Grátkór L.Í.Ú. ennþá einu sinni.

Ég ætla að birta hér bréf frá félaga mínum í Frjálslynda flokknum, hann er í þriðja sæti á Í-listanum, en að þeim lista standa þrír flokkar, Samfylkingin, Frjálslyndiflokkurinn og Vinstri grænir.  Þessir þrír flokkar hafa starfað af miklum ágætum síðast liðin fjögur ár.  Sýnir bara að úti á landsbyggðinni er frekar um að ræða einstaklinga með svipaðar skoðanir og stefnur en flokkadrætti.

Ég er afskaplega ánægð með alla á listanum.  Og þar er aldrei minnst á þú og þið, heldur VIÐ.

En hér kemur greinin:

Kristján Andri Guðjónsson: HG og strandveiðar

 

Kristján Andri Guðjónsson

Tilefni þess að undiritaður sest niður með penna í hönd er viðtal bb.is við framkvæmdastjóra Hraðfrystihússins-Gunnvarar undir fyrirsögninni „HG gæti stoppað í sumar." Á þeim sjö árum sem ég starfaði á Páli Pálssyni ÍS var yfirleitt stoppað í tvær til þrjár vikur í kringum verslunnarmannahelgi og því kom það mér spánskt fyrir sjónir að það væri einhver frétt að stoppa ætti í sumar bæði skip og fiskvinnsluhús.

 

Greina má mikla gremju framkvæmdasjóra HG út í strandveiðar á komandi sumri og þeim kennt um fyrirhugað stopp HG í sumar. Þetta er ekki rétt hjá framkvæmdastjóra HG. Engin mun verða fyrir skerðingu á aflamarki eða krókaaflamarki á núverandi kvótaári samkvæmt orðum sjávarútvegsráðherra. Þar með er það komið á hreint og þar með er það ekki strandveiðum að kenna að HG stoppar í sumar.

 

Nú skoðaði ég veiðistopp á Páli Pálssyni ÍS í júli og ágúst frá árinu 2001 til og með síðastliðnu sumri. Að meðaltali var Páll Pálsson ÍS frá veiðum á umræddu tímabili 22 daga á ári. Stoppin eru frá um 15 dögum og upp í 36 daga árið 2008.

Nú vil ég minna framkvæmdastjóra HG á að þegar svokölluðu dagakerfi var stútað og þeir bátar kvótasettir, þá heyrðist ekki stuna úr HG að stoppa þyrfti vinnsluna eða skipin meira vegna þess að kvóti væri dreginn af öllum til að láta til dagabátanna, til að loka því kerfi. - Lokun dagakerfisins var hlutur sem ég verð aldrei sáttur við.

 

Framsetning framkvæmdastjóra HG nú, um að strandveiðar valdi stöðvun veiða og vinnslu hjá HG, eiga því ekki við rök að styðjast. Að því sögðu sem áður er hér fram komið væri nærtækara fyrir framkvæmdastjóra HG að beita kröftum sínum innan LÍÚ til þess að ná fram aukningu á þorskkvóta og styðja þannig kröfu Landssambands smábátaeigenda og einróma áskorun bæjarstjórnar Ísafjarðarbæjar um auknar veiðiheimildir. Það væri aðgerð sem mundi auka tekjur og atvinnu í Ísafjarðarbæ sem og á landsvísu.

 

Skrifað á Norðurfirði á Ströndum,
Kristján Andri Guðjónsson frambjóðandi Í - listans í Ísafjarðarbæ.

Grein útgerðamannsins. http://www.bb.is/Pages/26?NewsID=103706

Frétt um sumarlokun.   http://www.bb.is/Pages/26?NewsID=103706

 

Það má svo sem segja frá því líka að ég hef starfað á kosningaskrifstofunni hjá Frjálslyndum þegar þeir hafa verið í framboði.  Og það er alltaf sama sagan, fólk kemur til okkar og spyr hvort það sé löglegt að framkvæmdastjórar sjávarútvegsfyrirtækjanna haldi fundi á kaffistofunni fyrir kosningar og segi fólkinu að ef það kýs ekki rétt fari fyrirtækið úr bæjarfélaginu og fólkið standi eftir atvinnulaust.  Þetta er allavega siðlaust.

Einn útgerðarmaðurinn var meira að segja á fullu að selja bæði skip og kvóta burt úr bæjarfélaginu, á sama tíma og hann var að hóta starfsfólkinu atvinnumissi.  Vona að þessir menn eignist einhverntíma samvisku og iðrist, en ætli það sé ekki borin von?

