Undir áhrifum - í annarlegu ástandi.

Það er áberandi í fréttum mikil aukning á innbrotum, árásum og annari óáran.  Það fer að verða svo að borgarar geta ekki um frjálst höfuð strokið.  Margir þessara árásamanna virðast vera af erlendu bergi brotnir.  Þ.e. virðast koma hingað í þeim tilgangi að brjótast inn og stela.

Þegar harðnar í ári og fólk missir lífsviðurværi sitt eða dettur fram af brúninni, tekur við örvænting og þá er gjarnan leitað í gleymsku vímunnar, eða róandi lyfja.

Þegar þjófnaði ber á góma segir fólk gjarnan; það á að loka þessi fífl inni og henda lyklinum.   Ég veit að það er ófyrirgefanlegt að brjótast inn og stela frá fólki.  Ég veit líka að fólk verður fyrir áfalli og er jafnvel lengi að ná sér eftir slíkt, það er hræðileg tilhugsun að einhver ókunnugur hafi farið um allar manns eigur og rótað í öllu manns dóti. 

Og lögreglan virðist standa ráðþrota og vísar fólki oft frá.  Fylgir jafnvel ekki eftir ábendingum eins og um notkun stolinna korta og slíkt.

 

Málið er bara ekki svona einfalt. 

Bak við hvert innbrot og árás er sorgarsaga og niðurbrot einstaklinga.  Og þessir einstaklingar eiga foreldra, systkini, afa og ömmur.  Oftast fylgir sögunni þegar menn nást að þeir hafi verið undir annarlegum áhrifum. 

Það er nefnilega málið, þeir sem svona er komið fyrir eru langflestir búnir að missa fótana í fíkniefnum og hringiðu neðanjarðarsvikamillu sem fólk almennt annað hvort veit ekki um eða gerir sér ekki grein fyrir.

Þetta byrjar sakleysislega með að prófa, sumir þurfa ekki meira, og smátt og smátt ánetjast ungmenni þessari neyslu og verða að lokum svo háð henni að þau ráða ekki við sig.  Þegar þannig er komið sögu eru þeir venjulega komnir í skuld við díler sem getur stjórnað þeim að eigin vild.  Því það er dýrt að nota eiturlyf og það þarf að fjármagna þau með einhverju móti.

Stúlkur eru betur settar að því marki er hægt er að tala um betur settar, því þær láta leiða sig í vændi, eða að þóknast einhverjum gæðingi díleranna.   Strákarnir eru þá frekar settir í innbrot.

Þannig byrjar hringrás sem ekki sér fyrir endan á.  Þeir nást, eru settir í fangelsi, fá sektir og þegar afplánun líkur er oftast fátt um úrræði.  Fíkillinn búin að koma sér út úr foreldrahúsum, og ekkert að leita til.  Þá bíður þeirra sama hringrásin, því eftir þeim bíður sá sem kom þeim þangað sem þeir eru, og það eru enginn grið gefinn, skuldir þarf að borga. 

Það sem mér finnst svo skrýtið er að dómsmálayfirvöld hafa allan hugann við þessa neðri endastöð, ég man ekki eftir að stórlaxi hafi verið stungið inn eða fundinn, ekki síðan Steinermálið í Hafnarfirði. 

Minn drengur átti til dæmis að taka á sig sök fyrir einhvern svona og óttin var slíkur að hann ætlaði að játa hvað sem tautaði og raulaði.  Það bara stóðst engan veginn og ég verð að segja rannsóknarlögreglunni það til hróss að hún hætti ekki fyrr en hún hafði sannað sakleysi hans, reyndar með minni aðstoð.

En aftur að toppunum.  Díler er auðvitað ekki aðalkallinn, heldur er hann millistig milli þeirra sem fjármagna og stjórna.  Ég er ósköp hrædd um að slíkir menn séu einhverjir hvítflibbar sem eru hreinlega verndaðir af yfirvöldum, of hátt settir til að hægt sé að hrófla við þeim.   Þetta er auðvitað hrein ágiskun en samt.  Af hverju er aldrei reynt að finna þá sem fjármagna og stjórna?

