Góða veðrið á Ísafirði og smá hugleiðing.

Hér á Ísafirði hefur verið sól og blíða alla vikuna, hitinn um og yfir 20 °.  Ekki hefur verið sérstaklega bent á þetta í fjölmiðlum, enda er veðrið á Vestfjörðum best geymda leyndarmál okkar landsmanna, og eigum við þó mörg slík, sérstaklega í pólitíkinni.

Í gærmorgun var svona mistur yfir bænum okkar, algjör þögn og kyrrð.

Skúturnar á pollinum hreyfðust ekki.

Einn af þessum fallegu morgnum, sem hafa verið lygnir í allt sumar, en meira þó um sólskinið.

Eftir hádegið reif svo sólin burtu mistrið og skein eins og venjulega í sumar, og það gerir hún líka í dag.

Svona s

máhugleiðing.

 

Það hyllir undir einhverskonar uppgjör á æðstu stöðum, og margt bendir til að nokkurs titrings gæti í röðum þeirra framá manna áttu að vera á verði í hruninu.  Sérstaklega hjá þeim sem hafa staðið til hliðar, en eiga þó sína sök, með því að þegja og leyfa öllu að fara fram, án þess að lyfta litla fingri.

 

Ég er viss um að engan grunaði að fallið yrði svona hátt, og þetta yrði svona svakalegt, en samt,  fólkið sem almenningur kaus til að fara með sín mál, treysti þeim fyrir velferð sinni, brást.  Og ekki bara þeir sem stóðu á verðinum meðan allt fór til andskotans, heldur líka þeir sem tóku svo við og þóttust ætla að bjarga okkur, mynda skjaldborg og velferðarbrú.

 

Ég var að lesa þessi ummæli frá 1997 eftir Jóhönnu Sigurðardóttur sem hljóðar svo;

 

Þann 1. janúar 1997 sagði núverandi forsætisráðherra Jóhanna Sigurðardóttir að fátækt á Íslandi væri þjóðarskömm.

 

Hún sagði einnig orðrétt: "Það er vissulega mjög alvarlegt ef sá maður sem öðrum fremur hefur fjöregg þjóðarinnar í hendi sér, sjálfur forsætisráðherrann neitar að horfast í augu við þá staðreynd að tugir þúsunda heimila í landinu búa við kjör nálægt sultarmörkum. Þetta er smánarblettur á þjóðinni," segir á vef Verkalýðsfélags Akraness.

 

Nú situr þessi sama kona sem forsætisráðherra og horfist ekki í augu við þjóðina sína, heldur fer undan í flæmingi.  Það þarf að bjarga bönkunum og auðmönnunum, meðan almenningi blæðir út. 

 

Jóhanna er ekki ein um svona hugsunarhátt og framkomu, því miður er þetta viðtekin venja þeirra sem komast að völdum.  Þess vegna er  öllu tjaldað til að komast til valda.  Ekkert prinsipp er svo heilagt að ekki megi býtta því út fyrir valdastól.   Það sést til dæmis vel á Steingrími J. Sigfússyni, ef menn nenna að fletta upp því sem hann sagði fyrir kosningar og svo eftir á.  Engan AGS, ekkert Icesave,  ekki ESB.  Það versta var að fólk hlustaði á hann og treysti því að hann væri að meina það sem hann sagði.

 

Þarna úti bíða  aðrir forystumenn annara flokka sem vilja komast að.  Þeir munu gera allt og lofa öllu til að fá athygli fólks og trúnað.

 

Málið er að loksins er almenningur að vakna upp við þann ljóta draum, að þjóðin var aldrei neinn hluti af þessu plani.  Við vorum bara nytsamir sakleysingjar sem þeir þurfa á að halda til að borga eyðsluna.  Og sífellt fækkar í hópnum.  Sífellt fleiri flytja erlendis til að komast í burtu frá spillingu og óheiðarleika, feluleikjum og lygum.  Aðrir hafa misst allt og verða að vera upp á náð og miskunn velferðarkerfisins, þar sem skammtað er naumlega úr hnefa.  Svona á meðan útrásarliðið lifir í vellystingum praktuglega og skortir ekki neitt.  Þeir eru heldur ekki bornir út úr villum sínum, nei þeir fá stöðugleikasamninga, afskriftir og meiri lán.

Svo er verið að krefja menn um að sýna Alþingi virðingu.  Virðing kemur ekki með valdboði, heldur ekki með peningum eða mútum.  Virðing verður einungis fenginn með eigin framkomu og heiðarlegum vinnubrögðum.

