Heimaræktað grænmeti handa ykkur elskurnar.

Kæru ísfirðingar og nágrannar, ef veðrið verður eins gott á morgun og það var í dag, vil ég bjóða ykkur að koma og fá ykkur grænmeti upp í gróðrarstöð.  Það er aðallega grænkál, en líka hvítkál, broccoli og fleira, jafnvel kartöflur.  Ég setti niður afgangin af grænmetinu í sumar, og þetta hefur dafnað ágætlega, en er allt of mikið fyrir mig eina.  Svo ég býð ykkur að kíkja við eftir hádegi, svona eftir kl. 13.30.  Og næla ykkur í heilbrigt heimaræktað grænmeti og jafnvel krydd.  Ég sé ekki fram á að geta nýtt mér þetta allt sjálf, svo ég vil endilega að þið fáið að njóta þess með mér.  Einnig er hægt að fá að týna bæði rifs og sólber.  Þið verðið samt að hafa með ykkur ílát, því ég á ekkert slíkt.

Þetta bíður eftir að vera tekið upp og borðað. 

Gjörið svo vel.

Athugasemdir

[Jóhann Elíasson, 15.9.2010 kl. 23:40]

Ég fæ nú bara vatn í munninn þegar ég hugsa um sólberin.  Þegar ég bjó í Noregi var drukkið alveg svakalega mikið af sólberjasafa og sólberjasulta var í hávegum höfð annars fannst mér ekkert komast í hálfkvist við tyttuberjasultuna.  Ég vil óska Ísfirðingum og nærsveitungum til hamingju með að eiga þig að.  Þið Elli eigið örugglega stórt pláss í hjarta margra.  

[Ásthildur Cesil Þórðardóttir, 15.9.2010 kl. 23:46]

Takk Jóhann minn. Já sólberin eru hreint sælgæti, og svo bragðgóð núna.

[Jóna Kolbrún Garðarsdóttir, 16.9.2010 kl. 01:40]

Ég man ennþá þegar ég byrjaði að borða sólber, þá var ég mjög lítil og bjó á Urðarstíg 14.  Á Urðarstíg 10 voru risastórir sólberjarunnar, og uxu þeir yfir girðinguna og út á gangstéttina.  Þar lærði ég að borða sólber, og þykja mér þau jafn góð í dag. 

[Guðrún Emilía Guðnadóttir, 16.9.2010 kl. 09:22]

Þú ert yndisleg dúllan mín, vildi að ég gæti komið til þín
Knús í Kúlu

[Kidda, 16.9.2010 kl. 11:05]

Þið eruð höfðingjar bæði tvö.

Knús í grænmetis og berjakúluna (hjarta)

[Laufey B Waage, 17.9.2010 kl. 09:00]

Þú ert æði. Vá hvað ég vildi vera í hæfilegri nálægð núna. Er eitthvað eftir handa Bjarkanum mínum? Má ég segja honum frá þessu?

[Ásthildur Cesil Þórðardóttir, 17.9.2010 kl. 10:22]

Endilega Laufey mín.  Ég vil að sem flestir fái að ná sér í, hér er líka persilla, bæði gróf og fín og fleiri kryddplöntur.  Þetta fer bara undir veturinn, því ég ræð ekki við að vinna þetta hef svo mikið að gera.