Ekki skessulegt raus, heldur nornalestur.

Loksins í dag fann ég að orkan mín er að koma til baka. Loksins þarf ég ekki að leggja mig um leið og ég get, og loksins get ég gert ýmislegt af því sem þarf að gera hjá sjálfri mér.

Ég er búin að vera svo orkulaus að það er ekki allt í lagi.  Garðplöntustöðin mín hefur setið á hakanum og garðurinn minn er orðin algjör villigarður.  Ég hef notað þá litlu orku sem ég átti til að sinna starfinu í bænum.  Svo í dag loksins hafði ég orku til að fara og aktiualli gera eitthvað af viti í garðplöntustöðinni minni.  Málið er að Blómaval er að gera sitt til að reyna að drepa mig niður.  Þeir hafa tekið yfir blómabúðina og stúlkuna sem þar var við völd.  Og núna eru þeir með allskonar tré og runna fyrir utan blómin.  Ég á auðvitað fasta kúnna sem þekkja mig og segja mér að plönturnar mínar lifi betur og séu sterkari en þeir hafa auðvitað tekið sinn toll, því flottu blómin niður í miðbæ glepja. Ég segi nú bara ágætu ísfirðingar þið hafið auðvitað val. 

Ef þið viljið hafa þessa garðplöntustöð áfram, þá þurfið þið að hugsa aðeins út fyrir rammann.  Ég stofnaði þessa garðplöntustöð vegna hvatningar frá fólki sem vildi geta keypt plöntur í heimabyggð.  Ef hinsvegar þið lítið svo á að það sé betra að versla við Blómaval, þá er það allt í lagi mín vegna.  Þá er bara að loka hér og fara að njóta lífsins, gera það sem ég vil og eignast líf fyrir utan garðyrkjuna.   Það er allt til í þessu.  Það er ykkar val elskurnar.  Ég hef ekki séð eftir einum einasta tíma sem farið hefur í þá vinnu sem hér hefur verið framkvæmd af okkur Ella mínum.  En ef þið kjósið að beina ykkar verslun til Blómavals þá verður það bara svo. 

Málið er að það er að það hefur alltaf verið svona.  Stóru fyrirtækin hafa dregið til sín kúnnana frá þeim smærri.  Hér í denn fóru menn vikulega suður til að versla í Bónus, eða þangað til Bónus sá sér fært að opna búð hér.  Ég verð að viðurkenna að það var búbót fyrir okkur hér að fá þá verslun hingað.  Hins vegar voru hér margir smákaupmenn sem hurfu við þá breytingu.

Og nú sé ég að akureyringur hefur opnað hér gjafaverslun fyrir skemmtiferðskipinn, málið er að skipin koma fyrst hingað og menn þarna fyrir norðan sáu auðvitað að það gat ekki gengið að ísfirðingar sætu að gjafavörunni einir. Þá þurfti auðvitað að koma hér og ná því sem hægt var að ná.  Klóa í smágróða, svo stendur á þessari túristabúð; Akureyri Reykjavík.  Ísafjörður hvað!

Ekki nóg með það, heldur var ákveðið að leggja niður svæðisútvörpin á landsbyggðinni, og allt flutt til Akureyrar, nema nú er bara Akureyri og nágrenni sem sendar eru fréttir um.  Og það í hádeginu þegar allir eru að gera eitthvað allt annað.  Og þess vegna ákvað ég að hætta að auglýsa mína þjónustu á rúv.

Hér er hún Guðrún okkar, flott kona, vann á Rúvvest og stóð sig mjög vel.  Og ég veit að margir hér fyrir vestan auglýstu á Rúv meðan það var hér.  Nú hefur það snarlækkað hlutfallið.  Við erum ekki að auglýsa í útvarpi Akureyrar.

Hér hefur verið skíðavika með smáhléum frá 1935.  Akureyringar hafa öfundað okkur af þessari uppákomu lengi, svo fengu þeir því framgengt að vetrarsportið var staðsett á Akureyri, þeim hefur samt sem áður ekki tekið að drepa Skíðavikna niður, en ríkisstyrktir eru þeir. 

Að endalaust gína yfir því sem aðrir eru að gera, og reyna að gleypa það finnst mér frekar ómerkilegt.  Og það er alveg sama batteríið og útrásin.  Græðgin í fyrirrúmi, reyna að ná til sín því sem aðrir eru að gera, í stað þess að gera bara eitthvað allt annað.

Nú hljóta þeir þarna fyrir norðan að fara að setja upp aldrei fór ég suður dæmi, því það er auðvitað óþolandi að ísfirðingar eigi eitthvað svo stórkostlegt sem það.

Nei ég segi svona.  Við eigum að hlú að því sem er næst okkur, og ríkið á ekki að grípa inn í og hygla einum á kostnað annars.  Frjáls samkeppni hlýtur að vera markmiðið. 

Þetta er svona raus í kerlingu sem er fjarskalega óánægð með hvernig málin hafa skapast á landinu okkar fagra.  Núna síðast hafa stjórnvöld verið rassskellt svo um munar og ættu með sanni að segja af sér og hunskast til að biðja fólk afsökunar á aðgerðaleysi sínu meðan fólk var rænt inn að skyrtu jafnvel svipt lífið sínu, og öllum sparnaði og eigum. 

