Sælla að gefa en þiggja og tilraun með að grilla pizzu.

Ég finn það á eigin skrokki eða sál að sælla er að gefa en þiggja.  Það er svo notalegt þegar fólk kemur og fær grænmeti eða ber og er þakklátt. 

Strákana mína langaði í pizzu í gær, og það voru góð ráð dýr, því ofninn minn er bilaður.  Við ræddum saman og sættumst á að ég byggi til pizzurnar en þeir sæu um að elda þær.  Það átti að prófa að grilla.

Og það var hafist handa.

Búin til þessi líka fína pizza með skinku ogpepperoni og önnur með túnfisk.

Það þurfti svo allskonar tilfæringar til að hún bakaðist jafnt á grillinu.  En það tókst bara ljómandi vel. Svo það er hægt að grilla pizzur. 

Ég er svakalega hrædd um að hann Brandur minn sé dáinn. Hann hefur ekki komið heim núna í tvær vikur. ég hugsa svo mikið til hans, hvar hann geti verið og hvort hann sé dáinn.  Hann var einn af fjölskyldunni.

Ef einhver hefur séð þessa elsku, vil ég endilega fá að vita af því. 

Elsku vinurinn ljúfi.

Músaveiðari góður líka.

Ef þú ert á lífi elsku Brandur komdu þá heim sem fyrst.

En eigið góðan dag. 

Ég ætla ekki að ergja mig á því að skrifa um pólitík, hún er orðin svo sóðaleg að manni verður flökurt af óheiðarleikanum, hrokanum og skilningsleysi þeirra sem hafa boðist til að gæta hagsmuna okkar, en gera ekkert annað en að hugsa um sitt eigið rassgat.  Sorglegt en satt.

Smáviðbót, mæli með að þið styðjið þessa konu til stjórnlagaþings.

http://www.facebook.com/?ref=hp#!/group.php?gid=153312264697152

Eins og sést er kertatíminn kominn í Kúlunni. 

Athugasemdir

[Hrönn Sigurðardóttir, 19.9.2010 kl. 13:04]

Vonandi finnst Brandur heill á húfi. Það er slæmt að vita ekki afdrif dýranna sinna.

Grilluð pizza hljómar vel. - Eru þær ekki eldbakaðar líka í borg óttans?

[Ragna Birgisdóttir (IP-tala skráð) 19.9.2010 kl. 13:18]

Það eru til sérstakir bakkar fyrir Pizzur til að grilla á.Algjör snilld:)

[Jóhann Elíasson, 19.9.2010 kl. 13:57]

Er Brandur týndur????  Ég held ég leggist bara í þunglyndi, í guðanna bænum segðu mér ÞEGAR hann skilar sér aftur.....

[Guðrún Emilía Guðnadóttir, 19.9.2010 kl. 15:03]

Vonandi skilar Brandur sér, já það er hægt að grilla meir en maður heldur.

Knús í Kúlu

[Ásthildur Cesil Þórðardóttir, 19.9.2010 kl. 15:46]

Jamm Hrönn grilluð pizza er algjört sælgæti nammi.

Ragna ertu að segja satt? hvar ætli ég fái svoleiðis?

Takk Jóhann minn og þið öll fyrir hluttekninguna.  Ég lofa að láta ykkur vita um leið og ég frétti af honum, eða hann kemur röltandi inn úr dyrunum eins og ekkert sé.

Knús á þig líka Milla mín.

[Hrönn Sigurðardóttir, 19.9.2010 kl. 17:21]

Ég hef heyrt að svona pönnur fáist í Byko...

[Dísa (IP-tala skráð) 19.9.2010 kl. 17:49]

Á ekki bágt með að trúa að grilluð pizza sé góð. Vona að fréttist sem fyrst af Brandi, ekkert er verra en að vita ekki

[Ásthildur Cesil Þórðardóttir, 19.9.2010 kl. 18:05]

Ókey Hrönn mín Byko, hér er útibú þaðan, best að fara og spyrja. 

Dísa mín ég vona það, því ég er satt að segja orðin svolítið uppgefin á dauðsföllum í fjölskyldunni.

[runar (IP-tala skráð) 19.9.2010 kl. 21:51]

Farðu bara í Byko og keyptu þér pizzustein, fullkomin snilld, ég elda aldrei pizzu öðruvísi en að grilla hana.

[Kidda, 20.9.2010 kl. 09:07]

Vonandi skilar Brandur sér heim sem fyrst, hann hefur örugglega farið í smáútilegu að skoða í hvaða átt mýsnar gera holurnar sínar og hvar þær eru.

Knús í kærleikskúluna (hjarta)

[Ásthildur Cesil Þórðardóttir, 20.9.2010 kl. 11:30]

Takk Rúnar, ætla að skoða það og bakkana.  Meðan ofnin er bilaður er ágætt að grilla, vandamálið hefur verið pizzurnar, en nú er fundinn lausn á því takk fyrir mig.

Kidda mín já ég vona það.  Ég er einhvernveginn ekki í rónni fyrr en hann skilar sér heim.

Getur verið að broskallarnir séu á bak við eitthvað skjal hjá þér? það gerst stundum hjá mér og þá get ég ekki sent broskalla fyrr en ég laga það.  knús.

[Ingibjörg Kristrún Einarsdóttir, 20.9.2010 kl. 15:18]

Ég er ein af þeim sem les alltaf bloggið þitt. Því miður erum við ekkert skyldar, búin að ath. Íslendingabók. Enn hvað ég hef fylgst með litlu hvítu kisunni og séð hana vaxa og dafna og Brandi líka. Ég er líka dýravinur og er að vestan, reyndar bara úr Dölunum.

[Ásthildur Cesil Þórðardóttir, 21.9.2010 kl. 10:49]

Takk fyrir Ingibjörg mín.  vertu velkomin hingað inn.   Takk fyrir að láta vita af þér.