Bara svona beint frá hjartanu.

Jæja hér er ég aftur.  Hera Björk var frábær í Júróvísion.  Ég er samt alveg sátt við sigur þjóðverja.  Stúlkan sú var líka frábær.  En ég er hugsandi yfir öllum hnjákollu og mjaðmaskjálftagellunum sem dansa í minipilsum eða þaðan af minna, til að undirstrika karlsöngvara sem láta ljósið skína.  Hvenær ætlum við virkilega að sjá að þetta er bara eitthvað 2007.  Hera Björk var okkar fjallkona og þær voru allar yndislegar og flottar, öruggar og heilbrigðar sterkar konur.  Allof margar söngkonur féllu í þessa gryfju að sýna líkama sinn og iða sér og rugga.  Sorrý ég er búin að fá nóg af þessu.  Ef röddin er ekki nóg þá á að vinna þetta upp með sexapeal. 

Kosningarnar voru líka vonbrigði fyrir mig.  Ég er orðin þreytt á stöðnuninni í mínu samfélagi.  En ég verð að virða vilja kjósenda.  Þeirra var valið og þetta var útkoman, verði þeim að góðu.  Það þýðir ekkert að koma til mín og röfla um eitt né neitt.  Ég mun láta fólk vita að ég hafi misst trú á heilbrigðri skynsemi fólks.  Þannig er það bara.

Það var líka skondið að hlusta á fjórflokkinn keppast um að ræða að þau hafi unnið stóran sigur.  Það varð einhvernveginn svo hjáróma og einmitt að sem fólk var að reyna að segja þeim að þau væru úti á túni.  Nákvæmlega það sem þau eru.  Jón Gnarr líka úti á túni og svei mér ef hann veit hvað snýr upp eða niður á sjálfum sér eða hvað eigi að gera næst.  Hanna Birna skælbrosandi fölsku brosi, ég get svarið það að fýlusvipurinn hentar henni betur en þetta bros.  Jóhanna veit að þetta eru skilaboð, en ekki til hennar.... óney hún ætlar sér að halda áfram.  Og auðvitað vilja þau ekki kosningar til alþingis á næstunni, segir sig sjálft.  Hvað þarf annars margar undirskriftir til að krefjast annað hvort kosninga eða utanþingsstjórnar?

Sóley Tómasdóttir hversu heilsteypt sem hún er og heiðarlega að mati formannsins, þá einfaldlega hefur hún ekki það vægi sem þarf til að vera í fronti í framboði.  Menn verða bara að viðurkenna það.  Hún er eins og viðkvæmt blóm sem segir hluti sem fæla menn frá.  Hún er hinn endinn á Hönnu Birnu. 

Enginn veit hvað gerðist í raun og veru.  Þegar þokan fer og menn fara að sjá það sem gerðist, er ég ansi hrædd um að kaldur og napur raunveruleiki blasi við pólitíkusum.  Þeir hafa ekki náð skilaboðunum alveg.  En það mun renna upp fyrir þeim smátt og smátt, því þetta er bara byrjunin alveg eins og Þórhildur Þorleifsdóttir sagði. Nú er skriðan komin af stað, og almenningur hefur fengið tána inn fyrir hurðargatið.  Þá verður ekki hægt að skella hurðinni á okkur. 

Smám saman holast steinninn og fólk getur farið að fara upp úr hjólfarinu sem það hefur verið í allof lengi og sjá allt sem er að gerast.  Allt falsið, lygarnar, leikaraskapinn og samtrygginguna sem þetta fólk hefur skapað kring um sig með fúslegu leyfi fjölmiðlamanna og embættismanna, því þar er samtryggingin ennþá algjör.

Ja fussum svei mannaþefur í helli mínum!!!

Athugasemdir

[Halla Rut , 30.5.2010 kl. 20:18]

Júróvísion: Ég hugsaði þetta nú einnig þegar ég horfði á keppnina og greinilegt að þarna er keppt um meira en bara besta lagið en ég get þó ekki tekið undir með þér, Ásthildur, að það séu heilbrigðar konur sem eru allt of þungar. Það er reyndar bara virkilega óhollt.

Kosningarnar: Sammála þér að stjórnmálamenn eru í algjörri afneitun og reyna allt til að halda því ástandi sem verið hefur hér svo lengi. Þessi rassskelling í Reykjavík og á Akureyri er það áhrifamesta sem við Íslendingar höfum gert síðan hrunið varð. 

[Ásthildur Cesil Þórðardóttir, 30.5.2010 kl. 20:53]

Ókey Mín kæra Halla Rut, þær eru ef til vill of þungar, en þær eru samt flottar og valkyrjur sem margir mega læra af.

Jamm nákvæmlega þessar kosningar eiga eftir að draga dilk á eftir sér, sem ekki margi sjá fyrir.  En þetta síast inn.

[Haukur Nikulásson, 31.5.2010 kl. 08:27]

Ég er eiginlega stórundrandi á því hversu sammála þér ég get verið. Stór hluti þjóðarinnar ákvað að það væri bara best að mæta vondum raunveruleika með klárum leikaraskap. Vitleysunni er breytt í algjöra vitleysu til að bæta eitthvað. Ég er hræddur um að þetta komi súrt upp á yfirborðið fyrr en seinna.

[Ásthildur Cesil Þórðardóttir, 31.5.2010 kl. 11:38]

Það er ansi hætt við því Haukur.