Athugasemdir

[Þorsteinn Briem, 8.5.2010 kl. 13:40]

XIII. kafli. Óleyfilegur kosningaáróður og kosningaspjöll.

92. gr. Óleyfilegur kosningaáróður og kosningaspjöll telst:

   a. að bera á mann fé eða fríðindi til að hafa áhrif á hvort hann greiðir atkvæði eða hvernig hann greiðir atkvæði, að svipta mann eða ógna manni með sviptingu atvinnu eða hlunninda í sama skyni, að heita á mann fé eða fríðindum ef kosning fari svo eða svo, að torvelda öðrum sókn á kjörfund eða til utankjörfundarkjörstaðar, svo og að beita þvingunarráðstöfunum í sambandi við kosningar,"

XVIII. kafli. Refsiákvæði.

103. gr. Eftirtalið varðar sekt, nema þyngri refsing liggi við eftir öðrum lögum:

    f. ef maður ber fé eða fríðindi á mann eða heitir manni fé eða fríðindum til að hafa áhrif á hvort hann greiðir atkvæði eða hvernig hann greiðir atkvæði, eða ef maður sviptir mann eða ógnar manni með sviptingu atvinnu eða hlunninda í sama skyni,"

104. gr. Eftirtalið varðar fangelsi allt að fjórum árum:

   a. ef maður beitir þvingunarráðstöfunum eða ofbeldi eða hótunum um ofbeldi til að raska kosningafrelsi manns, annaðhvort á þann hátt að meina honum að greiða atkvæði eða neyða hann til að greiða atkvæði á annan veg en hann vill,"

Lög um kosningar til sveitarstjórna nr. 5/1998

Ég ráðlegg ykkur eindregið að kæra þennan kosningaáróður strax til lögreglunnar, krefjast þess að hún rannsaki málið til hlítar og gangið hart eftir því, þar sem hér er um grafalvarlegt lögbrot að ræða, sem varðar allt að fjögurra ára fangelsi.

[Ásthildur Cesil Þórðardóttir, 8.5.2010 kl. 16:54]

Takk fyrir þessar upplýsingar Steini.  Gott að fá þetta.  Hvað má þá segja um útgerðarmenn sem hóta fólki brottrekstri úr vinnu ef þeir voga sér að vera á listum Frjálslynda flokksins.  Það veit ég til að hafi gerst oftar en einu sinni, og orðið til þess að menn hafa hætt við að vera á listum.  Ísland er nefnilega ekki bara rotið í bankakerfinu, heldur rotið niður í rætur samfélagsins, þar sem sumt fólk sem hefur authority nýtir sér það og ógnar fólki á þennan hátt.  Þetta er eitt af því sem ég vonaðist til að þessi ríkisstjórn fólksins myndi taka á.  En því miður þá er þessi ríkisstjórn einungis stjórn valdsins og valdníðslunnar alveg eins og fyrirrennara hennar s.l. 20 ár eða svo og örugglega lengur.  Það hafa þau Steingrímur og Jóhanna brugðist fólkinu í landinu, og það á að refsa þeim fyrir það í næstu ríkisstjórnarkosningum. 

[Þorsteinn Briem, 8.5.2010 kl. 18:15]

Fyrir tveimur árum var hér hins vegar "engin spilling", Ásthildur.

Ég óska Í-listanum alls hins besta og myndi kæra þetta glæpahyski sem fyrst.

[Finnur Bárðarson, 8.5.2010 kl. 18:23]

Þeir sem eru best staddir þeir sem hafa mest milli handa, þeir sem búa við sérréttindi jarma allatf hæst. Þeir vilja bara meira og meira og helst á kostnað okkar hinna.

[Þórarinn Baldursson, 9.5.2010 kl. 04:24]

Svona hótanir eru ekki bara bundnar við Vestfirði,það er aveg kristaltært,ég get sannað að svona aðferum var beitt hér suður með sjó fyrir síðustu alþingiskosningar.

[Sigurður Grétar Guðmundsson, 9.5.2010 kl. 10:17]

Ásthildur, velkomin á bloggið mitt <siggigretar.blog.is> en þar birti ég tvær greinar úr Bæjarlífi hér í Þorlákshöfn eftir mig um kvótamáli, kveikjan að þessum greinum voru "grátgreinar" Ármanns Einarssonar útgerðarmanns hér í bæ.

[Ásthildur Cesil Þórðardóttir, 9.5.2010 kl. 10:37]

Þakka góðar óskir Steini.

Það er alveg rétt Finnur, þeir sem "eiga" eitthvað hafa oftast hæst.  Og þeir synda alltaf ofaná með forréttindi sem ekki virðist vera hægt að taka af þeim.

Þórarinn sjómenn þurfa að taka sig saman og kæra þetta, eins og Steini bendri á hér að ofan varðar þetta við lög.

Takk fyrir innlitið Sigurður, sannarlega gott að sem flestir sýni fram á villimennskuna sem L.Í.Ú viðhefur og hefur komist upp með í fjölda ára.

[Linda Linnet Hilmarsdóttir, 13.5.2010 kl. 21:58]

Innlitskvitt og ljúfar kveðjur til ykkar elskur og gleðilegt sumar.....O)))