Landsmálin frá mínum bæjardyrum séð.

Ég ætlaði ekki að blanda mér í umræðurnar um villiketti versus heimilisketti og Samfylkinguna.  En ég get eiginlega ekki stillt mig.

Það hefur verið ótrúlegt að fylgjast með umræðunni og fréttamennskunni um þremenningana og afgreiðslu þeirra á fjárlagafrumvarpinu.  þar hefur opinberast fullkomlega það sem fram kom í rannsóknarskýrslunni um foringjaræðið og skort á sjáfstæðri hugsun,  fyrst og fremst sjáfstæðri hugsun alþingismanna. 

Ég hef alltaf haldið að menn sverðu það við biblíuna að fylgja engu nema sinni sannfæringu, eða allavega þangað til Ólafur Ragnar fékk því framgengt eftir mikið streð þegar hann fór á þing að fá að sverja við drengskap sinn, af því hann trúði ekki á biblíuna þá. 

En svo þegar fólk stendur upp og framfylgir þessari frumskyldu gagnvart þjóðinni, þá verða ráðamenn og vinir þeirra alveg brjálaðir.  Alls konar ásakanir um að fylgja ekki liðsheildinni, verði að gera upp hug sinn um hvort þeir eru í stjórn eða stjórnarandstöðu, þurfi að hugsa sinn gang og svo framvegis. (bullshit)

Ef þarna hefur ekki opinberast einmitt það sem Lilja og þau hin hafa verið að segja, þá veit ég ekki hvað.  Foringjaræðið og fordómarnir gagnvart sjálfstæðri hugsun.  Og hver man ekki eftir "Play with the team Dagnýju"?

Svo er reynt að segja upp í opið geðið á okkur að fullt samráð hafi verið haft við flokksmenn stjórnarflokkanna, þar stangast á orð Lilju og Árna Þórs, því hún sagði blákalt að hún hefði fyrst séð frumvarpið þegar það kom í þingið.  Og ég trúi Lilju langt umfram Árna Þór og hina sem hér hafa svo sannarlega birst í líki hýena en ekki villikatta. 

Ég hugsa líka að það sé erfiðara að smala hýenum en villiköttum, því þú veist að villikötturinn er óvinur þinn, en þú veist aldrei með hýenuna, því hún getur brosað til þín flírubrosi og stungið þig í bakið eftir á.   Dettur reyndar í hug orð Kára Stefáns á sínum tíma, hýenur og hælbítar. 

En það er líka gott að sannleikurinn blasir við þeim sem vilja sjá hann, gríman er fallinn og allur fagurgalinn og flírubrosin eru orðin að heiftargrettu og nýðingskap, svo nú standa forvígismenn okkar í pólitík naktir frammi fyrir okkur eins og keisarinn forðum.  Það er alltaf best að vita sannleikann hversu ljótur sem hann annars er.  Því þá er hægt að fara að breyta og laga.

Eitt það hallærislegasta og mestu mistökin voru ummæli formanns fjármálanefndar um að hún gæti ekki starfað með Ásmundi Daða, og ummæli Árna Þórs að hann liti svo á að þremenningarnir væru ekki lengur í Vinstri grænum.  Fólk sem talar svona þekkir ekki íslenska þjóðarsál. 

Ef þau þekktu sitt heimafólk betur, myndu þau sjá að meirihluti þjóðarinnar fylgir Lilju Mósesdóttur og villiköttunum í vinstri grænum að málum.  Við sjáum þarna örla í fyrsta skipti á heilbrigðri hugsun frá fólki frá fjórflokknum.  Hugarfari sem við höfum þráð lengi að upplifa.  Loksins lítið op inn í Nýtt Ísland. 

Ég vona að þessi ríkisstjórn fari frá sem fyrst.  'Eg vil sjá utanþingsstjórn í tvö ár í það minnsta, meðan stjórnmálin aðlaga sig að breyttum tímum. 

Kjósendur þurfa svo líka  að fara að hugsa sinn gang, og út fyrir rammann.  Ef við skoðum það sem Hreyfingin hefur verið að gera,  þar sem þau hafa staðið í lappirnar og sýnt okkur inn í heim vitfirringu á alþingi, sem er ekki lengur hægt að skrifa með stórum staf. 

Einnig þarf þjóðin að fara að skoða það sem Frjálslyndi flokkurinn stóð fyrir, og tillögur hans og meðferð á málum.  Sem voru allar í átt til betra lífs almennings, en var ekki hlustað á og allt reynt til að sverta og draga niður í svaðið. 

