Smá hugleiðing. Hver er munur á kúk og skít?

Þegar ég var lítil var mikill hræðsluáróður á heimilinu mínu um vondu kommúnistana.  Afi minn var heitur sjálfstæðismaður, enda var flokkurinn þá byggður upp á annan hátt en í dag með Matthías Bjarnason og fleiri góða menn í forsvari.  Afi sagði að vondu kommúnistarnir kæmu sínu fólki allstaðar að, og helst í fjölmiðlum til dæmis ríkisútvarpinu, þar sem þeir gætu haft sinn áróður í frammi. 

Svo liðu árin og ég smátt og smátt þroskaðist og sá að þetta var nú eitthvað málum blandið.  Fór að leita sjálf að þeim flokkum sem ég gat hugsað mér að styðja.  M.a. með því að setja inn spurningalista á kosningaskrifstofurnar með þeim áherslumálum sem ég hafði.  Sumir reyndu ekki einu sinni að svara, aðrir fabúleruðu eitthvað út í loftið og lofuðu öllu fögru.  Endaði svo með því að finna Frjálslynda flokkinn sem ég gat samsamað mig við, og fann að þar var fólk eins og ég sem virkilega vildi vinna að þjóðþrifamálum, svo sem eins og breytingum á kvótakerfinu og bætta aðstöðu aldraðra og öryrkja og mörg önnur góð markmið sem voru vel útfærð og vel unninn.

 

En ég ætlaði ekki að tala um flokkadrætti á Íslandi.   Eitt af því sem okkur sem krökkum var innprentað bæði í ræðu og riti og hjá afa var að bandaríkjamenn voru frelsishetjur, arabar voru hryðjuverkamenn, kínverjar alræðisríki sem píndi þegna sína til hlýðni við stjórnvöld.

Þessa heimsmynd lagði ég af stað með út í heiminn.  Smátt og smátt hefur þessi mynd máðst og sullast saman.  Til dæmis horfi ég upp á ráðamenn í Ísrael murka út líf og heimili Palestínumanna meðan Vesturveldin líta undan. 

Svo eru það kínverjar sem eru brjálaðir yfir því að kínverskur professor hefur verið valinn til að taka við friðarverðlaunum Nóbels.  Hann er kallaður hryðjuverkamaður og Kínverjar hóta þjóðum sem vilja vera viðstödd atburðin, þau eru líka ævarreið Norðmönnum fyrir tiltækið.  Vestrænum þjóðum finnst þetta forkastanlegt, og fólkinu þar vinnst þetta svívirðileg árás, og sérstaklega að þessum ágæta kínverja var varpað í fangelsi, konan hans í stofufangelsi, sem stórhættulegu fólki fyrir alræðisstjórnina í Kína.  Borgarstjórinn í Reykjavík bað kínverska sendiherrann að láta manninn lausan við litla hrifningu Kínverja. 

En nú ber svo við að maður nokkur ástrali, stendur fyrir því að upplýsa um vansæmandi vinnubrögð lýðræðisríkisins og góðu kananna.  Hver eru viðbrögðin ?  Jú sá maður er komin í fangelsi, fyrir einhverjar skrýtnar sakir, fyrir að nota smokk ekki á réttan hátt, hvernig sem það er nú hægt.  Það liggur ekki fyrir nein ákæra á hendur honum, samt er hann eftirlýstur af interpol og þegar hann gefur sig fram við lögreglu er hann umsvifalaust handtekinn og settur í fangelsi í Bretlandi.  Það á að framselja hann til Svíþjóðar, hvernig sem það má vera þegar engar ákærur liggja fyrir.  Og BNA gí yfir honum til að fá hann til sín.

Maðurinn hefur ekki brotið nein lög, og öfugt við Kína á að ríkja málfrelsi og upplýsingafrelsi í því sem við höfum hingað til kallað lýðræðisríki.  Ekki bara að maður sé hnepptur í fangelsi eins og hver annar stórhættulegur kínverji, heldur loka á hann bæði Visa, Eurocard, Amazon og ég veit ekki hvað.  Reyndar hef ég ekki heyrt borgarstjórann okkar biðja um að hann verði látinn laus. 

Heyrst hefur að það sé hægt að styrkja Alquaida, og eiturlyfjabaróna meira að segja mafíósa með kreditkortum, en ekki þá starfssemi sem þessi maður hefur byggt upp, sem er að upplýsa almenning í heiminum um framferði ráðamanna heimsins, sem á að liggja í þagnargildi svo þeir geti farið sínu fram. 

Það fer satt að segja um mig hrollur við þetta framferði ekki bara Bandaríkjamanna, sem ég hef fyrir löngu séð að eru heimsins mestu illmenni, samanber Quantanamo fangelsið illræmda á Kúpu, heldur hvernig þeir hafa att saman þjóðarbrotum til að komast yfir náttúruauðlindir, og ekki má gleyma innrásinni í Írak.