 

Nú er svo komið að þó ráðamenn séu jafnvel að reyna að gera eitthvað rétt, þá treystir þeim enginn lengur.   Þið ágætu alþingismenn og embættismenn eruð búin að missa bæði traustið og trúnaðinn.  Það verður erfitt að vinna það upp aftur.  Ekki er það heldur gæfulegt þegar kúlulánaþegar sem hafa fengið allt sitt niðurfellt, og söfnunarpésar sem neita að gefa upp í hvað peningarnir fóru og hver styrkti, ætla sér að sitja áfram á Alþingi eins og ekkert sé.

 

Þið getið auðvitað setið þar í krafti laganna og flokksins.  En það megið þið vita að virðingu almennings hafið þið varla.  Ekki vildi ég vera í þeim sporum, þó allt gull heimsins væri í boði.   Sjálfsvirðingin og mannorðið er með því helgasta sem maður á fyrir utan ástvinina.  Þið getið varla haft hvorugt ef þið eruð á annað borð með samvisku.

Mér virðist vera farið að skorta mikið á þolinmæði og jafnvægi þeirra sem sitja þingið.  Mér sýnist álagið og allur leikaraskapurinn vera að sliga samvisku manna þar.  Enda ekki skrýtið, því þið hljótið að finna fyrir vantrausti og vanþóknun almennings á verkum ykkar.   Þið ættuð að fara meðal almennings og hlusta á hvað fólkið á götunni er að segja um sína hagi, en ekki treysta bara á sérfræðinga sem hafa sína visku upp úr skýrslum og bókum, en ekki frá fólkinu sem verið er að fjalla um. 

 

Ef til vill þurfum við þennan skell til að sjá að ráðamenn eru engar heilagar kýr, heldur fólk sem boðist hefur til að vinna fyrir okkur.  Og að það er okkar að veita þeim aðhald og refsa þeim þegar þeir standa sig ekki, en ekki bara bugta okkur og beygja eins og almúgamenn fyrr á árum, sem voru leiguliðar og þrælar höfðingjanna, við erum á góðri leið í það sama far aftur ef við gætum okkar ekki. 

 

Málið er að gjáin milli stjórnmálamanna og almennings er orðin svo breið að það heyrist ekki á milli.  Ég hugsa að þar kæmi velferðarbrúin sér vel, og þá ætti að vera hægt að byggja skjaldborgina og gleyma um stund bönkunum og þeim sem þar sitja og deila og drottna, ríki í ríkinu og handvelja þá sem settir verða á og hverjir verða settir í sláturhúsið.  Og mér skilst að þar sé ekkert eftirlit.  Getur það virkilega átt sér stað?  

 

Hver lætur sér detta í hug að ráða bankaræningja til að sitja og skipta ránsfengnum milli manna?

En þetta er nóg í bili.  Við getum lokað augunum fyrir neyð annara, við getum jafnvel öfundað aðra og hneykslast á fólki, en ef við sjálf erum ekki heil á sálinni og gerum okkar besta af heiðarleika þá líður okkur einfaldlega ekki vel.  Og hvort skyldi nú vera betra upp á framtíðina, gróði eða gæfa.  Þetta fer nefnilega aldrei saman.  Eigið góða helgi.

  Má svo ekki bjóða ykkur ávexti svona í lokin.

Vínber?

Eða perur?

Athugasemdir

[Dísa (IP-tala skráð) 10.9.2010 kl. 20:02]

Jú takk, eina peru og nokkur vínber. Lognmyndirnar æðislegar.

[Hrönn Sigurðardóttir, 10.9.2010 kl. 20:56]

Mundirðu trúa því ef ég segði þér að ég hef aldrei komið til Vestfjarða?

[Bára (IP-tala skráð) 10.9.2010 kl. 22:23]

flottar myndir mamma, Til hamingju með afmælið! Klukkan hjá okkur er orðin 00:18 svo það er komin afmælisdagur :)

[Auður Matthíasdóttir, 10.9.2010 kl. 22:37]

Góður pistill.  Og ég tek undir með þér að það er svo sannarlega undirstrikað að ekki er sama Jón/Jóhannes kenndur við Bónus og  hinn almenni borgari sem berst við gjaldþrot.  " útrásarliðið lifir í vellystingum praktuglega og skortir ekki neitt.  Þeir eru heldur ekki bornir út úr villum sínum, nei þeir fá stöðugleikasamninga, afskriftir og meiri lán. "  Gjörsamlega óþolandi ástand og ekki hægt að horfa á þetta lengur.  En lognið fyrir vestan kyrrir hugann og gefur stundarfrið frá þessu öllu. Baráttukveðjur Ásthildur mín. 