Mig minnir að í Bretlandi hafi lögreglan tekið þá ákvörðun fyrir allmörgum árum að hætta að eltast við 0 - komma eitthvað gramm á götunni, sem gerir reyndar ekkert annað en að viðhalda eftirspurninni, en einbeita sér í stað þess að þeim sem eru hinir raunverulegu skaðvaldar.  Þeir sem flytja efninn inn og borga fyrri þau. 

Á lítill eyju út í ballarhafi hlýtur að vera auðveldara að hafa eftirlit með innfluttningi en á meginlandi.  Ég man vel þegar þetta var allt saman að byrja og tollvörðurinn minnir að hann heiti Kristján varaði við þessu og vildi meira eftirlit.  Einhverveginn var ekki hlustað á hann og eitthvað gerðist sem ég kann ekki að skilgreina.  En allavega var ekkert gert til að reyna að koma í veg fyrir innflutning.   Auðvitað finna menn burðardýrin og er það auðvitað vel, en hvað svo???  Af hverju er ekki hægt að finna þá sem eru á hinum endanum?  Það er þarna uppi í pýramídanum.   Það er alveg dagljóst að burðardýr og dílerar hvað þá fórnarlömbin sjálf hafa ekki það fjármagn til að kosta innfluttning, hvað þá áhættufé því alltaf finnst eitthvað af innflutningnum. 

Hinar erlendu mafíur sem hingað venja komur sínar er svo annað mál.  Miðað við þeirra heimaland er hér gósentíð, mikið af allskonar heimilistækjum og skartgripum sem hægt er að koma auðveldlega í verð.  Sennilega flutt út í gámum til sölu erlendis. 

Hér hefur ekki mátt orða það að biðja menn um sakarvottorð þegar þeir koma inn í landið.  Það gæti allavega aðeins minnkað komu þeirra hingað.  En það er eins og stjórnvöld hafi gefist upp á stríðinu við mafíur og fíkniefni því miður.  Því ég tel að þetta snerti á einhvern hátt allar fjölskyldur landsins,  annað hvort sem fjölskyldur eða fórnarlömb innbrota.

Þegar sverfur að og fólk missir fótana er reitt vonlaust og finnst það svikið, getur ekkert leitað og sífellt þrengir að þá brotnar eitthvað.  Þegar svo fólk fer að deyfa sársaukann með til dæmis vímuefnum, hvort sem það er vín eða fíkniefni þá gerist það sem við sjáum nú, hringrás innbrota, fangelsis þangað til vonleysið eitt ræður og menn taka auðveldasta veginn út.  Hvert líf er dýrmætt.  En stundum er eins og yfirvöld líti ekki á þetta ólánsfólk sem manneskjur heldur einhverja sem hantera má eins og þeim sýnist.  Virðingarleysið og fyrirlitningin er of algjör, og brotna sálin meðtekur þau skilaboð að hún sé einskis virði.

Þegar svona er komið er nær því ómögulegt að rífa sig upp, því ef það er reynt er er sjáflstraustið rifið niður og ekkert hald til að grípa í. 

Þess vegna ætti að vera búið FYRIR LÖNGU SÍÐAN að setja á stofn lokaða meðferðardeild þar sem ungir fíklar og jafnvel eldri eru skikkaðir í meðferð í stað fangelsis.  Ég bara skil ekki af hverju það er ekki löngu komið á hér í landi alsnægta.  Jú auðvitað veit ég það.  Þau eru einfaldlega ekki talin með í mannlegu samfélagi, setjum þetta pakk inn og hendum lyklinum.  Er einhver hér sem hefur hugsað svona, eða talað?

Hver manneskja er dýrmæt, hver manneskja hversu langt niður sem hún er kominn á sinn rétt á virðingu og réttlæti, samkvæmt stjórnarskrá á hún sinn rétt sem afar oft er á henni brotinn. 

Einhver sagði einhverntíman; Sá yðar sem syndlaus er kasti fyrsta steininum. 

