Íslandi allt.

Já hér hefur mikið verið fjallað um afsökunarbeiðnir tár og að stíga til hliðar.

Sumir halda ekki vatni fyrir þessu og telja að nú sé loksins siðferðið að koma til skila.  Ég verð að segja að ég set spurningamerki við öll þessi hliðarskref, tár og afsakanir.

Miðað við það sem á undan er gengið og miðað við allt sem þetta fólk hefur á samviskunni í að plata almenning upp úr skónum, aldrei gert neitt til að koma til skila að það séu ský á himni, hvað þá reynt að afstýra því sem var að gerast.  Þvert á móti reynt að taka til sín hluta af kökunni éta hana og vilja svo geyma hana líka.  Þá set ég spurningarmerki við krókódílatár og hliðarskref.

Ef eitthvað af þessu fólki sem hefur nú náðarsamlegast stigið til hliðar, af því að það vill ekki raska rannsóknum, hefði stigið niður fyrr, sett fótinn niður og sagt hingað og ekki lengra, hefði ég trúað.  En, takið nú eftir, ekkert þeirra gerði neitt eða sagði fyrr en rannsóknarskýrslan kom fram og sendi þeim skilaboð.

Það eru til dæmis ekki margir dagar síðan Þorgerður Katrín taldi sig ekki þurfa að víkja.  Ingibjörg Sólrún hefur komið fram og ásakað aðra um allskonar mistök.  Enginn hefur hingað til gengist við ábyrgð. 

Nema núna þegar glæpurinn er orðin lýðnum ljós. Þá er gripið til þess að "iðrast" og "víkja".  Ekki segja af sér, ónei, það væri alltof stórt skref. Þetta blessaða fólk lifir i allt öðrum heimi en við hin.  Ef við tökum kjötlæri úr Bónus, kemur löggan og við verðum dæmt annað hvort í sekt eða fangelsi.  En ef við værum uppvís að taka milljarð eða þar um bil að láni, með engu veði, sem við ætluðum aldrei að greiða, þá er nóg að koma fram og segja sorrý, gráta og allir vorkenna manni og segja Vá hvað hún/hann er saklaus og flottur, auðvitað viljum við hafa þau áfram, af því þau eru svo hreinskilin og góð.  (Afsakið meðan ég æli).

Nei gott fólk ef við virkilega viljum nýtt Ísland, þá föllum við ekki fyrir svona leikþáttum.  Þetta fólk hefur fyrirgert rétti sínum til að teljast trúverðugt og á að ganga alla leið og fara frá alveg.

Jóhanna og Steingrímur eru hluti af þessari spillingu líka, þau hafa alla tíð spilað með, þó Vinstri Græn hafi ekki beint verið í stjórn, þá vissu þau alveg um alla spillinguna sem viðgengst, og sögðu aldrei neitt, því það hefði kostað uppgjör sem þau vildu ekki taka þátt í, því von þeirra var að komast sjálf að kjötkötlunum.  Enda sýnir sagan að um leið og þau komust til valda, var alveg sama sagan upp á teningnum, valdhroki, spilling og heimaráðningar á vinum og vandamönnum. ( Fyrirgefið aftur meðan ég æli). 

Spilling fjórflokksins er svo djúpstæður og svo samtvinnaður að ef við virkilega viljum nýtt Ísland, þá gefum við þeim öllum frí í næstu kosningum.  Þá munu vonandi verða fleiri framboð og nýtt fólk sem gefur kost á sér.  Til dæmis veit ég að Frjálslyndi flokkurinn verður þar, sennilega Hreyfingin og Borgarahreyfingin, kristilegur flokkur og guð má vita hvað.  En við verðum að lesa og kynna okkur hvað flokkarnir hafa fram að færa, muna hvað þeir sem hafa verið á þingi hafa lofað og hvað þeir hafa svikið, og hafa dug til að refsa þeim duglega sem ekki hafa staðið við sín kosningaloforð.  Og svo þegar við höfum valið þá verðum við að fylgjast með því hvað flokkarnir sem komust að gerðu til að efna loforðin, og ef þeir hafa ekki staðið sig hafa festu og einurð til að refsa þeim næstu kosningar á eftir. 

Það er nefnilega nákvæmlega við sem getum haldið utan um lýðræðið, með því að veita stjórnmálamönnum aðhald, alveg rétt eins og fjármálaeftirlitið gleymdi að veita útrásarvíkingunum aðhald, gleymdum við að veita stjórnmálamönnunum aðhald.  Þeir hafa verið hingað til verið áskrifendur að atkvæðum sínum.   Hafa ekki þurft að standa sig, eða standa fyrir sínu, heldur lofa og lofa og standa ekki við neitt, og ljúga svo ennbetur fyrir kosningar og fólk kokgleypt allt sem þeir hafa sagt.  Hvernig getum við svo staðið hér og undrast í hvaða stöðu við erum?