[Sigrún Jónsdóttir, 10.9.2010 kl. 23:15]

Ljúft, ljúft, ljúft:) Myndirnar sko;) 

Þau ættu stundum að staldra aðeins við, sem komast á "toppinn" í pólitíkinni...

[Jóna Kolbrún Garðarsdóttir, 11.9.2010 kl. 00:47]

Heyr, heyr frábær hugvekja...

[Ásthildur Cesil Þórðardóttir, 11.9.2010 kl. 01:04]

Takk mín kæru.

Hrönn mín ef það er staðreynd, þá verð ég hreinlega að bjóða þér í heimsókn.

Jamm Sigrún fólk ætti aðeins að hugsa hvað þau vilja áður en þau gefa sig fram til slíkra verka.

Takk Jóna mín.

Versgú elsku Dísa mín. 

Auður mín, já faðir þinn á heiður af 200 mílna fiskveiðilögsögunni. Það er bara staðreynd. 

[Sunneva (IP-tala skráð) 11.9.2010 kl. 09:00]

Hún á afmæli í dag... hún á afmæli í dag... hún á afmæli hún ÍJA!!!!!! Hún á afmæli í dag :)

TIL HAMINGJU MEÐ AFMÆLIÐ ELSKU FRÆNKA :)

[Kidda, 11.9.2010 kl. 09:12]

Til hamingju með afmælið kæra vinkona. :)

Það er vel varðveitt leyndarmál veðrið á vestfjörðum. Æðislegar myndir og girnileg vínber og perur:)

Knús í afmæliskúluna ( Hjarta)

Get ekki sett inn nein tákn   :( 

[Guðrún Emilía Guðnadóttir, 11.9.2010 kl. 09:13]

Til hamingju með afmælið elsku besta og mikið ertu lánsöm að geta ræktað þessa ávexti.

Það var í eina tíð að orð stóðu, en því miður þá er eigi svo í dag manni rekur alla daga í rogastand

Knús í Kúlu
Milla

[Ásthildur Cesil Þórðardóttir, 11.9.2010 kl. 11:24]

Takk allar, elsku Sunneva mín knús

Orðið þitt er alveg á við táknið Kidda mín.

Knús Milla mín

[Sigurður Þór Guðjónsson, 11.9.2010 kl. 13:49]

Samkvæmt hitamælingum Veðurstofunnar hefur hitinn ekki komist 20 stig á Ísafirði í september. En hins vegar einn dag við skíðaskálann í Seljalandsdal. Veðrið á Vestfjörðum er heldur ekkert meira leyndarmál heldur en veðrið annars staðar, hvorki í veðurfregnum né almennum fréttum fjölmiðla. Sjá.

[Ásdís Sigurðardóttir, 11.9.2010 kl. 14:20]

Dulmagnaðar myndir frá höfninni. 

[Helga Kristjánsdóttir, 11.9.2010 kl. 14:31]

Sæl Ásthildur mín!  Auðveldara fyrir mig að sjá þig fyrir mér núna í "Eden" ,þar sem ég er svo nýbúin að vera þarna. Það sem mér fannst áberandi fyrir vestan þar sem ég fór um,er trjágróðurinn um allt.Skilst að ríkið styrki þá sem vilja gróðursetja tré,leggi þeim til græðlingana.        Hvað þessi sjór getur verið kyrr og fallegur,oft lýst sem spegli,sem hann er auðvitað eins og sést.   Að öðru,,, erum við ekki að fara að segja Jóhönnu upp?   Með góðri kveðju.:-)

[Sigrún Jónsdóttir, 12.9.2010 kl. 00:29]

Innilega til hamingju með afmælið þitt elsku Ásthildur...:)

[Jóna Kolbrún Garðarsdóttir, 12.9.2010 kl. 01:04]

Til hamingju með afmælið, ég óska þér heilla í framtíðinni. 

[Ragnheiður , 12.9.2010 kl. 22:02]

Óskaplega er mikil stilla. Þessu man ég eftir að vestan, í Súgandafirði.

Kær kveðja elsku vina

[Ásthildur Cesil Þórðardóttir, 13.9.2010 kl. 17:09]

Takk fyrir mig og góðar óskir,  mínar kæru vinkonur.

Sigurður Þór, ekki veit ég hvaðan þú færð þínar hitatölur, ég veit til dæmis ekki til að hitamælingar séu gerðar á Seljalandsdal, aftur á móti er tekinn hiti inn á Flugvelli, og í fjarðarbotninum, sem eru hvorttveggja skjóllausir staðir alveg niður við sjó.  Opinberu tölurnar eru svo frá Bolungarvík, þar sem yfirleitt er a.m.k. 1 - 2 °minni hiti en á Ísafirði.  Á Akureyri er hitinn tekinn inn í miðjum bæ.  Á tímabili tók löglreglan hér hitann á Ísafirði, og reyndist hann oft vera hærri en á Akureyri.