Til þess voru notaðir svokallaðir stjórnmálafræðingar sem eru eins langt frá að vera hlutlausir og hægt er.  Þessa rafta er ennþá verið endalaust að draga fram til að upphefja samfylkinguna sjálfstæðismenn og hluta vinstri grænna, hagræða sannleikanum ef þarf.  Segja hálfsannleikann og þegja yfir öðru. 

Þarna skortir mikið á hlutleysi fjölmiðla því miður virðast flestir fjölmiðlamenn fylgja herrunum á kostnað þjóðarinnar.   Ég hefði haldið að á þessum tímum hefði aldrei verið meiri þörf á því að draga sannleikann fram og sópa drullunni undan teppinu.  En ekkert slíkt gerist.  Alltaf sömu ráðgjafarnir sem allir vita í dag að segja það sem ráðamenn vilja heyra. 

Það er dæmigerður hræðsluáróður að þessi ríkisstjórn verði að vera áfram svo Sjálfstæðismenn og Framsókn komist ekki að.  Það þarf nefnilega ekki að vera þannig.  Við eigum nú þegar gott og heiðarlegt fólk sem við getum kosið inn á þingið.  Það eru þessir villikettir í Vinstri grænum, Hreyfingin og Frjálslyndi flokkurinn.  En fyrst og fremst þurfum við að koma á persónukosningum, til að hægt sé að henda slímsetufólkinu út af þingi.  Það gengur ekki lengur að sumir séu hreinlega áskrifendur að stólum alþingis vegna forgangsröðunnar stjórnmálaflokka. 

Þess vegna bind ég vonir við Stjórnlagaþingið og þeirra afstöðu til lýðræðisbreytinga. 

En bráðum koma blessuð jólin, og síðan nálgast nýtt ár.  Látum nýja árið verða árið sem við hreinsuðum til og komum sannleikanum, heiðarleikanum, virðingunni og kærleikanum í forgang. 

Með bestu kveðjum.

Athugasemdir

[Jóhann Elíasson, 22.12.2010 kl. 14:23]

Hjartanlega sammála hverju einasta orði.  Besta grein sem ég hef séð lengi.  Bestu kveðjur Vestur.

[Ásthildur Cesil Þórðardóttir, 22.12.2010 kl. 15:04]

Takk fyrir það Jóhann minn. 

[Sigurður Þorsteinsson, 22.12.2010 kl. 18:34]

Heil og sæl Ásthildur. Feiknarvel skrifuð grein. Get tekið undir flest allt, nema að ég er ekki viss um að Stjórnlagaþingið muni skila miklu.

Þið hafið á undanförnum árum sent okkur marga stórmerka stjórnmálamenn sem hafa komið mörgu góðu til leiðar. Menn eins og Einar Odd, Ólaf Ragnar, Jón Baldvin, Sigurvin Einarsson og marga aðra. Nú sendið þið okkur Ólínu Þorvarðardóttur sem nýlega var útnefnd hrokafyllsti þingmaðurinn. Hvað með að koma sjálf eða senda eitthvað af  af ykkar frábæra fólki. Nú þarf að vanda sig. 

Annars óska ég þér og fjölskyldu þinni góðra jóla og hátíðar, og vona að næsta ár verði þér gæfuríkt. 

[Ásthildur Cesil Þórðardóttir, 22.12.2010 kl. 19:24]

Þakka þér fyrir innlitið og góð orð Sigurður.  Ef ég hefði verið svona 20 árum yngri hefði ég örugglega tekið því að taka slaginn beint, en nú er ég orðin gömul og þróttlaus til að takast á við svona slag.  Ég ber mikla virðingu fyrir Ólínu hef reyndar fylgst með henni síðan hún var baldin unglingur, eða eins og sagt er oft verður gæðingur úr göldnum fola. 

Í þessu máli hefur hún látið afvegaleiða sig, vegna stöðugs hræðsluáróðurs fólks sem sér sína sæng útbreydda.

Við reyndum að senda ykkur frábært fólk eins og til dæmis Guðjón Arnar og Sigurjón Þórðar á þing, menn sem meintu það sem þeir sögðu, og voru tilbúnir bæði að bretta upp ermar og standa að réttlæti þjóðinni til handa í Frjálslynda flokknum, en því miður var fjórflokkurinn hræddur við það.  Því þeir gerðu sér grein fyrir því að ef okkar málflutningur kæmist í hámæli, myndu allt of margir sjá að stefna Frjálslynda flokksins var sú besta og ekki bara það, heldur var forystan þ.e. Guðjón Arnar og hans fólk tilbúið til að berjast fyrir þeim málefnum. 