Við sköpuðum þetta sjálf, eða þeir sem alltaf hafa kosið Sjálfstæðisflokkinn á hverju sem hefur gengið, og þeir sem kjósa Samfylkinguna nó matter What, framsóknarmennirnir sem aldrei hafa gert neitt annað en að setja x við B og Vinstri græn sem trúa því að Steingrímur og có séu svo saklaus dugleg og frábær.

Well ég get sagt ykkur að þau eru öll í sömu súpunni, samtryggingin, leikaraskapurinn og loforðin eru til þess gerð að plata okkur almúgan upp úr skónum, og láta okkur trúa því að við ráðum og getum valið.  Það er bara ekki þannig.

Og núna þegar við erum orðin nógu reið og nógu örvæntingafull til að leita að sannleikanum, þá setja þau upp leikrit sem heitir; stígðu til hliðar, biddu fyrirgefningar og gráttu pínu pons, og lýðurinn fylgir þér allt til dauða. (Fyrirgefið en ég þarf að æla aftur).

Ágæta fólk ég spyr, viljið halda þessum leik áfram, eða hafið þið þor til að segja þessari fjórklíku að þið nennið ekki meiru?  Ef þið virkilega viljið breyta, þá þurfið þið að hætta að vera svo barnaleg að trúa öllu sem að ykkur er rétt, og spyrja ykkur sjálf, hvað býr að baki þessum gráti, afsökun og sakleysisyfirlýsingum.

Til dæmis getur ekki verið að Þorgerður Katrín og Ingibjörg Sólrún hafi grátið af vorkunsemi yfir sjálfum sér að hafa þurft að standa í þessu svona tilneyddar.  Getur ekki verið að Illugi og Björgvin hafið æft sig fyrir framan spegilin og talið að með þessu tilhliðardæmi gætu þeir haldið áfram að vera þingmenn eftir allt saman?

Svo má segna að Bjarni Ben þurfi sennilega að axla sína ábyrgð með afsögn, og margir fleiri.  Það er okkar, ágæta alþýða að krefjast þess að þau einfaldlega víki, allt það fólk sem var með völd gegnum hrunið.  Þau vissu en sögðu ekki neitt og vonuðust eftir að komast upp með það.  Við þurfum að taka þau niður eitt og eitt og láta þau víkja.  Vegna þess að það hefur komið í ljós undanfarið að við höfum vald, þegar við stöndum saman. 

Við getum haft okkar áhrif, nýtum það og nýtum það vel til að byggja upp nýtt Ísland.

Athugasemdir

[Jens Guð, 19.4.2010 kl. 23:17]

  Ég kvitta undir hvert orð.  Þetta er eins og talað úr mínu hjarta.  Nema að þetta er betur orðað og en mín hugsun.

  Ég vil strika undir:  "Þetta blessaða fólk lifir i allt öðrum heimi en við hin."

  Og einnig:  "...valdhroki, spilling og heimaráðningar á vinum og vandamönnum. ( Fyrirgefið aftur meðan ég æli)." 

  Þetta eru lykilorð í greiningunni.  Ég vil bæta við að af þeim sem sagt hafa af sér tímabundið hefur engin/n beðið þjóðina afsökunar.  Orðræðan gengur öll út á að þau/þeir brugðust sjálfum sér og FLOKKNUM.  Þau stíga til hliðar til að skaða ekki FLOKKINN.

  Ennþá verra er að staðgenglar þessa fólks eru "lúserarnir" sem var hafnað í prófkjöri og kosningum.  Langt í frá betri eða skárri pappíarar.  Það segir sína sögu um ástandið.

[Þórarinn Baldursson, 19.4.2010 kl. 23:55]

Ég má til að taka undir orð Jens,hér að ofan.Þetta er eins og talað úr mínu hjarta,ég er viss um að meiripartur þjóðarinnar,mundi flikkjast undir gunnfána þinn Ásthildur.Stígðu fram og taktu hann upp,Þú hefur það sem okkur vantar marga,og það er að koma orðum að hlutunum skipulega.Við Jens verðum þér á sitthvora hönd,og látum engan vaða neitt ofan í þig.Látum verkin tala.

[Jóna Kolbrún Garðarsdóttir, 20.4.2010 kl. 00:49]

Ég vildi að ég gæti skrifað svona innblásnar greinar.  Ég tek undir allt sem þú segir.

[Jóhann Elíasson, 20.4.2010 kl. 05:31]

Ég tek sko undir hvert orð.  Að NOKKURskuli láta blekkjast af þessum "krókódíltárum" er mér alveg hulin ráðgáta.  Það næsta er það það verði komið á fót einhverri keppni, sem gæti heitið "GRENJAÐ FYRIR FRAMAN MYNDAVÉLARNAR" þar sem þeir fengju hæstu einkunnina sem sýndu mestu og bestu LEIKRÆNU tilburðina og þar með gætu blekkt sem flesta.  Er það að GRENJA í beinni að iðrast????  Sýna ekki viðbrögðin við þessu, þá sérstaklega hjá fjölmiðlum, að það á að ÞAGGA málið niður????

