Nei nú fórstu alveg með það Ásthildur.

Ég er nú farin að óttast að okkar æðstu ráðamenn skilji ekki útlensku, eða kunni ekki á erlenda ráðamenn. 

Ef til vill eru þeir eins og börnin innan um fullorðna fólkið kunna ekki leikinn.

 

Til dæmis þegar Svavar fór út og kom með þennan líka glæsilega samning heim úr þeirri för, sem kom svo á daginn að var mesta hörmung sem hægt var að bjóða okkur upp á.

 

Eða þegar Jóhanna sagði okkur að bara það eitt að sækja um aðild að ESB myndi færa okkur allskonar bjargræði og vináttu.  Ekkert hefur borið á slíku ennþá a.m.k.

 

Það er líka dálítið nöturlegt að um leið og utanríkisráðherra BNA skammar Kandamenn fyrir að leyfa íslendingum ekki að taka þátt í ráðstefnu um sjávarútvegsmál NorðurAtlandshafsins, skammar Össur forstöðumann bandaríska sendiráðsins í Reykjavík fyrir að leka trúnaðarskýrslum um sjálfan sig og aðra.

 

Og það má benda á að það er enginn sendiherra frá Bandaríkjunum á Íslandi, vegna þess að m.a. Össur klúðraði þar málum, ásamt forsetanum, svo ekki hefur gróið um heilt.  Og menn virðast ekki hafa neinar áhyggjur af því.

  

Ég óttast að það fólk sem við höfum ráðið tímabundið til að sjá um okkar hag í þessu landi, ráði ekki við verkefnin.  Þau virðast ekki skilja hvernig svona hlutir fara fram, og verða því sífell sjálfum sér og okkur til minnkunnar.

 

 

Á meðan landið brennur, eru ráðamenn að leika sér með allt önnur málefni en þau sem brenna mest á þjóðinni.  Mjög margir hafa bent á þessa, meira að segja í gær Gylfi Arnbjörnsson forseti Alþýðusambands Íslands, þar áður Samtök Atvinnulífsins, þó segja megi að þeim gangi ekkert gott til og vinni fyrir L.Í.Ú fyrst og fremst.  Þá eru þetta samt sem áður aðfinnslur sem taka ber alvarlega.  Það hafa margir bent á að við erum á röngu róli við uppbyggingu atvinnulífsins.  Í stað þess að ýta undir atvinnurekstur, smáiðnað og virkja almenning, eru settir á skattar og skyldur sem gera fólki nánast ókleyft að hreyfa sig, þó það hafi góðar hugmyndir og vilja.  Allt er lamað niður og njörvað, svo enginn getur hreyft sig.

 

Það var alltaf talað um að vinstri menn væru einmitt svona, en ég hallaðist að því að trúa ekki slíkum sögum, svo reynist hvert orð vera satt.

 

Í stað þess að leggja sig í líma við að ýta hjólum atvinnulífsins í gang, sitja þau og rífast um ketti, Kassöndrur og keisara. Svo er ráðist í að byggja hátæknisjúkrahús, meðan verið er að loka sjúkradeildum og segja upp fólki, byggja tónlistahöll og auka styrki til listamanna, um leið og kvikmyndagerð er skorin niður við trog. 

 

Almenningur er ekki vitlaus.  Við bíðum eftir lausnum, við tókum af skarið með þennan arfavitlausa Icesavesamning, og nú bíðum við eftir að ráðamenn komi með lausnir sem gagnast okkur í endurreisn.  Eitthvað haldfast sem hægt er að taka á og byrja að byggja upp ánýtt.

 

 

En fólkið bíður ekki lengi enn, áttið ykkur á því.  Þið eruð að brenna út á tíma.  Það eina sem núverandi ríkisstjórn hengir sig á í dag er að fólki vill ennþá síður þá sem bíða fyrir utan og vilja endilega sprengja ríkisstjórnina til að komast sjálfir að.

 

 

Þið ráðið ekki neitt við neitt, viðurkennið það bara og farið bónferð til Bessastaðabóndans, biðjið hann um að skipa utanþingsstjórn til að stjórna landinu meðan þið endurskipuleggið ykkur og veitið nýju fólki aðganginn, stigið sjálf til hliðar og sýnið okkur þá kurteisi að fara frá. 

Ef eitthvað væri verra en Sjálfstæðisflokkur og Framsókn þá er það Samfylkingin og Sjálfstæðisflokkurinn.  Málið er að við vitum alveg hvað Sjálfstæðisflokkurinn stendur fyrir, þ.e. sá hluti hans sem er í meirihluta(frjálshyggjuarmurinn), en Samfylkingin er sundurlaus höfuðlaus her sem ekki er hægt að treysta fram fyrir næsta horn. 

Ég held að ef allt væri tekið saman, þá bæri, það sem nú kallast órólega deildin í Vinstri Grænum mesta traust fólksins í landinu. 

Við viljum sjá aðgerðir en ekki endalausar upphrópanir um að þetta sé svo gott og flott og nú sé þetta að koma.  Bíðandi eftir úrlausnum frá AGS og helst ESB.  Það er bara þannig að það hleypur enginn upp til handa og fóta að bjarga okkur, nema við sjálf. 

 

Ég heyrði talað um að á næsta ári myndi skella yfir önnur heimskreppa verri en sú síðasta.  Ef svo er, þá verð ég að segja að af flestum þeim löndum sem ég þekki til, þá myndum við komast best af úr slíku.

 

Við höfum nefnilega allt sem til þarf, ef við álpumst ekki til að afhenda erlendum auðkýfingum og ríkjum auðlindirnar okkar.