Svo má í lokin benda á að útrásarvíkingar eru líka undir annarlegum áhrifum, þeirra fíkn heitir græðgi og virðist samvkæmt skilgreiningu yfirvalda vera fíkn sem er lögleg og skiljanleg.

Athugasemdir

[Jóhann Elíasson, 29.12.2010 kl. 14:47]

Er Gunnarsstaða-Móri þá í eitthvað "annarlegu" ástandi líka??????  Það getur ekki endalaust verið afsökun?????

[Helga Kristjánsdóttir, 29.12.2010 kl. 17:26]

   Það er erfitt að ná jafnvægi í þessum efnum,agi og hjálp,þurfa að funkera saman.(:- - -

[Ásthildur Cesil Þórðardóttir, 29.12.2010 kl. 18:32]

Mórinn sá já svo sannarlega er hann í annarlegu ástandi, hefur allavega svikið öll sín loforð og prinsipp.

Einmitt Helga, hér þarf að samræma aðstoðina ef hún á að gera virkað. 

[Ragnheiður , 29.12.2010 kl. 21:01]

Einhvernveginn ætti að vera hægt að lenda þessum málum betur en gert er. Bara í kvöld er talað um í fréttum að þrír dómar hafi úrelst vegna biðar, það er einhver sem er dæmdur fyrir afbrot. En það var pláss fyrir sektargemlinginn minn sem hafði samið, einhver klúðrar á hinum endanum. Þeir eru heppnir að við erum ekki í BNA. Þá þyrftu þeir að gæta sín á að fá ekki á sig kæru fyrir ólögmæta innilokun.

En við erum á svipaðri línu með fíklana..lokaðar meðferðardeildir, og einhver MIKLU meiri stuðningur við að koma þessum aðilum á rétta braut. Þau eru ekki einskis virði. Þetta eru börnin okkar .

[Ásthildur Cesil Þórðardóttir, 30.12.2010 kl. 01:43]

Já Ragnheiður mín því miður virðist enginn áhugi hjá hinu opinbera að hlú að börnunum okkar.  Þau eru fyrirlitinn og smáð, og það er eins og þessir jálkar gleymi því að þau eiga sinn rétt og þau eru ekki ein, heldur stendur að hverjum einstakling  margir fleiri sem eru í sárum.  Það hefði átt að vera fyrir löngu komið á legg lokaðri meðferðarstofnun fyrir fíkla.  Mörg þeirra eru yndæl og ljúf en fíknin hefur gert þau að sorglegu dæmi um eyðileggingu á mannssálinni.  Og þar hafa allir hjálpst að, ekki bara fíkniefnaheimurinn heldur líka læknar, sálfræðinga, heilbrigðiskerfið lögreglan, dómsmálakerfið allt spilar þetta inn í að draga niður og skemma einstaklingana, þegar hlutverk þeirra ætti að vera að hlú að og bjarga þeim.

[Kidda, 30.12.2010 kl. 10:55]

Það hefur aldrei boðað gott að taka neysluskammtinn af fíklum, þeir þurfa þá að fjármagna einhvern veginn annan skammt í viðbót. Og oftar en ekki gera þeir það með innbrotum eða öðrum þjófnaði. Okkur vantar tilfinnanlega lokaða meðferðastofnun sem hægt er að dæma fíkilinn í afplána þar. Og einnig fyrir þá fíkla sem ganga inn og út af meðferðarstofnunum, þeir þurfa að geta afsalað sér sjálfræði á meðan á meðferð stendur.

En ég er hrædd við erlendu glæpamennina, þeir koma frá svo allt öðruvísi samfélagi og eru mun grimmari og skipulagaðari en íslenska afbrotafólkið. Það á að láta þá afplána heima hjá sér dómana sem þeir fá hérna, enda er Hraunið víst lúxusstaður miðað við fangelsin úti. 