[Ragna Birgisdóttir (IP-tala skráð) 20.4.2010 kl. 08:06]

Góð grein Ásthildur og ég vona að þú látir birta hana í dagblöðunum.Sem flestir ættu að lesa hana.Bestu kveðjur.

[Jónína Dúadóttir, 20.4.2010 kl. 08:15]

Heyr heyr ! Eins og talað út úr mínu hjarta... en bara miklu flottar sett fram

[Ásthildur Cesil Þórðardóttir, 20.4.2010 kl. 10:14]

Tall öll, málið er að ég sé þetta svona fyrir mér og get ekki annað en undrast hve sumir eru barnalegir og trúgjarnir á allt sem fólk gerir.  Ef til vill af því að ég er orðin það gömul að þekkja mannlegan breyskleika.  Ef fólkið hefði skammast sín svona þá hefði það ekki beðið eftir skýrslu, það hefði fyrir lifandi löngu beðið okkur öll afsökunar og látið sig hverfa.  Það er ekki nokkur vafi á að þau vissu mætavel hvað þau voru að að hafast, en töldu sig --- eins og alltaf áður--- komast upp með það, og hefðu gert það ef rannsóknarskýrslan hefði ekki verið svona hreinleg og gegnheil.  En þarna eru fleiri sem ennþá sitja á púðurtunnu og telja sig geta setið áfram.  Ég segi ekkert ykkar sem var við völd þessi síðustu tvö ár eruð hæf til að sitja áfram.  Við eigum ekki að láta deigan síga en heimta að þau víki öll. Við viljum hreint borð, virðingu og heiðarleika, ekki mikið sem beðið er um, en virðist vera spillingaröflum ofviða að skilja.

[Ásdís Sigurðardóttir, 20.4.2010 kl. 11:58]

Ég er algjörlega sammála kommentum hér að ofan. Má ekki koma þessari grein í blöðin?  kær kveðja til þín elskan

[Ásthildur Cesil Þórðardóttir, 20.4.2010 kl. 13:56]

Takk Ásdís mín.  Ég sendi kannski Reyni Trausta þetta og sé til hvort hann hefur pláss.

[Dísa (IP-tala skráð) 20.4.2010 kl. 17:46]

Sammála þér, alla einlægni virðist skorta og þetta líkist mest óþekkum krökkum sem komist hefur upp um og þá segja þau " ég lofa að gera þetta aldrei aftur".

[Ásthildur Cesil Þórðardóttir, 20.4.2010 kl. 20:13]

Já einmitt, þetta er svona leikhús fáránleikans, enda er ekki að ástæðulausu að Alþingi er kallað Leikhúsið við Austurvöll. 

[Grefillinn Sjálfur - Koma svo! (IP-tala skráð) 20.4.2010 kl. 21:22]

Heyriði, öllsömul ... mig langar til að misnota aðstöðu mína hér og benda ykkur öllum á að SIÐFERÐISKUBBARNIR eru komnir! Frábær gjafavara!

ps. Ásthildur ... ef þú ætlar að senda Reyni þessa frábæru grein, blessuð sendu honum Siðferðiskubb með.

[Ásthildur Cesil Þórðardóttir, 20.4.2010 kl. 21:38]

Hehehe flottur Grefill. En ég er búin að senda greinina, og þeir ætla að birta hana í helgarblaðinu. 

[Grefillinn Sjálfur - Koma svo! (IP-tala skráð) 20.4.2010 kl. 23:35]

Gott mál. Vona að sem flestir lesi hana. Vel gert!

[Sigrún Aðalsteinsdóttir, 21.4.2010 kl. 14:02]

Ég er svo sannarlega sammála þér og gott til þess að vita að greinin mun birtast um helgina.

Veit um allnokkra flokksbundna sjálfstæðismenn sem hafa gengið úr flokknum, þar sem þeim hefur ofboðið ástandið.  Slíkt hlýtur að vera að gerast í öðrum flokkum líka.  En svo er hættan sú að viðkomandi xi næst við sinn gamla flokk, enda alþýða þessa lands með eindæmum minnislaus.

Vonandi skilst þessi texti ekki þannig að ég sé sjálfstæðismanneskja, skrýtið að bara fyrrverandi kjósendur sjálfstæðisflokksins hafi opinberað brottför sína úr flokknum í mín eyru

[Ásthildur Cesil Þórðardóttir, 21.4.2010 kl. 16:24]

Já skrýtið Sigrún.  En það sýnir ef til vill hve reiðir þeir eru orðnir út í spillinguna sem lekur úr hverjum kima flokksins.  Og hann er svo sannarlega í fararbroddi þar flokkurinn sá.

Takk Grefill.