En ég get vottfest það hér með vitnum að  hitinn hér fór oftar en einu sinni upp í 22 °.  Þar sem hitamælir er á mínum vinnustað.  Enda sumarið afar sólríkt og mikill hiti.  Þannig er nú það.  Það er nefnilega ekki sama hvað hitinn er mældur, eins og þú sjálfsagt veist. 

Get líka sagt skemtilega sögu af veðri.  Hér fyrir nokkrum árum, þegar ég var að fara í vinnuna kl. 7 um morguninn, heyrði ég í útvarpinu að það væri ekki flogið til Vestmannaeyja og Ísafjarðar vegna þoku.  Ég stari upp í heiðbláan himininn, og lognið er algjört, eins og bara getur orðið hér, svo hringi ég í fréttastofu RUV, ég spurði hvers vegna þeir segðu að það yrði ekki flogið  til Ísafjarðar vegna þoku.  Af því að við hringdum á flugvöllin og þar var okkur sagt að það væri þoka. 

En hér er alheiður himin sagði ég og ekki ský neinstaðar.

Getur þú þá fulllyrt að það verði flogið, sagði fréttamaðurinn

NEi auðvitað get ég það ekki, ég hef ekkert í höndunum til að meta slíkt, en ég er að segja þér að hér er alveg heiðskírt og logn.  Og þetta er ekki í fyrsta skipti sem þið segið ekki satt um veðrið hér fyrir vestan bætti ég við.

Já við sitjum náttúrulega bara hér drekkum kaffi og búum til frásagnir af vondu veðri á Ísafirði sagði fréttamaðurinn hvekktur.

Já sagði ég ákveðin, ég held það bara.

Svo hringdi ég inn á flugvöll, og viti menn, þar var símsvarinn í gangi frá því kvöldið áður.  En þá hafði verið þoka.   Mér varð nú hugsað til farþeganna sem voru að bíða eftir flugi til Ísafjarðar og fengu þær upplýsingar í úrvarpi allra landsmanna að það væri ekki flogið þangað vegna þoku. Og átti ég bara að staðfesta það að víst væri hægt að fljúga, kerling út í bæ???

[Laufey B Waage, 13.9.2010 kl. 20:48]

Ferlega flottar bátamyndirnar. Lognið á pollinum algjört.

Og ekkert smá flott að hafa svona girnilega ávexti.

[Anna Sigríður Guðmundsdóttir, 13.9.2010 kl. 22:34]

Kæra Áshildur. Ég skil svo vel að þessi pistill er skrifaður frá hjartanu og takk fyrir hann.

Innilega til hamingju með afnælið. Dagurinn er svo sannarlega sérstakur, og þú ert sérstök manneskja sem metur persónur eftir persónuleika en ekki trúar-misnotkunar-öfgum ef ég hef skynjað rétt. 

Mikið eru vestfirðirnir dýrmætir og fallegir fyrir okkur öll og þá er það mannauðurinn og fegurð náttúrunnar sem ég meina! það er hægt að taka frá okkur peninga (verðlausar tölur á svika-blaði), en ekki raunverulega auðinn!

Gæfan er göfug og gjöful vegna þess að hún er og verður ekki mæld í innistæðulausum svika-peningagróða, heldur kærleika okkar til annarra og annarra  til okkar á þessari jörð. Kærleikurinn til okkar sjálfra og náungans er eina sanna trúin, ásamt alheimsgóðu orkunni?

það er ekki öllum gefið að geta talað fyrir sanngirni og kærleika alla daga jafnt, án þess að missa sig stundum í reiði-ásökunar-forarpytt (ég er ein af þeim )! Mannlegt en fáránlega ósiðmenntað og vanþroskað ?

Hafðu það sem best Áshildur mín M.b.kv.

[Ásthildur Cesil Þórðardóttir, 15.9.2010 kl. 11:22]

Einmitt Laufley mín.  þetta er allt að verða fullþroskað.

Elsku Anna mín takk fyrir þessa fallegu færslu. Við erum víst öll þannig að við dettum ofan í forarpytt, málið er að þegar það gerist að vera manneskjur til að biðjast fyrirgefningar og viðurkenna fyrir okkur sjálfum að við erum stundum gallagripir.  Kærar kveðjur til þín og innilega takk.