Ég veit það mjög vel því ég sat lengi í Miðstjórn flokksins og er  formaður kjörnefndar Vestfjarðarkjördæmis.  Ef okkar rödd hefði heyrst meira, og við náð okkur á strik, værum þjóðin  ekki í svona vondum málum.  Því vissulega vöruðu okkar menn sterklega við því sem koma skyldi.  M.a. í fiskveiðistjórnunarkerfinu, en líka í málefnum aldraðra og öryrkja, og svo bænda, enda erum við með slíkt fólk inn í innstu röðum flokksins sem við treystum til að byggja um þau málefni sem þau þekkja best. 

Við munum sannarlega koma tvíefld til leiks í næstu kosningum, sem þó verða háðar maður á mann, því ekki er til fjármagn fyrir flokk sem ekki situr á alþingi. 

Ég óska þér og þinni fjölskyldu góðra jóla og gæfuríks árs.  Megi allir góðir vættir vaka yfir þér og þínum og takk fyrir innlitið. 

[Eyþór Örn Óskarsson, 23.12.2010 kl. 00:28]

Mikið var að einhver fór að skrifa eitthvað af viti - Flottur pistill Ásthildur og sendi kveðjur heim á Ísafjörð.............

[Helga Kristjánsdóttir, 23.12.2010 kl. 02:04]

Sæl Ásthildur mín!! Það var gott, að þú stilltir þig ekki. Horfði í gær á þátt Sigmundar Ernis, hjá INN. Gestir hans voru, Birkir Jónsson,Tryggvi Herberts, heiðursgestur var Steingrímur J. Þeir gæddu sér á hangikjöti sem framleiðslufyrirtæki skenkti þeim. Þar með sáum við þá matast,í bróðerni,en ekki hatast (eða svona allt að því stundum). Eftir létt skraf,var Steingrímur spurður um "óþekktina í Lilju", og honum bent á að fólk virði hana fyrir að breyta eftir  sannfæringu sinni,eins og kveðið er á um er hún gerist þingmaður.     Svar Steingríms minnti mig á hvernig hægt er að túlka gjörðir á ólíka vegu. Ekki man ég það orðrétt,en þar minnir hann á skyldu Lilju að samþykkja fjárlagafrumvarpið,þar sem hún væri meðlimur stjórnmálaflokks,sem hefði gert málefnasamning við Samfó. Gott ef að lá ekki í orðunum að hún skaðaði þjóðina með þessu háttalagi.    Ásthildur! Ég kem bara ekki orðum að þessu almennilega,það verður endursýnt,þá ætla ég að taka vel eftir þessu.mér er ekki að skapi að halla réttu máli.----- Þorláksmessa á morgun,alltaf er nóg að gera þótt börnin létti af mér skyldunum. Óska þér og þínum gleðilegra jóla! Gaman að lesa ljóðið í seinustu færslu. 

[Gunnar Th. Gunnarsson, 23.12.2010 kl. 02:48]

Sigmundur Ernir sagði í þættinum sem Helga vitnar í "Svartar tungur", þegar þremenningarnir í VG bárust í tal:

"þetta sprikl þeirra væri á kostnað okkar hinna í ríkisstjórninni".

Finnst ykkur þessi ummæli ekki makalaus? Er hægt að vinna með fólki sem tekur svona afstöðu til sjálfstæðra skoðana. Auk þess eru skoðanir ekki gagnrýndar, heldur hún sjálf.

kv. að austan

[Sigurður Hjaltested (IP-tala skráð) 23.12.2010 kl. 10:43]

Gaman að lesa greinar eftir fólk sem talar  Íslensku en ekki "pólitísku" Það þarf meira af svona fólki sem talar um hlutina eins og þeir eru og hætti þessum endalausa leikriti "nýju fötin keisarans" því við erum öll búin að fá mikið meira en nóg af því og því miður ætlar þetta fólk á alþingi ekki að skilja það að þjóðin vill Nýtt Ísland. Hér verður aldrei nein breyting fyrr en við fáum að kjósa fólk en ekki flokka, því flokkakerfið er aðalástæðan fyrir því hvernig komið er fyrir okkar þjóð.

Hafðu það sem allra best um jólin.