Topparnir sem skipuleggja innflutninginn virðast ekki vera til en þeir eru þarna úti og geta þess vegna verið nágranninn þinn sem er ósköp vinalegur og þægilegur í umgengni. Af hverju þeir eru ekki teknir er stórfurðulegt svo ekki sé meira sagt. Það hlýtur að vera vitað um nokkra. Veit reyndar til þess eftir frásögn fyrrverandi löggu í fíknó að það komi nokkrum sinnum fyrir að málin eru komin það langt á veg að handtaka væri á næsta leyti en þá kemur skipun að ofan sem stoppar ferlið og viðkomandi löggur settar í að rannsaka annað.  

Það eru ekkert svo ýkja mörg ár síðan við gátum skilið bílana okkar eftir ólæsta og jafnvel húsin okkar og verið róleg yfir því. Það gildir ekki lengur, núna þurfum við að fela það sem er skilið eftir í læstum bílnum og sofa með þjófavarnarkerfið á. 

Við höfum alveg nog með okkar glæpamenn þó svo að við þurfum ekki að hleypa erlsndum glæpamönnum inn í landið. Það er lámarkskrafa að fara fram á sakarvottorð við komuna til landsins, sérstaklega frá þeim löndum sem virðast sækja í að koma hingað til þjófnaða.

Knús í Kærleikskúluna

[Matthildur Kristmannsdóttir (IP-tala skráð) 30.12.2010 kl. 12:04]

Það heyrist aldrei neitt um hvernig gengur með gámaskannann!   Við fáum ýmsa tölfræði í fréttum eins og hvað hafi margir verið teknir við of hraðan akstur eða fullur undir stýri og það er fínasta forvörn að fólk geri sér grein fyrir því að löggæslan er á vaktinni en afhverju hefur alltaf verið svona hljótt um þennan gámaskanna?  Hann kostaði mikið og það var ekki auðsótt að hann yrði keyptur en loksins var hann keyptur og alveg frá fyrstu tíð hefur verið eins og einhver leynd yfir honum.  Ég vil gjarnan fá að vita hvort hann gerir eitthvað gagn, ef hann gerir ekkert gagn, er þá ekki eitthvað athugavert við það?   Mér finnst vera skítafýla af þessu máli.   Við fáum að vita um smáskammtana sem koma í gegnum Leifsstöð en hvað næst mikið í gámunum?  Ég vil fá mánaðarlegar skýrslur um það settar fram fyrir almenning, okkur kemur þetta við!

[Ásthildur Cesil Þórðardóttir, 30.12.2010 kl. 12:07]

Takk fyrir þetta innlegg Kidda.  Þetta sem þú segir hér er einkar athyglivert:

"Veit reyndar til þess eftir frásögn fyrrverandi löggu í fíknó að það komi nokkrum sinnum fyrir að málin eru komin það langt á veg að handtaka væri á næsta leyti en þá kemur skipun að ofan sem stoppar ferlið og viðkomandi löggur settar í að rannsaka annað.  "

Ég skora á yfirmenn lögreglunnar og saksóknara að láta fara fram rannsókn á slíku.  Þetta er nákvæmlega líka mín tilfinning og reyndar sagði mér ungur fíkill sem nú er látinn að hans mál fengu all undarlega meðferð, þar sem dómari var komin með hans mál inn á borð, afbrot sem hann framkvæmdi á laugardegi og var komið inn á borð dómara á sunnudegi.  Þar sem hann varð fyrir hótunum. 

Ég er viss um að þarna er eitthvað meira en lítið rotið, sem þarf að skoða.  Þetta getur ekki gengið svona lengur með öllum þeim rosa og viðbjóði sem þarna kraumar í undirheimum. 

[Ásthildur Cesil Þórðardóttir, 30.12.2010 kl. 12:12]

Algjörlega hárrétt hjá þér Matthildur.  Það hlýtur hver maður að sjá sem vill sjá það að það eru engir smálaxar sem stjórna þessu og fjármagna.  Það verður að fara að þrýsta á yfirvöld dómsmála að það verði lögð meiri áhersla á að komst fyrir toppana og stöðva málin þar.  Lekan þarf alltaf að stöðva við upptökin en ekki þar sem vatnið frussast út.  Þetta vita allir en ef til vill er málið of viðkvæmt fyrir hvítflippafólkið, þar má ekki hrófla við neinum, en þá liggja lika allir undir grun.