Við eigum fisk sem er bæði okkur sjálfum nægur og til útflutnings, við eigum matarkistu sem eru þau húsdýr og villt dýr sem við getum í okkur látið.  Við eigum ávext eins og krækiber, bláber og aðalbláber, hrútaber og jarðaber. Við eigum allskonar jurtir til átu og lækninga,Við eigum jarðhita og getum sennilega framleitt alla ávexti sem við þurfum á að halda og grænmeti.  Við eigum hreint kalt vatn.  Og nægilega vatnsorku til rafmagnsframleiðslu, m.a. bráðlega orku sem unninn verður úr hafstraumum.  Auðævi sem felast í fólkinu sem hér býr og þekkingunni sem er til staðar.

Svona mætti lengi telja, því má segja að ef við verðum einangruð frá umheiminum, getum við lifað af með því sem við höfum.  Ég segi við gætum lifað af, því við höfum allt til alls.  Það er miklu meira en aðrar þjóðir geta sagt.

 

 

Ef til vill verður framtíðin þannig að hver verði sjálfum sér næstur.  Þeir sem lifa nægjusamlegu lífi komast á endanum betur af en hinir sem bruðla með allt. 

Það sést sennilega best á því að við hér á Vestfjörðum erum nú hvað best stödd, minnsta atvinnuleysi, minnst fækkun og svo framvegis, af því að við höfum þurft að ganga þennan kreppuveg síðastliðin 20 ár, eða frá því að fiskurinn auðlindin sem Vestfirðir byggðust upp á, var tekin frá okkur og við höfum þurft að aðlaga okkur að breyttum aðstæðum.  Ég er líka viss um að þegar þeirri auðlind verður skilað til baka, sem verður fljótlega hef ég grun um, þá mun þetta svæði blómstra á ný. 

Þeir sem hræðast einangrun ættu að heimsækja sveitabæi sem eru langt frá öðrum byggðum.  Þar er hreinlega tekið á því að komast ekki frá bæ langa harða óveðursdaga. 

Ef til vill erum við að fara til baka til fortíðar, það þarf alls ekki að vera slæmt, það er hvernig við tökum á lífinu sem skiptir máli en ekki hvað við missum.

 

 

Sumum köttum þarf ekki að smala, þeir einfaldlega njóta félagsskaparins í ríkum mæli.

 

 

Ef ég ætti að velja um að vera í þessu hrikalega ástandi og hringekju um útrásarvíkinga, útburði og misrétti þá má ég frekar biðja um að lifa af því sem landið gefur og vera frjáls.

Athugasemdir

[Jónína Dúadóttir, 30.3.2010 kl. 13:37]

[Kidda, 30.3.2010 kl. 16:25]

Mikið er ég sammála þér að öllu leyti. Við getum verið sjálfum okkur næg ef við erum nægjusöm, við .urfum td ekki allt þetta útlenska dót sem er flutt hingað inn í massavís á meðan okkur skortir gjaldeyri.

Munum að versla aðeins íslenskar vörur.

Knús í kærleikskúluna

[Ásdís Sigurðardóttir, 30.3.2010 kl. 16:43]

Góð eins og alltaf Ásthildur mín, gleðilega páska og njóttu daganna.

[Ásthildur Cesil Þórðardóttir, 30.3.2010 kl. 16:50]

Sömuleiðis Ásdís mín. 

Kidda já ég er sannfærð um að við getum gert svo miklu meira og betur ef vil virkilega viljum leggja á okkur að vera sjálfstæði þjóð með reisn. 

Knús Jónína mín.

[Ragnar Gunnlaugsson, 30.3.2010 kl. 17:59]

Nú líkaði mér pistillinn þinn bara vel.

[Ásthildur Cesil Þórðardóttir, 30.3.2010 kl. 18:49]

Takk fyrir það Ragnar. 

[Jóna Kolbrún Garðarsdóttir, 30.3.2010 kl. 19:52]

Heyr, heyr.  Gleðilega páska.

[Jón Steinar Ragnarsson, 30.3.2010 kl. 20:13]

Kvitta undir þetta með feitum túss.  Gleðilega Páska elsku vinkona og berðu honum Ella kveðju mína og líka líka öllum þarna fyrir vestan sem nenna að þekkja mig ennþá.

[Ásthildur Cesil Þórðardóttir, 30.3.2010 kl. 23:02]

Knús Jóna Kolbrún mín.

Takk Jón Steinar minn, og ég veit um fullt af fólki sem man mikið og vel eftir þér, eins og til dæmis Tóta, Finni Magg, Obba jamm hér er fullt af liði sem man eftir þér og svo Elli auðvitað.  Knús á þig minn kæri.

[Haukur Nikulásson, 31.3.2010 kl. 07:35]

Góð færsla og í mínum anda Cesil.

(Stóra letrið er samt ekki að gera sig.)

Með bestu kveðju,

[Ragna Birgisdóttir (IP-tala skráð) 31.3.2010 kl. 08:11]

[Ásthildur Cesil Þórðardóttir, 31.3.2010 kl. 09:11]

Það er raunar alveg hárrétt hjá þér Haukur minn, var svo sem búin að sjá það en nennti ekki að laga, setti þetta upp í Word, útsetningin á því er alveg hörmuleg hér.  Ætla að hunskast til að minnka stafina.

Knús Ragna mín.

[Sigurður Þórðarson, 8.4.2010 kl. 22:23]

Í "Daglegu máli" í morgun voru hlustendur spurðir um orðið ábúðarmikill"kannast hlustendur við orðið ábúðarmikill, á-búðar-mikill og þá í hvaða merkingu"?

Af hverju spyrja þeir hjá Íslenskri málstöð eða hvað það nú heitir ekki beinskeyttari spurninga svo sem eins og hvort hlustendur kannist við ábúðarmikinn uppskafning á margföldum eftirlkaunum?