Kveðja.

[Ásthildur Cesil Þórðardóttir, 23.12.2010 kl. 11:55]

Takk öll fyrir innlegginn og hlý orð. Já ég þarf að hlusta á þennan þátt á ÍNN, fer reyndar sjaldan þangað inn, því þar er blái áróðurinn svo sannarlega á fullu. 

Ég segi það líka við verðum að fara að breyta okkur sjálfum og fara að hugsa meira sjálfstætt.  Það er nefnilega líka okkur sjálfum að kenna hvernig spillingin hefur fengið að grassera án þess að við lyftum litla fingri til að verjast henni.  Það gerum við einfaldlega með því að krossa alltaf við sama flokkinn aftur og aftur, án tillits til hvernig það fólk hefur hagað sér á kjörtímabilinu.  Pólitíkusarnir vita ósköp vel að þeir eru nánast áskrifendur að atkvæðum okkar.  Það eina sem þeir þurfa að gera er að koma sér í nógu þægilegt sæti ofarlega á listanum sínum, og þá eru þeir pottþéttir að komast að.  Það útskýrir líka fjárfúlgurnar sem þeir krafla sér inn í prófkjörum. 

Ef við til dæmis myndum nú ákveða að refsa stjórnarflokkum með því að kjósa einhverja aðra, myndu þeir hugsa sinn gang alvarlega, næst þegar þá langar til að svíkja kosningaloforðin.  Núna til dæmis ættu hvorki Samfylking né Vinstri Grænir að fá nein atkvæði nema þeirra sjálfra sem eru á listunum.  Það myndi svíða og þeir myndu hugsa sig um næst.

Þess vegna er það á okkar ábyrgð og heimóttargang að svona er komið fyrir okkur.  

Ef við virkilega viljum Nýtt Ísland verðum við að byrja á okkur sjálfum, ráðamenn hvaða nafni sem þeir nefnast munu ekki vilja breyta neinu, þetta er besta fyrirkomulagið að þeirra mati.  Það er nefnilega best að vera áskrifandi að atkvæðinu sínu. 

Og gleðileg jól og farsælt nýtt ár til ykkar allra. 

[Ásthildur Cesil Þórðardóttir, 23.12.2010 kl. 11:57]

Það er nefnilega þannig að við eigum val fyrir utan fjórflokkinn, þar eru Hreyfingin og Frjálslyndi flokkurinn til dæmis.  Það væri ágætis byrjun við að taka á spillingunni að veita þessum tveimur flokkum gott brautargengi í næstu kosningum.

[Gunnar Th. Gunnarsson, 23.12.2010 kl. 14:41]

Ásthildur, þú segir: "Já ég þarf að hlusta á þennan þátt á ÍNN, fer reyndar sjaldan þangað inn, því þar er blái áróðurinn svo sannarlega á fullu."

Þetta er vandamálið með ykkur vinstrimenn í hnotskurn. Það er ekki sama hver segir ykkur hlutina, jafnvel þó það sé bara verið að segja ykkur að 2+2 séu 4.

[Ásthildur Cesil Þórðardóttir, 23.12.2010 kl. 17:09]

Ég lít ekki á mig sem vinstri manneskju Gunnar, kaus Sjálfstæðisflokkinn í mörg ár, er alin upp á sjálfstæðisheimil, þar sem ég drakk með móðurmjólkinni að kommúnistar væri það versta af öllu illu.  Þeir hefði komið sér fyrir á Rúv og allstaðar þar sem þeir gætu komið áróðri sínum á framfæri.  Að Ragnar Arnalds væri Lúsifer holdiklæddur.

Þess vegna er ekki hægt að kalla mig vinstri mann.  Hins vegar lít ég svo á að allt þetta tal um hægri og vinstri sé rugl.   Við þurfum að fara að hugsa út fyrir þennan hægri vinstri ramma. Ég tel mig fyrst og fremst vera jafnréttis manneskju. Ég vil jöfnuð og jafnræði meðal manna, en líka að hver fái að njóta þess sem hann hefur, því vissulega erum við misjöfn og sumir eru færari en aðrir að skapa störf og fyrirtæki, sem svo nýtast þeim sem vilja bara vinna og fá sín laun.  

Hvorugum á að refsa, heldur hlú að því sem best er fyrir hvern og einn.  Og virða það sem fólk velur sér. 

