeir til dæmis reykja eins og strompar.  Í umferðinni eru þeir ekkert betri en við, aka yfir löglegum hraða og jafnvel svína á mann út af hliðarbraut. 

En þeir eru afskaplega kurteisir og bjóða alltaf góðan dag við þá sem þeir hitta,  ég er líka farin að þekkja sumar konurnar og karlana sem koma með börnin á leikskólann á sama tíma og ég.   Í sveitinni eru allir miklu vingjarnlegri en í Vín, þar sem enginn horfir í áttina til þín, nema þú sért með hund.  Þú mátt líka fara með hunda inn í kaffihús, sem okkur finnst alveg út úr kú á Íslandi.

Þessi húsasamstæða minnir mig alltaf á hringhúsið í Garðabænum

Svona sólarmynd ala Ísafjörður.

Hér má sjá eitt þorpið kúra við hlið akranna.

Gaman að þessum litlu þorpum þar sem búa svona fimm þúsund manns eða svo.  Friðsæl og hlý.

Ég held að ég hafi örugglega vakið eftirtekt heimamanna þegar ég stoppaði bílinn á hinum ýmsu stöðum og dró fram myndavélina.

Og hvert erum við nú komin? Jú til Marz hehe

En ég hef aldrei farið þessa leið og varð sífellt að taka eldsnöggar ákvarðanir, þegar ég sá eitthvað sem var interesant.

En svo er komið kvöld og litlu prakkararnir mínir þurfa að bursta tennur og fara að sofa því hér vakna allri snemma.

En á morgun ætla ég að segja ykkur frá mjög áhugaverðum degin sem var í dag.  Núna held ég að ég farið að halla mér.  Eigið góða nótt elskurnar.  Með kveðju frá Austurríki.

 

 

 

 

Athugasemdir

[Sigrún Jónsdóttir, 22.1.2011 kl. 00:41]

Yndislegt að fá að fylgjast svona með ferðum þínum Ásthildur mín

[Ásthildur Cesil Þórðardóttir, 22.1.2011 kl. 08:15]

Mín er ánægjan mín kæra  Það er gott að eiga svona marga skemmtilega og góða ferðafélaga.

[Jóhann Elíasson, 22.1.2011 kl. 08:57]

Alltaf jafn gaman og fróðlegt að skoða pistlana þína.  Rosalega sem "litlu" stelpurnar hafa stækkað og þroskast.  Hvað er mest ræktað þarna á þessu svæði?

[Kidda, 22.1.2011 kl. 10:02]

Það er á fleiri bæjum beðið eftir vorinu sé ég. Alltaf jafn gaman að ferðast með þér um ókunn lönd

Knús til Austurríkis

[Dísa (IP-tala skráð) 22.1.2011 kl. 10:07]

Meðan þú bloggar og miðlar okkur fróðleik og skemmtun ertu aldrei ein á ferð. Ekki ætti ég bágt með að trúa að stundum stoppirðu séstaklega til að taka mynd með einhvern í huga sem hefur áhuga á myndefninu. Megum við fá meira að heyra!

[Ásthildur Cesil Þórðardóttir, 22.1.2011 kl. 12:00]

Jóhann mér sýnist það vera Maís, sólblóm, paprikur, jarðarber,kartöflur svo eru epli, perur, kirsuber. Sumir rækta blóm, og svo er líka til að fólk fái að týna blóm eða ávexti sjálft af ökrum og borgi fyrir það sem þeir taka, þá eru bændur og búalið við akurinn með lítin kofa og borð, eða hreinlega einhversstaðar kassi til að leggja peninginn í.  Og þeir virðast vera alveg heiðarlegir í því fólkið á landsbyggðinni. 

 Takk Kidda mín, já við bíðum auðvitað öll eftir vorinu. 

Dísa mín, jú það hefur nokkrum sinnum komið fyrir að ég tek myndir af fólki eða stöðum sem ég veit að lesendum mínum þykir vænt um, og líka segi ég stundum við sjálfa mig, mikið væri gaman að sýna þeim þetta eða hitt sem fyrir augun ber, en fyrst og fremst geri ég þetta mér til mikillar ánægju.

[Helga Kristjánsdóttir, 22.1.2011 kl. 12:25]

 Ég myndi þekkja krílin hvar sem er,svo föst eru þau greypt í sjónminnið,hamingjusöm börn.Allir hér eru með handboltann á heilanum,leikur við Þjóðverja í dag,þjóð sem hefur alið marga okkar fræknustu,maður fær sína spennu í dag. Lifðu í lukku  

[Ásthildur Cesil Þórðardóttir, 22.1.2011 kl. 16:28]

Takk Helga mín, já þetta með fótboltan, hjá okkur er þýskur strákur, ég vona að handboltinn fari svona nokkurnveginn jafn, svo ekki verið atgangur hjá stákunum mínum  ÉG skil annars ekki þennan barlóm um að sjá ekki leikinn, því það er hægt að sjá hann beint í tölvunni.  En það er auðvitað ekki það sama og við sjónvarpsskjáin með bjór og snakk og konuna þjónandi kring um sig og vinina  Knús heillin,

[Jón Ríkharðsson, 22.1.2011 kl. 20:44]

þetta eru fínar myndir og þú mátt vera virkilega stolt, af þínum fallegu afkomendum.

[Ásthildur Cesil Þórðardóttir, 22.1.2011 kl. 21:41]

Þakka þér innlitið Jón og hlý orð,