'Eg vissi allan tíman að kínverjar væru villidýr sem ber að varast, en að valsa um í sauðagæru og þykjast vera góðu gæjarnir, þegar þeir eru ekki hótinu betri, er eitthvað sem er ekki hægt að sætta sig við. 

Ég er farin að hugsa sem svo að nú þurfi eitt syndaflóðið í viðbót.  Það þarf að hreinsa út, þó við hin verðum látin fjúka líka, þá er komin tími á að þessi svokallaði Guð helli yfir okkur svo sem einu flóði eða svo.  Það gæti vel verið að það væri hægt að smíða svo stóra örk að allir kæmust þar fyrir sem eru ekki svona spilltir og vondir, og svo þarf að vera pláss fyrir öll dýrin og plönturnar, því ekkert hafa þau gert af sér.  Það mætti þess vegna vera geimskip, við erum allavega með eina geimveru í Reykjavík sem gæti haft samand við sitt fólk, og svo með geimverusérfræðing sem hefur líka örugglega góð sambönd þarna einhversstaðar uppi, við gætum svo fengið gistingu meðan hinn elskulegi réttláti og dásamlegi Guð eyðir hinum óæskilegu.

Það er bara einn galli á gjöf Njarðar, það væri nefnilega alls ekki víst að við þessi hjartahreinu fengjum far með geimÖrkinni.  Það yrðu sennilega glæpamennirnir, auðvaldspakkið og ráðamennirnir sem fengu að fljóta með, en við hin yrðum eftir. 

En  ef svo færi, þá erum við hvort sem er laus við þetta illþýði og þá þyrfti ekkert syndaflóð og engar ráðstafanir, þá getum við bara byrjað upp á nýtt,  með spillingu, valdagræðgi ráðríki og stríð.  Því þegar upp er staðið þá býr þetta sennilega meira og minna í okkur öllum.  

Þess vegna er sennilega best að reyna að fá fólk til að vakna og hugsa öðruvísi.  Leggja meiri áherslu á að rækta sinn innri mann, elska náungan meira og hlú að fjölskyldu og vinum.  

Með kveðju Ásthildur.

Athugasemdir

[Jóhann Elíasson, 9.12.2010 kl. 11:51]

Góð grein.  Víst er að "réttlætiskennd" margra er misboðið þessa dagana, menn sem er vitað að brutu af sér og stálu milljörðum ganga lausir, nú síðast var okkur sagt frá mjög GRÓFUMbókhaldsbrotum bankanna til margra ára til þess að breiða yfir raunverulega stöðu sína, sem þeir komust upp með hjálp endurskoðenda og í því hefur ekkert verið gert.  En það var ekki lengi gert að handtaka þá sem fóru í Leonard í Kringlunni og náðu sér í nokkur úr (reyndar voru þessi úr í dýrari kantinum enda er Leonard þekkt að öðru en að vera einhver lágvöruverslun).  En hvað sem því líður þá er ekki sama hvers eðlis þjófnaðurinn er.

[Jóhann Elíasson, 9.12.2010 kl. 11:57]

"Lágvöruverðsverslun", átti þetta að vera.  Fyrirgefðu fljótfærnina.

[Ásthildur Cesil Þórðardóttir, 9.12.2010 kl. 12:23]

Já það ég var líka að heyra af því að lögreglan kom inn á vinnustað ungs manns til að handtaka hann og færa í fangelsi fyrir að hafa ekki greitt gjaldfallna hraðaakstursskuld, hann taldi sig hafa samið um skuldina en það var ekki hlustað, hann var færður beint í fangelsi fyrir einhvera þúsundkalla.  Er von nema manni blöskri??

[Kidda, 9.12.2010 kl. 12:38]

Og á meðan þessi ákveðni ungi maður situr inni halda áfram að fyrnast dómar yfir þeim sem hafa framið refsiverða glæpi. Ríkið mun í rauninni þurfa að borga með þessarri skuld vegna þess að skuldin fellur niður og ríkið þarf að sjá honum fyrir húsnæði og mat á meðan en fær ekkert upp í skuldina. Þeir hefðu fengið meira í ríkiskassann með því að leyfa honum að stunda sína vinnu í friði og fá staðgreðsluna í staðinn. Ónei, frekar er þúsundkallinum hent en krónan hirt.

[Ásthildur Cesil Þórðardóttir, 9.12.2010 kl. 12:44]

Einmitt og hver er tilgangurinn??????

[Kidda, 9.12.2010 kl. 14:35]

Það væri gaman að sjá hver hagnaðurinn er af svona fáranlegri reiknikúnst. Ekkert skrýtið að það sé allt að verða vitlaust yfir niðurskurði ef sami reiknimeistari sér um að reikna út hvað sé ódýrara fyrir ríkið og hvað ekki. Ég vildi ekki að sá reiknimeistari sæji um mín fjálmál.