Hins vegar er klíkuskapur og ráðningar af slíku tagi andstyggilegt og til þess fallið að drepa niður heilbrigða samkeppni og að sá besti vinni.  Það er því til þess fallið að gauka þeim til vegs og virðingar sem ekker hafa til þess unnið, hvorki með andlegum þroska né hæfni.

Það er langur vegur frá kommúnisma þar sem reynt er að gera alla jafna, það er einfaldlega ekki hægt. Því sumir vilja einfaldlega ekki hafa þá ábyrgð sem til þess þarf.   Meðan aðrir vilja leggja það á sig að stofna fyrir tæki og veita öðrum vinnu. Þarna þarf að dansa línuna með þarfir ólíkra manna að leiðarljósi.  

Hvorugan má drepa niður, og öfgarnar á báða vegu eru stórhættulegar. 

Þess vegna er best að dansa á línunni og fara hvorki til hægri né vinstri. 

[Gunnar Th. Gunnarsson, 23.12.2010 kl. 18:18]

Ekki veit ég hvers vegna mörgum vinstrimönnum er svo umhugað um að vilja ekki lengur tala um "vinstri/hægri" skilgreininguna í stjórnmálum. Kannski er það vegna þess að forystumönnum þeirra hefur tekist að koma slíku óorði á vinstrimennskuna, að þeir vilja ekki heyra á hana minnst.

En þessi skilgreining á fullan rétt á sér. Hún er til hægðarauka til að aðgreina augljósan mun á stjórnmálastefnum og hugmyndafræði, t.d. Sjálfstæðisflokksins og stjórnarflokkanna.

Vinstrimenn geta klætt hugmyndafræði sína í einhver önnur fínni orð ef þeim hugnast svo.

[Ásthildur Cesil Þórðardóttir, 23.12.2010 kl. 20:35]

Já það getur alveg rétt verið Gunnar minn.  En samkvæmt minni skilgreiningu þá er ég hvorki Vinstri né Hægri, heldur þarna mitt á milli.  Tek sem sagt það besta úr báðum.

[Gunnar Th. Gunnarsson, 23.12.2010 kl. 21:13]

Ég held að 90% þjóðarinnar hugsi reyndar þannig, sem er gott í sjálfu sér. Öfgamenn til hægri eða vinstri eru ekki samnefnari íslensku þjóðarsálarinnar.

[Gunnar Th. Gunnarsson, 23.12.2010 kl. 21:18]

En ástandið á Íslandi eftir bankahrunið hefur verið þannig að jarðvegur fyrir öfgasjónarmið til "vinstri" hafa fengið hljómgrunn vegna reiði í þjóðfélaginu. VG er öfgaflokkur sem reynt hefur að klæða hugmyndir sínar í fagra búninga.

Samfylkingin er hins vegar óreiðuflokkur... tækifærissinnar og ESB sinnar, sem vilja reyra okkur föst í reglugerðir Evrópusambandsins.

[Gunnar Th. Gunnarsson, 23.12.2010 kl. 21:20]

Kæmi mér ekki á óvart ef sama pólitíska þróunin verði á Írlandi á næstunni.

[Ásthildur Cesil Þórðardóttir, 23.12.2010 kl. 22:10]

Ég er sammála því að Samfylkingin er ósamstæður flokkur athyglissjúkra einstaklinga með engan metnað, og já þeir vilja koma okkur inn í ESB hvað sem það kostar.  Sennilega að mínu mati hefur forystumönnum þeirra verið mútað með góðri stöðu innan ESB, ég veit að margir fulltrúar ESB eru í Luxemburg þar sem þeir hafa það ansi gott með einkabílstjóra, í villum og börnin í einkaskólum.  Þetta heillar auðvitað. Þetta er einmitt ESB í hnotskurn.

Vinstri grænir hélt ég að væru meiri menn en þetta.  En því miður hefur Steingrímur J. sýnt að hann er ekki hótinu betri en Samfylkingin og þess vegna skil ég mjög vel órólegu deildina innan VG, sem reyna að spyrna á móti þessari þróun.  Vonandi fá þeir yfirráði í þessum flokki, eða hann klofnar sem er ef til vill hið besta mál. 

[Jóna Kolbrún Garðarsdóttir, 24.12.2010 kl. 01:46]

Ég óska þér gleðilegra jóla og farsæls komandi árs, og takk fyrir síðasta ár...

[Ásthildur Cesil Þórðardóttir, 24.12.2010 kl. 12:49]

Takk sömuleiðir Jóna Kolbrún mín með innilegri ósk um hátíðleg og góð jól.