Megi allar góða vættir vaka yfir okkur og vernda og losa okkur við óhæft fólk sem reynir að hanga á roðinu eins og hundar, og ekki sleppa þó meirihluti þjóðarinna vilji þau sem lengst í burtu.

Segi og meina. 

og að lokum Össur, þú sagðir í fréttum að ráðamenn í Hollandi og Bretlandi væru að taka sirkusinn á þetta... eða þannig.  Fyrir mér og mörgum öðrum ert bæði þú og þitt fólk að trúðast og algjörlega án trausts svo margra að ykkur ber að íhuga ykkar stöðu og helst víkja og fara fram á utanþingsstjórn, ekki þjóðstjórn Össur minn. Utanþingsstjórn, vegna þess að meirihluti fólks einfaldlega treystir ykkur ekki lengur.

Athugasemdir

[Auður Matthíasdóttir (IP-tala skráð) 22.6.2010 kl. 20:46]

Gott að orkan er komin til baka.    Nýttu hana vel og njóttu lífsins.  Það er ömurlegt ástand í landinu okkar og stjórnin sem situr sem fastast er vonlaus.

Hvernig í ósköpunum gátu Akureyringar náð að stofna gjafavöruverslun á Ísafirði á undan heimamönnum?

Veldi Akureyrar er að aukast.  Nú virðist eiga að  miða við fjarlægina milli Akureyrar og Reykjavíkur þegar rætt er um styttingu hringvegarins.

Þetta með Blómaval og plönturnar er bara nokkuð sem ég hef sannprófað í gegnum árin.  Plöntur ræktaðar í heimabyggð eru einfaldlega sterkari og flottari.

Hafðu það sem best og megi sumarið verða þér og þínum gott.

[Dísa (IP-tala skráð) 22.6.2010 kl. 21:09]

Heyr, heyr!!

[Sigrún Jónsdóttir, 22.6.2010 kl. 22:01]

Þú ert langflottust

[Sigrún Aðalsteinsdóttir, 22.6.2010 kl. 22:20]

Það er rétt að stóru fyrirtækin gleypa þau litlu, fyrst undirbjóða þau helling og svo þegar þau hafa fest sig í sessi hækka þau verðið og þjónustan verður lakari.

Ég er nú svoddan landsbyggðarkelling í mér (þrátt fyrir að vera alin upp í Reykjavík) að ég reyni að versla alltaf við heimamenn þegar ég er á ferðalagi um landið.  T.d. finnst mér afskaplega gaman að þræða öll bakaríin þar sem við erum á ferð. Neita barasta að kaupa samsölubrauð á Ísafirði, fer miklu frekar í t.d. Gamla bakaríið.   

Ég reyni líka að beina mínum daglegu viðskiptum til fyrirtækja í minni heimabyggð sem er Hafnarfjörður.

[Ragna Birgisdóttir (IP-tala skráð) 23.6.2010 kl. 11:15]

Elsku vina. Vonandi er orkan þín komin til að vera því að þjóðfélagið okkar þarf á svona fólki einsog þér að halda. Þessi yfirgangur þeirra stóru heitir frjálshyggja,þ.e. einstaklingurinn á að fá að njóta sín.Er það svo? Nei. Þeir sem harðast fara fram í frjálsu flæði hafa ryksugað upp byggðir landsins,í kvótaeign,jarðareign,og fleiru og fleiru og drepa niður í leiðinni þá sem eru að veikum mætti að skapa sér lífsviðurværi.Það eru fleir og fleiri sem eru gjörsamlega að gefast upp á þessu hokri hér sem er að verða nákvæmlega eins og þegar að Danirnir fóru eð eignarhald á öllu hér. estu kveðjur vestur í kúlukærleikann.

[Ásdís Sigurðardóttir, 23.6.2010 kl. 11:48]

Nú er mín aldeilis að hressast  frábært, hafðu það sem allra best yndið mitt.

[Guðsteinn Haukur Barkarson, 23.6.2010 kl. 12:10]

Flottur pistill frá flottri konu!

[Kidda, 23.6.2010 kl. 19:49]

Gott að nornin er komin tilbaka Velkomin til baka mín kæra, þetta kemur á endanum er manni sagt. En í annað eru ekki gjafavöruverslanir á Ísafirði?

Er Blómaval ekki með innflutt sumarblóm, mig minnir það. Þau hafa ekkert vanist íslenska veðrin. Vona að Ísfirðingar versli frekar við nornina

KNús í nornakúlu

[Guðrún Emilía Guðnadóttir, 24.6.2010 kl. 18:37]

Nornin mín flottasta velkomin í haminn, ég versla aldrei í Blómaval bara bændur hér í kring og blómabúðina á staðnum, bakaríið og ef ég er að fara suður þá fer ég í verslanir hér á Húsavík til að athuga hvað ég fæ á mig hér, fer helst aldrei í búðir fyrir sunnan.

Ekki gefast upp elskuleg, fólk áttar sig á málum.
Kærleik í kúlu
Þín vina Milla

[Þorsteinn Árnason (IP-tala skráð) 26.6.2010 kl. 19:32]

Velkomin í þann gír sem við viljum hafa þig, hlakka til að hitta þig, sem verður vonandi núna í byrjun júlí, stefni á 5. til 8. Knús í hús :)).  Steini Árna í Andakíl

[Ásthildur Cesil Þórðardóttir, 30.6.2010 kl. 11:26]

Innilega takk fyrir mig öll 

 hlakka til að hitta ykkur Dísu Steini minn.